MARCOS 13
13
Jesus la yal te ya xjim te temploe
1Te kꞌalal lokꞌ bael ta templo te Jesuse, ay jtul nopojel yuꞌun te jich la yal:
—Maestro, ilawil ben mukꞌ te tonetik sok ben tsaꞌam te naetik yuꞌun te temploe —xchi.
2La yal te Jesuse:
—Kꞌeluya me bael ta lek te naetik to te ben tsaꞌam pasbile. Spisil me ya xjim. Ni pꞌejuk ton kajal ya xjil ta sba yan ton —xchi.
Señail te slajibal kꞌaale
3Yo moik bael ta Wits Olivailtik. Kꞌo snajkan sba te Jesuse ta yelaw te temploe. Te Pedro sok Jacobo sok Juan sok Andres tal skꞌoponik ta stukelik nax. 4Jich a yalik:
—¿Tut ora ya xkꞌot ta pasel te tut la awale? ¿Y tut señail ya xchiknaj te xnopet ya xkꞌot ta pasel spisil liꞌ to? —xchiik.
5La yal te Jesuse:
—Ila me abaik, ma me machꞌa ya sloꞌlayex. 6Porke bayal me machꞌa xtal skuy sbaik ta joꞌon. Ya me yalik: “Joꞌon Cristoon”, xchiik me. Ya me xloꞌlayot bayal genteetik.
7“Yan te jaꞌexe te kꞌalal ya awaꞌiyik te ay guerra ta jakal, ma me xiꞌanik yuꞌun. Puersa me jich ya xkꞌot ta pasel, y ma to me jaꞌuk a te slajibal kꞌaale. 8Porke jun nasion ya me skontrain yan nasion, sok te gobiernoetik ya me spasik guerra. Ya me xtal jikichab ta bayuk nax luwar, y ya me xtal bayal wiꞌnal. Jaꞌ me slijkibal to nax te wokol ya xtale.
9“Ila me abaik te jaꞌexe. Ya me yakꞌelex ta skꞌab te juꞌeletike, y ya me awichꞌik majel ta chꞌulnaetik. Ya me stejkꞌanelex ta sit juꞌeletik sok ta sit gobierno ta skaj te achꞌuunejikone. Jich me kaj-testigoex ya xkꞌoex kuꞌun ta yolilik. 10Ma to me xtal te slajibal kꞌaale, puersa nail me ya yichꞌ alel te skꞌoplal kolele ta skuenta spisil ta tsojb genteetik ta spꞌejel balmilal. 11Te kꞌalal ya stekꞌanelex ta skuenta te juꞌeletike, ma me yajtaluk awoꞌtanik te tut ya awalik. Jaꞌ me ya awalik te tut ya yalbeyex ta awoꞌtanik te Diose te tut ora ya yikꞌelexe. Porke ma jaꞌukex te ya xkꞌopojexe; jaꞌ me ya xkꞌopoj te Chꞌul Espiritue. 12Ay me machꞌa ya xꞌakꞌot ta milel yuꞌun te machꞌa jun smeꞌ-stat soke; sok te tatile ay me ya yakꞌ ta milel te xnichꞌane. Sok ay untiketik ya me skontrain te smeꞌ-stat sok ay me ya yakꞌik ta milel ekꞌa. 13Ya me spꞌajelex spꞌejel te genteetik yuꞌun te achꞌuunejikone. Te machꞌa ya xkujchꞌ yuꞌun kꞌal ta slajibal kꞌaale, ya me xkol.
14“Te alwanej yuꞌun Dios te Daniel sbiile la yalbey jilel sluwaril te tut a te ma tsaꞌamuk te ya xꞌixlanwane. (Te machꞌa ya yil te tut tsꞌibabil liꞌe, a me snaꞌbe sluwaril). Te tut ora ya awilik te ochemix te ba ma jaꞌuk sluwaril, a me anikuk bael ta wits te machꞌatik ayik ta Judea. 15Te machꞌa ay moem ta sba snae, teme koj tale, ma me xꞌoch ta yut sna ta yichꞌel te tutik ay yuꞌune. 16Te machꞌa ay ta skꞌale, ma me wakꞌ sujtuk ta sna ta yichꞌel skꞌuꞌ-spakꞌ. 17Ay me swokolik te antsetik te ay tut staojike sok teme ay xchꞌin yalik te ya to xchuꞌune. 18Kꞌanbeyaik Dios te manchuk ayuk sik a te tut ora te ya xꞌanex baele. 19Porke ma me ayuk wokol jich kꞌoem ta pasel te kꞌalal pas tal te balmilal yuꞌun Dios. Sok maꞌyukix jich ta mas patil a. 20Te manchuk skomobey skꞌaalel te Kajwaltike, ni tuluk machꞌa ya xkuxuyin a. Pero chapalix yuꞌun te ya skombey skꞌaalel ta skuenta yuꞌun te machꞌatik tꞌujtalanbil yuꞌune.
21“Teme ay machꞌa jich ya yalbeyexe: “Ilawil, liꞌ ayix te Cristoe”, teme xchie, o teme yan ya yal: “Lum ayix to”, teme xchiꞌe, ma me chꞌuunik. 22Porke ay me ya xchiknaj lotil-cristoetik y lotil-alwanejetik. Ya me yakꞌ ta ilel señailetik sok milagroetik. Ya me sloꞌlayik ekꞌa te machꞌatik tꞌujtalanbilik yuꞌun te Diose te yauk xjuꞌ yuꞌunike. 23Ila me abaik. Spꞌejel nail la me kalbeyex.
Te tutꞌil ya xchaꞌ tal xan te Nichꞌanile
24“Te tut ora kꞌalal kꞌaxix a te wokolajele, te kꞌajkꞌale ya me xꞌikꞌub, te ue makꞌ me yakꞌix sakilel a, 25sok te ekꞌetike ya me xchꞌay ta koel ta chꞌulchan. Sok ya xnikot te tutik ay spuersa ta yolil te chꞌulchane. 26Jich me ya xchiknaj tal ta tokal ta yolil chꞌulchan te Nichꞌanile, te ya xtal sok bayal spoder sok te xojobil te slekilale. 27Ya me stikon bael te chꞌul angeletik yuꞌune, ya xba stsobik tal ta xchan-mejchꞌelul balmilal sok ta sjoylejal chꞌulchan balmilal te machꞌatik tꞌujbilik yuꞌune.
28“Te tut a te la kalbeyexe, nopaik ta skuenta te tutꞌil ay te ikuxe. Teme yipalix ta achꞌubel te skꞌabkꞌabe, sok teme yipal ta yaxubel te yaꞌnimale, jich me ya anaꞌik sluwaril te xnopet te jaꞌleltike. 29Jaꞌ nax jich te kꞌalal ya awilik te yipal ta kꞌoel ta pasel spisil te tutik la kalbeyexe, jich me ya anaꞌik te xtijilajonix tale, ayonix me ta tiꞌ puerta kꞌoem a. 30Jamal me ya kalbeyex, ma to me xchamik a te genteetik te kuxajtik ta balmilal te ya xkꞌot ta pasel spisil te tut a te la kalbeyexe. 31Ya me xlaj te chꞌulchan sok balmilal. Yan te jkꞌope, maꞌyuk bay ya xlaj skꞌoplal stukel.
32“Pero ni jtuluk machꞌa ya sna te tut ora sok tut kꞌaalil ya xkꞌot ta pasel. Ni ma snaꞌ euk te chꞌul angeletike, sok ma snaꞌ te Nichꞌanile. Jaꞌ nax ya snaꞌ stukel te jTatik Diose.
33“Jaꞌ yuꞌun ma me wayanik. Wikꞌiluk me asitik, y kꞌoponaik me Dios, porke ma xꞌanaꞌik te tut ora ya xkꞌot te yoraile. 34Jich me kꞌoem te tutꞌil jtul winik te jakal a bajt ta yan luware. La spas jilel ta mantal te yaj-aꞌteltake yuꞌun ya skanantay te nae. Jujutul la yaꞌbe jilel yaꞌtel, sok la yalbe jilel te jkanan-nae te ma me xwaye. 35Jich te jaꞌexe wikꞌiluk me asitik porke ma xꞌanaꞌik tut ora ya xjul te yajwal nae, me ta yochel akꞌubal, o ta ol akꞌubal, o ta sba yokꞌelal mut, o ta nopol sakubel kꞌinal. 36Ma me chꞌayemuk awoꞌtanik a te tut ora ya xtale, teme ay tutꞌil tal ta orae. 37Ya kalbeyex te jaꞌexe sok te yanetike: Wikꞌiluk me asitik ta sil tiempo —xchi te Jesuse.
Цяпер абрана:
MARCOS 13: AMANNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nuevo Testamento Tzeltal de Amatenango © Sociedad Bíblica de México, 2006.