MARCOS 12
12
Seña-kꞌop yuꞌun te aꞌteletik te ma tsaꞌamuk yoꞌtanike
1Jesus lijk yalbe yaꞌiyik seña kꞌopetik. Jich a yal:
—Ay jtul winik la stsꞌun tsꞌusubiltik y la smak ta makteꞌ. La spasbe yawil te ba ya yichꞌ lokꞌesel yaꞌlel sit te stsꞌusube, y la spas jun lojtsajibal yuꞌun ya yichꞌ kanantayel te tsꞌusubiltike. La yakꞌ ta majanel yuꞌun aꞌteletik te tsꞌusubiltik yuꞌune sok bajt ta jakal luwar. 2Te tut ora ya skꞌan tulel sit te tsꞌusube, la stikon bael tul yaj-mantal, yuꞌun ya xba skꞌanbe te aꞌteletike te jayeb ya xkꞌot ta skuenta te stsꞌusube. 3Pero tsꞌin to la stsakik sok la smajik, y la stikonik sujtel. Maꞌyuk tut a yaꞌbeyik bael chꞌinuk. 4Jaꞌ yuꞌun te yajwal tsꞌusubiltike la stikon bael yan yaj-mantal, pero te aꞌteletike la yechꞌentesbeyik sjol. Ma yakꞌik ta kuenta chꞌinuk. 5Te yajwal tsꞌusubiltike la stikon xan bael yan abat, pero lek a smilik. Y ta patil la stikon xan bael bayal abatetik. Ay tul cheb la yichꞌ majel y ay la yichꞌ milel.
6“Pero ay to jilem tul xan abat yuꞌun, jaꞌ te batsꞌi xnichꞌane te toj kꞌux ta yoꞌtane. Jaꞌ slajibalix a la stikon bael. Yuꞌun la yal ta yoꞌtan: “Te jnichꞌane ya me yakꞌikix ta kuenta a”, xchi ta yoꞌtan. 7Pero te aꞌteletike la yalbe sbaik: “Jaꞌ i to, jaꞌ te machꞌa ya xjil ta skuenta te lume. Jaꞌ lek ya jmiltik, yuꞌun joꞌotik me ya kichꞌbeytik jilel te slume”, xchiik. 8Jaꞌ yuꞌun la stsakik, la smilik y la xchꞌojik lokꞌel ta spat tsꞌusubiltik te stibalule.
9“¿Tut me ya spas te yajwal tsꞌusubiltike? Ya kalbeyex te ya me xtal smil jilel te aꞌteletike, sok ay me yan aꞌteletik ya yaꞌbey jilel ta skuentaik.
10“¿Me maꞌyuk awilojikuk ta Sjun Dios te jich ya yale?:
“Te ton te ma tsaꞌamuk ya yilik te alwaniletike jaꞌ yiptajib chikin-na kꞌotix stukel. 11Jaꞌ la yakꞌ kꞌotuk ta pasel te Kajwaltike. Ben tsaꞌam slekil la kiltik”, te xchie
—xchi te Jesuse.
12Jich kꞌan stsakik te Jesuse, yuꞌun kꞌot ta yoꞌtanik te jaꞌ skꞌoplalik te seña kꞌop la yale. Pero la xiꞌik te genteetike. Jaꞌ yuꞌun la sjilesik y bajtik.
Tutꞌil ay skꞌoplal te tojemale
13La stikonik bael te ba ay te Jesuse chaꞌoxtul te fariseoetik sok te machꞌatik sjoy sbaik sok te Herodese, skuenta yuꞌun ay tut ya sjojkꞌobeyik, yuꞌun te me ya stabeyik smul a. 14Jich a tal yalbeyik:
—Maestro, ya jnaꞌtik te puru batsꞌi jich te tut ya awale. Maꞌyuk machꞌa ya xiꞌat ta kꞌop yuꞌun, porke ma tsabiluk nax awuꞌun te machꞌa ya awakꞌ ta jkuentae. Te jaꞌate sluwaril ya snojpeswanat te tut ya skꞌan te Diose. Albotik kaꞌiytik: ¿Me lek te ya jtojtik stojemal yuꞌun te ajwalil Cesare? ¿Me lek ya jtojtik o ma xjuꞌ jtojtik? —xchiik.
15Te Jesuse la snaꞌbe sluwar te maꞌ lekuk yoꞌtanike. Jich a yalbe:
—¿Tut yuꞌun te ya awilbikon koꞌtane? Ichꞌbikon tal kil sejpuk denario-takꞌin —xchi.
16La yichꞌbeyik tal sejpuk. Kꞌalal la yil te Jesuse, la sjojkꞌoy yaꞌiy:
—¿Machꞌa slokꞌol te ya awilik ae, sok machꞌa sbiil te liꞌ tsꞌibabile? —xchi.
La sjakꞌik:
—Jaꞌ te mukꞌ ajwalil Cesare —xchiik.
17Te Jesuse la yalbe yaꞌiyik:
—Teme jaꞌ yuꞌun te Cesare, aꞌbeyaik me abi, sok teme jaꞌ yuꞌun te Diose, aꞌbeyaik me euk —xchi.
Cham a yaꞌiyik yuꞌun te tut la yale.
Jesus jokꞌobot tutꞌil ay te chaꞌkuxele
18Ay saduseoetik te tal skꞌoponik te Jesuse. Te saduseoetike kꞌoem ta yoꞌtanik te ma xchaꞌkux tal te animaetike. Jich a yalbeyik:
19—Maestro, te Moisese la stsꞌibabotik jilel: “Teme ay cham tuluk winik teme kuxul jilel yiname, teme maꞌyuk jilel yuntikil soke, a me yikꞌ yinamin te yijtsꞌine yuꞌun me jich ay stsꞌumbal ya xkꞌot a te anima-sbankile”, te xchie. 20Jaꞌ tsꞌin to, ay juktulik winketik te jun smeꞌ statike. Te bankilale nujpun sok tul ants y ora cham. Maꞌyuk jilel tuluk xnichꞌan. 21Jich te xchebal ijtsꞌinale la yikꞌ yinamin te biudae. Ja tsꞌin to, cham euk. Mismo maꞌyuk jilel tuluk xnichꞌan. Jachik euk te yoxebal ijtsꞌinale. 22Ta sjuktululik pajal maꞌyuk jilel xnichꞌanik. Ta patil cham euk te antse. 23Te tut ora ya sta yorail te ya xchaꞌkux tal spisil te animaetike sok te ya xchaꞌkuxik tal euke, ¿machꞌa me yinam ya xkꞌot te antse? Komo ta sjuktululik la yinaminik ta spisilik —xchiik.
24Te Jesuse jich a yalbe yaꞌiyik:
—Te jaꞌexe ma kꞌoemuk ta awoꞌtanik te tut tsꞌibabil jilel ta Sjun te Diose, sok maꞌyuk ta awoꞌtanik te tutꞌil ay spoder te Diose. ¿Me ma wan jaꞌuk skuentail te jowiyemex ta kꞌope? 25Te tut ora ya xchaꞌkuxik tal spisil te animaetike, ma xnupunikix a, sok ma xbajtikix ta ichꞌel a, yuꞌun jich ya xkꞌotik tutꞌil te xchꞌul angeletik te ayik ta chꞌulchane. 26Te tutꞌil ya ajojkꞌoyik te machꞌatik ya xchaꞌkuxik tale, ¿yuꞌun wan ma ba awilojik te tut tsꞌibabil jilel yuꞌun Moises te ba la yalbe skꞌoplal te pejtꞌ chꞌixteꞌ te yipal ta tilele? Jich a yal teꞌa te Diose: “Joꞌon Dioson yuꞌun te Abrahame sok te Isaake sok te Jacobe”, te xchie. 27Te Diose maꞌ jaꞌuk Dios yuꞌun te machꞌatik chamenike, si jaꞌ Dios yuꞌun te machꞌatik kuxajtike. Jaꞌ yuꞌun te jaꞌexe bayal jowiyemex ta kꞌop —xchi te Jesuse.
Te mantalil te bayal skꞌoplale
28Ay tul maestro yuꞌun te mantaliletike te tal ta stseꞌel te Jesuse. La yaꞌi sluwar te tut a yalbey sbaike sok la yil te lek a sujtesbe te skꞌopike. Jich a sjojkꞌobe euk:
—Ta spisil te mantaliletike, ¿ba me ay te tulan skꞌoplal ta pasele? —xchi.
29La yal te Jesuse:
—Jaꞌ ay bayal skꞌoplal i to: “Aꞌiya awaꞌiyik sluwar, Israeletik: Jun nax Kajwaltik ay kuꞌuntik, jaꞌ te Kajwaltik Diose. 30Kꞌux me xawaꞌiy ta awoꞌtan te Kajwaltik Dios sok spꞌejel awoꞌtan, sok spisil akuxlejal, sok spisil apꞌijil, sok spisil afuerza. Jaꞌ te mantal te ben tulan skꞌoplal to. 31Sok ay yan te pajal soke: “Kꞌux me xawaꞌiy ta awoꞌtan te ajoy ta krixianoile, jich te tutꞌil kꞌux ya awaꞌiy aba te jaꞌate”, te xchie. Maꞌyuk yan mantal te kꞌaxem jich ay skꞌoplal —xchi te Jesuse.
32La yal te maestroe:
—Ben lek te tut la awal, Maestro. Batsꞌi jich te tutꞌil ya awale te jun nax Dios aye, maꞌyuk yan. 33Sok te tutꞌil la awal te kꞌux me ya kaꞌiytik ta koꞌtantik sok spisil koꞌtantik, sok spisil jpꞌijiltik, sok spisil jkꞌuxlejaltik, sok spisil te jfuersatike. Y sok te tutꞌil kꞌux me ya kaꞌiytik ta koꞌtantik te joytik ta krixianoile, jich te tutꞌil kꞌux ya kaꞌi bajtik te joꞌotike. Jaꞌ tulan skꞌoplal ta pasel stukel. Jaꞌ pekꞌ me skꞌoplal kꞌoem spisil te tut ya kaꞌbeytik smajtꞌan te Diose sok spisil smajtꞌan te ya yichꞌ chikꞌel te ba xchikꞌojibal te smajtꞌane —xchi te winike.
34La yil te Jesus te la snaꞌbe lek sluwaril ta sujtesele. Jich a yalbe:
—Chꞌin xanix skꞌan ya awajwalin te Diose —xchi.
Spisilik maꞌyuk machꞌa juꞌ xan yuꞌunik sjojkꞌoyel yan aꞌabiyej a.
¿Machꞌa stsꞌumbal te Cristoe?
35Te kꞌalal yipal ta pꞌijuteswanej ta templo te Jesuse, jich a yal to:
—¿Tuꞌun te ya yalik te maestroetik yuꞌun te mantaliletik te jaꞌ stsꞌumbal David te Cristoe? 36Jaꞌ mismo David te la yal ta skuenta te Chꞌul Espiritue:
“Te Kajwaltik Dios la yalbey te Kajwale: ‘Naklan ta jbatsꞌi kꞌab, jaꞌ to teme ya kaꞌbeyat apechꞌ ta tekꞌel te akontrae’, xchi te Diose”, te xchie.
37¿Tutꞌil ay a te jaꞌ stsꞌumbal David te Cristoe te mismo David la yal “Kajwal”? —xchi te Jesuse.
Lom bayal te genteetik ben jun yoꞌtanik la yaꞌiybeyik spisil te tut la yal te Jesuse.
Jesus la yalbey ta jamal smulik te maestroetik yuꞌun te mantaliletike
38Te kꞌalal yipal ta pꞌijuteswanej te Jesuse la yal:
—Ila me abaik sok te maestroetik yuꞌun te mantaliletike. Ya skꞌupin yoꞌtanik yuꞌun te ya slapik ta beel te snajtꞌil skꞌuꞌ-spakꞌike sok ya skꞌupin yoꞌtanik yuꞌun te ya xpatbot yoꞌtanik ta komonsitil te ba yolil jtejklum. 39Sok ya skꞌupin yoꞌtanik yuꞌun te ya snajkꞌan sbaik ta primera naktajibaletik ta chꞌulnaetik. Sok ya smakik ta ora te primero naktajibaletik te ba ya stsob sbaik ta weꞌel. 40Sok ya spojbeyik sna sok stutik te biudaetike. Sok jal ya skꞌoponik Dios ta komonsitil, yuꞌun jich me ya xkuyot ta lek a. Jaꞌik me te mas tulan kastigo ya xꞌaꞌbotik —xchi te Jesuse.
Te smajtꞌan Dios la yakꞌ te biudae
41Jesus la snajkan sba ta templo te ba stsꞌeel xkaxail smajtꞌan te Diose. Yipal ta yilel tutꞌil ya yakꞌik ochel stakꞌinik teꞌa te genteetike. Ay bayal kꞌulejetik te bayal stakꞌinik la yakꞌik ochel teꞌa. 42Sok tal tul biuda te maꞌyuk tut ay yuꞌune, la yakꞌ ochel ta xkaxail cheb beinte sentabo te maꞌyuk tut ya xman bayal ae. 43Te Jesus la yikꞌ tal te jnopojeletik yuꞌune. Jich a yalbe:
—Jamal ya kalbeyex, te biuda to te maꞌyuk tut ay yuꞌune, kꞌaxem jich la yakꞌ kꞌoem stukel te tutꞌil la yakꞌik te yanetike. 44Puru sobrail stakꞌinik te la yakꞌik stukelike. Yan te biudae, manchuk te maꞌyuk tut ay yuꞌune, spisil la yakꞌ ochel stukel te tut ya smakꞌlin sba ae —xchi te Jesuse.
Цяпер абрана:
MARCOS 12: AMANNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nuevo Testamento Tzeltal de Amatenango © Sociedad Bíblica de México, 2006.