MARCOS 11
11
Och bael ta Jerusalen te Jesuse
1Te Jesuse sok te jnopojeletik yuꞌune tijil ayikix a ba Jerusalen. Kꞌojtik ta wits Olivailtik te ba ay cheb chꞌin jtejklum Betfage sok Betania. Te Jesuse la stikon bael chaꞌtul te jnopojeletik yuꞌune. 2Jich la yalbe:
—Baanik te ba jtejklum te chikan ta ilele. Te ba ochibal bael ya xkꞌo ataik kojtꞌ alal-buru te chukul a, te ma to ayuk machꞌa moem junuk buelta ae. Polaik sok ikꞌaik tal. 3Teme ay machꞌa ya sjojkꞌobeyex: ¿tuꞌun jich ya apasike?, albeyaik: “Jaꞌ ya xtuun yuꞌun te Kajwaltike. Ya sujtesbeyat tal ta ora liꞌ to”, ya me awutik —xchi te Jesuse.
4Jich a bajtik y kꞌo staik te alal-burue chukul te ba kaye ta xuk tiꞌ puerta, y la spolik tal. 5Ay machꞌatik tey ayik a, y la sjojkꞌoik:
—¿Tut ya apasik? ¿Tuꞌun ya apolik te burue? —xchiik.
6Te jnopojeletik jich a yalik te tut albot bael yuꞌun te Jesuse. Jich a aꞌbot tal. 7La xchechik bael te ba ay te Jesuse. La slimbey skꞌuꞌik ta spat te alal-burue. Jich mo skajtajibin te Jesuse. 8Ben bayal machꞌatik la slimik skꞌuꞌ-spakꞌik ta be, sok te yanetik la sbojtalanik tal skꞌab teꞌetik te la slimik bael ta bee. 9Te machꞌatik nailajemik baele sok te machꞌatik patilajemike xꞌawlajanik:
—¡Bayal slekilal! ¡Ben me tsaꞌam te machꞌa talemix ta skuenta te Kajwaltike! 10¡Ben me tsaꞌam te machꞌa xlijk ta mantale te stsꞌumbal te jtatik Davide! ¡Bayal slekilal te Chꞌul Dios te ay ta chꞌulchane! —xchiik ta aw.
11Jich och bael ta Jerusalen te Jesuse, y toj a bajt ta mukꞌul templo. La skꞌelulan ta soylejal spisil te tutik ay teꞌae. Y malix kꞌaal a, sujt bael ta Betania sok te lajchaytul jnopojeletik yuꞌune.
Jesus la yut jilel te ikux-teꞌe
12Ta yan kꞌaal lokꞌik bael ta Betaniae. Ben xwiꞌnaj te Jesuse. 13Jakal to a la yil bael jwol ikux-teꞌ te ay yaꞌnimale. Ba yil me ay sit, pero úniko a kꞌo stabe yaꞌnimal, yuꞌun ma yorailuk te ya yakꞌ sit te ikuxe. 14Te Jesus la yalbe te ikux-teꞌe:
—Ma me ayuk machꞌa ya sloꞌbeyat asit sbajtel kꞌinal —la yut.
Te jnopojeletik yuꞌune la yaꞌiyik te tut la yalbe te teꞌe.
Jesus la xchꞌoj lokꞌel te tut ay ta temploe
15Te tut ora a kꞌotik ta Jerusalen, och bael ta templo te Jesuse, y lijk xchꞌojtalan lokꞌel te machꞌatik yipalik ta chombajel y mambajel teꞌae. La sbutkꞌinlanbey xmexaik te jel-takꞌinetike, sok la sbutkꞌinlanbey snaktajib te machꞌatik yipalik ta xchonel palomaetike. 16Y ma xyakꞌ te ya xkꞌaxik bael ni tuluk te genteetik sok stutik yuꞌunik te bay te temploe. 17Jich a yal ta pꞌijuteswane te Jesuse:
—Jich tsꞌibabil ta Sjun Dios: “Te jnae jich albil te jaꞌ snaul skꞌoponel Dios yuꞌun spisil te genteetike.” Pero te jaꞌexe la awakꞌikix ta xchꞌen elekꞌetik —xchi te Jesuse.
18Te statal-saserdoteetik sok te maestroetik yuꞌun te mantaliletike la yaꞌiyik sluwaril te tut la yale. Jich lijkik ta sleel te tutꞌil ya smilik te Jesuse, yuꞌun la xiꞌik te Jesuse, yuꞌun spisil te gente ben tsaꞌam ya yaꞌiyik te pꞌijutesel yuꞌune. 19Kꞌalal te ya xꞌikꞌubix a te kꞌinale, te Jesus sok te jnopojeletik yuꞌune lokꞌik bael te ba mukꞌul jtejklume.
Takej te ikux-teꞌe
20Ta sab ta yan kꞌaal, kꞌaxik xan te ba ay te ikux-teꞌ, y la yilik te takejemix kꞌal ta yisim a. 21Te Pedroe la snaꞌ te tut albot te teꞌe. Jich a yalbe:
—Maestro, ilawil te ikux-teꞌe te la awut jilel. Takejix —xchi.
22La sjakꞌ te Jesuse:
—Ayuk me xchꞌuunel awoꞌtanik sok te Diose. 23Jamal ya kalbeyex, teme ya awalbeyik te wits to: “Lokꞌan teꞌa me to, chꞌoja aba ochel ta mar”, teme ya awute, jich me ya xkꞌot ta pasel, teme makꞌ ya awal ta awoꞌtan te ma jichuk ya xkꞌote sok teme jich xchꞌuunej awoꞌtane. 24Ja sluwaril te ya kalbeyex te ya skꞌan ya xchꞌuun awoꞌtanik te ya yaꞌbeyat te Diose spisil te tut ya akꞌan ta skuentae. Jich me ya awichꞌik te tut ya akꞌanbeye. 25Te tut ora ya akꞌoponik te Diose, pasbeyaik perdon nailuk te machꞌa ay sla awoꞌtanik soke. Yuꞌun jich me ya spasbeyex perdon yuꞌun amulik euk te jTatik te ay ta chꞌulchane. 26Yan teme ma xꞌapasik perdon te jaꞌexe, jich ekꞌa te aTatik te ay ta chꞌulchane makꞌ me spasbeyex perdon ekꞌa yuꞌun te amulike —xchi te Jesuse.
Ay yichꞌoj yaꞌtel te Jesuse
27Ta patil sujtik xan bael ta Jerusalen. Te yipal ta beel ta templo te Jesuse, tijilajik tal ta stsꞌeel te statal-saserdoteetik sok te maestroetik yuꞌun te mantaliletike sok xan euk te mamaletik yuꞌun te jtejklume. 28La sjokꞌobeyik te Jesuse:
—¿Tuti awaꞌtel awichꞌoj ta spasel spisil to? ¿Machꞌa yaꞌbeyat awichꞌ awaꞌtel ta spasel to? —xchiik.
29La yal euk te Jesuse:
—Jichon, ay tut ya jojkꞌobeyex. Teme ya awaꞌbon sutib te jkꞌope ya me kalbeyex tsꞌin ekꞌa te machꞌa stikonejon ta spasel i to. 30Albikon. ¿Machꞌa stikon tal ta yakꞌel ichꞌjaꞌ te Juane? ¿Me jaꞌ wan te Diose o jaꞌ te winketike? Ya me awalbikon tsꞌin —xchi te Jesuse.
31Jich a lijkik ta snopel stukelik:
—Teme ya kaltik te Dios la stikon tale, ya me yalbotik: “¿Tuꞌun ma la achꞌuunik te tut la yale?”, ya me yutotik. 32¿Y tut ya xba kaltik te jaꞌ winketik a tikonot tal yuꞌunik? —xchiik ta snopel. Ayik ta xiꞌel yuꞌun te genteetike, yuꞌun spisil xchꞌuunejik ta jaꞌ jꞌalwanej yuꞌun Dios te Juane. 33Jaꞌ yuꞌun te saserdoteetik la yalbeyik te Jesuse:
—Ma jnaꞌtik —xchiik.
Jich te Jesuse la yalbe:
—Jichon euk ma xkalbeyex te tut kaꞌtel kichꞌoj ta spasel spisil to —xchi.
Цяпер абрана:
MARCOS 11: AMANNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nuevo Testamento Tzeltal de Amatenango © Sociedad Bíblica de México, 2006.