APOEM AYANG: 29
29
Yaku gi Laban da" Yhoem: Khyoo: Ju" Lo Khyoo:
1Yaku gi nya: gyung: khyoo: xo' so" yhe: lo" wigi bid thu moug: shoid khyoo: yhe: loo" bye:. 2Nyang: gi yang phung: soem" phung: lheing khoem vhoeb to" da" pa: dam khoug: mo gyid thung" daloem: moo nyeigdain tung" ju" loo" bye:. Hau: gyid thung" da" amyhid" gi lug yho' moo" zeing nghoid wigi yang phung: joem gi he: gyid thung" mo gyid ri lhung kham: jhug jang: nghoid. 3Khanham nghoid loug yang phung: joem dangain" houg: moo ju" lo lho: yang zoem: mo, gi lug yho' amyhid" ri tu: phang wigi gyid kham: jhug boem. Bain jhug lang" nyangnu" doem tu: myhid" too" ago".
4Yaku gi yang zung" bang: ri «Nga" byencang" bi" we' nyangnu" kha: moug: bang: nghoid ago"» ga: myid:.
Nyangnu" we' «Haran mo nghoid» ga: tid boem.
5Nyang: gi «Nahora da" nya: myid: zoo: Laban ri asi' goo" la"» ga: doem myid:.
Nyangnu" we' «Se'- ngoonu" se'» ga: tid ago".
6«Nyang: gi dayang" nyid lha"» ga: myid:.
«Yang" nyid da:» ga: nyangnu" tid lho: «Yu" we' hid: the- nya: zoo: myiyi: nu" Rakhela gi nya: yang phung: ri khaid lho: loo bye:» ga: tid ago".
7Yaku gi «Akhid" nyid" moo" kang danghoid ashi"- gougnyhoug joem ri lhoung too" wa ayo, anghoid shi". Ce: gang mo gougnyhoug joem ri gyid we' akham: jhug- mhain" we' adoem yhe: kaid zhoo" koid go" lha"» ga: tid.
8Nyangnu" gi «Gougnyhoug phung: joem dangain" ju" zeing: lo wigi lug yho' ri phang pyam byid: ri za: anghoid rigi ngoonu" ci: we' ayo" koid. Phang pyam lang" she' gougnyhoug joem ri gyid kham: jhug wa nghoid» ga: tid.
9Yaku gi nyangnu" yo' dang: ji go" nyid uri Rakhela gi yang phung: yo' ju" loo bye:. 10Yaku gi nya: myhi' da" mung Laban da" yang phung: yo' dage" Rakhela ri lhoem: myang lang" nyang: gi gyid thung" khyoo: yhe: lho: lug yho' ri yhe: tu: phang wigi yang joem ri gyid kham: jhug. 11Hau: thang: ri nyang: gi Rakhela ri boobug bug lho: gau wigi ngau da:. 12Nyang: ri «Ngoo gi re" pho da" bidnoem Rebekha da" nya: zoo: nghoid» ga: tid.
Rakhela gi nya: phoo ri lo" gei tid wigi 13Nya: zooau: Yaku da" khyoo: shoug" gyoo: lang" gei re" lho: Yaku ri gab po: ci: wigi boobug bug lho: nyang: ri yhoem: khyoo: shu" loo" bye:. Houg: lang" Yaku gi Laban ri bue" khyoo: dangain" bain bain tid khyoo" bye:. 14Laban gi «Gi bye:- nang gi ngoonya: soid" shoo" nyang: nghoid bye:» ga: tid. Yaku gi hau: moo lhammoo" dakhyab goin" nyid nyid.
Yaku gi Rakhela yo' Lea shid re" Laban Jhang moo Deizoo: Lo" Koid Khyoo:
15Laban gi Yaku ri «Nang gi nga" bidnoem nyang: nghoid yoomo ce: aphoug" we' asang: loo: za: nga" shid re" moo" azei:. Nang aphoug" khamyhoo' vho: lha"» ga: tid. 16Laban gi myiyi: nu" eig yug yo" da:. Bi: zeing yug gi Lea nghoid lho: zoothang gi Rakhela ga: zi nghoid. 17Lea gi myojid" young" su: nghoid. Nghoid loug we' Rakhela gi gung khyang: bo lho: yu" yung" sam" dab su: nghoid.
18Yaku gi Rakhela ri yu" ngei yoomo nyang: tid zigi «Nang ngoo ri Rakhela yo' lo, xo' byid: wa nghoid rigi nang moo ngoo nyhed zain lang: jhang koid wa» ga: tid.
19Laban gi «Ngoo gi byu gooji ri byid: pyam wa tho' re" nang ri byid: wa gi je ge'. Ngoo yo' dage" hid: moo nyid shang» ga: tid. 20Yaku gi Rakhela ri shoug" yu wa shid re" lang: jhang koid da" nyhed zain gi nya: shid re" bidnyid dajhi' za: kyeing" su" jho: nyid. Khasu" wim gari Rakhela ri jheddab yoomo nghoid.
21Hau: thang: Yaku gi Laban ri «Bidnyid byeung" bye:- re" zoo: yo' ngoo ri lo, xo' byid: re» ga: tid. 22Houg: yoomo Laban gi lo, xo' pui" koid byid: wigi hau: pui" moo yugkhang" moo" ri khe: bye:. 23Nghoid loug hau: myen ri Rakhela da" gungthid- nyang: gi Lea yug ri Yaku jhang fang byid: wigi Yaku gi hau: yug yo' dage" yhoeb bye:. 24Laban gi nya: join myhi' Zilpha ri nya: zoo: Lea da" dangcang: myhi' khyo" byid: bye:. 25Thang: nab soin: myo, amyang shi" ri Yaku gi Lea danghoid jo, ziri si' lang" nyang: gi Laban jhang yhe: lho: «Ce: gang mo nang ngoo ri hid: su" koid lha"- ngoo gi Rakhela ri yoo" wa shid re" moo" dazei: byid: ri nang gi ngoo ri ciyoomo mhau' lha"» ga: yhe: tid.
26Laban gi «Bi zeing yug shi" lo, axo' ri nya: nhung" ri lo, xo' byid: da" thung" hid: moo ajo,. 27Lo, xo' pui" labain lid sho' lang" shi" we'. Nang khyo" nyhed zain lang: jhang doem xo' koid nghoid rigi Rakhela ri we' byid: wa» ga: tid.
28Yaku we' myid veing" wigi lo, xo' pui" labain lid: khari" lang" Laban gi nyang: ri nya: zoo: Rakhela ri Yaku da" yhoem: seing: myhi' khyo" byid: bye:. 29Laban gi nya: join myhi' Bila ri nya: zoo: Rakhela da" dangcang: myhi' khyo" byid: kaid. 30Yaku gi Rakhela yo' we' dage" yhoeb lho: Yaku gi nyang: ri Lea ri tho' re" je jheddab da:. Hau: thang: nyang: gi Laban jang" moo xo' lho: nyhed zain lang: jhang moo" doem zei: bye:.
Yaku ri Zooshang: Khu: Byid: Khyoo:
31Lea gi Rakhela yhi' jheddab nheigloem: ashau" kham: yu ziri Aseing myang lang" nyang: gi Lea ri zooshang: yoo" nhang: lho: Rakhela rigi zooshang: ayoo" nhang:. 32Lea gi zoonu" gung bue" lo lho: yuggi nu" dayug ri khu: byid: bye:. Nyang: gi «Aseing gi nga" yau: khe" khyoo: ri myang byid: bye:. Nga" yhoem: seing: phoo gi ngoo ri jheddab wa bye:» ga: tid. Houg: yoomo nyang: gi hau: yug ri Ruben ga: myeing byid: bye:. 33Lea gi zoonu" gung dalheing: doem bue" lo lho: yuggi zoo: dayug ri doem khu:. Nyang: gi «Aseing gi he: yuggi zoo: ri we' doem byid:. Khasu" wim ga: ri ngoo gi jheddab nheigloem: ashau" yu ziri nyang: shau" gyo: abye:» ga: tid lho: hau: zooshang: ri Simun ga: myheing. 34Zooshang: gung dalheing: doem bue" lo lho: yuggi zoo: doem khu: wigi nyang: gi «Akhid" gi nga" yhoem: seing: phoo ngoo ri je geing: teing sho' jheddab wam bye:- khasu wim ga: ri ngoo gi nyang: ri yuggi zoo: soem" yug khu: byid: bye:» ga: tid lho: hau: zooshang: ri Levi ga: myheing byid: da:. 35Hau: thang: zooshang: gung dalheing: doem bue" lo lho: yuggi zoo: dayug ri doem khu: bye:. Nyang: gi «Akhid" lheing: gi ngoo Aseing ri coung" nghei wa o"»ga: tid lho: zooshang: ri Yuda ga: myheing. Hau: thang: nyang: gi zooshang: yo" khyoo: theing: byug bye:.
المحددات الحالية:
APOEM AYANG: 29: LCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lacid Bible © Bible Society of Myanmar, 2009.
