APOEM AYANG: 28
28
1Isag gi Yaku ri khe: yu lho: mainkaid dang: tid zigi «Khanan myiyi: ri ayu lhe". 2Re" phoug" Bethuela da" yhoem: Mesopotamia moug: khyoo: yhe: lho: houg: moo nyid da" re" myhi' da" nya: mang Laban da" nya: zoo: myiyi: nu" yi mo dayug yug ri yhe: yu wa. 3Myhang: thang da" Mangsoo gi nang ri byu myoo" sho' da" nya: phoo bue" loo nhang: wa shid re" re" da" ikoin deungkhu: ri mainkaid byid: lho: zooshang: myoo" sho' yoo" nhang: baja". 4#Apm 17:4-8. Nyang: gi Abraham ri mainkaid byid: yhang: ti" nang ri we' re" amyed ashen yiri we' mainkaid byid: baja". Mangsoo gi Abraham ri byid: to" da" joyoo nghoid lho: nang nyid nyid da" joyoo he: moug: ri nang shoug" seing: yu wa zi nghoid» ga: tid. 5Isag gi Yaku ri Aramia byumyu" Bethuela da" nya: zoo:- nya: myhi' Rebekha da" nya: mung Laban nyid da" Mesopotamia khyoo: nhang: kaid.
Eso gi Yhoem: Seing: Myhi' Gootu: yu Khyoo:
6Nya: phoo Isag gi Yaku ri mainkaid byid: lho: Mesopotamia moug: mo yhoem: seing: myhi' yhe: yu wa shid re" nhang: kaid ziri Eso gi yu" se' yu abye:. Nya: phoo gi Yaku ri mainkaid byid: uri Khanan byumyu" mo yhoem: seing: myhi' ayu, wa shid re" tid ziri we' nyang: si' bye:. 7Yaku gi nya: myhi' yo' nga" pho da" dang: ri tam" gyo: lho: Mesopotamia khyoo: yhe: loo" khare" ziri we' nyang: myang kaid bye:. 8Nya: phoo Isag gi Khanan byumyu" myiyi: ri myid aveing" ziri Eso si' bye:. 9Houg: yoomo nyang: gi Abraham da" nya: zoo: Ishmaela jhang yhe: lho: hau: youg da" nya: zoo:- Nebaiod da" nhammoo" Mahalad ri lo, xo' yu bye:.
Bethela mo Yaku da" Yhoebmo,
10Yaku gi Berasheba mo thu lho: Haran shoid khyoo: yhe: loo" bye:. 11Bidvang lang" nyang: gi gyeung" shang: joyoo daloem: khyoo: ju" lho: houg: moo theing: bye:. Nyang: gi lugboem daloem: moo vhu" khug khoug lho: yhoeb bye:. 12#Yoh 1:51. Nyang: yhoebmo, myang zigi myidjang mo mougkhung: moo ju" myhi: sho' da" zoem" lang: daloem: moo moug: lagyoo: bi" gi houg: moo do, do, gyoo" gyoo"- so" nyid boem da" ziri myang da:. 13#Apm 13:14,15. Hau: lho: nya: nam moo gi Aseing yab jo, lho: «Ngoo gi Abraham yo' Isag da" Aseing Mangsoo nghoid. Ngoo gi nang jhang" to" da" he: mougmyid ri nang yo' re" amyed ashen yiri byid: wa. 14#Apm 12:3; 22:18. Nyangnu" gi moug: gyab goin" moo zhoophei" su" myo: tham: loo wa nghoid. Nyangnu" da" meing: ri ashoid shoid khyoo: ce" lam yhe: loo" wa zi nghoid lho: nang yo' re" amyed ashen yi khyo" wigi ngoo gi byumyu" dangain" ri mainkaid byid: wa. 15Goo" lhoo: xoem" too" we'. Ngoo gi nang yo' dage" nyid nyid wa nghoid wigi nang yhe: lo" jo, yo khang" moo" moo goem loem byid: nyid wa nghoid wigi Ngoo gi nang ri he: moug: khyoo: doem shu" tau" loo wa nghoid. Ngoo khyo" nang ri dangsoo" byid: to" ziri abain zei: pyeing pyeing gi nang ri ngoo too" khoo' wa anghoid» ga: tid da" yhoebmo, ri myang.
16Yaku gi yhoeb to' lo lho: «Aseing gi hid: moo nyid. Nyang: he: joyoo moo nyid ziri ngoo gi asi' nhung:» ga: tid. 17Nyang: gi gyoug dain ziyo' tid zigi «He: joyoo gi gyoug pho" joyoo nghoid nhung:. He: zigi Mangsoo yhoem: nghoid lho: phang to" da" mougkhung: khoem" moo" duang: nyang: danghoid nhung:» ga: tid.
18Yaku gi thang: nab soin: no' re to' lho: nyang: khoug yhoeb da" lugzeing ri yu wigi xang: yoeb ladoo" zeing zhoug too" kho'. Hau: thang: nyang: gi zhainloin: xu: ri foin' gyoin: lho: Mangsoo ri shugbyid: bye:. 19Nyang: gi hau: joyoo ri Bethela ga: myeing byid:. Hau: moug: da" goonham' myeing koem' gi Luza nghoid. 20Hau: thang: ri Yaku gi Aseing moo dang: thang" cab to" zigi «Nang gi ngoo yo' sagse: to" lho: ngoo yhe: lo" nyid da" nga" gyung: khyoo: moo ngoo ri goem loem byid: wigi ngoo ri lazoo: lashug yo' void byi: void mi byid:. 21Ngoo gi goug: goug: nyu: nyu: yo' nga" pho yhoem: khyoo: doem yo" tau" ju" lo" nghoid rigi nang gi nga" Mangsoo nghoid bye:. 22Ngoo zhug to" da" he: xang: yoeb ladoo" lugzeing- he: joyoo moo nang ri ngoo lo noku wa. Houg: lho: nang ngoo ri byid: moo byid: dangain" da" daxi: boem mo daboem nang ri byid: wa» ga: tid.
المحددات الحالية:
APOEM AYANG: 28: LCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lacid Bible © Bible Society of Myanmar, 2009.
