APOEM AYANG: 30
30
1Nghoid loug Rakhela gi Yaku ri zooshang: ayoo" byid: nghoid da:. Houg: yoomo nya: bi: ri nheigloem: no lho: Yaku ri «Ngoo ri zooshang: byid: we' anghoid lang" ngoo shid: loo: wa» ga: tid. 2Yaku gi Rakhela ri nheig yo: lho: «Ngoo gi Mangso joyoo yo" yu su: anghoid. Mangsoo gi nang zoo: yoo" wa zi toem' too" su: nghoid» ga: tid. 3Rakhela gi «Hid: the- nga" join myhi' Bila nyid nyang: yo' yhoeb we' nyang: gi nga" shid re" zooshang: yoo" byid: wa nghoid. Hougsu" lang" nya: gang mo ngoo gi myhi' zeing yo" bue" loo wa nghoid» ga: tid kaid. 4Houg: yoomo Rakhela gi Bila ri nya: yhoem: seing: pho jhang ab byid: wigi Yaku we' Bila yo' yhoeb bye:. 5Bila gi zooshang: gung bue" re" wigi Yaku shid re" yuggi zoo: dayug ri khu: byid: bye:. 6Rakhela gi «Mangsoo gi ngoo ri myonhoo: byid: bye:. Nga" akyu" mho' dang: ri gyoo: byid: lho: ngoo ri yuggi zoo: byid: bye:» ga: tid lho: hau: zooshang: ri Dan ga: myeing myheing byid: bye:. 7Bila gi zoonu" gung dalheing: doem bue" lo lho: Yaku shid re" yuggi zoo: eig yug ein: yug ri doem khu: byid: bye:. 8Rakhela gi «Ngoo gi nga" bi: ri yoem: kaid thougtheung lho: ngoo oung: bye:» ga: tid lho: hau: zooshang: ri Nabthali ga: myeing byid:. 9Lea gi nyang: zooshang: ayoo" lo: ziri si' lang" nya: join myhi' Zilpha ri Yaku jhang yhoem: seing: myhi' khyo" nyid nhang: bye:. 10Houg: lang" Zilpha gi Yaku shid re" yuggi zoo: dayug ri doem khu: bye:. 11Lea gi «Ngoo zhafa: gi bye:» ga: tid lho: hau: zooshang: ri Gad ga: myheing bye:. 12Zilpha gi Yaku shid re" gootu: yuggi zoo: dayug ri doem khu: wigi 13Lea gi «Ngoo- atho' tid gau o". Akhid" gi myiyi: yigi ngoo ri gau su: ga: tid goo" wam bye:» ga: tid lho: hau: zooshang: ri Ashera ga: myeing myheing byid.
14Sungsoo: yoo yham" yo, ri Ruben gi dain" khyoo: thu yhe: lho: gyo, yen" shi" ri myang wigi hau: ziri nya: myhi' Lea jhang ci: lo. Rakhela gi Lea ri «Re" zoo: ci: lo da" gyo, yen" shi" ngoo ri we' dayham" gam zhoo" we'» ga: tid. 15Lea gi «Nga" yhoem: seing: phoo ri seing: pyam zi agi" shi" rhe". Akhid" nang gi nga" zoo: da" gyo, yen" shi" ri we' yu pyam wa dasoin' nyid shi" nhung: lha"» ga: tid.
Rakhela gi «Re" zoo: da" gyo, yen" shi" ngoo ri byid: wa nghoid rigi Akhamyen Yaku yo' nang yhoeb we'» ga: tid.
16Myen" thang: ri Yaku dain" mo ju" lo lang" Lea gi nya: jhang thu yhe: lho: «Nang gi akhamyen ngoo yo' yhoeb zi nghoid. Ngoo gi nga" zo: da" gyo, yen" shi" yo' nang ri qei too" bye:» ga: yhe: tid. Houg: yoomo Yaku gi hau myen moo Lea yo' dage" yhoeb bye:.
17Mangsoo gi Lea da" akyu" mho' dang: ri tam" gyoo: byid: yoomo zooshang: gung bue" re" wigi Yaku shid re" wim: yug ein: da" yuggi zoo: ri doem khu: byid:. 18Lea gi «Ngoo gi nga" join myhi' ri nga" yhoem: seing: pho jhang ab byid: yoomo Mangsoo gi ngoo ri ngi shab jhungshug byid: bye:» ga: tid wigi hau: zooshang: ri Isakha ga: myeing byid: bye:. 19Lea gi zooshang: gung dalheing: doem bue" lo wigi Yaku shid re" khyug yug ein: wa yuggi zoo: dayug ri doem khu: bye:. 20Nyang: gi «Mangsoo gi ngoo ri jhungshug zeing nyang: byid: bye:. Akhid" ngoo gi yuggi zoo: khyug yug nyang: khu: byid: bye: yoomo nga" yhoem: seing: phoo gi ngoo ri kham: yu wam bye:» ga: wigi hau: zooshang: ri Zebulun ga: myeing ri myheing byid: da:. 21Hau: thang: ri Lea gi myiyi: nu" dayug ri khu: lho: Dina ga: myeing myheing byid: da:.
22Hau: thang: Mangsoo gi Rakhela ri myid boin: byid: wigi Mangsoo gi nya: da" akyu" mho' dang: ri gyoo: byid: lho: nyang: ri zooshang: doem ge yoo" da" akhang" byid: bye:. 23Nyang: gi zooshang: gung bue" re" wigi yuggi zoo: dayug ri khu: bye:. Nyang: gi «Mangsoo gi nga" da" sho' phu" khyoo: ri ngoo ri yuggi nu" yoo" nhang: khyo" yu pyam byid: bye:. 24Aseing gi ngoo ri gootu: yuggi nu" doem yoo" nhang: baja" o"» ga: tid lho: Yoseb ga: myeing myheing byid:.
Yaku gi Laban yo' ziyoo jonu" kho' go" Khyoo:
25Yoseb ri khu: thang: ri Yaku gi yugphoo' Laban ri «Ngoo gi nga" yhoem: khyoo: loo" loo ba- poin' kaid re. 26Ngoo re" jang" mo zei kung: to" da" nga" yhoem: seing: myhi' tang: yo' zooshang: yi ngoo ri byid: re. Ngoo loo" loo ba. Ngoo gi nang ri khasu" moo" zei: byid: loo bye: ziri nang si' gu nghoid» ga: tid. 27Laban nyang: ri «Ngoo hid su" tid ba. Ngoo gi re" da" gang mo ngoo ri Aseing mainkaid jeju" byid: bye: ziri ngoo boin: loo bye:. 28Re" da" vhukung: phoug" soin: yu" we'. Houg: lang" nang ri ngoo byid: kaid wa» ga: tid. 29Yaku gi «Ngoo gi re" shid re" khasu" zei: byid: lo ziyo' re" lo, khoug: moo re" gougnyhoug cisu" myo: je: loo bye: ziri nang si gu: nghoid bye:. 30Ngoo ari" shi" ri nang dajhi' za: dayo". Akhid" gi myoo" sho' nyang: nghoid bye:. Ngoo kha: ju" kha: Aseing nang ri mainkaid jeju" byid: bye:. Akhid" gi ngoonya: shid re" zei: wa ayo, nghoid bye:» ga: tid. 31«Nang ri ngoo cisu" aphoug" shang" wa lha"» ga: Laban myid lang" Yaku gi «Ngoo ce: aphoug" we' avhoo:- ngoo hid su" ein: ziri nang myid veing" nghoid rigi re" da" gougnyhoug kyung ri ngoo xo' zoem: shi" wa. 32Akhid" nyid"- re" da" gougnyhoug kyung khyo" ngoo so" lid: lo" lho: no, da" yang nu" joem dangain" yo' atug atuang wim da" coidbaid nu" joem dangain" ri ngoo yu wa. Hau: zigi ngoo vho: da" vhu" kung: phoug" nghoid bye:. 33Ngoo nheigloem: aguid" ziri he: thang: nyid" moo nang goo" lhoo: za: myang wa nghoid. Nga" da" vhukung: phoug" joem ri nang re" yu" uri ngoo gi atug atuang awim da" coidbaid yo' ano, da" yang ngoo moo bo nghoid rigi khau" to" abye: da: ein: ziri nang- yu" si' wa nghoid» ga: wigi tid. 34Laban gi «Nang tid ziyo' dakhyoo" ti" koid shang» ga: tid. 35Nghoid loug Laban gi hau: nyid" ri atug atuang wim da" coidbaid loo: joem yo' coid zeing dangain" ri we' aphyu: atuang bue" ziri we' khyen: thu pyam wigi no, da" yang joem dangain" ri we' khyen: thu pyam lho: nya: zooshang: tang: yiri ab byid: pyam wigi 36Hau: thang: ri Yaku ri soem" nyid" koo: yi: ca" da" joyoo moo deing da" gougnyhoug joem yo' yhi: nhang: kaid. Yaku gi hau: gu: ri yhe: zoem: nyid.
37Yaku gi nyau da" popla gam- Lashab gam yo' Luza gam joem mo seig kung: ri yu lho: seig kug dayham" ri aphyu: atuang tuang bue" sho' shid pyam lho: 38Hau: seig kung: joem ri gougnyhoug yi gyid lhoung lo shug shug wim da" jang" moo zhug to". Khasu" wim ga: ri gougnyhoug joem gi nyangnu" gyid lo shug uri ci" lhung lo cang go" da" joyoo nghoid yoomo houg: moo zhug to" zi nghoid. 39Houg: yoomo coidbaid joem gi hau: nam moo ci" cang" go" lho: atug atuang wim da" coid nu" joem ri xang" boem ago". 40Yaku gi yang joem ri coidbaid joem yo' kho' pyam lho: nyangnu" ri atuang tuang wim ziyo' no, no, wim da" Laban gougnyhoug joem shid khyoo: myonhoo: yeing too" nhang:. Hid: khyo" wigi nyang: gi Laban jang" mo nya: gougnyhoug kyung ri myo: loug je: be: loo nhang:. 41Yang" zain: da" gougnyhoug joem ci" cang go" boem uri hau: da" seig kung: joem nam moo cang so" boem sho' Yaku gi gyid shug jang: dangain" moo cang zhug to". 42Nghoid loug yang" yang" awim da" gougnyhoug joem nam moo gi seig kung: joem ri azhug too" byid:. Khamyhang amyang" rigi Laban da" gougnyhoug joem gi yang" yang" awim wigi Yaku da" gougnyhoug joem dangain" gi yang" zi kyeing" bue" lo. 43Hidsu" khyo" wigi Yaku gi gye" yo" loo bye:. Nyang: gi coid kyung yang kyung joem join joem gola-ug joem yo' loo zei: joem myoo" sho' yoo" bye:.
المحددات الحالية:
APOEM AYANG: 30: LCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lacid Bible © Bible Society of Myanmar, 2009.
