युहन्ना 20
20
खालि तोम
(मत्ति २८:१-८; मर्कुस १६:१-८; लुका २४:१-१२)
1आथारको लाङदिना एर्हिमाङ मरियम मग्दलिनि इसुको सिकाजिउ ताअ्का तोमता हानेहि। तोमता थुकालि लोलाउ इङको तोमसो उन्ठुइ लाअ्पाका तिङहि। 2इदोइ तिङतेङ इङको सिमोन पत्रुस रो इसुको दाया पाका भेनेङ चात्याकोता धाअ्पुतेङ हानेहि रो एम्बालाइहेङ दोअ्हि, “एम्बालाइ केलाइको प्रभुहेङ तोमसो ओल्हेपातेङ चुम्पुहि रो वासेहेङ हिसु चुम्पुतेङ ताअ्का हि, केलाइ माग्याङ।”
3कोलाउ पत्रुस रो भेनेङ चात्या ओदोङघरि तोमभारि धाअ्तेङ हानेहि। 4इङको न्हेमिङ दोसादोसाङ दोङ धाअ्हि, कुलाउ भेनेङ चात्या पत्रुसहेङ काल्हामतेङ तोमता लाम्फा थुकालिलोहि। 5तोमलिअ्ता तुघुरतेङ खाङलाउ, इसुको सिका जिउता लाम्फा लुन्दाइन्हाका मानचाउलि खिनिङ इन्ता हिघाहि, कुलाउ इङको तोमलिअ्ता मादुल्हि।
6इङकोन्हुअ्सो सिमोन पत्रुस इन्ता थुकालि लोहि रो सोझाङ तोमलिअ्ता दुल्हि। कालाउ इङको बुङ इसुको सिकाजिउता लुन्दाइका मानचाउलि खिनिङ तिङहि। 7वाको पुरिङता लुन्दाइन्हाका नोसोइ मानचाउलिदोफा मान्थुघाहि, कुलाउ फारापा भेनेङ थामेता धेम्तेङ ताअ्का हिघाहि। 8कोलाउ तोमता लाम्फा थुकालिलोका भेनेङ चात्या बुङ लिअ्ता दुल्हि रो इङको तिङतेङ इङको खान्धुर पाहि। 9(हाइदोनु एम्बालाइ इसु सिकासो सिन्हुतेङ ल्होलिगोयाङ दोअ्का धरमकिताबको कथन एलाथिकापा गेका मान्थुघाहि।)
इसु मरियम मग्दलिनिकोता देखाल पिका
(मत्ति २८:९-१०; मर्कुस १६:९-११)
10इङकोन्हुअ्सो पत्रुस रो भेनेङ चात्या ताइको साअ् घुरेहि। 11कुलाउ मरियम मग्दलिनि तोम बाहार खारतेङ जाअ्तेङ हिघाहि। इङको खारकाताङ तोमलिअ्ता तुघुरतेङ खाङहि। 12जेता इसुको सिका जिउ ताअ्का हिघाहि, इन्ता जेका धाबा होङका न्हेमि सादेलचरगेलाइहेङ तिङहि। एम्बालाइता एमि इसुको पुरिङ हिकाभारि रो भेनेङचाहिँ खोकोइ हिकाभारि योम्तेङ हिका इङको तिङहि।
13ओबालाइ इङकोहेङ दोअ्हि, “आनाउ, ना हाइपालि खारखेना?”
इङको ओबालाइहेङ दोअ्हि, “एम्बालाइ काङको प्रभुहेङ चुम्पुहि, कुलाउ वासेहेङ हिता ताअ्का हि, का माग्याङका।” 14इदोइ काथा दोअ्तेङ घुरितेङ खाङलाउ इङको इसुहेङ जाअ्तेङहिका तिङहि, कुलाउ इसु दोङ हि दोअ्तेङ मानाल्हि।
15इसु इङकोहेङ दोअ्हि, “आनाउ, ना हाइपालि खारदोङखेना? हासुहेङ भोदोङखेना?”
इङको इसुहेङ बागाने गेतेङ दोअ्हि, “मास्टर, ना इसुहेङ इतासो चुम्पुकाहिका हिनु, हिता ताअ्का हिन्हा कासेहेङ दोअ्, का वासेहेङ चुमप्वाङका।”
16इसु इङकोहेङ दोअ्हि, “मरियम!” इङको घुरितेङ वासेहेङ हिब्रु राउता दोअ्हि, “रब्बोनि!” जाइको माने जेङखे “मास्टर!”
17इसु इङकोहेङ दोअ्हि, “कासेहेङ मासाइ, हाइदोनु का एलाथिकापा आबाकोता हानेका मान्थुघा। कुलाउ काङको ओनेगेलाइकोता हानेतेङ एम्बालाइहेङ दोअ्पि, ‘काङको आबा रो नेलाइको आबा, काङको परमेस्वर रो नेलाइको परमेस्वरकोता हानेदोङखा।’”
18कोलाउ मरियम मग्दलिनि हानेहि रो चात्यागेलाइहेङ हिङपाहि, “का प्रभुहेङ तिङघा।” कालाउ इङको वाको दोअ्का काथा एम्बालाइहेङ हिङपाहि।
इसु चात्यागेलाइकोता देखाल पिका
(मत्ति २८:१६-२०; मर्कुस १६:१४-१८; लुका २४:३६-४९)
19इङकोङ देउबारको दिना दिलिमा चात्यागेलाइ यहुदि आगुवागेलाइदोफा थितेङ फिनु गिअ्तेङ हिघाखे। इङको दोङ पहर इसु एकासि लोतेङ एम्बालाइको माझाता जाअ्हि रो एम्बालाइहेङ दोअ्हि, “नेलाइहेङ सुबिस्ता ज्याको!” 20इदोइ दोअ्तेङ वा एम्बालाइहेङ ताइको खुर रो कोखे बुङ तिङपिहि। कालाउ प्रभुहेङ तिङतेङ चात्यागेलाइ हेन्जाङ लेङचाहि।
21कालाउ इसु आरोङ एम्बालाइहेङ दोअ्हि, “नेलाइहेङ सुबिस्ता ज्याको! जेसापा आबा कासेहेङ दिङगिल्हि, एन्साङ का बुङ नेलाइहेङ दिङगिलाङका।” 22कालाउ इदोइ दोअ्तेङ वा एम्बालाइर्हुता ताइको हुसि म्होअ्तेङ दोअ्हि, “पुनित हाङसा र्हुसु। 23जाइको कुकरम नेलाइ माफ पास्वाना, एम्बालाइहेङ माफ ज्यावा रो जाइको कुकरम नेलाइ माफ मापास्वाना एम्बालाइहेङ माफ माज्यावा।”#मत्ति १६:१९; १८:१८
इसु थोमाकोता देखाल पिका
24इसु लोलाउ तेन्हे चात्यागेलाइता ए मि दिदुमस दोअ्का थोमा इन्ता एम्बालाइदोफा मान्थुघाहि। 25कालाउ चात्यागेलाइ इङकोहेङ दोअ्हि, “केलाइ प्रभुहेङ तिङन्हाहि।”
कालाउ थोमा एम्बालाइहेङ दोअ्हि, “जेलाउथिकापा का ताइमिङ वाको खुर्ता काटिको दागा मातिनाङका, ताइकोङ आङगुलिहोइ इङको काटिको दागा मासायाङका रो काङको ताइकोङ खुरहोइ वाको कोखेता तिअ्तेङ माखानाङका कोलाउथिकापा का खान्धुर मापाङका।”
26ए आथारन्हुअ्सो वाको चात्यागेलाइ फिनुगिअ्तेङ साअ्तालिअ्ताङ हिघाखे। इदिखेपचाहिँ थोमा बुङ एम्बालाइदोफाङ हिघाखे। इङको पहर बुङ इसु एकासि देखाल पितेङ एम्बालाइको माझाता जाअ्तेङ दोअ्हि, “नेलाइहेङ सुबिस्ता ज्याको!” 27कोलाउ वा थोमाहेङ दोअ्हि, “नाङको आङगुलि इता ताअ् रो काङको खुरगेलाइ खाङ रो नाङको खुर काङको कोखेता तिअ्। साङखा मापा, कालाउ बुङ खान्धुर पा।”
28थोमा इसुहेङ दोअ्हि, “काङको प्रभु, काङको परमेस्वर!”
29इसु इङकोहेङ दोअ्हि, “ना कासेहेङ तिङका खातिर कासेहेङ खान्धुर पाका एइ? सहसाम्पा निङका ज्याको एम्बालाइ, जाइ कासेहेङ तिङका मान्थु, कालाउबुङ खान्धुर पाखे।”
इदोइ किताबको धेय
30इसु बो हेन्जाङ चिनोगेलाइ चात्यागेलाइको आगाता पाहि, जेदोङचाहिँ इदोइ किताबता लेखेन्हाका मान्थु। 31कुलाउ इदोइ लेखेन्हाका हि, नेलाइ इसु परमेस्वरको चान, ख्रिस्ट हि दोअ्तेङ खान्धुर पासु। खान्धुरसो वाको मिङता नेलाइ असिम ज्यान निङसु।
المحددات الحالية:
युहन्ना 20: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2024 (Active), Wycliffe Bible Translators, Inc. All rights reserved.
