युहन्ना 19
19
इसुहेङ कुरुसता टाङगाइलि हुकुमपिका
(मत्ति २७:१५-३१; मर्कुस १५:६-२०; लुका २३:१३-२५)
1कोलाउ पिलातस इसुहेङ चुम्पुतेङ छरि म्हेअ्लि हुकुम पिहि। 2छरि लागाइकान्हुअ्सो सिपाल्हाइगेलाइ इसुहेङ चुइको सिरपेच रो बेङगाना रङको राजाको लागाइकाभाइका धाबा होङपापिहि। 3कालाउ वाको भेर्पा लोतेङ दोअ्हि, “यहुदिगेलाइको राजाहेङ सेउपाखा!” दोअ्तेङ निन्दा पातेङ चाउरेलि तेङहि।
4आरोङ बाहार ओल्हेतेङ पिलातस एम्बालाइहेङ दोअ्हि, “खाङसु, का यासेहेङ नेलाइकोता बाहार चुमादोङखा रो नेलाइहेङ दोअ्लि भोखा, का याता हाइदोङ कसुर मानिङखा।” 5कोलाउ चुइको सिरपेच रो बेङगाना रङको धाबा होङतेङ इसु बाहार लोहि रो पिलातस एम्बालाइहेङ दोअ्हि, “खाङसु, इदोइ द्याङहेङ!”
6जेलाउ मुल धामिगेलाइ रो पालेगेलाइ इसुहेङ तिङहि, कोलाउ एम्बालाइ एसा दोअ्तेङ र्हिकाइलि तेङहि, “इङकोहेङ कुरुसता टाङगाइ, इङकोहेङ कुरुसता टाङगाइ!”
पिलातस एम्बालाइहेङ दोअ्हि, “एन्सानु नेलाइ दोङ यासेहेङ चुम्पुतेङ कुरुसता टाङगाइसु, हाइदोनु का याता हाइदोङ कसुर मानिङखा!”
7यहुदि आगुवागेलाइ वासेहेङ दोअ्हि, “केलाइको नियममाफिक इङको सिलिङगोयाङ। हाइपानु या ताइमिहेङ परमेस्वरको चान हिघा दोअ्तेङ दोअ्का हि।”
8इदोइ काथा हिङतेङ पिलातस आरोङ थिहि। 9वा आरोङ महललिअ्ता दुल्हि रो इसुहेङ हिअ्हि, “ना हिताको हिन्हा?” कुलाउ इसु वासेहेङ हाइदोङ मादोहि। 10इदोइखातिर पिलातस वासेहेङ दोअ्हि, “हाइ ना कादोफा माधुयाना? नासेहेङ लाअ्पिका रो कुरुसता टाङगाइका खाबारा कादोफा हि दोअ्का हाइ ना मागेखेना?”
11इसु दोअ्हि, “नासेहेङ र्हुतासो मापिका हिनु कार्हुता नाङको हिदिङ खाबारा माहिधावा। इङकोखातिर कासेहेङ नाङको खुर्ता पिका आरोङ हेन्जा कुकरमको दागि जेनावा।”
12इङकोन्हुअ्सो पिलातस इसुहेङ लाअ्पिलि हेन्जा बल पाहि। कुलाउ यहुदि आगुवागेलाइ एसा दोअ्तेङ र्हिकाइहि, “एदि ना इङकोहेङ लाअ्पिन्हा पानु ना कैसरको सानाइति मान्थुन्हा। जाइ ताइमिङहेङ राजा एइ दोअ्तेङ जिकिर पाखे इङको कैसरको खिलापता जाअ्खे।”
13पिलातस इदोइ काथा हिङतेङ इसुहेङ बाहार चुमाहि रो वा “उन्ठुइको पौवा” दोअ्का थामेता (जाइहेङ हिब्रु राउता गब्बथा दोअ्खे) चुम्पुहि। इन्ता पिलातस नियापाका थामेता योम्हि। 14इङको पहर लाअ्पिका पारबाको लाङ दिना हिघाहि। एन्सालाउ नितिमाको तेन्हे बजेका हिघाहि रो पिलातस यहुदि आगुवागेलाइहेङ दोअ्हि, “खाङसु, नेलाइको राजा!”
15कुलाउ एम्बालाइ एसा दोअ्तेङ र्हिकाइहि, “चुम्पु, चुम्पु, इङकोहेङ कुरुसता टाङगाइ!”
पिलातस एम्बालाइहेङ हिअ्हि, “हाइ का नेलाइको राजाहेङ कुरुसता टाङगायाङका?”
मुल धामिगेलाइ दोअ्हि, “कैसरबिना केलाइको बो हिदिङ राजा मान्थु।”
16कोलाउ पिलातस इदोइ काथा हिङतेङ इसुहेङ कुरुसता टाङगाइलि एम्बालाइको खुरता पिहि। सिपाल्हाइगेलाइ बुङ इसुहेङ जिमा र्हुहि।
इसु कुरुसता
(मत्ति २७:३२-४४; मर्कुस १५:२१-३२; लुका २३:२६-४३)
17इसु ताइको कुरुस ताइमिङ फातेङ खप्परे दोअ्का आरदाङता हानेहि, जाइहेङ हिब्रु राउता गलगथा दोअ्खे। 18इन्ता एम्बालाइ वासेहेङ किला तातेङ कुरुसता टाङगाइहि। एन्साङ पातेङ वाको दाम्पाहा रो केपाहा बो न्हेमिहेङ बुङ भेनेङभेनेङ कुरुसता टाङगाइहि। इसु एम्बालाइको माझाता टाङगाइन्हाका हिघाहि।
19पिलातस एलोङ कसुर चिथि बुङ लेखेतेङ कुरुसर्हुता टाङगाइपिहि। जाइ इसिका लेखेन्हाका हिघाहि, “नासरतको इसु यहुदिगेलाइको राजा।” 20इङको कसुर चिथि हेन्जाङ यहुदिगेलाइ पर्हेहि, हाइदोनु इसु कुरुसता टाङगाइन्हाका थामे पुरको भेर्पाङ हिघाहि। इङको चिथि हिब्रु, ल्याटिन रो ग्रिक राउता लेखेन्हाका हिघाहि। 21कालाउ यहुदिगेलाइको मुल धामिगेलाइ पिलातसहेङ दोअ्हि, “‘यहुदिगेलाइको राजा’ दोअ्का माको, कुलाउ ‘या का यहुदिगेलाइको राजा एइ दोअ्हि’ दोअ्तेङ लेखेपि।”
22पिलातस एम्बालाइहेङ दोअ्हि, “का जे लेखेघा।”
23जेलाउ सिपाल्हाइगेलाइ इसुहेङ कुरुसता टाङगाइहि, कोलाउ एम्बालाइ वाको लोखोन र्हुतेङ ताताइमिता बाखाराइहि। वाको बाहारको धाबा बुङ र्हुहि, कुलाउ इङको धाबाचाहिँ जोका मान्थुका र्हुतासो लेताथिकापा थिर्का गोत्लाङ हिघाहि।
24इदोइखातिर एम्बालाइ ताताइमिता दोअ्हि, “इदोइचाहिँ माथेअ्ताइने, कुलाउ इदोइ हासुको ज्याङ एइ दोअ्तेङ चिठा ह्वाअ्ताइने।” धरमकिताब पोङघा ज्याको दोअ्तेङ दोङ इदोइ जेङका हिघाहिः
“एम्बालाइ काङको लोखोन ताताइमिता बाख्राइहि
रो बाहारको धाबाचाहिँ चिठा ह्वाअ्हि।”#ले २२:१८
25इदोइखातिर सिपाल्हाइगेलाइ इदोइ काम पाहि। कालाउ इसुको कुरुस भेर्पाङ वाको आमाइ, वाको माउसि, क्लोपासको बेअ् मरियम रो मरियम मग्दलिनि जाअ्तेङ हिघाखे। 26जेलाउ इसु ताइको आमाइ रो वाको इन्ताना पाका चात्या भेर्पा जाअ्तेङ हिकातिङहि। कालाउ वा ताइको आमाइहेङ दोअ्हि, “आमाइ, खाङ, नाङको चान!” 27कोलाउ इङको चात्याहेङ बुङ वा दोअ्हि, “खाङ, नाङको आमाइ!” इङको पहरसो इङको चात्या इसुको आमाइ मरियमहेङ ताइकोङ साअ्ता चुम्पुहि।
इसु कुरुसता सिका
(मत्ति २७:४५-५६; मर्कुस १५:३३-४१; लुका २३:४४-४९)
28इङकोन्हुअ्सो इसु गोताङ काम दोहोइ दोअ्का गेतेङ धरमकिताब पोङघा ज्याको दोअ्तेङ दोअ्हि, “का आम्लि किअ्घा।”#ले २२:१५; ६९:२१ 29इन्ता अङगुरको झोलहोइ पोङघाका एलोङ भान्डा ताअ्का हिघाहि। इङको अङगुरको झोलता चेन्थारा चोभेरतेङ र्हिङका नाले पासिम्ता खेअ्पातेङ सिपाल्हाइगेलाइ इसुको नुइता लागाइपिहि। 30जेलाउ इसु इङको अङगुरको झोल र्हुहि, कोलाउ वा दोअ्हि, “एला दोहोइ!” कालाउ वा पुरिङ तुघुरपातेङ हाङसा लाअ्पिहि।
इसुको कोखेता बाका
31इङको दिना माइसाका दिनाको लाङदिना हिघाहि। इदोइखातिर यहुदि आगुवागेलाइ इङको जरुरि माइसाका दिनाता सिका जिउगेलाइ कुरुसता माह्याको दोअ्तेङ पिलातसहेङ पुकार पाहि रो एम्बालाइको खोकोइ थुरतेङ एम्बालाइको जिउ चुमप्वाको दोअ्तेङ र्हेहि। 32कोलाउ सिपाल्हाइगेलाइ लोतेङ इसुदोफाङ कुरुसता टाङगाइन्हाकालाइता लाम्फा एमिको, इङकोन्हुअ्सो भेनेङको खोकोइ थुरपिहि। 33जेलाउ एम्बालाइ इसुकोता लोहि कोलाउ एम्बालाइ तिङहि, वा लाम्फा दोङ सिलिदोका हिघाहि रो वाको खोकोइ माथुरपिहि। 34कालाउ ए मि सिपाल्हाइ इसुको कोखेता बाहि रो ओदोङघरि हिति रो चि ओल्हेहि। 35नेलाइ बुङ खान्धुर पालि दोसु दोअ्तेङ इदोइ तिङकालाइ दासि पिका एइ रो वाको दासि जातिङको हि रो जातिङको धुइखा दोअ्तेङ वा गेखे। 36“वाको हिदिङ बुङ हारा माथुरावा” दोअ्का धरमकिताबको कथन पोङघाको दोअ्तेङ इदोइ जेङलि लोहि।#दामालाअ्का १२:४६; गान्देका ९:१२; ले ३४:२० 37कालाउ आरोङ भेनेङ थामेता धरमकिताबता एसा दोअ्खे, “जाइहेङ एम्बालाइ बाका हि, एम्बालाइ वासेहेङ खानावा।”#जकरिया १२:१०; फाइसालामका १:७
इसुहेङ तोमता ताअ्का
(मत्ति २७:५७-६१; मर्कुस १५:४२-४७; लुका २३:५०-५६)
38अरिमाथिया पुरसो लोका योसेफ मिङ हिका एमि चात्या हिघाखे। यहुदि आगुवागेलाइदोफा थितेङ इङको बोमिहेङ मागेपासिङ इसुहेङ खान्धुर पाका हिघाखे। इङको वाआङ पिलातसकोता लोतेङ इसुको सिका जिउहेङ चुम्पुलि निनाको दोअ्तेङ पुकार पाहि। कोलाउ पिलातस चुम्पुलि हुकुम पिहि रो इङको इसुकोता लोतेङ वाको सिका जिउ चुम्पुहि। 39कालाउ इसुहेङ न्हिसिङ दुसुलि लोका निकोदेमस बुङ योसेफदोफाङ हिघाखे। इङको चाहिँ एकुरितेसुम किलो झोको मुर्र रो एलवा सिङसो बान्हाइका मालामालाका आतर चुम्तेङ लोका हिघाखे।#युहन्ना ३:१-२ 40एसापा एम्बालाइ इसुको सिकाजिउहेङ यहुदि रितमाफिक मालामालाका आतरदोफा मानचाउलिहोइ लुन्दाइहि रो तोमता ताअ्लि त्यार पाहि। 41इसु कुरुसता टाङगाइन्हाका थामेको भेर्पाङ एलोङ बागान हिघाहि। इङको बागानता हेअ्लाउ हासुङ माताअ्का एलोङ नावा तोम हिघाहि। 42हाइपानु इङको दिना यहुदिगेलाइको माइसाका दिनाको साजेका दिना हिघाहि। कालाउ इङको तोम बुङ भेर्पाङ हिघाहि रो एम्बालाइ इसुको सिकाजिउहेङ इङकोङ तोमता चुम्पुतेङ ताअ्हि।#१९:४२ माइसाका दिना सुरु जेङलि तोम्का हिघाहि, इदोङभाअ्सिङ माइसाका दिनाको साजेका दिना खान्तेङ लाम्फा भेर्पाङको तोम्ता इसुको सिका जिउहेङ ताअ्हि।
المحددات الحالية:
युहन्ना 19: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2024 (Active), Wycliffe Bible Translators, Inc. All rights reserved.
