युहन्ना 21
21
इसु न्हिअ् चात्यागेलाइकोता देखाल पिका
1इङकोन्हुअ्सो इसु आरोङ चात्यागेलाइको आगाता गालिल माउजाको तिबेरियास#२१:१ तिबेरियास गालिल जाहादिहेङ तिबेरियास जाहादि बुङ दोअ्खे। जाहादिको काम्बेता देखाल पिहि। 2एन्सालाउ सिमोन पत्रुस, दिदुमस दोअ्का थोमा, गालिलको काना पुरको नथानेल, जब्दियाको न्हेमि चानगेलाइ युहन्ना रो याकुब रो वाको चात्यागेलाइता बो न्हे मि एदोफाङ हिघाखे। 3कालाउ सिमोन पत्रुस एम्बालाइहेङ दोअ्हि, “का हाया माङलि हानेदोङखा।” एम्बालाइ सिमोन पत्रुसहेङ दोअ्हि, “केलाइ बुङ नादोफाङ हानाङ।” एम्बालाइ हानितेङ नाउता धोल्हि, कुलाउ इङको न्हिसिङ एम्बालाइ एलोङ बुङ हाया मानिङहि।#लुका ५:५
4र्हिमा जेङलिङ तोम्लाउ इसु जाहादिको काम्बेता जाअ्तेङ हिघाहि। कुलाउ चात्यागेलाइ वा इसु दोङ हिघाहि दोअ्तेङ नाल्लि मादोहि। 5इसु एम्बालाइहेङ दोअ्हि, “सानाइतिगेलाइ, नेलाइ हेथे हाया माङसुन्हा?”
एम्बालाइ वासेहेङ दोअ्हि, “एलोङ बुङ माङका मान्थुन्हाहि।”
6इसु एम्बालाइहेङ दोअ्हि, “एन्सानु जाले नाउको दाम्पाहा थाल्सु, कालाउ निङस्वाना।” कोलाउ एम्बालाइ जाले थाल्हि रो हाया हेन्जा देनाङ एम्बालाइ जाले तान्हेलिङ मादोहि।#लुका ५:६
7इसुको इन्ताना पाका चात्या सिमोन पत्रुसहेङ दोअ्हि, “वा प्रभु कि हिनाउ” “वा प्रभु हिनाउ” दोअ्का हिङतेङ सिमोन पत्रुस ताइको गुअ्का धाबा केङखेनेता तेअ्तेङ चिता धासेहि। हाइपानु इङको ताइको लागाइका लोखोन लाम्फाङ होअ्का हिघाहखे। 8बो चात्यागेलाइ नाउताङ धोलतेङ हाया पोङघाका जाले तान्हेकाताङ लोहि। एम्बालाइ काम्बेसो हेन्जा दुरे माको, कालाउ एन्साङ साइ मिटर झोको दुरे हिघाखे। 9जेलाउ एम्बालाइ जाहादिको काम्बेता खुअ्हि, कोलाउ एम्बालाइ मेको आङघ्रोता हाया ताअ्का रो तोले तिङहि।
10इसु एम्बालाइहेङ दोअ्हि, “नेलाइको एलाङखिनिङ रिम्का हायासो आतुइसा चुमासु।”
11कोलाउ सिमोन पत्रुस नाउता धोल्तेङ ए साइ न्हेकुरितेसुम लोङ बाबार्का हायाहोइ पोङघाका जाले तिकारता तान्हेतेङ चुमाहि, कालाउबुङ जाले माथेअ्हि। 12इसु एम्बालाइहेङ दोअ्हि, “लोतेङ चासु।” चात्यागेलाइ हासुङ बुङ “ना हासु हिन्हा?” दोअ्तेङ हिअ्लि हिमत मापाहि। हाइपानु एम्बालाइ वा प्रभु हि दोअ्तेङ नाल्लिदोका हिघाखे। 13इसु लोहि रो तोले चुम्तेङ एम्बालाइहेङ पिहि, कालाउ एन्साङ पातेङ हाया बुङ पिहि। 14इसु सिकासो सिन्हुतेङ ल्होकान्हुअ्सो वा चात्यागेलाइकोता देखाल जेङका इदोइ सुम खेप हिघाहि।
पत्रुसहेङ इसुको आखिरि हुकुम
15जेलाउ एम्बालाइ चालिदोहि, कोलाउ इसु सिमोन पत्रुसहेङ दोअ्हि, “युहन्नाको चान सिमोन, हाइ ना कासेहेङ एबालाइखान्तेङ हेन्जा इन्ताना पाखेना?”
सिमोन पत्रुस वासेहेङ दोअ्हि, “एइ प्रभु, ना गेखेना, का नासेहेङ इन्ताना पाखा।”
इसु इङकोहेङ दोअ्हि, “एन्सानु काङको भेरागेलाइहेङ चापा।”
16इसु आरोङ न्हे खेप इङकोहेङ दोअ्हि, “युहन्नाको चान सिमोन, हाइ ना कासेहेङ इन्ताना पाखेना?”
सिमोन पत्रुस वासेहेङ दोअ्हि, “एइ प्रभु, ना गेखेना, का नासेहेङ इन्ताना पाखा।”
इसु इङकोहेङ दोअ्हि, “एन्सानु काङको भेरागेलाइहेङ घो।”
17इसु इङकोहेङ सुम खेप दोअ्हि, “युहन्नाको चान सिमोन, हाइ ना कासेहेङ इन्ताना पाखेना?”
पत्रुस मन तुपाहि, हाइपानु वा सुम खेप इङकोहेङ “हाइ ना कासेहेङ इन्ताना पाखेना?” दोअ्हि। इङको वासेहेङ दोअ्हि, “प्रभु ना गोताङ काथा गेखेना रो का नासेहेङ इन्ताना पाखा दोअ्तेङ बुङ ना ताइमिङ गेखेना।”
इसु इङकोहेङ दोअ्हि, “काङको भेरागेलाइहेङ चापा। 18जातिङको का नासेहेङ दोअ्खा, जेलाउ ना धाना हिघान्हा कोलाउ ना ताइमिङ ताइको तेपाना ताइमिङ तेअ्घाना रो जेता लाल्सा पाघाना इन्ता हानेघाना। कुलाउ जेलाउ ना वाराङ जेनाना, कोलाउ ना ताइको खुर ह्याना, बोमि नाङको तेपाना तेअ्पावा रो ना जेता हानेलि माकिअ्खेना इन्ता चुम्पुन्हाना।” 19हिदोइ खाल्को सिकासो इङको परमेस्वरको प्रताप पावा, इङकोको टिप्नि पातेङ इसु इदोइ दोअ्का हिघाहि। इदोइ दोअ्तेङ वा इङकोहेङ दोअ्हि, “कासेहेङ पिताइ।”
इसुको मोन्दाताका चात्या
20सिमोन पत्रुस घुरितेङ खाङलाउ इसुको इन्ताना पाका चात्याहेङ न्हुन्हु लोतेङहिका तिङहि। या दोङ दिलिमाको चाकाको पहरता इसुको तुम्ताता उन्धितेङ, “प्रभु, नासेहेङ रिम्पाका हासु एइ?” दोअ्तेङ हिअ्का हिघाखे।#युहन्ना १३:३५ 21इङकोहेङ तिङतेङ सिमोन पत्रुस इसुहेङ हिअ्हि, “प्रभु, याको चाहिँ हाइ ज्याङ?”
22इसु सिमोन पत्रुसहेङ दोअ्हि, “का मालोपाधाउ इङको र्हुम्तेङह्याको दोअ्का काङको लाल्सा हिलाउ बुङ नासेहेङ हाइ चारि जेङहि? ना कासेहेङ पिताइ।” 23इदोङखातिर इङको चात्या मास्याङ दोअ्का काथा चात्यागेलाइको माझाता फाराहि। इसु इङको मास्याङ दोअ्का मान्थुघाहि, कुलाउ, “का मालोपाधाउ इङको र्हुम्तेङह्याको दोअ्का काङको लाल्सा हिलाउ बुङ नासेहेङ हाइ चारि जेङहि?” दोअ्का हिघाहि।
24इदोइ इङको दोङ चात्या एइ, जाइ इदोइ काथाको बारेता दासि पिदोङखे रो इदोइ काथा लेखेका हि, कालाउ केलाइ गेन्हाखे इङकोको दासि जातिङको हि।
दोपाका
25इसु बो बुङ हेन्जाङ काम पाहि। इङकोता झाराङको बारेता लेखेहि पानु, कासेहेङ इसिका लागेखे, इङकोको बारेता लेखेन्हाका किताबगेलाइ दुनियाता बुङ थेम्लि मादोधावा।
المحددات الحالية:
युहन्ना 21: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2024 (Active), Wycliffe Bible Translators, Inc. All rights reserved.
