Utusang pung Carita 5
5
Ananias deng Safira mati
5:1-11
1Ada laki-laki satu nama Ananias. Dia pung maitua nama Safira. Dong dua jual dong pung tana sapanggal. 2Akang pung kepeng, Ananias simpang saparu la yang sisa dia pi kasi akang par Yesus pung utusang-utusang. Dia pung maitua jua tau kalo dia biking bagitu.
3Tarus Petrus tanya dia bagini, “Ananias e! Mangapa ale kasi biar Setang pung Raja parenta ale sampe ale su parlente Allah pung Roh? Ale su jual tana la simpang akang pung kepeng saparu. 4Waktu ale balong jual akang tana tu, akang masi jadi ale pung to? Bagitu lai waktu ale su jual akang, akang pung kepeng tu ale pung lai. Ale mau kasi akang pung kepeng ka seng, itu ale pung hak. Mar mangapa kong ale bilang kalo akang pung kepeng cuma ini sa? Ale bukang cuma parlente katong sa, mar ale jua su parlente Allah!”
5Abis Ananias dengar bagitu, dia jatu la mati. Samua orang jadi takotang paskali waktu dengar itu. 6Tarus, ana muda babarapa orang datang la bungkus dia pung mayat deng kaeng la pi bakubur dia.
7Akang pung tiga jam bagitu, Ananias pung maitua datang ka situ lai. Mar dia seng tau sadiki lai kalo dia pung laki tu su mati. 8Petrus tanya dia, “Safira e! Coba ale bilang yang batul par beta do. Ale deng ale pung laki jual tana deng harga bagini ka?”
Safira bilang, “Batul. Akang pung harga bagitu suda.”
9Petrus bale bilang lai, “Mangapa ale deng ale pung laki baku skongkol par coba Tuhan pung Roh? Ale tau, dong yang ada badiri di muka pintu tu, dong baru abis bakubur ale pung laki. Dong nanti bawa ale pung mayat la pi bakubur ale lai.”
10Abis Petrus bilang bagitu, skrek bagini, Safira jatu di Petrus pung kaki la mati. Waktu anana muda maso ka dalang, dong dapa dia su mati. Tarus, dong angka dia pung mayat la pi bakubur dia di sabala dia pung laki. 11Waktu orang-orang parcaya deng samua orang yang laeng dengar apa yang jadi tu, dong takotang paskali.
Yesus pung utusang-utusang biking tanda-tanda herang
5:12-16
12Yesus pung utusang-utusang biking banya tanda herang di muka orang-orang. La samua orang yang parcaya Yesus jaga bakumpul di Teras Salomo di Tampa Sombayang Pusat. Dong samua satu hati. 13Orang-orang yang seng parcaya Yesus seng barani pi bakumpul deng dong. Mar biar kata bagitu, banya orang taru hormat par dong. 14La orang-orang yang parcaya Tuhan Yesus, laki-laki deng parampuang, batamba banya tarus. 15Yesus pung utusang-utusang biking banya tanda herang sampe orang-orang bawa orang-orang saki di atas tikar ka tandu la taru dong di jalang basar. Dong biking bagitu biar waktu Petrus langgar, dia pung sombar bisa kana babarapa orang dari dong la dong bae. 16Orang banya dari kampong-kampong yang tinggal dekat kota Yerusalem jua datang bawa dong pung orang-orang saki deng orang-orang yang takanal. La dong samua jadi bae.
Malekat kasi kaluar Yesus pung utusang-utusang dari bui
5:17-25
17Orang Yahudi pung Imam Basar deng antua pung anana bua dari kalompok Saduki jalus paskali tagal apa yang Yesus pung utusang-utusang su biking. 18Jadi, dong tangkap Yesus pung utusang-utusang la kasi maso dong ka dalang bui. 19Mar akang pung malang, Tuhan pung malekat satu buka pintu-pintu bui la bawa Yesus pung utusang-utusang kaluar. Malekat tu bilang bagini, 20“Pi ka kintal Tampa Sombayang Pusat la kasi tau Kabar Bae soal Yesus par orang-orang, Kabar Bae yang bisa biking dong hidop tarus-tarus deng Allah.”
21Tarus, Yesus pung utusang-utusang iko apa yang malekat tu su bilang par dong. Akang pung amper siang, dong maso di orang Yahudi pung Tampa Sombayang Pusat pung kintal la mulai kasi balajar orang-orang soal Yesus.
Mar waktu itu jua, orang Yahudi pung Imam Basar deng antua pung anana bua ada kumpul samua orang Yahudi pung Pamimping-pamimping Sidang. Dong suru babarapa orang pi ambe Yesus pung utusang-utusang dari bui par mau sidang dong. 22Mar pas orang-orang yang dapa suru tu sampe di bui, dong seng baku dapa Yesus pung utusang-utusang tu. Tarus, dong bale kombali la kasi tau soal apa yang dong su lia tu. 23Dong bilang, “Bapa-bapa e, waktu katong sampe, pintu bui tu masi takonci mati deng orang yang jaga bui masi ada di muka pintu lai. Mar waktu katong buka pintu bui, katong seng lia satu manusia lai di dalang.”
24Waktu kapala pasukan yang jaga orang Yahudi pung Tampa Sombayang Pusat deng orang Yahudi pung imam-imam kapala dengar bagitu, dong jadi tabingong-bingong. Dong bilang, “Apa lai yang su jadi deng Yesus pung utusang-utusang tu?”
25Skrek bagini, satu orang datang par dong la bilang kata, “Bapa-bapa e, orang-orang yang bapa-bapa dong su kasi maso dalang bui tu, sakarang ni dong ada di kintal Tampa Sombayang Pusat la ada kasi balajar orang banya.”
Orang Yahudi pung Pamimping-pamimping Sidang kasi sidang Yesus pung utusang-utusang
5:26-42
26Abis dengar Yesus pung utusang-utusang ada kasi balajar orang di kintal Tampa Sombayang Pusat, kapala pasukan bawa antua pung anana bua pi ka sana par tangkap Petrus deng dia pung tamang-tamang tu. Mar kapala pasukan dong pi tangkap Petrus dong deng bae-bae, tagal dong taku jang sampe orang banya yang ada di situ lempar dong deng batu. 27Abis itu, dong bawa Petrus dong par orang Yahudi pung Pamimping-pamimping Sidang. Tarus, orang Yahudi pung Imam Basar tanya-tanya Petrus dong kata, 28“Katong su larang kamong par jang paskali pi kasi balajar orang-orang soal Yesus to? Mangapa kong kamong seng iko katong pung parenta? Mala kamong pi kasi balajar orang-orang di antero kota Yerusalem deng kamong pung ajarang. Baru kamong jua mau tudu kalo katong yang biking sampe Yesus mati.”#Matius 27:25
29Mar Petrus dong bilang, “Bapa-bapa e, katong seng bisa iko manusia pung mau. Katong musti iko Allah pung mau. 30Kamong salib Yesus sampe mati, mar Allah yang katong pung moyang-moyang somba tu su kasi hidop Antua kombali. 31Allah su angka Yesus ka sorga la kasi dudu Antua di Allah pung sabala kanang, tampa paleng panting, par pimping deng kasi salamat manusia. Allah angka Antua biar katong orang-orang Israel bisa kasi tinggal katong pung dosa-dosa la dapa kasi ampong. 32Katong ni yang jadi saksi dari samua tu, bagitu lai deng Allah pung Roh yang Antua kasi par orang-orang yang iko Antua pung mau.”
33Waktu Pamimping-pamimping Sidang dengar Petrus bilang bagitu, dong jumawa paskali. Tarus, dong baku skongkol par bunu Petrus dong. 34Mar dari Pamimping-pamimping Sidang tu ada orang Farisi satu. Dia nama Gamaliel. Dia tu guru Torat. Samua orang Yahudi taru hormat par dia. Dia badiri la suru orang bawa Petrus dong kaluar dolo dari tampa sidang. 35Tarus, dia bilang par Pamimping-pamimping Sidang kata, “Basudara orang Israel e! Coba pikir bae-bae do apa yang kamong mau biking par Petrus dong. 36Kamong masi inga deng Teudas ka seng? Dolo dia parna bilang kalo dia tu pamimping basar, la mangkali barang ampa ratus orang bagabung deng dia. Mar apa yang jadi? Orang-orang bunu dia. La dia pung anana bua samua lari talamburang la dong pung rencana seng jadi apapa lai. 37Abis dia, ada muncul satu orang lai, waktu pemerinta Roma ada biking sensus par rekeng masarakat. Dia nama Yudas. Dia asal dari propinsi Galilea. Banya orang iko dia par malawang pemerinta Roma. Mar orang-orang bunu dia la dia pung anana bua samua lari talamburang lai.
38Tagal itu, dengar beta bilang par kamong! Jang biking apapa par Petrus dong. Kasi biar dong bagitu sa. Kasi lapas dong. Barang, kalo samua yang dong biking deng ajar tu asal dari manusia, akang nanti ancor lai macang deng Teudas deng Yudas pung rencana tu. 39Mar, kalo apa yang dong biking deng ajar tu asal dari Allah, kamong seng bisa kasi barenti dong. Mala kamong yang nanti lawang Allah.” Pamimping-pamimping Sidang tarima Gamaliel pung nasehat tu.
40Abis itu, dong suru orang bawa maso Petrus dong kombali. Tarus, dong suru orang-orang cambok Petrus dong. Dong bilang par Petrus dong kata, “Kamong seng bole kasi balajar orang-orang soal Yesus lai.” Abis itu, dong kasi lapas Petrus dong.
41Petrus dong pi kasi tinggal Pamimping-pamimping Sidang Yahudi deng hati paleng sanang. Barang, dong tau kalo Allah su pili dong par sangsara deng dapa biking malu macang bagitu tagal Yesus. 42Dong sabang hari kasi balajar Kabar Bae soal Yesus par orang-orang. Dong bilang kalo Yesus tu, Orang yang Allah su Angka par Kasi Salamat Manusia. Dong biking bagitu tarus di orang Yahudi pung Tampa Sombayang Pusat pung kintal deng di ruma-ruma.
المحددات الحالية:
Utusang pung Carita 5: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
