Utusang pung Carita 4
4
Petrus deng Yohanis di muka orang Yahudi pung Pamimping-pamimping Sidang
4:1-22
1Waktu Petrus deng Yohanis ada bicara par orang banya, skrek bagini, orang Yahudi pung imam-imam, kapala pasukan yang jaga Orang Yahudi pung Tampa Sombayang Pusat, deng orang-orang dari kalompok Saduki datang par dong dua. 2Dong paleng mara tagal Petrus deng Yohanis kasi balajar orang banya soal Yesus. Dong dua bilang kalo Yesus su mati mar hidop kombali, la Antua nanti kasi hidop orang-orang yang su mati. 3Jadi, dong suru orang-orang tangkap dong dua. Tagal su malang, dong dua dapa tahang dalang bui sampe eso baru dong dua pung parkara dapa urus. 4Mar, dari orang-orang yang su dengar Petrus deng Yohanis pung ajarang tu, banya lai yang parcaya Yesus, sampe samua orang yang parcaya Yesus, kalo rekeng laki-laki sa, mangkali barang lima ribu orang.
5Akang pung eso, orang Yahudi pung pamimping-pamimping, imam-imam kapala, deng guru-guru Torat bakumpul di kota Yerusalem. 6Orang Yahudi pung Imam Basar Hanas, sama-sama deng Kayafas, Yohanis, deng Aleksander, deng jua orang-orang panting laeng dalang Hanas pung kaluarga ada di situ lai. 7Dong suru orang bawa maso Petrus deng Yohanis ka tampa sidang la tanya dong dua kata, “Kamong dua biking orang lumpu tu bae deng kuasa apa? Kamong pake sapa pung kuasa par biking akang?”
8Allah pung Roh kasi kuasa par Petrus la dia bilang kata, “Orang Israel pung pamimping-pamimping deng imam-imam kapala e! 9Sakarang ni bapa-bapa dong kasi sidang katong tagal katong su biking bae orang lumpu. Bapa-bapa mau tau bagemana sampe orang lumpu tu bisa bae? 10Beta mau bapa-bapa deng samua orang Israel tau kalo orang lumpu tu bisa badiri sakarang di muka bapa-bapa dong ni tagal Yesus Kristus dari kampong Nasaret tu pung kuasa. Yesus tu yang bapa-bapa dong su kasi salib, mar Allah su kasi hidop Antua kombali. 11Yesus yang kamong seng tarima tu macang deng,
‘Batu yang tukang-tukang su buang tu,
Akang su jadi batu pandasi yang paleng panting.’#Lagu-Lagu 118:22
12Seng ada satu orang lai yang bisa kasi salamat katong, cuma Yesus sa. Barang, seng ada orang laeng di dunya yang Allah su Angka par Kasi Salamat Manusia.”
13Waktu dong yang kasi sidang Petrus deng Yohanis tu dengar dong dua barani bicara macang bagitu, deng tau kalo dong dua tu orang biasa yang seng sakola agama, dong jadi taherang-herang. Tarus, dong sadar kalo dong dua tu bisa biking macang bagitu tagal dong dua tu Yesus pung murid-murid. 14Mar dong seng bisa bilang apapa par lawang dong dua lai. Barang, dong lia orang lumpu yang su bae tu ada badiri sama-sama deng dong dua. 15Jadi, dong suru dong tiga kaluar dari tampa sidang. Tarus, dong baku tukar pikirang soal dong dua pung parkara. 16Dong baku tanya kata, “Katong musti biking apa dong dua? Samua orang di Yerusalem su tau kalo dong dua biking tanda herang yang luar biasa. Katong jua seng bisa manyangkal akang. 17Mar, biar carita soal tanda herang ni seng labe tamba tasiar ka mana-mana lai, labe bae katong larang dong dua. Katong ancam dong dua biar dong dua jang pi kasi tau soal Yesus lai par orang-orang.”
18Tarus, dong suru orang bale bawa maso dong dua ka tampa sidang. Dong bilang kata, “Petrus deng Yohanis! Mulai dari oras ni, kamong seng bole kasi tau deng kasi balajar orang-orang soal Yesus lai!”
19Mar Petrus deng Yohanis bale bilang, “Bapa-bapa e! Coba pikir, mana yang batul di muka Allah: Katong musti iko bapa-bapa dong pung parenta ka iko Allah pung parenta? 20Katong seng bisa barenti par kasi tau soal apa yang katong su lia deng dengar.”
21Pamimping-pamimping sidang ancam Petrus deng Yohanis kombali par jang paskali kasi tau soal Yesus. Mar akang pung laste, dong kasi lapas dong dua tagal dong seng tau mau hukum dong dua bagemana. Dong takotang jang sampe orang-orang yang ada di situ mangamu. Barang, samua orang tinggal kong puji-puji Allah tarus tagal orang lumpu tu su bae. 22Orang lumpu yang su bae tu seng bisa bajalang su ampa pulu taong labe.
Orang-orang parcaya pung sombayang
4:23-31
23Abis dapa kasi lapas, Petrus deng Yohanis pi par dong pung tamang-tamang, la carita soal samua yang orang Yahudi pung imam-imam kapala deng pamimping-pamimping bilang par dong. 24Waktu dong dua pung tamang-tamang dengar dong dua pung carita, dong sombayang sama-sama par Allah bagini, “Bapa e, Bapa pung kuasa par samua-samua. Bapa yang biking langit, daratang, lautang, deng akang pung isi samua.#Kaluar dari Mesir 20:11; Nehemia 9:6; Lagu-Lagu 146:6 25Dolo, Bapa su bicara lewat Bapa pung Roh par katong pung moyang Daud, Bapa pung orang suru-suru tu, la Daud bilang bagini,
‘Mangapa orang-orang yang bukang Yahudi mara-mara?
La mangapa lai orang-orang Yahudi baku skongkol
par biking apapa yang seng ada akang pung guna?
26Raja-raja ada siap-siap par mau prang
la pamimping-pamimping di dunya ada bakumpul
par malawang Tuhan deng Orang yang Antua su Angka par Kasi Salamat Manusia.’#Lagu-Lagu 2:1-2
27Apa yang Raja Daud tulis tu su jadi. Di kota Yerusalem ni, Raja Herodes deng Gubernur Pontius Pilatus su bakumpul sama-sama deng orang-orang Israel deng orang-orang yang bukang Israel. Dong bakumpul par baku skongkol malawang Yesus, Bapa pung Orang Karja yang kudus, yang Bapa su angka par Kasi Salamat Manusia.#Matius 27:1-2; Markus 15:1; Lukas 23:1, 7-11; Yohanis 18:28-29 28Apa yang dong biking par Antua tu, Bapa su ator akang dari kamuka biar akang jadi iko Bapa pung kuasa deng Bapa pung mau. 29Bapa lia sandiri jua, sakarang ni, dong ada ancam katong, Bapa pung orang suru-suru ni. Jadi, katong minta Bapa tolong buka jalang biar katong bisa kasi tau Bapa pung Kabar Bae soal Yesus deng barani paskali. 30Kasi kuasa par katong biar katong bisa kasi bae orang-orang saki deng biking tanda-tanda herang pake Yesus, Bapa pung Orang Karja yang kudus tu pung kuasa.”
31Waktu Petrus, Yohanis, deng dong pung tamang-tamang su abis sombayang, skrek bagini, tampa yang dong ada bakumpul tu bagoyang. Allah pung Roh kasi kuasa par dong samua la dong kasi tau Allah pung Kabar Bae soal Yesus deng barani paskali.
Orang-orang parcaya hidop satu hati
4:32-37
32Orang-orang yang parcaya Yesus tu, dong hidop satu hati. Seng ada satu orang lai dari dong yang pikir kalo dia pung barang tu cuma par dia pung diri sandiri sa, mar par dong samua pake.#Utusang pung Carita 2:44-45 33La deng Allah pung kuasa basar, Yesus pung utusang-utusang tarus-tarus pi kasi tau soal Tuhan Yesus yang su hidop kombali. Allah kasi berkat basar par dong samua. 34Seng ada satu orang lai dari dong yang kurang apapa. Barang, sakali-sakali, sapa dari dong yang ada pung tana ka ruma yang labe, dong jual akang, 35la bawa akang pung kepeng par Yesus pung utusang-utusang. Tarus, Yesus pung utusang-utusang bage kepeng tu par orang-orang, iko dong satu-satu pung parlu.
36Bagitu lai deng Yusuf. Dia dari suku Lewi. Dia asal dari pulo Siprus. Yesus pung utusang-utusang jaga panggel dia par Barnabas. Barnabas tu pung arti, ‘Orang yang kasi kuat orang laeng pung hati’. 37Yusuf ni pi jual dia pung tana sapanggal la bawa akang pung kepeng par Yesus pung utusang-utusang.
المحددات الحالية:
Utusang pung Carita 4: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
