Utusang pung Carita 6
6
Orang-orang parcaya pili tuju orang par urus orang kasiang
6:1-7
1Waktu itu, orang-orang Yahudi yang parcaya Yesus tamba hari tamba banya. Dong yang bicara pake bahasa Yunani barsungut deng dong yang bicara pake bahasa Ibrani.#6:1 Orang Yahudi yang tinggal di Yerusalem bicara pake bahasa Ibrani la orang Yahudi yang tinggal di luar Israel bicara pake bahasa Yunani. Dong yang pake bahasa Yunani bilang kata, “Katong pung janda-janda seng dapa bantuang makanang yang dapa bage sabang hari.”
2Tagal itu, Yesus pung sapulu dua utusang kumpul samua orang yang parcaya Yesus la bilang par dong kata, “Basudara samua e! Kalo katong musti barenti kasi balajar Allah pung ajarang biar katong bisa bage kepeng deng makanang par janda-janda, itu seng bole. 3Jadi, labe bae kamong pili tuju orang dari kamong biar katong bisa angka dong par bage kepeng deng makanang. Kamong musti pili orang yang banya orang su tau kalo dong pung kalakuang bae, pung pikirang tajang, deng Allah pung Roh pung kuasa ada deng dong. 4Deng bagitu, katong bisa batul-batul pake katong pung waktu par sombayang deng kasi balajar orang-orang soal Allah pung ajarang.”
5Samua orang yang ada di situ setuju deng apa yang Petrus dong bilang. Jadi dong pili tuju orang. Yang partama, Stefanus. Dia ni paleng parcaya Yesus, baru Allah pung Roh pung kuasa jua ada deng dia. Dong jua pili Filipus, Prokorus, Nikanor, Timon, Parmenas, deng Nikolaus. Nikolaus ni asal dari kota Antiokia. Dia bukang orang Yahudi, mar su maso agama Yahudi.
6La dong bawa tuju orang yang su dapa pili tu par Petrus dong. Tarus, Petrus dong taru tangang di atas dong tuju tu la sombayang minta Allah bantu dong pung karja.
7Jadi, orang-orang labe banya lai dengar Allah pung ajarang. La orang-orang yang parcaya Yesus di kota Yerusalem batamba banya. Orang Yahudi pung imam-imam jua banya lai yang jadi parcaya la iko Yesus.
Stefanus dapa tangkap
6:8-15
8Allah kasi berkat deng kuasa yang basar par Stefanus sampe dia jaga biking tanda-tanda herang yang luar biasa di muka orang banya. 9Mar ada orang Yahudi dari satu tampa sombayang yang seng suka Stefanus. Dong pung tampa sombayang tu nama Libertini, yang pung arti ‘orang-orang yang su seng jadi jongos lai’. Dong tu asal dari kota Kirene, kota Aleksandria, propinsi Kilikia, deng propinsi Asia. Dong mulai baku malawang deng dia. 10Mar tagal Allah pung Roh kasi kuasa par Stefanus sampe dia pintar bicara deng pung pikirang tajang, jadi dong seng bisa kasi kala dia. 11Tagal itu, dong tusu-tusu mulu par babarapa orang la suru dong bilang di muka orang banya kata, “Katong su dengar Stefanus hojat Allah deng Musa.”
12Dong tinggal kong tusu-tusu mulu par orang Yahudi pung Pamimping-pamimping, guru-guru Torat, deng orang Yahudi banya lai. Tarus, dong pi tangkap Stefanus la bawa dia ka orang Yahudi pung Pamimping-pamimping Sidang. 13Dong suru orang par jadi saksi-saksi parlente la saksi-saksi tu bilang par Pamimping-pamimping Sidang tu kata, “Bapa-bapa e! Orang ini to, seng stop-stop hina katong pung Tampa Sombayang Pusat deng Kitab Torat yang Musa su tulis. 14Katong bilang bagini tagal katong su parna dengar dia bilang kalo Yesus dari kampong Nasaret tu nanti kasi ancor katong pung Tampa Sombayang Pusat ni, deng nanti roba katong pung atorang adat samua yang Musa su kasi par katong.”
15Tarus, samua orang yang ada di situ manganga Stefanus. Dong lia dia pung muka tarang paskali macang deng malekat pung muka.
المحددات الحالية:
Utusang pung Carita 6: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
