MATIUS 15
15
Kabiasaangu manga i upung
(Mrk. 7:1-13)
1Singkomol᷊ang u tau Farisi dingang u pirang katau meteru agama bou Yerusalem nusumongo si Yesus. I sire nukina si Sie, 2“Nakurawe tumatuhu-U l᷊ul᷊awang kabiasaangu manga i upungi kite? Su tempo ngu kumang i sire ta manguhasi l᷊ima ngi sire horo tumuhu atorang!”
3I Yesus nusumimbahi, “Nakurawe i kumu l᷊ai l᷊umal᷊awang parentangu Mawu Ruata, kitang ual᷊ing tumuhu adatu manga i upung i kumu? 4#Kel. 20:12, 21:17; Im. 20:9; Ul. 5:16Watu u Mawu Ruata nangul᷊i, ‘Pangadati si papa ngu dingang si mamangu,’ dang ‘I sai-sai ko mangane si papa nge dingang si mamange, mambeng i hukung pakapate.’ 5Arawe i kumu manintiro: Boko taumata mangul᷊i su ghaghurange, ‘Apa ko hinongu daku i onggo si papa dingang si mama, seng daku nisumba su Mawu Ruata,’ 6inau tau e'e seng kuhate mangadati ghaghurange.#15:6: ghaghurange: pirambau wohe horo: i papa arako i mamange Inau, ual᷊ingu adatu manga i upungi kumu, i kumu mamala didato ngu Mawu Ruata. 7I kumu mang taumata ma pal᷊antikari! Mang nuhino kahingang apang ko niul᷊i i Yesaya bou hal᷊i i kumu, ko kiri ie,
8 #
Yes. 29:13
‘Kiri i nihabaru Mawu Ruata:
Manga umati e'e kitang manumba si Sia dingang u didato,
arawe naungi sire marau bou Ia.
9Takoae gunange i sire manumba si Sia,
watu u atorang u taumata nitintirongi sire
nikoa kere e'e ko l᷊aatori-Ku.’ ”
Kaul᷊i apang ko makal᷊amuhu taumata
(Mrk. 7:14-23)
10Bou e'e I Yesus nukumui manga taumata dingang nangul᷊i si sire, “Raringiheko tadeau makahingang! 11Apang ko mataho su mohong tamakal᷊amuhu taumata; kitang apang ko mal᷊ua bou mohonge, e'e makal᷊amuhu si sie.”
12Bou e'e manga tumatuhu I Yesus nusumongo nangul᷊i si Sie, “I Tuang matitong i sire tau Farisi e'e namansa su tempo ngi Tuang nangul᷊i kere e?”
13I Yesus nusumimbahi, “Apang sasuang ko ta nisuangi Yamang-Ku su sorga sarung i sawu. 14#Luk. 6:39Kuhate musumpi tau Farisi e'e. I sire e'e ko mangangaha ko wuta; boko tau wuta mangaha tau ko wuta i sire rua sarung manawo su goti.”
15I Petrus nangul᷊i, “Tul᷊ungko pakal᷊ahe si kami papinintu e'e Tuang!”
16I Yesus nusumimbahi si sire, “Apa i kumu mborong tanakahingang l᷊ai? 17I kumu ko wugha, apang ko masu su mohong maturusi sarang l᷊al᷊ungu tiang, bou e'e sau masuwang? 18#Mat. 12:34Arawe ko mal᷊ua bou mohong, e'e sumuwang bou naung; dang e'e makal᷊amuhu taumata. 19Watu u bou l᷊al᷊ungu naung tumimbul᷊i sipirang ko dal᷊ai sarang makakoa taumata mamate, mawuang, musundal᷊i, manako, musaksi l᷊eo, dang muhinakang. 20Ko e'e kaul᷊ie makal᷊amuhu taumata, wal᷊ingewe ual᷊ingu kumang tamanguhasi l᷊ima.”
Pangangimangu singkatau kowawine ngu Kanaan
(Mrk. 7:24-30)
21Bou e'e I Yesus nanintang u tampa e'e nakoa sarang tampa ko masandighu soa ngu Tirus dingang u Sidon. 22Singkatau kowawine ngu Kanaan bou wanua e'e, nusumandighi si Yesus dingang kakuinge “Ahusi Daud, kindaghite ko ia i! Anaku kowawine nikasukangu roh ko dal᷊ai, kakakoae mabuha kahingang.”
23I Yesus tanusumimbahi su kowawine e'e. Bou e'e manga tumatuhu I Yesus nusumandighi dingang nundo si Sie, “Tuang roie tau kowawine e'e pakapul᷊e. I sie kitang kapugarae su l᷊ikuri kite!”
24I Yesus nusumimbahi, “Ia nioro kitang guna ngu tau Israel, kitang si sire apang ko napal᷊iri.”
25Tau kowawine e'e nusumimbahi nusuba su saruang I Yesus dang nangul᷊i, “Tul᷊ungko ia Tuang.”
26I Yesus nusumimbahi, “Tamakahino mangal᷊a kang u mangarario bou e'e i teleri su kapuna.”
27“Tingari, Tuang,” nisimbahu tau kowawine e'e, “Kateho kapuna l᷊ai mang kumang manga l᷊umbei ko nanawo bou medangu mawunge.”
28Bou e'e I Yesus nangul᷊i si sie, “Ma, mang tingari ko l᷊abo pangangimangu! Pakariadi te apang ko i kao u!” Singkatempo e'e l᷊ai ana u kowawine e'e naul᷊e.
I Yesus nupakaul᷊engu maul᷊i taumata ko masasaki
29I Yesus nanintang u tampa e'e bou e'e nul᷊umal᷊eng nusumilei bou wiwihu bou apeng u ano Galilea. Bou e'e i Sie simaka sarang wul᷊ure dang nukumaiang su se'e. 30Maul᷊i taumata nusumongo si Sie numbawa manga taumata ko pengkadi, ko wuta, ko kesohi, ko bobo, dang maul᷊i l᷊ai ko masasaki ko wal᷊inge. I sire namilo manga taumata e'e su sarung I Yesus, dang i Sie nupakaul᷊e ngu manga taumata e'e. 31Taumata maul᷊i ko ene su se'e naherang suapang nakawua tau ko wowo nakapudidato, ko pengkadi naul᷊e, tau ko kesohi nakaral᷊eng dang tau ko wuta nakawua. Bou e'e i sire nundal᷊o Mawu Ruata ngu tau Israel.
I Yesus nupakang u taumata pau hiwu su kataunge
(Mrk. 8:1-10)
32Bou e'e I Yesus nukumui manga tumatuhu-E bou e'e nangul᷊i, “Ia kumindaghi su taumata maul᷊i i'i. Seng tilu l᷊ou i sire ringang-Ku, dang su orasi i'i i sire seng takoae kang. Ia mandi mamalangi sire mapul᷊e nahutung, tihang i sire mapinsang su l᷊al᷊eng.”
33Bou e'e manga tumatuhu-E nukina si Sie, “Su apa i kite botonge makarea kang su tampa ko nahae i'i guna ngu taumata maul᷊i i'i?”
34“Pirambau boroti si kumu?” I Yesus nukina si sire.
“Pitu,” angkungi sire, “Dingang u kina ko dadio pirambua.”
35Inau I Yesus nangoro si sire pakaiang su tana. 36Bou e'e i Sie nangal᷊a boroti pitu dingang u kina e'e, mbuhue nu tarimakase su Mawu Ruata. Nasue e'e i Sie nangompeng boroti l᷊au kina e'e dingangu l᷊ima-Nge, mbuhue i Sie nunggile e'e su manga tumatuhu-E. Dang i sire namahia su taumata ko maul᷊i e'e. 37Kaul᷊i u taumata e'e nukumang sarang nal᷊aeri. Nasue e'e manga tumatuhu I Yesus nangomol᷊i l᷊umbei ngu wiahi e'e. Kaul᷊ie mborong pitu mbawewe napene. 38Kaul᷊i u koese nukumang su tempo e'e pau hiwu sukataunge, su l᷊ikuru manga kowawine dingang u manga rario.
39Bou e'e I Yesus nangoro taumata maul᷊i e'e pakapul᷊e. Arawe i Sie sisanenge nusumake sakaeng singgisa nakoa sarang wanua Magadan.
المحددات الحالية:
MATIUS 15: LAISXN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
2014 Indonesian Bible Society (Lembaga Alkitab Indonesia)
