MATIUS 14
14
Papatengi Yohanes Mananahani
(Mrk. 6:14-29; Luk. 9:7-9)
1Su tempo e'e i Herodes mangangawasangu soangu Galilea, nakaringihi hal᷊i I Yesus. 2I Herodes nangul᷊i su manga ringange, “Nal᷊ahe i'i mang i Yohanes Mananahani sau nuwiahi! E'e sabapie i Sie pia kawasa mukoa ko makal᷊aherang.”
3 #
Luk. 3:19-20
Watu u su horo u e'e i Herodes nangoro paname si Yohanes dang pangiki si sie mbuhue pasue su tutupang. I Herodes nukoa hal᷊i e'e ual᷊ingi Herodias kawingi Filipus tuaringe sisane. 4#Im. 18:16, 20:21Watu u i Yohanes bou nangul᷊i si Herodes kiri'i: “Tawotonge i kau mukawing si Herodias!” 5Suhinonge i Herodes ko mo mamate si Yohanes, kateho i sie mataku u taumata, watu u i sire mutuhung si Yohanes kere nabi.
6Su tempo ngi Herodes kapusal᷊iwang u hari jadinge, ana i Herodias ko mahua nusal᷊ai su tingo ngu sake. Sal᷊ainge e'e nakapia uha i Herodes, 7hakiu i Herodes nudiandi si sie dingang nutewa, apang ko pundokange, sarung i onggoe si sie.
8Ual᷊ing nil᷊okengi mamange, ana mahua e'e nangul᷊i, “Ia mundo timboi Yohanes Mananahani onggo si sia su orasi i'i taho su baki!”
9Nakaringihi ndo e'e i Herodes dingang nasusa kahingang naunge. Katewe ual᷊ingu i sie seng nutewa su tingo ngu sakenge, i sie nuparenta tadeau ndou ana mahua e'e pakituhuke. 10I sie nuparenta taumata patamai sarang tutupang pamoto timbo i Yohanes. 11Bou e'e timbo i Yohanes niwawa sarang l᷊al᷊unge mapapilo su baki dingang nionggo su ana ko mahua e'e. Bou e'e niwawa sarang koai mamange. 12Bou e'e manga muriti Yohanes nusumongo nangal᷊a mayati Yohanes nil᷊uwing. Mbuhue i sire tamai nuhabaru hal᷊i e'e si Yesus.
I Yesus nupakangu taumata l᷊ima hiwu sukataunge
(Mrk. 6:30-44; Luk. 9:10-17; Yoh. 6:1-14)
13Su tempo-Ngi Yesus nakaringihi habari e'e, i Sie nusakaeng sisanenge nanintang u tampa e'e, nakoa sarang tampa simbau ko mal᷊umpi. Suapang nikaringihu taumata, i sire nanintang u soa ngi sire tamai nul᷊umingang nutumuhu si Yesus. 14Su tempo-Ngi Yesus nal᷊intu bou sakaeng dang nakawua taumata maul᷊i e'e, I Sie nukumindaghi si sire. Bou e'e i Sie nupakaul᷊e ngu taumata masasaki su tal᷊oara i sire.
15Seng kawawul᷊aenge, manga tumatuhu I Yesus nusumongo dang nangul᷊i si Sie, “Seng wawul᷊aeng dang tampa i'i ko nahae. Mapiang i Tuang pangoro manga taumata i'i paral᷊eng, tadeau makapuluang kang i sire su manga soa.”
16“Tahawal᷊uasu i sire paral᷊eng,” angkung I Yesus, “I kumu te pupakang si sire.”
17“Si kami kitang pia boroti l᷊ima mbau dingang u kina dua mbua!” sasimbahu apang tumatuhu I Yesus e'e.
18“Wawae mai,” angkung I Yesus. 19Bou e'e i Sie nangoro taumata maul᷊i pakangiang su ruku. Bou e'e i Sie nangal᷊a boroti l᷊ima mbau dingang u kina dua mbua, nul᷊umingara sarang l᷊angi nupatarimakase su Mawu. Nasue bou e'e i Sie nangompeng boroti e'e dingang u l᷊imang-E dang nangongo su manga tumatuhu-E pakipahia su taumata ko maul᷊i e'e. 20I sire kaul᷊ie nukumang sarang nal᷊aeri. Bou e'e manga tumatuhu I Yesus nangomol᷊i l᷊umbeingu kang e'e; mborong pia mapul᷊o dua su bawewekang napene. 21Taumata ko nukumang su tempo e'e patehang l᷊ima hiwu su kataunge kaul᷊ie su l᷊ikuru manga kowawine dingang u manga rario.
I Yesus nul᷊umal᷊eng su wawou ake
(Mrk. 6:45-52; Yoh. 6:16-21)
22Bou e'e I Yesus nuparenta manga tumatuhu-E pasake su sakaeng dang puhoro pal᷊iu rano, I Sie nundoi taumata maul᷊i e'e pakapul᷊e. 23Sumanga taumata maul᷊i e'e seng nasue napul᷊e, I Yesus nusumaka sisanenge sarang wul᷊ure simbau nukal᷊iomaneng. Sarang nuratingu huwi, I Yesus mang mborong se'e sisanenge. 24Su tempo e'e sakaeng ko nisakenangu manga tumatuhu I Yesus, seng tasae mal᷊auri su tal᷊oarau rano. Sakaeng e'e taghunang mansa punangu l᷊ua, musomahu anging. 25Su wulau pukul᷊i tatilu dingang pukul᷊i nung mal᷊ukari, I Yesus nusumandighi si sire, karal᷊enge su wawou ake. 26Suapang manga tumatuhu-E nakawua si Sie karal᷊enge su wawou ake, i sire nahuwi dal᷊ai-l᷊ai. “Himukuri!” i sire kakihae nataku.
27Arawe I Yesus nusumimbahi, “Pakatatape! Ia i'i I Yesus. Ari kataku!”
28Bou e'e i Petrus nangul᷊i, “Boko i Kau ko I Yesus, parentai te ia paral᷊eng su wawou ake.”
29“Maite” nisimbah I Yesus. Inau i Petrus nul᷊umintu bou sakaeng, nul᷊umal᷊eng su wawo u ake nusumandighi si Yesus. 30Suapang i Petrus nakawua kal᷊auhae anging su rano, i sie nataku dang nanita kawawontol᷊i. “Mawu, tul᷊ung ko!” i sie kakihae.
31I Yesus dingang nangul᷊uhi l᷊imange dang naname si sie, dang nangul᷊i, “Petrus, Petrus, singkodo pangangimangu. Nakurawe i kau sal᷊a ta mangimang si Sia?”
32Bou e'e i sire rua nusumake su sakaeng, anging dingang nalenehi. 33Manga tumatuhu-E nusuba nanumba si Sie. I sire nangul᷊i, “Mang tingari Mawu ko Ahusu Ruata!”
I Yesus nupakaul᷊engu taumata masasaki su Genesaret
(Mrk. 6:53-56)
34Su tempo-Ngi Yesus nahumpa su simbukangu rano, i sire nutumul᷊i su Genesaret. 35Su tempo taumata su se'e nakawua I Yesus nusumongo, i sire namombeng habari e'e suapang tampa masandighu soa e'e. Bou e manga taumata masasaki niwawa sarang koa I Yesus 36I sire nundo si Sie tadeau makapanuhung kakingkaeng-E, maning kitang pondol᷊e. Bou e'e kaul᷊ie ko nakasuhung kakingkaeng-E nasue naul᷊e.
المحددات الحالية:
MATIUS 14: LAISXN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
2014 Indonesian Bible Society (Lembaga Alkitab Indonesia)
