LUCAS 12
12
Te Jesuse la yalbe skꞌoplal te ma-tsaꞌamuk-oꞌtanile
1Jich ora a stsob sbaik tal bayal genteetik te ba ay te Jesuse. Stenten sbaik tal ta stojol. Jich te Jesuse lijk yalbe primero te jnopojeletik yuꞌune:
—Ila me abaik sok te levadura yuꞌun te fariseoetike, jaꞌ bi, jaꞌ te tutꞌil ma tsaꞌamuk yoꞌtanike. 2Porke maꞌyuk te tut nakꞌal te ma xchiknaje sok maꞌyuk tut a te mukul te ma xꞌakꞌot ta aꞌiyele. 3Spisil te tuti awalojik ta ijkꞌal kꞌinale, ya me xꞌaꞌiyot sluwar ta sakil kꞌinal. Jich te tut mukul la awal ta yutil anae, jaꞌ me ya xꞌawutayot ta sbaba nantik.
Machꞌa a te ya skꞌan xiꞌele
4Te jaꞌex, te kamigo jbatike, ya kalbeyex ma me xiꞌanik yuꞌun te machꞌa ya smilbeyex te atibalulike, pero ta patil maꞌyuk tut ya xjuꞌ ya spasbeyex xan. 5Joꞌon ya kalbeyex te machꞌa ya skꞌan ya axiꞌike: Jaꞌ me xꞌaxiꞌik te machꞌa ya xjuꞌ yuꞌun ya smilate sok te ay yaꞌtel te ya xjuꞌ ya yakꞌex bael ta kꞌajkꞌ te ma xtupꞌ sbajtel kꞌinale. Batsꞌi jich ya kalbeyex: Jaꞌ me xꞌaxiꞌik stukel.
6¿Meꞌn ma wan chebuk pesu stojol ta chonel te joꞌkojt chꞌin mutetike? Pero ni jkojtuk ya xchꞌay ta yoꞌtan te Diose. 7Jich euk te jaꞌexe, asta te stsotsil ajolike ajtabil yuꞌun ta jujulijk. Jaꞌ yuꞌun ma me xiꞌanik te jaꞌexe. Mas me tulan akꞌoplalik ta yoꞌtan ke te chꞌin mutetike.
Aꞌ me kaltik ta jamal te jchꞌuunejtik te Jesucristoe
8“Ya kalbeyex, te machꞌa jamal ya yal ta stojol genteetik te tutꞌil joꞌon yajwalone, jich euk te Nichꞌanile, jamal me ya yal ta stojol te chꞌul angeletik yuꞌun te Diose te tutꞌil ay ta skuentae. 9Yan te machꞌa ma jamaluk ya yalon ta stojol te genteetike, jich euk te joꞌone ma jamaluk ya kal ta stojol te chꞌul angeletik yuꞌun te Diose.
10Dios ya spasbot perdon yuꞌun te machꞌa ya skontra-kꞌoptay te Nichꞌanile. Yan te machꞌa ya stoyba-kꞌoptay te Chꞌul Espiritue ma xjuꞌ ya spasbot perdon yuꞌun stukel.
11“Te kꞌalal ya yikꞌelex bael ta sinagogaetike, o teme ya stejkꞌanelex ta stojol te alkaletike, sok ta stojol te juꞌeletike, ma me xꞌawakꞌ yajtal awoꞌtanik yuꞌun te tut ya skꞌan ya ajakꞌbeyik te skꞌopike sok te tut xkꞌo awalike. 12Porke te kꞌalal ya sta yorail te ya xkꞌopojexe, te Chꞌul Espiritue ya me yaꞌbeyex anaꞌik te tut xkꞌo awalike —xchi te Jesuse.
Ay peligro yuꞌun te kꞌulejalile
13Ay jtul winik ta yolil te genteetike la yalbe te Jesuse:
—Maestro, albeya te jbankile te yauk yaꞌbon oliluk euk te tut yakꞌojbon sok jilel te jtate —xchi.
14Te Jesuse la sjakꞌbe:
—Kere, ¿meꞌn ay machꞌa yakꞌojbon kaꞌtel ta xchapel o ta xatꞌel te stutik yuꞌun atate? —xchi.
15Sok la yaltalanbe:
—Ila me abaik te jaꞌexe, ma me xbikꞌta awoꞌtanik yuꞌun te kꞌulejalile. Porke ma jaꞌuk ya xkuxuyinat yuꞌun teme ay bayal tut ay awuꞌune —xchi te Jesuse.
16Jich a lijk yaltalanbe seña-kꞌop:
—Ay jtul jkꞌulej winik te lom bayal skꞌal te lom lek a lokꞌ te skosechae. 17Te jkꞌulej winike lijk ta pensar: “¿Tut ya skꞌan ya jpas? Yuꞌun maꞌyuk ba ya jkꞌej te jkosechae.” 18Nojp yuꞌun tsꞌiin: “Te ora to la jnaꞌix tut ya jpas. Ya me jim spisil te yawil kixime. Ya me jpas mas mukꞌ. Yuꞌun teꞌ ya jkꞌej spisil a te jkosechae sok spisil te tutik ay kuꞌune. 19Y ya me kalbe te jchꞌulele: ‘Jchꞌulel, bayalix te tut kꞌejel awuꞌune, yuꞌun ya xtuun awuꞌun bayal jaꞌbil. Ya jkux koꞌtantik. Weꞌukotik, uchꞌaukotik. Ben junuk koꞌtantik yuꞌun’”, xchi ta yoꞌtan. 20Pero albot yuꞌun te Diose: “Ma xꞌanaꞌ kꞌinal. Mismo ajkꞌubal to ya me xchamat. Spisil te tut kꞌejbil awuꞌune, ¿machꞌa me ya yichꞌbeyat jilel?” xchi te Diose. 21Jich me ya xkꞌot te winik teme jaꞌ nax baem yoꞌtan stsobel te skꞌulejal te ya xtuun yuꞌun stukel naxe, pero meꞌbaꞌ ta stojol Dios —xchi te Jesuse.
Dios ya skanantay te yal-xnichꞌane
22Ta patil te Jesuse jicha yalbe te jnopojeletik yuꞌune:
—Jaꞌ sluwar te ya kalbeyexe, ma me xꞌawakꞌ yajtal awoꞌtanik yuꞌun te tut ya xkuxuyinexe, ni te tut ya aweꞌike ni te akꞌuꞌ-apakꞌik te ya alapike. 23Jaꞌ mas tulan skꞌoplal te akuxlejalike ke te tut ya aweꞌike. Y mas tulan skꞌoplal te atibalulike ke te akꞌuꞌ-apakꞌike. 24Ila awilik tut kuxajtik te jokjok mutetike. Makꞌ xꞌawalejik, sok ni makꞌ xkꞌajojinik, sok maꞌyuk yawil yiximik, sok maꞌyuk yawil stutik yuꞌunik. Pero jaꞌ makꞌlilanbil yuꞌun te Diose. Yan te jaꞌexe mas baleex ke te mutetike. 25Sok ¿meꞌn ya wan xjuꞌ awuꞌun te ya anajtꞌutes aba xan chꞌin kꞌaxem chaꞌjot teme lom yajtal awoꞌtan te lom kꞌoxate? 26Teme ma xjuꞌ awuꞌun spasel te tut chꞌin skꞌoplale, ¿tuꞌun te ya awakꞌ yajtal awoꞌtan yuꞌun te yan tutike?
27“Ila me awilik te tutꞌil ya xchꞌi te nichimetike. Makꞌ xꞌaꞌtejik ni makꞌ sjal skꞌuꞌ-spakꞌik. Pero ya kalbeyex manchuk me ben tsaꞌam te skꞌuꞌ-spakꞌ te rey Salomone, pero maꞌ spajbe tsaꞌamul te nichim to. 28Yuꞌun teme Dios a yakꞌ te ben tsaꞌam te xnichimul te witse y ta pajel chijkꞌix ta yawil kꞌajkꞌ a, ¿me yuꞌun wan ma jichuk ya skꞌuꞌultesex te jaꞌexe? Genteex te ma xchꞌuun awoꞌtanike. 29Jaꞌ yuꞌun te jaꞌexe ma me xꞌawakꞌ yajtal awoꞌtanik sleel te tut ya aweꞌ sok ya awuchꞌike. 30Porke spisil te tutik to jaꞌ nax baem ta yoꞌtanik sleel te machꞌatik ma snaꞌbe sba te Diose. Yan te jaꞌexe ay jtul Atatik te snaꞌoj te tutik ya xtuun awuꞌunike. 31Te jaꞌexe jaꞌ me xꞌawajwalinik stukel te Diose, y ya me awichꞌik spisil te tutik to.
Kꞌulejalil ta chꞌulchan
32“Ma me xiꞌanik, karneraetik kuꞌun, jaꞌex te ma bayalukexe. Te Jtatike ben jun yoꞌtan ya yakꞌex teꞌa te ba ya xmantaleje. 33Chonaik te tut ay awuꞌunike, y kꞌebenbeya te meꞌbaꞌetike. Leaik yawil atakꞌinik te ma xꞌixtaje. Kꞌejaik ta chꞌulchan te akꞌulejalik te makꞌ xlaje, te makꞌ xꞌoch elekꞌ aye, sok te ba makꞌ xjochꞌube. 34Yuꞌun te ba kꞌejbil te akꞌulejalike, teꞌuk me ay ekꞌa te awoꞌtanike.
Chapalukotik me
35Chapalukex me sil tiempo sok tilemuk akꞌajkꞌik kꞌoem. 36Jichukex me te tutꞌil te jꞌaꞌteletik te chapajtik ta smaliyel te yajwalik te baem ta il-nujpunele, te ora ya sjeꞌbeyik te stiꞌpuerta te kꞌalal ya xjul skꞌojkꞌutay te puertae. 37Ben tsaꞌam slekil te jꞌaꞌteletik te kuxul yoꞌtanik ya xjul taek yuꞌun te yajwalike. Jamal ya kalbeyex, te yajwalike ya me xchap sba, ya me yakꞌ sba ta mantaltesel yuꞌunik, ya me yikꞌ tal ta mexa, y ya me xꞌaꞌbot sweꞌelik yuꞌun. 38Ben tsaꞌam slekilik teme kuxul yoꞌtanik ya xjul tajtalaneke manchuk me ta ol ajkꞌubal o ta nopol sakub xjul tajtalanek te jꞌaꞌteletike. 39Naꞌbeyaik me sluwaril to: Jich tutꞌil te yajwal nae te yauk snaꞌ tut ora xtal te jꞌelekꞌe, ma xyakꞌ ta jeꞌel te sna te jichuke, yuꞌun makꞌ xꞌelkꞌanbot bael te stutik yuꞌune. 40Jich euk te jaꞌexe, chapalukex me ta maliwanej, porke te Nichꞌanile, jaꞌ ya xtal a te makꞌ ya amaliyik aye —xchi te Jesuse.
Te lekil jꞌaꞌtele sok te ma lekil jꞌaꞌteluke
41Te jPedroe la sjojkꞌoy:
—Kajwal, ¿me joꞌotik nax ya awalbotik te seña-kꞌop to, o ta spisil ya awalbe te yan xane? —xchi.
42La yal te Kajwaltike:
—Te lekil jkanan te ay spꞌijil yoꞌtane, ya xꞌaꞌbot ta skuenta te tutik ay yuꞌun ta sna te yajwale, yuꞌun ya spukbey te tutik ya sweꞌik te juju-chꞌoj te ya yichꞌike. 43Ben me tsaꞌam slekil te aj-aꞌtelil te jich yipal ta spasel a te kꞌalal ya xjul taek yuꞌun te yajwale. 44Batsꞌi jich ya kalbeyex, te yajwale ya me yaꞌbe skanantay spisil te tutik ay yuꞌune. 45Pero te aj-aꞌtelile teme lijk yal ta yoꞌtan: “Ma to wan xtal ta ora te kajwale”, tem xchie, ya xlijk yutalan te yan jꞌaꞌteletike sok te kriaraetike, y ya xlijk ta weꞌel uchꞌajel sok ta yakꞌubel. 46Ja skꞌaalel a te makꞌ smaliye, sok te tut ora chꞌayem yoꞌtan ta smaliyel aye, ya xkꞌot te yajwale. Ya me yaꞌbe kastigo. Teꞌ me ya xbajt a te ba ya xbajt te machꞌatik te ma xchꞌuunejuk te Diose.
47Jich te jꞌaꞌtele te snaꞌoj te tut ya skꞌan yoꞌtan te yajwale pero ma chapaluk ni ma xchꞌuun, ya me xꞌaꞌbot stoj ta majel. 48Yan te jꞌaꞌtel te ma snaꞌojuk te tut ya skꞌan yoꞌtan te yajwale, te jaꞌ a spas te tut ay kastigo yuꞌune, chꞌin nax me ya stoj ta majel stukel. Te machꞌa bayal tut ya xꞌaꞌbote, bayal me te tut ya xkꞌambote. Jich euk te machꞌa bayal tut ya xꞌaꞌbot skanantaye, jich me bayal ya xkꞌambot sujtel stukel.
Te Jesuse ya yakꞌ xjatꞌ sbaik te genteetike
49Tal kakꞌ tiluk kꞌajkꞌ ta balmilal. Koꞌtanuk te tilemixe. 50Pero puersa me ya xkꞌax bayal jwokol nailuk. Beno yajtal koꞌtan yuꞌun. Koꞌtanuk te kꞌaxemukixe. 51¿Meꞌn ya akuyik te tal kakꞌ bujtsꞌan kꞌinal ta balmilale? Ya kalbeyex te ma jichuke. Tal kakꞌ xjatꞌ sba te genteetike. 52Jaꞌ yuꞌun liꞌ nax kꞌalal to te ba ay joꞌtul ta snaike, ya me xjatꞌ sbaik. Te oxtule ya me skontrain te chaꞌtule, y te chꞌatule ya me skontrain te oxtule. 53Te tatile ya skontrain te xnichꞌane. Te nichꞌanile ya me skontrain te state. Te meꞌile ya me skontrain te yantsil-ale. Te yantsil-ale ya me skontrain te smeꞌe. Te meꞌalibale ya me skontranin te yalibe y te alibale ya me skontrain te smeꞌ yalibe —xchi te Jesuse.
Te señaetik tut ay te tiempoe
54Te Jesuse la yaltalanbe te genteetike:
—Kꞌalal ya awilik te ay tokal te ba xchꞌay bael kꞌajkꞌale, jich ya awalik te ya xtal jaꞌale, y jich ya xkꞌot ta pasel. 55Y te kꞌalal ya xtal ikꞌ ta stojil sur, jich ya awalik: “Lom kꞌux kꞌajkꞌal yoꞌtik”, xchaꞌex, y jich ya xkꞌot ta pasel. 56Te jaꞌexe, te ma tsaꞌamuk awoꞌtanike, teme ya anaꞌik yilel tut ay te chꞌulchan y sok te balmilale, ¿tuꞌun tsꞌiin te ma xꞌanaꞌik tut yipal ta kꞌoel ta pasel te ora to?
Chapa aba sok te kontrae
57“¿Tuꞌun te ma xjuꞌ awuꞌunik snopel te tut lek ta pasele? Teme ay machꞌa ya yikꞌat bael te ba ay te jꞌuꞌeletike, chapa aba sok nailuk mientras ay to tiempo, yuꞌun makꞌ yikꞌat bael a te ba alkale. 58Porke te mauke, te alkale ya yakꞌat bael entregal ta skab te mayole, y te mayole ya me yotsesat ta prexo. 59Ya kalbeyat, ma me xlokꞌat tal teꞌa jaꞌ to teme tsꞌakal la atoj te amultae —xchi te Jesuse.
المحددات الحالية:
LUCAS 12: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
