LUCAS 13
13
Ben tulan skꞌoplal te ya sujtes koꞌtantik yuꞌun te jmultike
1Mismo tiempo a, ay machꞌatik a tal yalbe te Jesuse te tutꞌil ay te Galileaetik te ba miltalanek yuꞌun te jPilatoe. Teꞌ malbot xchꞌichꞌel a te ba yipalik ta smilbeyel smajtan te Diose. 2Te Jesuse la yaltalanbe:
—¿Meꞌn akuyojik te mas ay smul stukelik te tutꞌil ay smul te yanetik slumale te jicha kꞌot ta skuentaike? 3Ya kalbeyex te ma jichuke. Jich teme ma xꞌasujtes awoꞌtanik ta stojol Dios te jaꞌexe, jich me ya xlajex euk. 4¿Akuyojik wan te mas ay smulik te machꞌatik ayik ta Jerusalen te ay diesiocho ta jtul chamik ta tentalanel te kꞌalal jimta koel te torre yuꞌun te Siloee? 5Ya kalbeyex te ma jichuke. Jich teme ma xꞌasujtes awoꞌtanik ta stojol Dios te jaꞌexe, jich me ya xlajex euk —xchi te Jesuse.
Seña-kꞌop te ikux-teꞌ te ma xyakꞌ site
6Te Jesuse la yaltalanbe te seña-kꞌop to:
—Ay jtul winik stsꞌunoj ta slum jpejt ikux-teꞌ, y ba yil teme ay site. Pero maꞌyuk a stabe. 7Jich a yalbe tsꞌiin te winik te jkanane: “Ila awil, ayix oxeꞌ jaꞌbil te ya xtalulanone yuꞌun ya kilulan me ya sitin te ikux-teꞌe. Pero ni maꞌyuk ya jtabe sit. Jaꞌ yuꞌun, tsꞌeta lokꞌel, yuꞌun ma lomuk nax smakoj kꞌinal liꞌ ba lume”, xchi. 8Pero la yal te machꞌa skanantayej te lume: “Kajwal, jilesa to junuk jaꞌbil teꞌa. Ya to jokꞌbe slumil, sok ya to kaꞌbe kurtibo. 9Jich wan ya yakꞌ sit. O teme ma yakꞌ site, ya xjuꞌ ta tsꞌetel lokꞌel”, xchi —xchi te Jesuse.
Te Jesuse la slekutes jtul ants te kꞌujul spate ta skꞌaalel kuxo-oꞌtan
10Te Jesuse ba nojpeswanuk ta sinagoga ta skꞌaalel kuxo-oꞌtan. 11Ay jtul ants teꞌa te ayix diesiocho jaꞌbil te ay chamel ta stiꞌbalule te kꞌujanbil spat yuꞌun pukuj te ma spas ya xjach sbae. 12Kꞌalal la yil te Jesuse, la yikꞌ tal y la yalbe:
—Ants, kolatix yuꞌun te achamele —xchi. 13Jich a skajambe skꞌab ta sjol, y ora tojob spat te antse. Lijk yalbe kola yal Dios yuꞌun.
14Pero te machꞌa yichꞌoj yaꞌtel ta statalil te ba sinagogae ilin yuꞌun, yuꞌun te Jesuse la slekutes ta skꞌaalel kuxo-oꞌtan. La yalbe te genteetike:
—Ay wakeꞌ kꞌaal te ya xꞌaꞌtejotike. Jaꞌ ya xtalex a te ya awakꞌ abaik ta lekutesel yuꞌun te achamelike. Ma me jauk a te skꞌaalel kuxo-oꞌtane —xyut.
15Te Kajwaltike la yalbe:
—Jaꞌex te ma tsaꞌamuk awoꞌtanike, ¿meꞌn ay wan jtuluk te jaꞌexe te makꞌ ya apolik ta skꞌaalel kuxo-oꞌtan te awakaxike sok te aburuike te ya xba awaꞌbeyik tal yuchꞌ jaꞌe? 16Yuꞌun te ants to, te jaꞌ stsꞌumbal te jꞌAbrahame, ayix diesiocho jaꞌbil te chukbil ta chamel yuꞌun te pukuje. ¿Meꞌn ma wan lekuk te la yichꞌ koltayel te skꞌaal kuxo-oꞌtane? —xyut.
17Te kꞌalal jich a yal te Jesuse, kꞌexaw spisil te skontratake. Pero spisil te genteetike ben kontentoik yuꞌun te la yilbeyik te ben tsaꞌam y mukꞌ te tut ya spas te Jesuse.
Seña-kꞌop te sbakꞌ mostesia
18Te Jesuse la yal xan:
—¿Tut a te pajal kꞌoem sok te tutꞌil ya xkꞌot ta ajwalinel te Diose? ¿Tut ya jpajtik sok a? 19Jaꞌ pajal kꞌoem sok te sbakꞌ mostesia te ya stsꞌun ta skꞌal te jtul winike. Ya xchꞌi y mukꞌ ya xkꞌot te steꞌele. Te teꞌtikil mutetike ya xtal spas xpechechik te ba skꞌab kaꞌbe —xchi.
Seña-kꞌop te levadura
20La yal xan te Jesuse:
—¿Tut a te pajal kꞌoem sok te tutꞌil ya xkꞌot ta ajwalinel te Diose? 21Jaꞌ pajal kꞌoem sok te levadura te ya skap ta oxpꞌis jarina te antse, jaꞌto teme sijt ta swolol te matsꞌe —xchi.
Te puerta te yub naxe
22Te kꞌalal yipal kꞌael ta beel ta Jerusalen te Jesuse, yipal kꞌael ta pꞌijuteswanej te ba jtejklumetike sok ba kolonyaetike. 23Ay jtul machꞌa jojkꞌobot yuꞌun:
—Kajwal, ¿me ajtabil nax wan te machꞌa ya xkolike? —xchi.
La sjakꞌ te Jesuse:
24—Akꞌaik puersa te ya xꞌochex bael te ba puerta te yub nax. Ya me kalbeyex: Ay me bayal machꞌatik yoꞌtanuk ya skꞌan xꞌochik teꞌa, pero ma xjuꞌ yuꞌunik. 25Patil teme la stsꞌus stiꞌ spuerta te yajwal nae, jaꞌex te ayex ta jwerae jich ya xlijk awalik: “Kajwal, jeꞌbotik te puertae”, ya me awutik. Pero ya yalbeyex te yajwal nae: “Ma jnaꞌ ba talemex te jaꞌexe”, ya me yutex. 26Jich me ya xlijk awalik tsꞌiin: “Ay a joyin jbatik ta weꞌel-uchꞌajel, sok jaꞌat la apꞌijutesotik ta skayail te jlumaltike”, ya me awutik. 27Pero te yajwal nae ya me sjakꞌbeyex: “Ma jnaꞌ ba talemex. Kꞌeja abaik ta jtojol, jaꞌex te yipalex ta spasel te tut ma tsaꞌamuke”, ya me yutex. 28Teꞌ me ya awokꞌetay abaik a, y teꞌ me ya akꞌuxilan aweik a te tutꞌil ya awilik te jꞌAbrahame te jꞌIsaake, te Jacobe sok spisil te antibo jꞌalwanejetik te teꞌ ayik te ba ay ta ajwalil te Diose. Yan te jaꞌexe chꞌojbilex lokꞌel ta jwera. 29Porke ya me xtal gente ta stojil norte sok ta stojil sur sok ta stojil ba xchꞌay kꞌajkꞌal sok ta stojil ba xlokꞌ kꞌajkꞌal. Ya me xꞌoch najkajikuk ta weꞌel te ba ay ta ajwalil te Diose. 30Jich te machꞌatik mukꞌ ayik ta primeroe, chꞌin me ya xkꞌoik. Yan te machꞌatik chꞌin ayik ta primeroe, mukꞌ me ya xkꞌoik ta patil stukelik —xchi te Jesuse.
Te Jesuse la yokꞌetay te Jerusalene
31Jich mismo kꞌaal a ay fariseoetik a laj kꞌot y la yalbeyik te Jesuse:
—Lokꞌan bael liye, yuꞌun te jHerodese yoꞌtanuk ya smilat —xchiik.
32Te Jesuse la sjakꞌtalanbe:
—Ben mañoske me to. Ban albeyaik: “Te ora to sok pajel ya to slokꞌes pukujetik sok ya to slekutes jchameletik. Chaꞌbej to wan laj ya xlaj yoꞌtan”, uta me. 33Porke ya to me xbeenon te ora to sok pajel sok chaꞌbej. Yuꞌun ma xjuꞌ te yan ba ya xlaj jtuluk jꞌalwanej yuꞌun te Diose; puersa me teꞌ ya xlaj te ba Jerusalene.
34“Jerusalen, Jerusalen, te kꞌayemat ta smilel te jꞌalwanejetik yuꞌun te Diose, sok kꞌayemat ta xchꞌojel ta ton te machꞌatik tikonlanbil tal yuꞌun Dios ta atojolike. Bayal buelta te kꞌan jtsob te awal-anichꞌanike jich tutꞌil ya stsob xchꞌinik yal ta yanil xikꞌ te mute, pero ma la akꞌanik. 35Yotik to ya kalbeyex awaꞌiyik: Te alumalike ya me xchꞌojot jilel. Sok ya kalbeyex te makꞌ ya awilbikonix jsite jaꞌ to teme ya sta yorail te jich ya awalike: “Ben me tsaꞌam slekil te machꞌa tikonbil tal yuꞌun te Kajwaltike”, teme xchaexe —xchi te Jesuse.
المحددات الحالية:
LUCAS 13: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
