LUCAS 11
11
Te Jesuse nojpeswan ta skꞌoponel Dios
1Ay jun buelta yipal ta skꞌoponel Dios te Jesuse ta jun luwar, kꞌalal laj yoꞌtane albot yuꞌun jtul jnopojel:
—Kajwal, nojpesaotik ta skꞌoponel Dios euk, jich tutꞌil te Juane la snojpes te jnopojeletik yuꞌune —xchi.
2Altalanbot yuꞌun te Jesuse:
—Te kꞌalal ya akꞌoponik te Diose
jich me xꞌawalik to:
Jtatik Dios te ayat ta chꞌulchane, aꞌ me chꞌuunekix ta lek te achꞌul-biile. Aꞌ me staix skꞌaalel te ya xꞌochat ta ajwalil. Laꞌ me pasa te tut ya skꞌan awoꞌtan ta balmilal jachik tutꞌil ta chꞌulchane.
3Aꞌbotik me tal te tutik ya jweꞌtik ta jujun kꞌaale.
4Aꞌbotik me perdon yuꞌun te jmultike jachik tutꞌil te ya jpasbeytik perdon yuꞌun te machꞌa ya sta smul kuꞌuntike. Y ma me xꞌawakꞌ mulawukotik. Koltayaotik me te ba tut ma tsaꞌamuke, xchaex me,
—xchi te Jesuse.
5Sok altalanbot xan yuꞌun te Jesuse:
—Jich tutꞌil to, teme ay jtul awermano ya xba akꞌopon te sna ta ol ajkꞌubal: “Hermano, ya jmajantik oxpejchuk awot, 6yuꞌun ay jtul kermano julel to ta jna. Lijk tal ta beel, y maꞌyuk tut ay kuꞌun yuꞌun ya kaꞌbe”, te ya awute. 7Ta yut sna ya sjakꞌbeyat akꞌop, ya yalbeyat: “Ma awulilanon, yuꞌun tsꞌusulix te jpuertae, yuꞌun wayalotikix sok te kuntikile sok te joꞌone. Ma spas xjajch kaꞌbeyat te tut ya akꞌane”, ya yutat. 8Ya kalbeyat, manchuk me ma skꞌan xjajch yaꞌbeyat te tut ya akꞌambey te awermanoe, pero puersa me ya yaꞌbeyat te tut ya akꞌambeye yuꞌun makꞌ awulilanix a. Y ya me yaꞌbeyat spisil te tut ya xtuun awuꞌune. 9Jaꞌ yuꞌun ya kalbeyex: Kꞌambeyaik te Diose, jich me ya yaꞌbelex. Leaik te tut ya akꞌanike, jich me ya ataik ta leel. Kꞌopojanik ta tiꞌpuerta, jich me ya sjeꞌbeyex te Diose. 10Porke te machꞌa ay tut ya skꞌambe te Diose, ya me xꞌaꞌbot yuꞌun. Sok te machꞌa ya sle te tut ya skꞌane, ya me sta. Sok te machꞌa ya xkꞌopoj ta tiꞌpuertae, ya me xjeꞌbot.
11“¿Me ay wan jtulukex te jaꞌex te tatilexe meꞌn ton ya awaꞌbey sweꞌ te anichꞌan teme ya skꞌambeyat yote? ¿Sok meꞌn chan ya awaꞌbe sweꞌ teme chay te skambeyate? 12¿Sok meꞌn tsek ya awaꞌbe teme tomut ya skꞌambeyate? 13Jich te jaꞌexe manchuk me ma tsaꞌamuk te awoꞌtanike, pero ya anaꞌik yakꞌel te tut a te lek ta stojol te awal-anichꞌanike. ¿Jaꞌuk to xan wan a te Jtatik te ay ta chꞌulchane? Ya me yaꞌbeyex te Chꞌul Espíritu te machꞌa ya skꞌambeye —xchi te Jesuse.
Ya yalbeyik skꞌoplal te Jesuse te yichꞌojbe spoder te pukuje
14Te Jesuse la slokꞌesbe pukuj ta yoꞌtan jtul winik te ma xlokꞌ skꞌop yuꞌune. Te kꞌalal lokꞌ te pukuje lijk lokꞌuk skꞌop te umaꞌe. Te genteetike toj cham a yaꞌiyik yuꞌun. 15Ay yan ya yalik:
—Te winik to ya slokꞌes pukujetik ta skuenta Beelzebu te mero tatil yuꞌun te pukuje —ay xchiik.
16Sok ay yan lijk skꞌambeyik seña smilagro ta chꞌulchan te Jesuse yuꞌun ya yilbeyik yoꞌtan. 17Pero te Jesuse la snaꞌbe sluwar te tut ya yal ta yoꞌtanike. La yaltalanbe:
—Spisil te machꞌatik jun nax yaj-presidenteike teme lijk xat sbaike sok teme ya xlijk skontrain sbaike, jich me ya yixlan sbaik ta stukelik nax a. Y teme lijk xjat sbaik spisil te machꞌatik jun nax snaike, jich ya sjim sbaik a. 18Jich ekꞌa te pukuje teme ya xlijk skontrain sbae, ¿Tutꞌil kꞌan jalajuk ta aꞌtel sok spoder teme jichte? Te tutꞌil jich ya kalbeyexe, jaꞌ yuꞌun te ya awalbikon te yipalon ta slokꞌesel pukuj ta spoder te Beelzebue. 19Pero teme jich aye, ¿machꞌa ta skuenta te ya slokꞌes pukujetik te jnopojeletik awuꞌunike? Por eso jaꞌ yuꞌun ta skuenta te jnopojeletik awuꞌunike te chikan a te ma jichuk te tut ya awalike. 20Pero te ya jlokꞌes te pukujetike, jaꞌ nax ta skuenta spoder te Diose. Jich chikanix ta jamal a te ayix ta ajwalil ta awolilik te Diose.
21“Teme ay jtul kꞌajkꞌal winik te lek xchapoj sba ta skanantayel te snae, makꞌ xꞌelkanbot te stutik yuꞌune. 22Pero teme tal jtul xan winik te mas to kꞌajkꞌe, ya me stsalot yuꞌun, sok ya me xpojbot bael te tut yichꞌoj te jaꞌ yipinej yoꞌtane. Jich me ya xꞌichꞌbot bael te stutik yuꞌune.
23“Te machꞌa maꞌyuk ta jtojole, yuꞌun nanix skꞌontrainejon abi. Te machꞌa makꞌ soyinon ta tsobawe, jaꞌ jimaw abi.
Te pukuje ya xchaꞌoch xan te ba lokꞌem tal
24Kꞌalal ya xlokꞌ ta yoꞌtan gente te pukuje, ya xbeen ta takin kꞌinal, ya sle ba ya xkux yoꞌtan, pero ma sta. Jich ya xlijk snop: “Ya me sujton bael ta jna te ba lokꞌemon tale”, xchi. 25Te kꞌalal ya sujt bale, ya xkꞌo sta te yoꞌtan te winike jich tutꞌil na te lek jojchotesbil y lek mesbil. 26Jich ya xba sle xan tal jukeb xan sjoy te mas pewor te tutꞌil ay stukele. Y spisilik ya xꞌoch snaimbeyik yoꞌtan te gentee. Mas pewor ya sujt te gentee ke te tutꞌil ay te nail toe —xchi te Jesuse.
Te machꞌatik ben jun yoꞌtanik ta stojol Diose
27Yipal to ta yalel a te kꞌop to te Jesuse, ay jtul ants ta yolil te genteetike tulan a kꞌopoj:
—Ben tsaꞌam slekil te ants te la yalatayate sok te la stsꞌijtesate —xchi ta kꞌop.
28Te Jesuse la sjakꞌ:
—Jaꞌ ben tsaꞌam slekil te machꞌatik ya yaꞌibeyik sluwaril te skꞌop Diose, y ya xchꞌuunik —xchi.
Te genteetik ya skꞌan yilik junuk seña smilagro
29Te genteetike sigue ya stsob sbaik tal te ba ay te Jesuse. Y jicha lijk yaltalanbe:
—Te genteetik te ora to ma tsaꞌamuk yoꞌtanik ya skꞌan yilik junuk seña milagro, pero ma xꞌaꞌbot. Jaꞌ nax seña ta stojolik kꞌoem te Jonas te antibo jꞌalwanej yuꞌun te Diose. 30Te Jonase jaꞌ seña akꞌot ta stojol te jniniveetike. Jich euk te Nichꞌanile, jaꞌ seña kꞌoem ta stojolik te genteetik te kuxulik te ora to. 31Te tut kꞌaalil te ya xꞌilbot tut yilel yaꞌtelik te genteetik te kuxulik te ora to, teꞌ me ay ekꞌa te ants te ay ta reyil ta nasion ta stojil sur. Jaꞌ me ya xꞌalbot smulik yuꞌun. Porke te antse lom jakal a tal ta yaꞌibeyel sluwar spꞌijil skꞌop te Salomone. Yan te ora to liꞌ ay te machꞌa mukꞌ yuꞌun te Salomone. 32Sok teꞌ me ayik ekꞌa te jniniveetike. Jaꞌ me ya yalbeyik smul kꞌoem euk te genteetik te kuxajtik te ora to, porke te jniniveetike la sujtes yoꞌtanik yuꞌun smulik te kꞌalal la yaꞌiyik te skꞌop Dios te albot yuꞌun te Jonase. Yan te ora to liꞌ ay te machꞌa mukꞌ yuꞌun te Jonase.
Te tut ya yil kꞌinal a te jtiꞌbalultike
33Maꞌyuk machꞌa ya stsun jun lampara te ya xba snakꞌ ta jun luware, ni ta yutil junuk kajon. Toyol ya sojkꞌan yuꞌun jich ya yil kꞌinal a te machꞌa ya xꞌoch ta snae. 34Te asitike jich kꞌoem tutꞌil luz te ya yil kꞌinal a te atibalulike. Teme lek ay te asitike, skojtol atibalul sakubenix kꞌinal ta stojol. Yan teme ma tsaꞌamuk te asite, skojtol te atibalule ay ta ijkꞌal kꞌinal. 35Ila me abaik te sakil kꞌinal te ayix ta akuentaike ma me sujt ta ijkꞌal kꞌinal. 36Teme skojtol atibalul te ayat ta sakil kꞌinal soke, teme maꞌyuk chꞌinuk ijkꞌal kꞌinal ae, jich me lek ya awil kꞌinal a, jich tutꞌil teme tilem ta atojol te lamparae —xchi te Jesuse.
Te Jesuse la stabe ta alel smulik te fariseoetike sok te maestroetik yuꞌun te mantaliletike
37Kꞌalal laj yoꞌtan ta kꞌop te Jesuse, ay jtul fariseo la yikꞌ bael ta weꞌel ta sna. Jicha och bael teꞌa te Jesuse, nakajtik kꞌoel ta weꞌel ta mexa. 38Te fariseoe lijk yal ta yoꞌtan te ma tsaꞌamuk a yil yuꞌun te ma spok skꞌab nailuk jich tutꞌil te skostumbreik te ya xlijkik ta weꞌele. 39Te Kajwaltike la yalbe:
—Te jaꞌex fariseoexe, jaꞌ nax ya asapbeyik spat te posiyoetike sok te platoetike. Pero te yutil awoꞌtanike nojel ta sbikꞌtal-oꞌtanil sok te tut ma tsaꞌamuke. 40Ma xꞌanaꞌik kꞌinal. Te machꞌa la spasbe spat te posiyoe, jaꞌ a spasbe euk te yutile. 41Te jaꞌexe kꞌebanaik te tut kꞌejbil awuꞌunike, jich me lek sapbil spisil a te spate sok te yutile.
42“Te jaꞌex fariseoexe, oꞌol me abaik, porke ya awaꞌbeyik smajtanin Dios jun ta slajunebal te atulpimilike, sok te alutaike, y spisil ta jkaj te abokike. Yan te tutik lek ta pasel ta stojol te yane, sok te ya skꞌan te kꞌux ya kaꞌitik ta koꞌtantik te Diose, chꞌayem ta awoꞌtanik stukel. Jaꞌ to jaꞌ ya skꞌan ya apasik, sok euk te tut yipalex ta spasele.
43Te jaꞌex fariseoexe, oꞌol me abaik, porke jaꞌ ben anujtsojik te primero naktajibale yuꞌun te sinagogaetike, yuꞌun jaꞌ ya akꞌanik te ya yakꞌelex ta jkuenta ae. Sok ben sniꞌ xꞌawaꞌiyik te ya yujtsꞌibelex akꞌabik ta sitil komon te ba parkee.
44Oꞌol me abaik, maestroetik yuꞌun te mantaliletike, sok jaꞌex fariseoetik, jaꞌex te ma tsaꞌamuk awoꞌtanike. Jich kꞌoemex tutꞌil te sba anima te ma chikanuk ta ilele, jun yoꞌtanik ya xkꞌaxik ta beel teꞌa te genteetike, yuꞌun makꞌ snaꞌ teme sba animae —xchi te Jesuse.
45La sjakꞌ tal jtul maestro yuꞌun te mantaliletike:
—Maestro, te tutꞌil jich la awale, joꞌotik la ataotik ta utel euk —xchi.
46La yal te Jesuse:
—Te jaꞌex maestroetik yuꞌun te mantaliletike, oꞌol me abaik euk, porke te ijkatsil ya awaꞌbey xkuch te genteetike maꞌyuk machꞌa xlijk yuꞌun. Yan te jaꞌexe ni jchꞌixuk yal akꞌabik ya akꞌan ya apikik chꞌinuk.
47Oꞌol me abaik jaꞌex te ya achapulambeyik sba smukemal te antibo jꞌalwanejetik yuꞌun Dios te la yichꞌik milel yuꞌun te antibo ameꞌ-atatike. 48Jich ya awakꞌik ta ilel te tutꞌil ben sniꞌ xꞌawaꞌiyik te tut spasik te antibo ameꞌ-atatike. Yuꞌun stukelik a smilik. Y te jaꞌexe jaꞌ ya achapulambeyik te sba smukemale.
49“Jaꞌ yuꞌun te Dios, te ay spꞌijil yoꞌtan stukele, la yal: “Ya jtikombeyex jꞌalwanejetik sok jpuk-kꞌopetik. Ay ya amilik sok ay ya awilbajinik”, xchi me. 50Te machꞌatik kuxajtik ta balmilal te ora to, ya me skuchik smalbeyel xchꞌichꞌel spisil te jꞌalwanejetik te lajik ta milel ta slijkibal to tal te balmilale. 51Jaꞌ bi, jaꞌ slijkibal te malbot xchꞌichꞌel te jꞌAbele sok jaꞌ to te kꞌalal malbot xchꞌichꞌel te Zacariase, jaꞌ te la yichꞌ milel ta yolil te xchikꞌojibal smajtan Dios te ba temploe. Jich me ya kalbeyex, te machꞌatik kuxulik ta balmilal te ora to ya me xꞌaꞌbot xkuchik smalel te xchꞌichꞌelike.
52Oꞌol me abaik maestroetik yꞌun te mantaliletike, porke la alokꞌesbeyikix te syaweil tiꞌpuerta yuꞌun te pꞌijil-oꞌtanile. Makꞌ xꞌochex teꞌa te jaꞌexe y kombil awuꞌunik te machꞌatik ya skꞌan xꞌochik teꞌae —xchi te Jesuse.
53Te kꞌalal laj yoꞌtan ta yalel te Jesuse, te maestroetik yuꞌun te mantaliletike sok te fariseoetike ben ip a laj ilin yuꞌun. Jicha lijk swulilanik ta kꞌop yuꞌun, bayal tut ya sjojkꞌobeyik. 54Yuꞌun ya smaliyik teme ay tut ma lekuk ya yale yuꞌun jich ya stsakik ta skꞌopik a te Jesuse.
المحددات الحالية:
LUCAS 11: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
