‘Apositoló 17
17
Ko e Maveuveu ‘i Tesalonaika
1PEA nau fou atu ‘i ‘Amifipoli mo ‘Apolonia, ‘o nau hoko ki Tesalonaika, ‘a ia na‘e tu‘u ai ha falelotu ‘o e kakai Siu: 2pea hū ki ai ‘a Paula, ‘o hangē ko ene fa‘a fai, ‘o kau mo kinautolu; pea ko e Sāpate ‘e tolu na‘a ne fai fakakikihi mo kinautolu mei he Tohitapu, 3‘o ne faka‘uhinga mo fokotu‘u, ‘o pehē, Na‘e pau ke feia ‘a e Mīsaia, pea ke toetu‘u mei he pekia; mo ‘eni foki, Ko eni ‘a e Mīsaia ko ia, ‘a Sīsū ‘oku ou malanga‘aki kiate kimoutolu. 4Pea na‘e ai honau ni‘ihi na‘e tui, pea na‘e fakahoko kinautolu kia Paula mo Sailosi; pehē foki mo e fu‘u tokolahi ‘o e kau Kalisi kuo lotu faka-Siu, mo e tokotokolahi ‘o e kau fefine tu‘ukimu‘a.
5Pea meheka ai ‘a e kau Siu, ‘o nau ‘ave ha kau siana pau‘u na‘e tutu‘u noa pē ‘i he mala‘e fakatau, ‘o nau tānaki ha fu‘u kakai, mo veuveuki ‘a e kolo, pea nau ‘ohofia ‘a e ‘api ‘o Sēsoni, ‘o nau kumi ‘a kinaua ke nau taki atu ki he Fakataha-‘a-kakai. 6Pea ‘i he ‘ikai te nau ‘ilo kinaua, na‘a nau toho ‘a Sēsoni mo e ni‘ihi ‘o e kāinga ki he kau pule kolo, ‘o nau kalanga, Ko e kau siana ko ia, ‘a ia kuo nau fakaangatu‘u ‘a māmani, kuo nau ha‘u ki heni foki. 7Pea kuo fakaafe kinautolu ‘e Sēsoni: pea ko e kau siana ko ia ‘oku nau paetaku kotoa pē ki he ngaahi tu‘utu‘uni ‘a Sisa, he‘enau pehē, ‘oku tu‘i ha taha kehe, ko Sīsū tokua. 8Pea nau fakahoha‘a ‘a e kakai mo e kau pule kolo ‘i he‘enau tala ha ngaahi me‘a pehē. 9Ko ia, na‘a nau ‘eke ha pa‘anga talifaki meia Sēsoni mo e kāinga, ‘o nau toki tukuange kinautolu.
Ko e Hono Tali e Ongoongo Leleí ‘i Pēlea
10Pea hanga leva ‘e he kāinga, ‘o nau ‘atu po‘uli ‘a Paula mo Sailosi ki Pēlea: pea ‘i he‘enau hoko ki ai, pea ō ai pē kinaua ki he falelotu ‘o e kakai Siu. 11Pea na‘e anga faka‘ei‘eiki ange ‘a e kakai ni ‘iate kinautolu ‘i Tesalonaika, he na‘a nau tali loto lelei ‘aupito ‘a e folofola, ‘o nau kumi ‘i he Tohitapu ‘i he ‘aho kotoa pē ‘a e mo‘oni ‘o e ngaahi me‘a ko ia. 12Ko ia, na‘e tokolahi honau kakai na‘e tui, pea tokotokolahi mo e hou‘eiki fafine ‘o e kakai Kalisi, pea mo e kau tangata. 13Ka ‘i he ‘ilo ‘a e kau Siu mei Tesalonaika kuo malanga‘aki ‘i Pēlea foki ‘a e folofola ‘a e ‘Otua ‘e Paula, na‘a nau omi, ‘o nau o‘i mo fakahoha‘asi ‘a e kakai ‘i he potu ko ia. 14Pea na‘e toki hanga ‘e he kāinga, ‘o tuku atu leva ‘a Paula ke ‘alu atu ki tahi: ka ka nofo ai pē ‘a Sailosi mo Tīmote fakatou‘osi. 15Pea ko kinautolu na‘e ‘ave ‘a Paula na‘a nau a‘utaki ia ki ‘Atenisi: pea kuo nau ma‘u ‘ene fekau kia Sailosi mo Tīmote ke fai hona tūkuingata ke vave mai, pea nau toki ō.
Ko Paula ‘i ‘Ātenisi
16Pea lolotonga na‘e talitali ‘e Paula kiate kinaua ‘i ‘Atenisi, na‘e ‘ita hono laumālie ‘o‘ona ‘i he‘ene vakai kuo tamapua‘ia ‘a e kolo. 17Ko ia, na‘a ne talanoa fakakikihi ‘i he fale lotu mo e kau Siu, mo e kakai kuo tafoki mai, pea ‘i he mala‘e fakatau na‘a ne fai ‘i he ‘aho kotoa pē kiate kinautolu te nau fe‘iloaki. 18Pea na‘e ai ha ni‘ihi ‘o e fa‘ahinga ‘Epikulio, mo e fa‘ahinga Sitoiko, ko e kau filōsefa, na‘a nau fepaki mo ia. Pea pehē ‘e ha ni‘ihi, Ko e hā nai ‘a e ‘uhinga ‘o e lau ‘a e siana pālau ni? Pea ko e ni‘ihi na‘a nau pehē, ‘Oku ne matamata ko e toko taha fokotu‘u ‘otua fo‘ou: ko hono ‘uhinga, ko ‘ene malanga‘aki ‘a Sīsū mo e Toetu‘u.#17.18 ‘a Sīsū mo e Toetu‘u; ‘I he lea faka-Kalisí ‘oku ala faka‘uhinga‘i ‘a e fo‘i lea toetu‘ú ko e hingoa ‘o ha ‘otua fefine.
19Pea nau puke ia, ‘o taki ki ‘Aleopeiko, ‘o nau pehē, ‘E ngofua koā ke mau ‘ilo pe ko e hā ‘a e tokāteline fo‘ou ni, ‘a ‘eni ‘oku ke lea‘aki? 20He ‘oku ke ‘omi ki homau telinga ha ngaahi me‘a ‘oku matamata kehe: ko ia ‘oku mau fie‘ilo pe ko e hā ‘a e ‘uhinga ‘o e ngaahi me‘a ko ia. 21(He ko e kau ‘Ātenisi kotoa pē, mo e muli na‘e ‘āunofo ai, na‘e ‘ikai te nau fai ha me‘a kehe, ka ko e nofo pē ke lau me‘a fo‘ofo‘ou, pe ke fanongo me‘a pehē.)
22Pea kuo tu‘u ‘a Paula ‘i he loto ‘Aleopeiko, pea ne pehē, ‘A matāpule ‘Ātenisi, ‘oku hā kiate au ‘i he me‘a kehekehe ‘oku ou sio ki ai, tā ko e kakai kimoutolu ‘oku matamata hulu atu ‘i he tauhi fa‘ahikehe. 23He lolotonga ‘eku ‘alu fano, ‘o u tokanga‘i ‘a e ngaahi me‘a ‘oku mou lotu ki ai, ne u ‘ilo foki ha ‘ōlita ‘a ia na‘e tohi ai ‘a e lea ni, MO‘O HA ‘OTUA TE‘EKI ‘ILOA. Pea ko e Me‘a ‘oku mou lotu ta‘e‘ilo ki ai, ko eni ia ‘oku ou fakahā ni kiate kimoutolu. 24Ko e ‘Otua na‘a ne ngaohi ‘a e ‘univeesi, mo e me‘a kehekehe ‘oku ‘i ai, ko e toko taha ia ko e ‘Eiki ‘o e langi mo māmani; ko ia ‘oku ‘ikai te ne ‘afio ‘i ha ngaahi temipale kuo ngaohi ‘e he nima.#1 Tu‘i 8.27; ‘Ais 42.5; Ngā 7.48 25‘Uma‘ā hano tauhi ‘e he nima ‘o e tangata, ko e pehē ‘oku ne masiva ‘i ha me‘a–‘a ‘Ene ‘Afio koā, ‘a ia ‘oku ‘a‘ana ‘a e foaki mai kiate kitautolu fuli pē ‘a e mo‘ui, mo e mānava, mo e me‘a kotoa pē! 26Na‘a ne o‘i foki ‘a e ngaahi fa‘ahinga kakai ‘a ia ‘oku nau tupunga taha kotoa pē, ke nau nofo‘ia ‘a e funga kotoa ‘o māmani; he ne ne fakafuofua ‘a e ngaahi kuonga na‘e tu‘utu‘uni ki he‘enau nofo, mo honau ngaahi kau‘ā; 27koe‘uhi ke nau kumi ki he ‘Otua, hei‘ilo te nau fāfā ia ‘o ‘ilo‘i, ka tala‘ehai ‘oku ne mama‘o mei hatau toko taha. 28He ‘oku ‘iate ia ‘etau mo‘ui, mo ‘etau ngāue, mo ‘etau ‘i ai; ‘o hangē foki ko e lau ‘a e ni‘ihi ‘o e kau maau ‘oku ‘iate kimoutolu ‘o pehē, He ko Hono hako foki ‘a kitautolu. 29Pea kapau leva ko e hako ‘o e ‘Otua ‘a kitautolu, tala‘ehai ‘oku totonu ‘etau lau ‘a ‘Ene ‘Afio ‘oku tatau mo ha konga koula, pe siliva, pe maka, ha me‘a kuo tongitongi, ko e ngāue mo e fakakaukau ‘a ha tangata. 30Pea neongo ‘ene fakata‘eta‘e‘afio‘i ‘e he ‘Otua ‘a e ngaahi kuonga ‘o e tu‘uvale, ka ‘i onopooni ‘oku ne fekau ki he kakai kotoa pē ‘i he potu kotoa pē ke nau fakatomala: 31koe‘uhi kuo ne kotofa ha ‘aho, ‘a ia ‘oku ne teu fakamaau ai ‘a māmani, ‘o ‘au‘autotonu, ‘o fakafai ‘i he tangata kuo ne polo‘i; ‘o ne tuku mo‘o e kakai kotoa pē ha tu‘unga ki he‘enau tui ‘i he‘ene fokotu‘u ‘a e toko taha ko ia mei he pekia.
32Pea ‘i he‘enau fanongo ki he lau toetu‘u ‘a e pekia, na‘e luma ha ni‘ihi: kae pehē ‘e ha ni‘ihi, ‘Oua ke mau toe fanongo kiate koe ‘i he me‘a ko ia ‘i ha taimi ange. 33Na‘e pehē ‘a e ‘alu atu ‘a Paula mei honau ha‘oha‘onga. 34Ka na‘e ai ha kau matāpule na‘e piki kiate ia, ‘o nau lotu: ko honau taha ko Taionisio, ‘a ia na‘a ne kau ki he ha‘a ‘Aleopeiko, pea mo ha fefine na‘e hingoa ko Temaleti, mo e ni‘ihi kehe.
المحددات الحالية:
‘Apositoló 17: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
