Ẹksọdọs 19
19
Ivbi Izrẹl Vbe Oke Sainai
1-2Ivbi Izrẹl keghi kpao vbe Rẹfidim rre, vbe ikpẹdẹ ne okaro ọghe uki ne ogieha ne ivbi Izrẹl kpao vbe Igipt rre, iran keghi do sẹ ato ọghe Sainai. Iran na bu agọ ye ototọ oke Sainai. 3E Mosis keghi hin uhunmwu oke nii ne ọ ya vba Osanobua. E Nọyaẹnmwa keghi datie ẹre ke uhunmwu oke rre, ọ na tama rẹn wẹ ne ọ tama ivbi Izrẹl ne ivbi uniẹn Jekọb wẹẹ: 4“Wa miẹn emwi ne I ru ivbi Igipt re, vbene I na mu uwa zẹ vbene oghohọn mu ovbi ẹre vbe ifuẹn ọnrẹn, I na viọ uwa gha die ehe ne I ye. 5A deghẹ wa gha họn ẹmwẹ mwẹ, wa na vbe rhie uhi mwẹ mwẹ, wa ghi do gha re emwa obọ mwẹ. Mẹ ọre ọ yan agbọn na hia, sokpan wa ghi gha re emwa ne I hannọ zẹ. 6Wa ghi gha re uhunmwu ẹvbo ọghe emwa nii ga mwẹ zẹ vbe ohẹn, emwa ne a ya fiohan ne imẹ okpa.” 7Ẹre Mosis na ya tie avbe olotu emwa nii si koko, ọ na ta ẹmwẹ hia ne Nọyaẹnmwa yi ẹre iyi ma iran.
8Emwa nii hia keghi ya urhu ọkpa kha wẹẹ, “Ma gha ru emwi hia ne Nọyaẹnmwa tae.” E Mosis na vbe ya khama e Nọyaẹnmwa vbene emwa nii kha hẹ.
9E Nọyaẹnmwa keghi tama e Mosis wẹẹ, “I gha la uwu okuku ne ọ mwẹ imi bu ruẹ rre, ne emwa nii miẹn ehe na họn vbe I guẹ guan ne iran gha rhie ẹmwẹ ruẹn kevbe ẹghẹ na kpao.” 10E Mosis keghi tama e Nọyaẹnmwa vbene emwa nii kha hẹ, e Nọyaẹnmwa keghi tama e Mosis wẹẹ, “Bu emwa nii gha khian ya tama iran ne iran mu egbe ugamwẹ ye otọ khẹ ẹrẹna kevbe ẹdẹ ne akhuẹ, ne iran họnmwẹ egbe ye otọ khẹ ugamwẹ. Wẹ ne irẹn họ ukpọn iran ne a miẹn wẹ, 11vbe ẹdẹ ne irakhuẹ, vbe ẹdẹ ne ẹdẹrriọ, mẹ ne Nọyaẹnmwa gha tuorre vbe uhunmwu oke Sainai ehe ne avbe emwa nii hia gha na bẹghe mwẹ. 12U ghi yi uwu lẹga oke nii ne emwa na, u ghi tama iran wẹ ne iran mwẹ ẹwaẹn ne iran ghẹ hin oke nii ra ne iran ya obọ kan ẹzi ẹre. A deghẹ ọmwaikọmwa ya obọ kan rẹn, te a ra gbe ẹe rua. 13A ghi filo okuta gbe ẹe rua, ra a ghi ya ifẹnmwẹ salọ ẹe gbe ua vbe ne ọmwa rhọkpa i na ya obọ kan rẹn. Kevbe emwa nagbọn kevbe emwirri ọre a kha na. Te a gha gbele ehia a. Sokpan, a ghẹ ghi kpe okpe nẹ, emwa hia ghi hin uhunmwu oke.”
14E Mosis keghi tuorre vbe uhunmwu oke do vba emwa nii, ọ na wẹ ne iran mu egbe ugamwẹ. Iran keghi họ ukpọn iran. 15E Mosis keghi khama iran wẹẹ, “Wa ghi mu egbe irakhuẹ. Okpia vbe okhuo ghẹ miegbe vbe uwu ẹghẹ na.” 16Vbe owiẹ vbe ikpẹdẹ ne ogieha, avan ne ukhunmwu kevbe ayan kegha wannọ vbe uhunmwu oke, okuku ne ọ mwẹ imi, kevbe urhu okpe ne ọ la ẹsẹse. Emwa ni rre agọ hia kegha guọ zẹzẹzẹ ne ohan. 17E Mosis keghi viọ emwa nii ladian vbe agọ ne iran ya vba Osanobua, iran keghi mudia vbe ototọ oke. 18Ighogho keghi gba uhunmwu oke Sainai hia rhunmwuda e Nọyaẹnmwa la erhẹn tuorre yan rẹn. Ighogho nii kegha ye odukhunmwu zẹ vbe ighogho ogidi erhẹn. Emwa nii hia kegha guọ kpẹkpẹkpẹ. 19Urhu okpe keghi kakabọ gha tu sayọ. E Mosis keghi guan, e Nọyaẹnmwa na ya avan ne ukhunmwu zẹmwẹ wanniẹn ọẹn. 20E Nọyaẹnmwa keghi tuorre ye uhunmwu oke Sainai, ọ keghi tie Mosis la uhunmwu oke, e Mosis keghi hin odukhunmwu.
21E Nọyaẹnmwa tama e Mosis wẹẹ, “Tuorre, ya tama emwa nii ne iran ghẹ fian uwu gberra ghe edinran wẹ iran ra do ghe mwẹ, ne nibun vbe uwu iran ghẹ ya wulo. 22Uhin avbe ohẹn nii sikẹ mwẹ, deghẹ ẹ i re te iran họnmwẹ egbe, te I ra rri iran oya.”
23E Mosis keghi tama e Nọyaẹnmwa wẹẹ, “Emwa nii i ra hin odukhunmwu, rhunmwuda u ka yan ma ima ne wẹẹ te oke nii huanrẹn kevbe ne a vbe vin uwu yọ.”
24E Nọyaẹnmwa keghi wanniẹn tama rẹn wẹẹ, “Tuorre ne u ya rhie Errọn ba egbe gha dee. Sokpan wẹ ne avbe ohẹn kevbe emwa nekpa ghẹ fian uwu rra hin odukhunmwu bu mwẹ gha dee nii I ghẹ rri iran oya.” 25E Mosis keghi tuorre ya bu emwa nii gha khian, Ọ na ya tama iran vbene Nọyaẹnmwa kha hẹ.
Currently Selected:
Ẹksọdọs 19: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
