Ẹksọdọs 20
20
Uhi Igbe
(Diuteronomi 5:1-21)
1Osanobua keghi guan avbe ẹmwẹ na hia. Ọ wẹẹ. 2Mẹ ọrọre Nọyaẹnmwa Osanobua ruẹ ne ọ rhie ruẹ ladian hin otọe Igipt rre, lahin owa ọviọnmwa.
3“Ohan i gie uwẹ mwẹ osa ọvbehe ba imẹ.
4“Ohan i gie uwẹ ka ukhurhẹ ne egbe ruẹ ra ama emwi ne a yi nii rre ẹrinmwi ra ne ọ rre uwu amẹ vbe otọ. 5Ohan i gie uwẹ ya uhunmwu rhanmwẹ otọ ne ukhurhẹ ra ne u ga ẹe rhunmwuda mẹ ọrọre Nọyaẹnmwa Osanobua ruẹ, Osanobua ne ọ ta ekpẹn mẹ khin. Emwa nii khuiwu mwẹ, I gha rria ivbi iran ikhi ya sẹ orre ne ogieha ke ne ogienẹ. 6Sokpan iran nii ho ẹmwẹ mwẹ nii vbe rhie uhi mwẹ mwẹ, aro nọmaa mwẹ gha rre iran egbe ya sẹ orre arriaisẹn arriaisẹn.
7“Ohan i gie uwẹ lo eni imẹ ne Nọyaẹnmwa Osanobua ruẹ vbe odẹ ọkhọ rhunmwuda ọmwa ne ọ lo eni mwẹ ihan, I gha rria ẹre ikhi.
8“Ye Ẹdẹ Ikẹtin rre ne u ya ẹe ru emwi ne ọ huanrẹn ne Nọyaẹnmwa. 9Ẹdẹ ehan ọre u gha ya gha winna iwinna ruẹn hia, 10sokpan ẹdẹ ne ogihinrọn, Ẹdẹ Ikẹtin ne a ya fiohan ne imẹ ọre nọ. Vbe ẹdẹ nii, ghẹ winna hiehie, ọre uwẹ nọ, ra ivbi uẹ, ra eviẹn ruẹn ra emwirri ruẹ, ra avbe erhunmwuyẹn nii rre ẹvbo ruẹ. 11Ẹdẹ ehan ọre mẹ ne Nọyaẹnmwa ya yi ẹrinmwi, agbọn, avbe okun kevbe emwi nii rre uwu iran hia, sokpan vbe ikpẹdẹ ne ne ogihinrọn, I keghi kẹtin. Ọnii ọ zẹe ne imẹ ne Nọyaẹnmwa na fiangbe Ẹdẹ Ikẹtin, I na ya ẹe khian ne ọ huanrẹn.
12“Ya ọghọ ne erha a kevbe iye uẹ ne u miẹn ehe na tọ vbe otọ ne imẹ ya nuẹn.
13“Ghẹ de izigha.
14“Ghẹ ghẹẹ.
15“Ghẹ rha a.
16“Ghẹ ba mu ẹmwẹ ohoghe ba ọmwaikọmwa.
17“Ghẹ yaro ye owa ẹrrẹe, ghẹ yaro ye amwẹ ẹrrẹe ra eviẹn ọnrẹn ra ẹmila re ra ekẹtẹkẹtẹ ọre ra emwikemwi nii re ọghọe.”
Ohan Ne Ọ Mu Emwa Nii
(Diuteronomi 5:22-33)
18Ugbẹn vbe emwa nii ghi họn avan ne ukhunmwu kevbe okpe ni vannọ, vbe iran ghi vbe miẹn ayan kevbe uhunmwu oke ne ọ gbe ighogho, iran kegha guọ zighazigha ne ohan, iran na mudia ye urria gban an. 19Iran keghi tama e Mosis wẹẹ, “Wẹ gha gu ima guan ighẹ ma gha họn, sokpan afianma fian mwa wẹ, deghẹ Osanobua gu ima guan, ma gha wulo.” 20E Mosis keghi tama emwa nii wẹẹ, “Wa ghẹ fian afianma, te Osanobua do danmwẹ uwa kẹkan ne u wa miẹn ehe na gha mu ohan rẹn, ne u wa ghẹ ru oru khọ.” 21Sokpan emwa nii keghi ya mudia ye urria gban an, e Mosis ọkpa ọre ọ ghi sikẹ okuku nii vbe ehe ne Osanobua gha ye.
Uhi Vbe Ekpa Aka
22E Nọyaẹnmwa keghi tama e Mosis wẹ ne ọ tama ivbi Izrẹl wẹẹ: “Wa miẹn wẹ I gu uwa guan ke ẹrinmwi rre. 23Wa ghẹ ma amazẹ ẹrọnmwọ ra igoru ne u wa gha vbe gha ga ẹe ba mwẹ. 24Wa ya ekẹn ma aka mẹ, wa ghi gha zẹ ese rua ne a giẹn uan ke ẹe kevbe ese ne a gba zọ ọghe uwa, kevbe ohuan kevbe ẹmila rua. Eheikehe ne I rhirhi a kha ma uwa ne uwa na gha ga mwẹ, I gha rre do gha fiangbe uwa vbe evba. 25A deghẹ wa ya okuta ma aka mẹ, wa ghẹ ya okuta ne a guọghọe maẹn, rhunmwuda, wa gha ye a gha uwa kan rẹn nẹ, a ya ẹe khian ne ẹ i ghi gie a lo mẹ. 26Wa ghẹ ru aka ne a nana ikpawẹ ya gha sẹ mẹ, ne uwa ghẹ ya gha bannọ uan vbe uwa a gha hin ẹnrẹn khian.
Currently Selected:
Ẹksọdọs 20: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
