Ẹksọdọs 18
18
E Jẹtro Do Tuẹ Mosis
1E Jẹtro ne ohẹn e Midian, ne ọre erha amwẹ Mosis keghi họn emwi hia ne Osanobua ru ne Mosis kevbe avbe ivbi Izrẹl ẹghẹ vbe ọ viọ iran ke Igipt ladian. 2Rẹn keghi rhie e Zipora ne amwẹ Mosis mwẹ obọ gha dee do miẹn e Mosis. 3E Jẹtro kevbe viọ Gẹsiọm kevbe Eliezẹ ne ivbi e Mosis nikpia e eva gha dee. (E Mosis khare wẹẹ, “Orhunmwuyẹn ọre i khin vbe otọe ọrriọvbe”; ọre ọna he ovbi ẹre ne okpia ọkpa Gẹsiọm. 4Ọ kevbe kha wẹẹ, “Osanobua avbe erha mwẹ ọre ọ yọmwẹ obọ, ọ na miẹn mwẹ fan vba obọ umozo ọba Igipt”; ọre ọ na he ovbi ẹre ne okpia nọkpa Eliezẹ.) 5E Jẹtro keghi viọ amwẹ Mosis kevbe ivbi ẹre nikpia gha die uwu ato vbe ehe ne Mosis na bu agọ ye uhunmwu oke ne ọ huanrẹn. 6Rẹn keghi gie ne a khama e Mosis nẹ wẹ iran dee. 7E Mosis keghi khian bu ẹre sẹ odẹ, ọ mu ẹko rhu otọ nẹẹn, ọ keghi ya unu soso ẹre unu. Iran nọ egbe ẹmwẹ egberranmwẹ iran, iran na la uwu owa ukpọn e Mosis. 8E Mosis keghi na iyẹn emwi ne Nọyaẹnmwa rhunmwuda ivbi Izrẹl ru ọba Igipt kevbe ivbi Igipt re ma e Jẹtro. Ọ na iyẹn ọlọghọmwa ne iran he miẹn vbe odẹ kevbe vbene Nọyaẹnmwa miẹn iran fan hẹẹ. 9E Jẹtro ghi họn ena hia, ẹko keghi rhiẹnrhiẹn ọẹn. 10Ọ keghi kha wẹẹ, “Rho e Nọyaẹnmwa ne ọ miẹn ruẹn fan vbe obọ ivbi Igipt kevbe ọba Igipt. Rho e Nọyaẹnmwa ne ọ miẹn emwa rẹn fan vbe ne iran na te re eviẹn rre. 11Banbanna nian, I miẹn wẹ, e Nọyaẹnmwa kpọlọ sẹ avbe ẹbọ hia, rhunmwuda te Osanobua ru vbenian na vbe ọ miẹn oya ne ivbi Izrẹl gha a re vbe obọ ivbi Igipt.”
12Ẹre Jẹtro na ya viọ ese gie Osanobua, kevbe emwi imuohan ne a gha giẹn; Errọn kevbe avbe ekaolotu ivbi Izrẹl hia keghi lele orruan e Mosis ne okpia gha dee do rri evbare iruemwi nii zẹ vbe emwi ne a ya ga.
A Zẹlẹ Iran Ni Buohiẹn
(Diuteronomi 1:9-18)
13Vbe ikpẹdẹ ne ọ lele ẹe, e Mosis keghi tota ne ọ gha bu ohiẹn emwa nii. emwa kegha rrie ehe ne ọ ye ke owiẹ ya sẹ asọn. 14Ugbẹn vbe Jẹtro ghi miẹn iwinna hia ne Mosis winna, ọ keghi nọ wẹẹ, “Vbọ khun emwi ne u ru ne avbe emwa na yi. Vbe uwẹ ọkpa na tota hẹ vbene emwa nii hia na do ga ruẹ ke owiẹ ya sẹ asọn?” 15E Mosis keghi wanniẹn wẹẹ, “Ẹ i mwẹ I ma ru ẹe vberriọ rhunmwuda te emwa nii do gha nọ emwi ne Osanobua ho. 16Arhin eva gha vbe gui, iran ghi vbe bu mwẹ gha dee, I ghi rhie a se ne nọ rri a se, I ghi ta uhi kevbe iyi Osanobua ma iran.”
17E Jẹtro keghi tama rẹn wẹẹ, “Vbene u ru ẹe na i maa. 18U gha ru ẹe, te u ra wiẹn egbe ruẹ ya na ke uwẹ kevbe emwa nii guẹ. Ọ na bun gbe sẹ mwẹ, wẹ ọkpa i sẹtin ru ẹe. 19Danmwehọ mwẹ nian, gun mwẹ rhie igiodẹ esi ma ruẹn. Osanobua gha vbe yaba ruẹ. Wẹ gha ta ne unu iran na vbe odaro Osanobua, ne u vbe gha viọ imuan ẹmwẹ iran gie ẹe. 20U ghi vbe ma iran avbe iyi kevbe uhi Osanobua, u ghi vbe rhan otọ re vbene iran gha ya gha yin kevbe vbene iran gha ya ru emwi hẹ ma iran. 21Sokpan, deba ọnii, zẹlẹ emwa nii sẹ vbe uwu iran, ne u ya iran ru ekaolotu emwa na ẹ ọkaolotu arriaisẹn, iyisẹn, ekigbesiyeha kevbe igbe. Ọ kere ne iran gha re emwa nii muohan Osanobua kevbe ne ọ gie a mu ẹtin yan, kevbe ne a i sẹtin rhie oko odieke na. 22Gie iran gha re ne ọ bu ohiẹn iran na ne a wa rẹn yọ. Iran sẹtin gha viọ ẹzọ nii lọghọ bu ruẹ rre, sokpan iran ghi gha tobọ iran bu avbe ne giẹrẹ nii rrọọ. Erriọ ọre ọ gha na khuẹrhẹ nuẹn sẹ vbe iran ra guẹ mu vbe ihe na. 23U gha ru ẹe vbe nian vbene Osanobua yi ẹre iyi, u i khian wiẹn egbe ruẹ ya, a ghi vbe bu ohiẹn iran na hia iran te gha rrie.”
24E Mosis keghi rhie ẹmwẹ Jẹtro, ọ na ru zẹ vbene ọ kha re. 25Ọ keghi hannọ emwa nii sẹ ẹe vbe ivbi Izrẹl hia, ọ na ya iran ru ọkaolotu yan iran, ọkaolotu arriaisẹn, iyisẹn, ekigbesiyeha kevbe igbe. 26Iran kegha re emwa nii bu ohiẹn ọghe emwa nii, zẹ vbe emwa ne a wa rẹn yọ, iran kegha viọ ẹzọ nii lọghọ nii rrọọ bu e Mosis rre, sokpan iran na tobọ iran gha bu ohiẹn ẹzọ ne giẹrẹ nii rrọọ. 27Ẹre Mosis ghi na gbe ọ khian ẹdẹ hia ne Jẹtro. E Jẹtro na gha rrie ẹvbo ẹre.
Currently Selected:
Ẹksọdọs 18: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
