Ẹksọdọs 17
17
Amẹ Ke Uwu Okuta ladian
(Nọmbas 20:1-13)
1Ivbi Izrẹl hia keghi si kpao vbe ato Sin rre, iran na gha si ke agọ ọkpa la ọvbehe zẹ vbene Nọyaẹnmwa tama iran. Iran keghi ya yakọ vbe Rẹfidim, sokpan iran ma miẹn amẹ wọn vbe evba. 2Iran kegha gu e Mosis gui wẹẹ, “Rhie amẹ ne ima wọn.” E Mosis wanniẹn tama iran wẹẹ, “Vbọzẹ ne uwa na gunmwẹ gui yi? Vbọzẹ ne uwa na danmwẹ e Nọyaẹnmwa ghe?”
3Sokpan ohanmwẹ amẹ kegha kakabọ gbe emwa nii, iran na gha gui ẹzọ Mosis. Iran wẹẹ, “Vbọzẹ ne u na hẹ ima ke Igipt ladian? te u wẹ ne u do ya ohanmwẹ amẹ gbele ima an ra, ke emọ kevbe emwirri?”
4E Mosis keghi kakabọ na erhunmwu ghe Nọyaẹnmwa wẹẹ, “Vbe I a ra ru emwa na hẹ yi? Te iran ghi ra filo okuta ya gbe mwẹ uan.”
5E Nọyaẹnmwa keghi tama e Mosis wẹẹ, “Viọ eso vbe uwu avbe ekaolotu ivbi Izrẹl ba egbe ne u fian ke odaro ne iran. Rhie ọkpọ ne u rhie gbe ẹzẹ mwẹ obọ ne u gha khian. 6I gha mudia ye odaro ruẹ vbe uhunmwu okuta vbe oke Sainai. Ya ọkpọ nii kpe okuta, amẹ gha vẹ ke uwu ẹre ladian ne emwa nii wọn.” E Mosis keghi sirra avbe ekaolotu Izrẹl nii ru vberriọ. 7A kegha tie evba nii, “Masa,” kevbe “Mẹriba,” rhunmwuda te ivbi Izrẹl gha gui, iran na vbe danmwẹ Nọyaẹnmwa ghe vbe iran khare wẹẹ, “Nọyaẹnmwa gu ima rrọọ ra ẹ i gu ima rrọọ?”
Okuo Ne A Gu Emwa Amalẹk Khọn
8Emwa Amalẹk keghi mu okuo gie ivbi Izrẹl vbe Rẹfidim. 9E Mosis keghi khama Jọsua wẹẹ, “Hannọ emwa eso ladian ne ima ne uwa ladian ya gu emwa Amalẹk khọn akhuẹ. I gha mudia ye uhunmwu oke vbene I na gha rhie ọkpọ ne Osanobua rhie mẹ mwẹ.” 10E Jọsua keghi ru vbene Mosis tama rẹn, ọ ladian ya gu ivbi Amalẹk khọn, vbene Mosis, Errọn kevbe Họ, na hin uhunmwu oke. 11E Mosis gha viọ obọ da odukhunmwu, ivbi Izrẹl ghi gha khọnmiotọ, sokpan, ọ gha viọ obọ ghe otọ, ivbi Amalẹk ghi gha khọnmiotọ. 12Ugbẹn vbe obọ ghi yan e Mosis, Errọn vbe Họ keghi mu okuta, iran na mu ẹn yo ọre akharha, rẹn keghi tota yan rẹn vbene iran na mudia ye asefẹn ọnrẹn, iran keghi dada ẹre obọ, iran ke da ẹe yi gbain vbe owẹn te ya dero. 13Ẹre Jọsua na wa khọn ivbi Amalẹk muotọ.
14Ẹre Nọyaẹnmwa na tama e Mosis wẹẹ, “Gbẹn emwi na ye ebe ne a miẹn ehe na gha ye ẹre rre. Tama Jọsua wẹẹ I gha wa fuẹn Amalẹk fo fẹẹrẹ.” 15E Mosis keghi bọ aka, ọ ke gha tie ẹre “Nọyaẹnmwa ọrọre Afiala mwẹ.” 16Ọ keghi kha wẹẹ, “Tọn afiala e Nọyaẹnmwa mu! E Nọyaẹnmwa gha wa gha gu emwa Amalẹk khọn khian!”
Currently Selected:
Ẹksọdọs 17: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
