Ẹksọdọs 16
16
E Mana Kevbe Ahianmwẹ
1Ivbi Izrẹl hia keghi kpao vbe Ẹlim, ọ ghi rre ikpẹdẹ ekesugie vbe uki ne ogieva ne iran kpao vbe Igipt rre, iran keghi sẹ ato ọghe Sin, ne ọ rre ẹkpo Ẹlim kevbe Sainai. 2Ehia keghi gha gui ẹzọ e Mosis kevbe Errọn vbe uwu ato. 3Iran wẹẹ, “E Nọyaẹnmwa wa gbele ima ye Igipt ọre ọ te maa sẹ. Evba ma gha na te gha tota ke ọkpan emiowo, ma ghi vbe gha rri evbare vbene ọ khọn mwa sokpan wa viọ ima la uwu ato na ne uwa do ya ohanmwẹ gbele ima an.”
4E Nọyaẹnmwa keghi tama e Mosis wẹẹ, “Mẹ ra ru ẹe ne ebrẹd gha dele ke odukhunmwu rre ne uwa hia, dọmwadẹ ọghọe vbe uwu avbe emwa nii ghi gha ladian ya gha rhọ ne ọ gha sẹ vbe ọghe ẹdẹ ọkpa. Vbe nian ọre I gha ya danmwẹ iran ghe, a deghẹ iran gha ya uhi mwẹ ru emwi. 5Vbe ikpẹdẹ ne ogiehan, iran ghi viọ ukhukhu eva ọghe ne iran ka viọ yi, iran ghi vbe le ẹe ye otọ.” 6Ẹre Mosis kevbe Errọn na tama ivbi Izrẹl hia wẹẹ, “Vbe ota na, wa gha rẹn wẹ Nọyaẹnmwa ọre ọ viọ uwa ke otọ Igipt ladian. 7Vbe owiẹ, wa gha miẹn awanwan ne ẹi gie a ghe ọghe ehe ne Nọyaẹnmwa ye. Ọ họn ẹzọ ne uwa gu irẹn gui, rhunmwuda uhunmwu ne ọ gie ọre ima yo.” 8E Mosis keghi kha wẹẹ, “E Nọyaẹnmwa ọre ọmwa ne ọ ra rhie emiowo ne uwa re vbe ota kevbe inu ebrẹd ne uwa ho vbe owiẹ, rhunmwuda ọ họn vbe ne uwa ghi gui ẹzọ irẹn hiẹ.”
9E Mosis keghi tama Errọn wẹẹ, “Tama emwa nii hia wẹ ne iran gha dee do mudia vbe odaro e Nọyaẹnmwa, rhunmwuda ọ họn ẹzọ ne iran gui.” 10Ehe ne Errọn na gu avbe emwa nii guan nii, iran na gbe aro ghe odẹ ato, vbe udomwurri, awanwan ne ẹi gie a ghe nii keghi rhie egbe ma vbe okuku. 11E Nọyaẹnmwa keghi tama e Mosis wẹẹ, 12“I họn ẹzọ ne ivbi Izrẹl gui, Tama iran wẹ ẹdẹ gha wan dee, iran gha miẹn emiowo re, ọ gha sẹ ẹghẹ owiẹ, iran gha vbe miẹn ebrẹd vbe ne iran ho. Ẹghẹ nii, iran gha rẹn wẹ mẹ ne Nọyaẹnmwa ọrọre Osanobua iran.”
13Ọ ghi sẹ ẹghẹ ota, ahianmwẹ ne iran tiẹre kuel keghi vẹ rre, ọ gba agọ nii hia, ọ ghi vbe sẹ owiẹ, evbu keghi ro lẹga agọ nii. 14Evbu nii ghi ka nẹ, emwi eso ne hẹghẹhẹghẹ ne ọ ye vbe ibobo keghi rhu gba ato nii hia, ọ keghi ye mose mose zẹ vbe esia vbe otọ.
15Ugbẹn vbe ivbi Izrẹl ghi miẹn ọẹn, iran ma rẹn emwi ne ọ khin, iran na gha nọ egbe ọta wẹẹ, vbe ọna khin yi? E Mosis keghi tama iran wẹẹ, “Ebrẹd ne Nọyaẹnmwa viọ gie uwa re ọre ena khin. 16Iyi ne Nọyaẹnmwa yi ọre ọna khin: wẹ Orhiọnkpọkpa vbe uwu uwa ghi rhọ vbene ọ gha sẹ nẹẹn, ọmwa ago eva ne orhiọnkpọkpa. Dọmwadẹ ọghọe ghi rhọ vbene ọ gha gba emwa ne ni rre owa ẹre obọ.”
17Ivbi Izrẹl keghi ru ẹe vberriọ, eso rhọ ne ọ bun gbe, eso rhọ ne ọ ma sẹ. 18Iran ghi do mwa rẹn, iran nii rhọ bun gbe ma ghi mwẹ ne ọ bun gbe, iran nii vbe rhọ ne ọ ma sẹ ma vbe gha mwẹ nọ ma sẹ. Ehia keghi rhọ zẹ vbene ọ khẹ ke dọmwadẹ ọghọe. 19E Mosis keghi tama iran wẹẹ, “Ọmwarhọkpa ghẹ rhie vbọ hin rre khẹ akhuẹ.” 20Sokpan eso vbọ ma zẹ ye Mosis re, iran keghi viọ eso hin rre vbọ khẹ ẹdẹnakhuẹ. Ẹdẹ ghi gbe, ọ keghi vuọn ne ọkhọe, ọ keghi kẹkẹ ya, ọ wia. Ohu iran keghi mu e Mosis. 21Iran kegha rhọ ẹre owiowiẹ zẹ vbene ọ gha sẹ ne dọmwadẹ ọghọe, sokpan ugbẹn vbe ovẹn a ghi gha yunmwu, nii kẹrre vbe otọ ghi ranran kua.
22Vbe ẹdẹ ne ogiehan, iran ghi rhọ ukhukhu eva, ago enẹ ne orhiọnkpọkpa. Avbe ọkaolotu nii rrọọ hia keghi do na iyẹn ma e Mosis. 23Rẹn keghi tama iran wẹẹ, “Iyi ne Nọyaẹnmwa yi ọna khin. Ẹdẹ ikẹtin ọre ẹdẹ ne akhuẹ khin, ẹdẹ ne ọ huanrẹn ọghe ikẹtin ne a ya fiohan ne Nọyaẹnmwa. Wa fian ebrẹd ne uwa gha fian ne uwa vbe le emwi ne uwa gha le. Emwi ne ọ ghi kẹrre hia, wa ya iran gba khua hin rre khẹ ẹdẹnakhuẹ.” 24Zẹ vbene Mosis khare, iran keghi ya nii kẹrre gbakhua khẹ ẹdẹ ne akhuẹ, ọ ma rhia, ọ ma vbe guọkhọe rua. 25E Mosis keghi kha wẹẹ, “Wa rri ọna ẹrẹna rhunmwuda Ẹdẹ Ikẹtin ne a ya fiohan ne Nọyaẹnmwa ọre ọna khin, wa i ra vbe miẹn evbare vbe uwu oha. 26Wa ghi rhọ ẹre la ikpẹdẹ ehan, sokpan vbe ikpedẹ ne ogihinrọn ne ọ re Ẹdẹ Ikẹtin, ẹ i khian gha rrọọ.”
27Vbe ikpẹdẹ ne ogihinrọn, emwa eso keghi ladian ne iran ya rhọ evbare sokpan iran ma miẹn.
28Ẹre Nọyaẹnmwa na tama e Mosis wẹẹ, “Inu ẹghẹ wa ra rra uhi kevbe iyi mwẹ la yi? 29Yerre wẹ mẹ ne Nọyaẹnmwa ọre ọ rhie Ẹdẹ Ikẹtin ne uwa, ọnii ọre ọ zẹe ne I na viọ evbare ukhukhu eva ne uwa vbe ikpẹdẹ ne ogiehan. Dọmwadẹ ọghọe ghi gha rre ehe ne ọ ye vbe ẹdẹ ne ne ogihinrọn, ọmwa rhọkpa ghe kpa hin owa rre.” 30Rhunmwuda ọnii, emwa nii ma winna, vbe ikpẹdẹ ne ne ogihinrọn.
31Ivbi Izrẹl ke gha tie nene evbare mana. Ọ keghi yevbe ighọn akọnifua, ọ ke gha fuọfua, ọ ghi yevbe ebrẹd fẹrhẹfẹrhẹ ne a ya owọn ru. 32E Mosis keghi kha wẹẹ, “Iyi ne Nọyaẹnmwa yi ọna khin. Wa rhie emana ye uwu emwi ne ọ vuọn, ne a rhie ẹre hin rre khẹ emọ ne uwa gha biẹlẹ, ne iran miẹn evbare ne I ya koko uwa vbe uwu ato, vbe ẹghẹ ne I na viọ uwa ke otọ Igipt ladian.” 33E Mosis keghi tama Errọn wẹẹ, “Rhie uru, mwa ago eva ọghe emana ye uwu ẹre, ne u muẹn ye odaro e Nọyaẹnmwa, ne a mu hin rre khẹ emọ ne ima gha biẹlẹ.” 34Zẹ vbene Nọyaẹnmwa yi ẹre iyi ma e Mosis, Errọn keghi muẹn ye odaro Ẹkpẹti Ile ne a miẹn ehe na gha gbe aro ghe ẹre. 35Ukpo iyeva ọre ivbi Izrẹl rri emana la, iran te do sẹ otọe Kenan ne iran yinrin. 36(Emwi na a ya mwa emwi ẹghẹ nii keghi re vbe a gha wa adanna ye ihe igbe.)
Currently Selected:
Ẹksọdọs 16: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
