मरकुस 15
15
पिलातुस चो ईशु ले सवाल
1बिहान पावते ची तुरते परधान याजकमन, सियानमन, आउर शास्तरीमन आउर माहासभा चो लोग सला करून भाती ईशु के बान्दाला, आउर हुनके धरून भाती पिलातुस चो हाथे सोपला। 2पिलातुस हुनचो ले पचारलो, “काय तुय यहूदीमन चो राजा आस?” हुन हुनके जबाप दिलो, “तुय खुद बोल सीस।” 3परधान याजकमन हुनचो उपरे खुबे गोठमन चो दोष लगाते रवत। 4पिलातुस हुनचो ले फेर पचारलो, “काय तुय काई जबाप नी देईस, दक ऐ मन तुचो उपरे कितलो गोठमन चो दोष लगाये सोत?” 5ईशु फेर काई जबाप नी दिलो; ऐथा तक कि पिलातुस के खुबे अकचकित होली।
ईशु के मरना डण्ड चो हुकुम
6पिलातुस हुन तिआर ने कोनी गोटक बन्दुआ के जोन के हुनमन मन करोत, हुनमन चो काजे छांडुन देते रलो। 7बरअब्बा नाव चो गोटक माने हुन राजधुरीईमन संगे बंदी रलो, जोनमन राजधुरीई थाने हत्या करू रवत। 8आउर भीड़ उपरे जाऊन भाती हुनचो ले गुहार करूक मुरयाली, कि जसन तुय आमचो काजे करते ईली सीस असने ची कर। 9पिलातुस हुनमन के जबाप दिलो, “काय तुमी मन करसास कि मय तुमचो काजे यहूदीमन चो राजा के छांडुन देयें दें?” 10कसनबल्लोने हुन जानते रलो कि परधान याजकमन हुनके कपट ले धराऊ रला। 11मान्तर परधान याजकमन लोगमन के उच-उचाला कि हुन बरअब्बा के हुनमन चो काजे छांडुन देओ। 12ऐ सुनुन पिलातुस हुनमन ले फेर पचारलो, “तो जेके तुमी यहूदीमन चो राजा बलेसास, हुनके मय काय करू आंय?” 13हुनमन फेर चिचयाला, “हुनके कुरूस थाने चेगाऊन देस!” 14पिलातुस हुनमन ले बल्लो, “केंव, ऐ काय गलती करलो से?” मान्तर हुनमन आउर बले चिचयाला, “हुनके कुरूस थाने चेगाऊन देस!” 15तेबे पिलातुस भीड़ के हरिक करतोर इच्छा ले, बरअब्बा के हुनमन काजे छांडुन दिलो, आउर ईशु के कोड़ा लगाऊन भाती सोपलो कि कुरूस ने चेगाया जाओ।
ईशु चो अपमान
16पलटनमन हुनके किला चो भीतरे चो दुआर ने धरून गेला जोन प्रिटोरियुम बलाय जाऊ आय, आउर सपाय पलटन के हाग देऊन आनला। 17तेबे हुनमन हुनके बयंजनी फटीई पिन्दाला आउर काटामन चो मुकुट गुतुन भाती हुनचो मुण्ड ने संगाला, 18आउर ऐ बोलुन भाती हुनके जुहार करला, “हे यहूदीमन चो राजा, जुहार!” 19हुनमन हुनचो मुण्ड ने राज बड़गी मारते, आउर हुनचो उपरे थुकते, आउर मांडी पाडून भाती हुनके जुहार करते रवत। 20जिदलदाय हुनमन हुनचो मजाक करला, तेबे हुनचो उपर ले बयंजनी फटीई के हिटाऊन भाती हुनची फटीई के पिन्दाला; आउर तेबे हुनके कुरूस उपरे चेगातो काजे बाहरे धरून गेला।
ईशु के कुरूस ने चेगातोर
21सिकन्दर आउर रूफुस चो बुआ शिमोन, गोटक कुरेनी माने, जोन गाँव ले ऐते रलो हुन बाट ले निकरलो; हुनमन हुनके जबड़दस्ती ने धरला कि हुनचो कुरूस उठाऊन धरून जाओ। 22हुनमन ईशु के गुलगुता नाव चो जगा थाने, जेचो मतलब खोपड़ी चो जगा आय, आनला। 23हुता हुनके पीता मिसा लो बिती दाखरस देऊक मुरयाला, मान्तर हुन नी धरलो। 24तेबे हुनमन हुनके कुरूस थाने चेगाला आउर हुनचो फटीई थाने चिठ्ठीमन डालुन भाती, कि काके काय मिरेदे, हुनमन के बाटला। 25आउर गोठ पाहार दिन चेगुन जाऊ रली, जिदलदाय हुनमन हुनके कुरूस थाने चेगाला। 26आउर हुनचो दोष पतर लिकुन भाती हुनचो उपरे लगाऊन दिआ गेली कि “यहूदीमन चो राजा”। 27हुनमन हुनचो संगे दुय झान डाकु, गोटक हुनचो उजा घाई गोटक हुनचो डेबरी हाथ घाई कुरूस थाने चेगाला। 28तेबे पवितर शास्त्र चो हुन बचन कि हुन दोषीमन चो संगे गेनाय गेलो, पुरा होली। 29आउर बाट ने जातो बितामन मुण्ड हलान-हलान भाती आउर ऐ बोलुन भाती हुनचो निन्दा करते रवत, “बाप रे! मंदिर के घसरातो बिता, आउर तीन दिन ने बनातो बिता! 30कुरूस उपर ले उतरून भाती आपन खुद के बचाव।” 31असने रीति ले परधान याजक बले, शास्तरीमन संगे, आपस ने मजाक ले बलते रवत, “ऐ तो दुसरमन के बचालो, मान्तर आपन के नी बचाऊक सकलो। 32इस्राएल चो राजा, मसीह, अदायं कुरूस उपर ले उतरून ऐओ कि आमी दकुन भाती बिश्वास करूं दे।” आउर जोन हुनचो संगे कुरूसमन उपरे चेगाय जाऊ रवत, हुनमन बले हुनचो निन्दा करते रवत।
ईशु चो मरना
33दुय पाहार होते खन सपाय देश ने अंधार छाऊन गेली, आउर तीसर पाहार तक रली। 34तीसर पाहार ईशु बड़े शब्द ले चिचयाऊन भाती बल्लो, “इलोई, इलोई, लमा शबक्तनी?” जेचो मतलब ऐ आय, “हे मोचो माहापुरू, हे मोचो माहापुरू, तुय मोके केंव छांडुन दिलीस?” 35जोन लगे उबा रवत, हुनमन थानले कितलो लोग ऐ सुनुन भाती बल्ला, “दका, हुन एलिया के हाग देये से।” 36आउर गोटक पराऊन भाती रूई के सिरका ने चबरलो, आउर राज बड़गी थाने संगाऊन भाती हुनके चुपरालो आउर बल्लो, “ठेबा, दकवां, एलिया हुनके उतरातो काजे ऐऊ आय कि नाई।” 37तेबे ईशु बड़े शब्द ले चिचयाऊन भाती जीव छांडलो। 38आउर मंदिर चो परदा उपर ले खाले तक फाटून भाती दुय गोंदा होली। 39जोन सुबेदार हुनचो पुरे उबा रलो, जिदलदाय हुनके असन चिचयाऊन भाती जीव छांडतोर दकलो, तेबे हुन बल्लो, “सत-सत ऐ माने, माहापुरू चो बेटा रलो!”
40कितलो बायले लेकीमन बले लापी ले दकते रवत: हुनमन ने मरियम मगदलीनी, नानी याकूब आउर योसेस चो आया मरियम, आउर सलोमी रली। 41जिदलदाय हुन गलील ने रलो तेबे ऐ मन हुनचो पाट-पाट होऊ रवत आउर हुनचो सेवा शासन करते रवत; आउर दुसर खुबे बायले लेकीमन बले रला, जोन हुनचो संगे यरूशलेम ने ऐऊ रवत।
यूसुफ चो कबर ने ईशु चो लाश के संगातोर
42जिदलदाय संझ होऊन गेली तेबे ऐईकाजे कि तिआरी चो दिन रये, जोन सब्त चो गोटक दिन पयले होऊ आय, 43अरिमतिया चो रतो बिता यूसुफ ईलो, जोन बड़े सभा चो सदस्य रलो आउर खुद बले माहापुरू चो राज चो बाट दकते रलो। हुन हिम्मत करून पिलातुस चो लगे गेलो आउर ईशु चो लाश के मांगलो। 44पिलातुस के अकचकित होली कि हुन इतलो झटके मरलो; आउर हुन सुबेदार के हाग देऊन भाती पचारलो, “काय हुनचो मरलोर खुबे बेर होली?” 45जिदलदाय हुन सुबेदार चो दुवारा हाल जानलो, तेबे लाश यूसुफ के दिलो। 46तेबे हुन मलमल चो गोटक चदर घेनलो, आउर लाश के उतराऊन भाती हुन चदर ने गुन्ड़ीयालो, आउर गोटक कबर ने जोन पकना ने खोड़ा जाऊ रये संगालो, आउर कबर चो बाट थाने गोटक पकना उलटाऊन दिलो। 47मरियम मगदलीनी आउर योसेस चो आया मरियम दकते रवत कि हुन काहां संगाया गेलो।
Currently Selected:
मरकुस 15: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
