मरकुस 14
14
ईशु के मारतो काजे खराप उआट
1दुय दिन चो पाचे फसह आउर अखमीरी रोटी चो तिआर होतो बिती रली। परधान याजक आउर शास्तरीमन ऐ गोठ चो खोज ने रवत कि हुनके कसन छंद ले धरून भाती मारूदें; 2मान्तर बलते रवत, “तिआर चो दिने नाई, काहांय असन नी होओ कि लोगमन ने बलवा मचो।”
बायले लेकी चो ईशु के आदर करतोर
3जिदलदाय हुन बैतनिय्याह ने शिमोन कोढ़ी चो घरे खाऊक लाय बोसलो, तेबे गोटक बायले लेकी संगमरमर पकना चो बनलो कोंड़ी ने जटामांसी चो खुबे मोल चो शुद्ध इतर धरून भाती ईली; आउर बरतन के फुटाऊन भाती इतर के हुनचो मुण्ड थाने रीकाली। 4मान्तर कोनी-कोनी आपलो मन ने घुरयाऊन भाती बोलुक मुरयाला, “ऐ इतर के केंव सत्यानाश करली? 5कसनबल्लोने ऐ इतर तो तीन सव दीनार ले जादा रेट ले बिकुन भाती कंगालमन ने बाटुन देऊक सकते रऊँ।” आउर हुनमन हुनके खिजुक मुरयाला। 6ईशु बल्लो, “हुनके छांडुन दिआस; हुनके केंव कन्दरायसास? हुन तो मोचो संगे अच्छा करली से। 7कंगाल तुमचो संगे हरमेशा रऊ आत, आउर तुमी जिदलदाय चाह ले हुदलदाय हुनमन चो भलाई करूक सकास; मान्तर मय तुमचो संगे हरमेशा नी रये। 8जोन काई हुन करूक सकली, हुन करली; हुन मोचो तोपा जातोर तिआर ने पयले ले मोचो देंह थाने इतर घासली। 9मय तुमचो ले सते बलेंसे कि सपाय जगत ने जाहांय बले ऐ नगतखबर परचार करा जाये दे, हुता हुनचो ऐ काम चो चरचा बले हुनचो सुरता ने करा जाये दे।”
यहूदा चो ईशु संगे बिश्वासघात
10तेबे यहूदा इस्करियोती जोन बारा झान थानले गोटक रलो, परधान याजकमन चो लगे गेलो कि हुनके हुनमन चो हाथे धराऊन देयें दें। 11हुनमन ऐ सुनुन भाती हरिक होला, आउर हुनके रूपया देतो काजे मानला; आउर हुन मवका डगराऊक मुरयालो कि हुनके कसन परकार धरायें दें।
आखरी भोज
12अखमीरी रोटी तिआर चो पयला दिने, जोन थाने हुनमन फसह चो जतरा करते रवत, हुनचो चेलामन हुनचो ले पचारला, “तुय काहां मन कर सीस कि आमी जाऊन भाती तुचो काजे फसह खातोर तिआर करूं दे?” 13हुन आपलो चेलामन थानले दुय झान के ऐ बोलुन भाती पठालो, “नंगर ने जाआ, आउर गोटक माने पानी चो हांडी उठालोर तुमके मिरेदे, हुनचो पाट-पाट जाहा; 14आउर हुन जोन घर ने जायेदे, हुन घर चो मालिक ले बोला, ‘गुरू बले से कि मोचो धरमशाला जोन थाने मय आपलो चेलामन चो संगे फसह खायेंदे काहां आसे?’ 15हुन तुमके गोटक सजालोर, आउर तिआर करलो बिती बड़े उपर पाऊज बाकरा दकाऊन देयेदे, हुता आमचो काजे तिआर करा।” 16चेलामन निकरून भाती नंगर ने ईला, आउर जसन हुन हुनमन के बोलु रलो, असने ची पावला; आउर फसह तिआर करला। 17जिदलदाय संझ होली, तेबे हुन बारा झान चो संगे ईलो। 18जिदलदाय हुनमन बसुन भात खाते रवत, तेबे ईशु बल्लो, “मय तुमचो ले सते बलेंसे कि तुमीमन थानले गोटक, जोन मोचो संगे भात खाये से, मोके धरायदे।” 19हुनमन मुरमुरा होऊन गेला आउर हुनमन गोटक-गोटक करून हुनचो ले बोलुक मुरयाला, “काय हुन मय आंय?” 20हुन हुनमन ले बल्लो, “हुन बारा झान थानले गोटक आय, जोन मोचो संगे थारी ने हाथ डालु आय। 21कसनबल्लोने माने चो बेटा तो, जसन हुनचो बारे ने लिकलोर आसे, जाऊ ची आय; मान्तर हुन माने उपरे हाय जेचो दुवारा माने चो बेटा धराया जाये से! अगर हुन माने चो जनम नी होती, तेबे हुनचो काजे अच्छा होती।”
चेलामन संगे परबु भोज
22जिदलदाय हुनमन खाते ची रवत, हुन रोटी धरलो, आउर आशीष मांगुन भाती टुटालो, आउर हुनमन के दिलो, आउर बल्लो, “धरा ऐ मोचो देंह आय।” 23फेर हुन बटका धरून भाती धन्यबाद करलो, आउर हुनमन के दिलो; आउर हुन सपाय झान हुन थानले पिवला। 24आउर ईशु हुनमन ले बल्लो, “ऐ बायदा चो मोचो लऊ आय, जोन खुबे लोग काजे बहाया जाये से। 25मय तुमचो ले सते बलें सें कि अंगुर चो रस हुन दिन तक फेर केबीई नी पियें दें, जिदलदाय ले माहापुरू चो राज ने नवा नी पियें दें।” 26फेर हुनमन भजन गाऊन भाती बाहरे जैतून चो डोंगरी थाने गेला।
पतरस चो इन्कार करतो बारे ने अगम गोठ
27तेबे ईशु हुनमन ले बल्लो, “तुमी सपाय ठोकरना खाआ से, कसनबल्लोने लिकलोर आसे: ‘मय राका करू के मारेंदें, आउर मेंडामन जतखत होदे।’ 28मान्तर मय आपलो जीव उठलोर पाचे तुमचो ले पयले गलील ने जायें दें।” 29पतरस हुनचो ले बल्लो, “अगर सपाय ठोकर खावले खाओत, मान्तर मय ठोकर नी खायें।” 30ईशु हुनचो ले बल्लो, “मय तुचो ले सते बलेंसें कि आजी ची ऐई राती के कुकड़ा चो दुयहार बासतोर पयले, तुय तीन हार मोचो ले मुकरून जासे।” 31मान्तर हुन आउर बले जोर देऊन भाती बल्लो, “अगर मोके तुचो संगे मरूक बले पड़े दे, तेबले बले मय तुचो इन्कार केबीई नी करेंदे।” ऐई परकार आउर सपाय झान बले बल्ला।
गतसमनी ने ईशु चो पारथना
32फेर हुनमन गतसमनी नाव चो गोटक जगा ने ईला, आउर हुन आपलो चेलामन ले बल्लो, “ऐथा बसुन राहा, जिदलदाय ले मय पारथना करेंदे।” 33आउर हुन पतरस आउर याकूब आउर यूहन्ना के आपलो संगे धरून गेलो; आउर खुबे अधीर आउर बाय बिकाल होलो, 34आउर हुनमन ले बल्लो, “मोचो मन खुबे मुरमुरा आसे, ऐथा ले कि मय मरतो ने आंसे: तुमी ऐथाय थेबा, आउर चेता राहा।” 35फेर हुन खिन्डिक पुरे गेलो आउर भूईं ने घसरुन भाती पारथना करूक मुरयालो कि अगर होऊक सके तो ऐ समया मोचो थानले गुचुन जाओ, 36आउर बल्लो, “हे अब्बा, हे बुआ, तुचो ले सपाय काई होऊक सके; ऐ बटका के मोचो लगले गुचाऊन देस: तेबले बले जसन मय मन करें से असन नाई, मान्तर जोन तुय मन कर सीस हुनी होओ।” 37फेर हुन ईलो आउर हुनमन के सोहतोर भेटुन भाती पतरस ले बल्लो, “हे शिमोन, तुय सोय सीस? काय तुय गोटक घड़ी बले चेता रऊक नी सकलीस? 38चेता आउर पारथना करते राहा कि तुमी परीक्षा ने नी पड़ा। आत्मा तो तिआर आसे, मान्तर देंह कमजोर आसे।” 39आउर हुन फेर गेलो आउर हुनी शब्द ने पारथना करलो। 40फेर ऐऊन भाती हुनमन के सोहतोर भेटलो, कसनबल्लोने हुनमन चो आँईकमन झुमा ले भरून रली; आउर नी जानते रवत कि हुनके काय जबाप देदे। 41फेर तीसर हार ऐऊन भाती हुनमन ले बल्लो, “अदायं सोहते राहा आउर सुसताते राहा, होली, समया अमरली; दका माने चो बेटा पापीमन चो हाथे धराया जाये से। 42उठा, जांव! दका, मोचो धरातो बिता लगे अमरलो से!”
गतसमनी ने ईशु के धोका ले धरातोर
43हुन ऐ बोलते रलो कि यहूदा जोन बारा झान थानले गोटक रये, आपलो संगे परधान याजकमन आउर शास्तरीमन आउर सियानमन चो बाटले गोटक बड़े भीड़ धरून भाती तुरते अमरलो, जोन खंडामन आउर ठेंगामन धरू रवत। 44हुनचो धरातो बिता हुनमन के ऐ पता देऊ रलो कि जेके मय चुमें दें हुनी आय, हुनके धरून भाती अच्छा ले निआ। 45हुन ईलो, आउर तुरते हुनचो लगे जाऊन भाती बल्लो, “हे गुरू!” आउर हुनके खुबे चुमलो। 46तेबे हुनमन हुनचो उपरे हाथ लगाऊन भाती हुनके धरला। 47हुनमन ले जोन लगे उबा रवत, गोटक खंडा झिकुन भाती माहायाजक चो दास उपरे चलालो, आउर हुनचो कान काट लो। 48ईशु हुनमन ले बल्लो, “काय तुमी डाकु समजुन भाती मोके धरतो काजे खंडामन आउर ठेंगामन धरून भाती निकरला सास? 49मय तो रोजे दिना मंदिर ने तुमचो संगे रऊन भाती उपदेश देते रले, आउर तेबे तुमी मोके नी धरलास: मान्तर ऐ ऐईकाजे होली कि पवितर शास्त्र चो गोठमन पुरा होओ।” 50ऐ थाने सपाय चेलामन हुनके छांडुन भाती पराला। 51गोटक जुआन आपलो ढुमन्ढ़ा देंह थाने चदर ओड़लोर हुनचो पाटे होलो; आउर लोगमन हुनके धरला। 52मान्तर हुन चदर छांडुन भाती ढुमन्ढ़ा परालो।
ईशु माहासभा चो पुरे
53फेर हुनमन ईशु के माहायाजक लगे नीला; आउर सपाय परधान याजक आउर पुरनिमन आउर शास्तरीमन हुनचो थाने रूंड़ा होला। 54पतरस लापी ची लापी हुनचो पाट-पाट माहायाजक चो दुआर चो भीतरे तक गेलो, आउर जगवारमन चो संगे बसुन भाती आईग छेकुक मुरयालो। 55परधान याजक आउर सपाय माहासभा ईशु के मारतो काजे हुनचो बिरूद ने गोहई चो खोज ने रला, मान्तर नी मिरली। 56कसनबल्लोने खुबे असन हुनचो बिरूद ने झूठा गोहई देते रवत, मान्तर हुनमन चो गोहई गोटक असन नी रली। 57तेबे थोड़े असन लोगमन उठून भाती हुनचो बिरूद ऐ झूठा गोहई दिला, 58“आमी ऐके ऐ बलते सुनलु से, ‘मय ऐ हाथ चो बनालोर मंदिर के घसराऊन देयेंदे, आउर तीन दिन ने दुसर बनायेंदें, जोन हाथ ले नी बनली से।’” 59ऐ थाने बले हुनमन चो गोहई गोटक असन नी निकरली। 60तेबे माहायाजक मंजी ने उबा होऊन भाती ईशु ले पचारलो, “तुय काई जबाप नी देईस? ऐ लोग तुचो बिरूद ने काय गोहई देसोत?” 61मान्तर हुन ओगाय होऊन रलो, आउर काई जबाप नी दिलो। माहायाजक हुनचो ले फेर पचारलो, “काय तुय हुन परमधन्य चो बेटा मसीह आस?” 62ईशु बल्लो, “मय आंय: आउर तुमी माने चो बेटा के सर्वशक्तिमान चो उजा बाटे बसलोर, आउर बादरी चो कुमरामन चो संगे ऐतोर दका से।” 63तेबे माहायाजक आपलो फटीई के चिरून भाती बल्लो, “अदायं आमके गोहईमन चो आउर काय जरूरत आसे? 64तुमीमन ऐ निन्दा सुनलास। तुमचो काय राय आसे?” हुनमन सपाय बल्ला कि ऐ मारा जातोर लायक आय। 65तेबे कोनी तो हुनचो उपरे थुकुक, आउर कोनी हुनचो थमना के ढ़ापुक आउर हुनके ठुसा मारूक, आउर हुनचो ले बोलुक मुरयाला, “अगम गोठ कर!” आउर जगवारमन हुनके धरून भाती थापड़ मारला।
पतरस चो इन्कार करतोर आउर गागतोर
66जिदलदाय पतरस खाले दुआर ने रलो, तेबे माहायाजक चो दासीमन थानले गोटक हुता ईली, 67आउर पतरस के आईग छेकतोर दकुन हुनके आँईक गड़ाऊन भाती दकली आउर बोलुक मुरयाली, “तुय बले तो हुन नासरी ईशु चो संगे रलीस।” 68हुन मुकरून गेलो, आउर बल्लो, “मय नी जाने आउर ना समजें सें कि तुय काय बोल सीस।” फेर हुन बाहरे डेवढ़ी ने गेलो; आउर कुकड़ा बासली। 69हुन दासी हुनके दकुन भाती हुनमन ले जोन लगे उबा रवत, फेर बोलुक मुरयाली, “ऐ हुनमन थानले गोटक आय।” 70मान्तर हुन फेर मुकरून गेलो। थोड़े समया चो पाचे हुनमन जोन लगे उबा रवत फेर पतरस ले बल्ला, “बिलकुल तुय हुनमन थानले गोटक आस; कसनबल्लोने तुय गलीली बले आस।” 71तेबे पतरस खुद पसताऊक आउर किरिया खाऊक मुरयालो, “मय हुन माने के, जेचो तुमी चरचा करेसास, नी जाने।” 72तेबे तुरते दुसरहार कुकड़ा बासली। पतरस के हुन गोठ जोन ईशु हुनचो ले बोलु रलो सुरता ईली, “कुकड़ा चो दुयहार बासतोर पयले तुय तीन हार मोचो इन्कार कर से।” आउर हुन ऐ गोठ के बिचारून भाती गागुक मुरयालो।
Currently Selected:
मरकुस 14: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
