मरकुस 16
16
मेलाय कबर
1जिदलदाय सब्त चो दिन बितली, तेबे मरियम मगदलीनी, आउर याकूब चो आया मरियम, आउर सलोमी बास देतो बिती तीजमन घेनला कि ऐऊन भाती हुनचो उपरे घसोत। 2सपता चो पईल दिने बड़े बिहाने जिदलदाय बेर निकरून ची रली, हुनमन कबर ने ईला, 3आउर आपस ने बोलते रवत, “आमचो काजे कबर चो बाटघड़ी ले पकना कोन उलटाये दे?” 4जिदलदाय हुनमन आँईक उपरे उठाला, तेबे दकला कि पकना उलटालोर रली-हुन खुबे बड़े रली। 5कबर चो भीतरे जाऊन भाती हुनमन गोटक जुआन के पोंडरा फटीई पिंदलोर उजा घाई बसलोर दकला, आउर खुबे भक्याला। 6हुन हुनमन ले बल्लो, “भकवा नी हुआ, तुमी ईशु नासरी के, जोन कुरूस उपरे चेगाय जाऊ रये, डगरायेसास। हुन जीव उठलो से, ऐथा निआय; दका, ऐ हुनी जगा आय, जोन थाने हुनमन हुनके संगाऊ रला। 7मान्तर तुमी जाआ, आउर हुनचो चेलामन आउर पतरस ले बोला कि हुन तुमचो ले पयले गलील ने जाये दे। जसन हुन तुमचो ले बोलु रलो, तुमी हुताय हुनके दका से।” 8आउर हुनमन निकरून भाती कबर ले पराला; कसनबल्लोने थरथर आउर भेलकी हुनमन उपरे चेपाऊन रली; आउर हुनमन कोकीई काई नी बल्ला, कसनबल्लोने डरते रवत।
मरियम मगदलीनी ईशु के दकु आय
9सपता चो पईल दिने बिहान पावते ची हुन जीव उठून भाती बिहान-बिहान मरियम मगदलीनी के जेचो थानले हुन सात दुष्टआत्मामन के निकराऊ रलो, दका दिलो। 10हुन जाऊन भाती ईशु चो संगवारीमन के जोन दुक ने पडु रवत आउर गागते रवत, खबर दिली। 11हुनमन ऐ सुनुन भाती कि हुन जीव आसे आउर हुन हुनके दकली से, बिश्वास नी करला।
दुय झान चेलामन के दका देतोर
12ऐचो पाचे हुन दुसर रूप ने हुनमन थानले दुय झान के जिदलदाय हुनमन गाँव बाटे जाते रवत, दका दिलो। 13हुनमन बले जाऊन भाती दुसरमन के खबर दिला, मान्तर हुनमन-हुनमन चो बले बिश्वास नी करला।
बड़े हुकुम
14पाटे हुन-हुन गिआरा झान के बले, जिदलदाय हुनमन खाऊक लाय बसु रवत दका दिलो, आउर हुनमन चो अबिश्वास आउर मन चो कठर उपरे उलाहना दिलो, कसनबल्लोने जोनमन हुनचो जीव उठलोर पाचे हुनके दकु रला, ऐ मन हुनमन चो बले बिश्वास नी करू रला। 15आउर हुन हुनमन ले बल्लो, “तुमी सपाय जगत ने जाऊन भाती पुईतराय बरमाण्ड चो लोगमन के नगतखबर परचार करा। 16जोन बिश्वास करे दे आउर डूबन धरे दे हुनचेई मुक्ति होये दे, मान्तर जोन बिश्वास नी करे दे हुन दोषी ठेबाय जाये दे; 17बिश्वास करतो बितामन ने ऐ चिना हो दे कि हुनमन मोचो नाव ले दुष्टआत्मामन के निकरा दे, नवा-नवा भाषा बोल दे, 18सांपमन के उठाऊन धर दे, आउर अगर हुनमन बिश बले पिऊन जादे तेबले बले हुनमन चो काई नुकसान नी होये दे; हुनमन बेमारीमन उपरे हाथ संगा दे, आउर हुनमन चेंगा होऊन जादे।”
ईशु चो सरग जातोर
19परबु ईशु हुनमन ले गोठमन गोठयालो पाचे सरग उपरे उठाय गेलो, आउर माहापुरू चो उजा हाथ घाई बसलो। 20आउर हुनमन निकरून भाती हरकोनी जगा परचार करला, आउर परबु हुनमन संगे काम करते रलो, आउर हुन चिनामन चो कारन जोन संगे-संगे होते रये, बचन के जमखम करते रलो। आमीन।
Currently Selected:
मरकुस 16: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
