मरकुस 13
13
ईशु बाटले मंदिर चो विनाश चो अगम गोठ
1जिदलदाय हुन मंदिर ले निकरते रलो, तेबे हुनचो चेलामन थानले गोटक हुनचो ले बल्लो, “हे गुरू, दक, कसन-कसन पकना आउर कसन-कसन माहाल आसे!” 2ईशु हुनचो ले बल्लो, “काय तुमी ऐ बड़े-बड़े माहाल दकेसास: ऐथा पकना उपरे पकना बले बाचुन नी रये जोन घसराया नी जाये।”
आखरी दिनमन चो चिना
3जिदलदाय हुन जैतून चो डोंगरी उपरे मंदिर चो पुरे बोसु रलो, तेबे पतरस आउर याकूब आउर यूहन्ना आउर अन्द्रियास अलगे जाऊन भाती हुनचो ले पचारला, 4“आमके सांग कि ऐ गोठमन केबे होये दे? आउर जिदलदाय ऐ सपाय गोठमन पुरा होतो ने होये दे हुदलदाय चो काय चिना होये दे?” 5ईशु हुनमन ले बोलुक मुरयालो, “खबड़दार राहा कि कोनी तुमके नी भरमाओत। 6खुबे लोग मोचो नाव ले ऐऊन भाती बोल दे, ‘मय हुनी आय!’ आउर खुबे लोगमन के भरमादे। 7जिदलदाय तुमी लड़ीई नाहले लड़ीईमन चो चरचा सुना से, तेबे नी घबराहा; कसनबल्लोने ऐ मन चो होतोर जरूरी आय। मान्तर हुन समया आखरी नी होये। 8कसनबल्लोने जाति उपरे जाति, आउर राज उपरे राज चड़ाई करे दे। सपाय जगा भुईं डोल होये दे, आउर अकाल पड़े दे। ऐ तो दुक डण्डमन चो मुर होये दे।
9“मान्तर तुमी आपलो बारे ने बाचुन राहा; कसनबल्लोने लोग तुमके बड़े सभामन ने सोप दे आउर तुमी पंचायतमन ने पेटाय जाआ से, आउर मोचो कारन राजपालमन आउर राजामन चो पुरे उबा कराय जाआ से, बल्ले हुनमन चो काजे गोहई हुआ। 10मान्तर जरूरी आय कि पयले नगतखबर सपाय जातिमन ने परचार करा जाओ। 11जिदलदाय हुनमन तुमके नेऊन भाती सोप दे, तेबे पयले ले चिन्ता नी करा कि आमी काय बोलुन्दे; मान्तर जोन काई तुमके हुनी समया सांगुन दिआ जाये दे हुनी बोला; कसनबल्लोने बोलतो बिता तुमी नुआस, मान्तर पवितर आत्मा आय। 12भाई के भाई आउर बुआ के बेटा मरातो काजे सोप दे, आउर पिलामन आया बुआ चो बिरूद ने उठून भाती हुनमन के मरा दे। 13आउर मोचो नाव चो कारन सपाय लोग तुमचो ले बईर कर दे; मान्तर जोन आखरी तक धीरज धरून रये दे, हुनचेई मुक्ति होये दे।
माहाकष्ट चो समया
14“आउर जिदलदाय तुमी हुन उजरातो बिती खराप तीज के जोन थाने ठीक नुआय हुता उबा दका, (पड़तो बिता समजो) तेबे जोन यहूदिया ने रदे, हुनमन डोंगरी उपरे परा ओत; 15जोन छानी उपरे रदे, हुन आपलो घर ले काई धरूक लाय खाले नी उतरो आउर ना भीतरे जाओत; 16आउर जोन बेड़ा ने रदे, हुन आपलो फटीई धरतो काजे पाटकुती नी बाहड़ो। 17हुन दिनमन ने जोन देंहबारी आउर गोरस खुआते रदे, हुनमन काजे हाय-हाय! 18आउर पारथना करा कि ऐ सीतकार ने नी होओ। 19कसनबल्लोने हुन दिन असन झंझट चो दिन होये दे कि बरमाण्ड चो मुर ले, जोन माहापुरू बनालो से ऐबे तक ना होली से आउर ना फेर केबीई होये दे। 20अगर परबु हुन दिनमन के नी घटातो, तेबे कोनी जीव जन्तु बले नी बाचता; मान्तर हुन चुनलो बितामन चो कारन जोनमन के हुन चुनलो से, हुन दिनमन के घटालो। 21हुदलदाय अगर कोनी तुमचो ले बलदे, ‘दका, मसीह ऐथा आसे,’ नाहले ‘दका, हुता आसे,’ तेबे बिश्वास नी करा; 22कसनबल्लोने झूठा मसीह आउर फंदी अगम गिआनी उठून उबा हो दे, आउर चिना आउर भयंकर काम दका दे कि अगर होऊक सको तो चुनलो बितामन के बले भरमादे। 23मान्तर तुमी चेत ने राहा; दका, मय तुमीमन के सपाय गोठमन के पयले ले सांगले से।
ईशु चो दुसर आगमन
24“हुन दिनमन ने, हुन कलेश चो पाचे बेर अंधार होये दे, आउर जोन उजर नी देये; 25आउर बादरी उपर ले तारामन घसरुक मुरयादे; आउर बादरी चो शक्तिमन हलाया जाये दे। 26तेबे लोग माने चो बेटा के बड़े सामरत आउर महिमा चो संगे बादरी ने ऐतोर दक दे। 27हुन समया हुन आपलो दूतमन के पटाऊन भाती, धरतनी चो ऐ पाट ले बादरी चो हुनपाट तक, भोंवरक ले आपलो चुनलो लोगमन के रून्डाये दे।
अंजीर रूक चो कहनी
28“अंजीर चो रूक ले ऐ कहनी सिका जिदलदाय हुनचो खेंदा कोंवरी होऊ आय, आउर पान निकरूक मुरयाऊ आय; तेबे तुमी जानु आस कि जेठ लगे आसे। 29असने परकार जिदलदाय तुमी ऐ गोठमन के होतोर दका, तेबे जाना कि हुन लगे आसे मान्तर बाट ची थाने आसे। 30मय तुमचो ले सते बलें सें कि जिदलदाय ले ऐ सपाय गोठमन नी होये, हुदलदाय ले ऐ लोग जाते नी रदे। 31बादरी आउर धरतनी टलुन जादे, मान्तर मोचो गोठमन केबीई नी टले।
हरमेशा चेत ने राहा
32“हुन दिन नाहले हुन घड़ी चो बारे ने कोनी नी जानोत ना सरग चो दूत आउर ना बेटा; मान्तर मात्र बुआ। 33दका, चेत ने आउर पारथना करते राहा; कसनबल्लोने तुमी नी जानास कि हुन समया केबे ऐये दे। 34ऐ हुन माने चो असन गती आय, जोन परदेश जातो समया आपलो घर के छांडुन जाओ, आउर आपलो दासमन के हक देओ: आउर हरकोनी के हुनचो काम जनालो, आउर बाट राका करू के चेत ने रतोर हुकुम दिलो। 35ऐईकाजे चेत ने राहा, कसनबल्लोने तुमी नी जानास कि घर चो मालिक केबे ऐये दे, संझ के नाहले अधघर राती के, नाहले कुकड़ा बासतो समया नाहले बड़े बिहाने। 36असन नी होओ कि हुन उधापड़े ऐऊन भाती तुमके सोहतोर भेटो। 37आउर जोन मय तुमचो बलें सें, हुनी सपाय ले बलें सें: चेत ने राहा।”
Currently Selected:
मरकुस 13: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
