मरकुस 12

ईशु बाटले दुष्ट किसानमन चो कहनी

1फेर हुन कहनीमन ने हुनमन ले गोठयाऊक मुरयालो: “कोनी माने दाख चो बनवाड़ी लगालो, आउर हुनचो भोंवरक बाड़ा बान्दलो, आउर रस चो कुण्ड खोड़लो, आउर गुबा बनालो; आउर किसानमन के ठेका देऊन भाती परदेश गेलो। 2फेर फर चो सीजन ने हुन किसानमन चो लगे गोटक दास के पठालो कि किसानमन ले दाख चो बनवाड़ी चो फरमन चो हिस्सा धरो। 3मान्तर हुनमन हुनके धरून भाती पेटला आउर मेलाय हाथ फिराऊन दिला। 4फेर हुन गोटक आउर दास के हुनमन लगे पठालो; हुनमन हुनचो मुण्ड के फुटाला आउर हुनचो बेईजित करला। 5फेर हुन गोटक आउर के पठालो; हुनमन हुनके मारून पोकाला। तेबे हुन आउर खुबे के पठालो; हुनमन थानले हुनमन कितलो के पेटला, आउर कितलो के मारला। 6अदायं गोटक ची रऊन जाऊ रये, जोन हुनचो लाड़रा बेटा रये; आखरी ने हुन हुनके बले हुनमन चो लगे ऐ सोचुन भाती पठालो कि हुनमन मोचो बेटा चो ईजीत कर दे। 7मान्तर हुन किसानमन आपस ने बल्ला, ‘ऐ तो हकदार आय; ईआ, आमी ऐके मारून देवां, तेबे धनमाल आमचो होऊन जाये दे।’ 8आउर हुनमन हुनके धरून भाती मारला, आउर दाख चो बनवाड़ी चो बाहरे पोकाला।

9“ऐईकाजे दाख चो बनवाड़ी चो मालिक काय करे दे? हुन ऐऊन भाती हुन किसानमन के नाश करे दे, आउर दाख चो बनवाड़ी के दुसर के देये दे। 10काय तुमीमन पवितर शास्त्र ने ऐ बचन नी पढ़लास:

‘जोन पकना के राजमिस्त्रीमन बेकार ठेबाऊ रला,

हुनी कोनया चो मुंडी पकना होली;

11ऐ परबु चो बाटले होली,

आउर आमचो नजर ने भयंकर आय’!”

12तेबे हुनमन हुनके धरूक चाहला; कसनबल्लोने समजुन रवत कि हुन आमचो बिरूद ने ऐ कहनी बल्लो से। मान्तर हुनमन लोगमन ले डरला, आउर हुनके छांडुन भाती गेला।

राजा के कर देतो काजे सवाल

13तेबे हुनमन हुनके गोठमन ने फासतो काजे कितलो फरीसीमन आउर हेरोदीमन के हुनचो लगे पठाला। 14हुनमन ऐऊन भाती हुनचो ले बल्ला, “हे गुरू, आमी जानु, कि तुय सत आस, आउर काचीई फिकर नी करीस; कसनबल्लोने तुय मानेमन चो थोमना दकुन भाती गोठ नी गोठयाईस, मान्तर माहापुरू चो बाट सत धरम ले सांगु आस। तेबे काय राजा के कर देतोर नगत आय कि नुआय? 15आमी देऊ, नाहले नी देऊ?” हुन हुनमन चो कपट जानुन भाती हुनमन ले बल्लो, “मोके केंव परकेसास? गोटक दीनार मोचो लगे आना, कि मय दकें दें।” 16हुनमन आनला, आउर हुन हुनमन ले बल्लो, “ऐ छाप आउर नाव काचो आय?” हुनमन बल्ला, “राजा चो।” 17ईशु हुनमन ले बल्लो, “जोन राजा चो आय हुन राजा के, आउर जोन माहापुरू चो आय माहापुरू के दिआस।” तेबे हुनमन हुन थाने खुबे भक्याला।

फेर जीव उठतोर बारे ने सवाल

18फेर सदूकीमन बले, जोन बोलु आत कि मरलो बितामन चो जीव उठतोर आसे ची नाई, हुनचो लगे ऐऊन भाती हुनचो ले पचारला, 19“हे गुरू, मूसा आमचो काजे लिकलो से कि अगर काचीई भाई बिना बेटा चो मरे दे आउर हुनचो बायले रये दे, तेबे हुनचो भाई हुनचो बायले ले बिहा करो आउर आपलो भाई चो काजे बंश जनमा ओ। 20सात भाई रवत। पयला भाई बिहा करून बिना बेटा चो मरलो। 21तेबे दुसर भाई हुन बायले लेकी ले बिहा करलो आउर बिना बेटा चो मरलो; आउर असने ची तीसर भाई बले करलो। 22आउर सातो भाई ले बेटा नी होला। सपाय चो पाचे हुन बायले लेकी बले मरली। 23आउर जीव उठलो ने हुन हुनमन थानले काचो बायले होये दे? कसनबल्लोने हुन सातो चो बायले होऊ रली।”

24ईशु हुनमन ले बल्लो, “काय तुमी ऐई कारन ले धोका ने नी पड़लासास कि तुमी ना तो पवितर शास्त्र के जानास, आउर ना माहापुरू चो सामरत के? 25कसनबल्लोने जिदलदाय हुनमन मरलो बितामन थानले जीव उठ दे, तेबे हुनमन ना बिहा कर दे आउर ना बिहा ने दिया जादे, मान्तर सरग ने दूतमन चो असन हो दे। 26मरलो बितामन चो जीव उठतोर बारे ने काय तुमी मूसा चो किताब ने बुटा चो कहनी ने नी पढ़लास कि माहापुरू हुनचो ले बल्लो, ‘मय अब्राहाम चो माहापुरू, आउर इसाक चो माहापुरू, आउर याकूब चो माहापुरू आंय’? 27माहापुरू मरलो बितामन चो नुआय मान्तर जीवतामन चो माहापुरू आय; आउर तुमी बड़े धोका ने पड़लासास।”

बड़े हुकुम

28शास्तरीमन थानले गोटक ऐऊन भाती हुनमन के बहस करतोर सुनलो, आउर ऐ जानुन भाती कि हुन हुनमन के अच्छा रीति जबाप दिलो, हुनचो ले पूछलो, “सपाय ले बड़े हुकुम कोन बिती आय?” 29ईशु हुनके जबाप दिलो, “सपाय हुकुममन ले ऐ माहान आय: ‘हे इस्राएल सुन! परबु आमचो माहापुरू गोटक ची परबु आय, 30आउर तुय परबु आपलो माहापुरू ले आपलो सपाय मन ले, आउर आपलो सपाय जीव ले, आउर आपलो सपाय अकल ले, आउर आपलो सपाय शक्ति ले मया संगाव।’ 31आउर दुसर ऐ आय, ‘तुय आपलो अड़स-पड़स चो लोग ले आपलो असन मया संगाव।’ ऐचो ले बड़े आउर कोनी हुकुम निआय।” 32शास्तरीमन हुनचो ले बल्लो, “हे गुरू, खुबे ठीक! तुय सते बोल सीस कि हुन गोटकी ची आय, आउर हुनके छांडुन आउर कोनी निआत। 33आउर हुनचो ले सपाय मन, आउर सपाय अकल, आउर सपाय जीव, आउर सपाय शक्ति चो संगे मया संगाव; आउर अड़स-पड़स चो लोग ले आपलो असन मया संगातोर, सपाय होमबलिमन आउर बलिदानमन ले बडुन भाती आय।” 34जिदलदाय ईशु दकलो कि हुन समज ले जबाप दिलो, तेबे हुनचो ले बल्लो, “तुय माहापुरू चो राज ले लापी निआस।” आउर कोकीई फेर हुनचो ले काई पचारतोर हिम्मत नी होली।

ईशु चो सवाल

35फेर ईशु मंदिर ने उपदेश देते-देते ऐ बल्लो, “शास्तरीमन कसन ने बोलु आत कि मसीह दाऊद चो बेटा आय? 36दाऊद खुदे ची पवितर आत्मा ले होऊन भाती बल्लो से:

‘परबु मोचो परबु ले बल्लो,’ ‘मोचो उजा हाथ बाटे बस,

जिदलदाय ले कि मय तुचो बयरीमन के तुचो पाँयमन चो खाले नी करून देये।’”

37“दाऊद तो खुद हुनके परबु बोलु आय, फेर हुन हुनचो बेटा काहां ले ठेबलो?” आउर भीड़ चो लोग हुनचो हरिक ले सुनते रवत।

ईशु चो बाटले जनातोर

38हुन आपलो उपदेश ने हुनमन ले बल्लो, “शास्तरीमन ले खबड़दार राहा, जोन लाम-लाम फटीई पिन्दुन भाती बुलतोर आउर हाटमन ने जुहार, 39आउर आराधना घरमन ने मुख्य-मुख्य आसन आउर भोज ने मुख्य-मुख्य जगा बले मनकरू आत। 40हुनमन रान्डीमन चो घरमन के खाऊ आत, आउर दकातो काजे खुबे दाय ले पारथना करते रऊ आत। ऐ मन खुबे डण्ड पावदे।”

रान्डी चो दान

41हुन मंदिर चो भण्डार चो पुरे बसुन भाती दकते रलो कि लोग मंदिर चो भण्डार ने कसन परकार पयसा डालु आत; आउर खुबे असन सवकारमन खुबे काई-काई डालला। 42इतलो ने गोटक कंगाल रान्डी ऐऊन भाती दुय दामड़ीमन, जोन गोटक अदली चो बराबर होऊ आय, डालली। 43तेबे हुन आपलो चेलामन के लगे हाग देऊन भाती हुनमन ले बल्लो, “मय तुमचो ले सते बलें सें कि मंदिर चो भण्डार ने चेगातो बितामन थानले ऐ कंगाल रान्डी सपाय ले बडुन भाती डालली से; 44कसनबल्लोने सपाय आपलो धन चो बाड़ती थानले डालला से, मान्तर ऐ आपलो घाटामन थानले जोन काई हुनचो रली, बल्ले आपलो सपाय जीवना के डालली से।”

Currently Selected:

मरकुस 12: HLBNT

ማድመቅ

Copy