लूका 2

बैतलहम गेन यीशु गा जनम

(मत्ती 1:18-25)

1डी दिनेन रोमी सम्राट कैसर औगुस्तुस नी हेजा सेबाई राज्य गेन कुरकू श्री गिनती दडा गा हुकूम ओटके। 2येटेन पेला श्री गिनती डी टेमो डायेन, जब क्विरीनियुस सीरिया देशो गा राज्यपाल डा। 3सेबाई कुरकू श्री गिनती गेन जीमू ओलगा घल्जी इकु-इकुगा पुरान ओले देटे टे दिकुगा जुना सनाकु डा। 4यूसुफ भी इनिघल्जी कि देटेन दाऊद गा उरामिंकू एठा पीढी गा डा, गलील जिल्हा गा नासरत पुराटे यहूदिया जिल्हा गेन दाऊद गा पुरान बैतलहम पूरान ओले। 5यूसुफ हेजा गा मंगेतर मरियम गा सेंग्गोन जो लाच्के डा जीमू ओल घल्जी बैतलहम पुरान ओले। 6-7जब दिकु बैतलहम पूरा गेन डा, देटेन सेंदरामिंकू रुकातिंजूबा होय डी जगा गेन थंदळ गा घल्जी दिकुन तुनिकाभी जगा बान डा। इनिघल्जी दिकु म्या कोठान थंदळजे। जब मरियम गा सानी डाऊ गा टेमो हेन, मेटे डीचनी देटेन हेजा पेला कोण के जनम जीके। डीचनी सनी के फांडून गुंडीकेनेच एठा डीचके गौवनीन डोकेनेच देटेन कुरकू जनावरकु घल्जी चारा येंडावा होय।

ताठयाकुन स्वर्गदूत गा खाबोर

8एठा डी जिल्हा अदा ताठयाकु डा, जो रातोन मैदान गेन थंदळ टे इकुगा खाळु गा जागली लक्के डा। 9जब परमेश्वर गा म्या स्वर्गदूत दिकुगा मेरान हेन डो टेगेनके, प्रभु गा तेज दिकुगा उफुन्भी कोनेन चमकातिंजे, मेटे दिकु भेबाव हिगरायेन। 10मेटे स्वर्गदूत नी दिकुटे मंडीके, “बाकी हिगरा, चोयाकी डोगे इंज आपेके भेबाव खुशी गा अच्छा खाबोर घालेवा मेना, जो सेबाई कुरकू गा घल्जी खाट खुशी गा वाजा डाऊवा। 11डीच येटेन टैंज बैतलहम गेन होय, जो कि राजा दाऊद गा पूरा होय, आपे घल्जी म्या उध्दार दडामिठाच डायेन होय। डीचका मसीह प्रभु होय। 12येटेन इनी बातो गा साबुत होय कि येटेन डीका सानी होय, डीचके आपे फांडून गुंडीटे एठा कोठान गिटीचटे डूगुवा।” 13मेटे अचनाक चोटोका अलग्गो स्वर्गदूत स्वर्ग टे इटान हेन, डी परमेश्वर गा दूत गा सेंग्गोन बेलऊ लठ्ठाका मेना परमेश्वर गा स्तुति दडा लज्जे एठा मंडीके, 14“सेबाई टे ऊँचा टे स्वर्ग गेन परमेश्वर गा महिमा एठा पृथ्वी लिंजेन डी कुरकू गेन दिकुटे देटेन खुशोके होय शांती डायु।”

ताठयाकु गा बैतलहम गेन सेने

15जब स्वर्गदूत दिकु मेराटे स्वर्ग गेन ओले मेना, मेटे ताठयाकुनी इकुका मंडीके, “हेजे आबु बैतलहम पूरान सेनेवा डो येटेन जो बातो डायेन होय, एठा डीके प्रभु नी आलेके अच्छा खाबोर घालेवा होय, डोगे।” 16एठा दिकुनी तुरुटो ओलेडो मरियम एठा यूसुफ के एठा कोठान डी सनी के गिटीचके डोकेनेच। 17दिकुनी डी सनी गा आंटे-बाटे के घालके कि स्वर्गदूत नी डी सानी गा बारेन चोच मंडीके डा। 18एठा सेबाई आजुममिंकू डी सेबाई बातो के जो ताठयाकुनी दिकुके घालके डा, इनी अजोम्टे दिकु बिचारजे। 19पेनो मरियम इनी सेबाई बातो हेजा मनेन धोटे सोचातिंज लज्जे। 20एठा ताठयाकुनी जैसा परमेश्वर गा स्वर्गदूतकु नी दिकुके घाल्के डा, डेनोगोका सेबाईकु आजुमटे एठा धोटे परमेश्वर गा महिमा एठा स्तुति डाटे हिराएन।

यीशु गा खतना एठा जीमू दोडो

21सानी यीशु गा जनम गा बादोन आठवा दिन दियागा खतना गा टेमो हेन, मेटे दियागा जीमू यीशु डोके मेना, येटेन जीमू स्वर्गदूत द्वारा, दियागा लाजेन हेजे टे पेलाका जीके डा। 22-24जब मूसा गा नियम गा रोंगो मरियम एठा यूसुफ चोखाराएन गा दिन पुराएन डा, मेटे दिकु यरूशलेम मंदिर गेन ओले। दिकु देटेन बरी कबूत्तर गा कोणकिंज टे गा बलिदान पेपेळेचटे ओले, येटेन प्रभु गा नियम गा पालन दडा घल्जी डा। दिकु यीशु सेंग्गोन यरूशलेम शहर गेन ओले कि डीचके प्रभु गा सम्मान सालेनेच चोयाकी प्रभु गा नियम इनी मंडीवा होय, “हारेक पेला कोण प्रभु गा घल्जी चोखरा आरु घल्जी अलग्गो केच होना।”

शमौन गा भविष्यवाणी

25डी टेमो यरूशलेम शहर गेन शमौन जीमू म्या कोरो डा। डी कोरो धर्मी एठा परमेश्वर गा हिगरा दोडो मिठाच कोरो डा। एठा बेसबार टे मसीह गा इंतजार दडा लक्के डा, कि देटेन हेजे एठा इस्राएली कुरकू के तसल्ली जे। एठा पवित्र आत्मा दियागा सेंग्गोन डा। 26पवित्र आत्मा नी डीचके घाल्के, कि गुजूटे पेला, देटेन प्रभु गा मसीह के डोगेवा। 27डी दिन आत्मा गा द्वारा दियागा अगुवाई डाके कि देटेन यरूशलेम गा मंदिर गेन हेन, डीका टेमो मरियम एठा यूसुफ नी मूसा गा नियमनौर द्वारा पक्काके विधीनौर के पूरा दडा गा मकसद टे सानी यीशु के साटे देटेन मोएन। 28मेटे डीचनी सानी यीशु के हेजा गा बुलून सैय्येनेच एठा परमेश्वर गा धन्यावाद डाटे मंडीके। 29“हे प्रभु, इंज्के अमागा भाग्य के अमा वादा रोंगो शांती टे टूल्जाकेच। 30-31चोयाकी इंज्नी इंजगा मेट टे अमागा उध्दार दडामिठाच के डोकेनेच होय, डीचके आमनी सेबाई कुरकू के बबाचातिंज गा घल्जी कुल्केनेच। डीचके आमनी सेबाई देशो गा कुरकू गा सम्मान तैयार केनेच होय। 32कि देटेन अलग्गो जाटो गा कुरकू लिंजेन परमेश्वर के ओटमिनी उजाला आरुयु, एठा आम इस्राएली कुरकू गा घल्जी महिमा होय।” 33यूसुफ एठा सानी गा आंटे इनी बातो के जो शमौन दियागा बारेन गेन मंडीके डा, बिचार डा। 34मेटे शमौन नी डी सानी के आशीर्वाद जीके, दियागा आंटे मरियम टे मंडीके, “आजुमे डी तोटेनका इस्राएली कुरकू के नशो एठा उध्दार गा घल्जी ठहरातिंजके होय एठा डीचके परमेश्वर कोनेटे म्या चिन्हा रुपोन कुल्केनेच होय, लेकिन चोटोका कुरकू दियागा खिलाफबेन डाएवा। 35(एठा इनिघल्जी दिकुगा उखुके बिचार के ओडे। एठा कासु, म्या धार तलवार गा रोंगो, अमा खुद गा दिल टयगेवा।”)

हन्नाह व्दारा गवाही

36आशेर गा कोणकुटे हन्नाह जीमू फनुएल गा कोंजाई टे म्या परमेश्वर गा कोनेटे मंडीमिठाच डा देटेन ठायका बुड्डी डा, एठा ब्याह डायेन गा बादोन सात साल हेजा गा सानाटे गा सेंग्गोन थंदळके डा। 37डेगा बादोन डीच चौरांसी साल विधवा आरुटे थंदळके। एठा हमेशा यरूशलेम गा मंदिर के बान आरा डा, पेनो उपासो एठा प्रार्थना डा-डा टे रातो-दिन आराधना दडा डा। 38एठा देटेन डी टेमो देटेन हेंडो परमेश्वर गा धन्यवाद दडा लज्जे, एठा दिकु सेबाईकु टे जो यरूशलेम शहर गा कुरकू आरा गा राह दोडो लक्के डा दियागा बारेन बातो लज्जे।

यूसुफ एठा मरियम गा उरान हिरा

39जब यूसुफ एठा मरियम नी प्रभु गा मूसा गा नियम रोंगो सेबाईका पुराके मेटे दिकु इकुगा पुरान गलील जिल्हा गा नासरत ओले। 40एठा सानी बढातिंजुवा एठा आत्मा गेन बलवन्त आरोएन एठा दिमाग टे पूरा भेट्टेन डा एठा परमेश्वर गा आनुग्रह दिया लिंजेन डा।

सानी यीशु मंदिर गेन

41यीशु गा आंटे-बाटे हारेक साल फसह गा तिवार गेन यरूशलेम शहर गेन सेने का डा। 42जब यीशु बारह साल गा डायेन, मेटे यीशु एठा दियागा आंटे-बाटे फसह गा तिवार गा रितो रोंगो यरूशलेम शहर गेन ओले। 43जब दिकु फसह तिवार गा स्याएन गा बादोन हिरा लज्जे, पेनो सानी यीशु यरूशलेम शहर गेन थंदळके एठा यूसुफ एठा सानी गा आंटे बान मालूम डा। 44दिकु येटेन सामझातिंजटे, कि देटेन अलग्गो सेंदरामिंकू गा सेंग्गोन होंगा, इनिघल्जी दिकुनी पूरा दिन सेंदरावे एठा डाबोलटे इकुगा सगाकु एठा सोपतीकु गा तलान दियागा घागटा सुरुके। 45पेनो जब देटेन बान घटाडुका, मेटे घगाटा-घगाटा यरूशलेम शहर गेन हिरायेन। 46एठा तीन दिन गा बादोन दिकुनी डीचके यरूशलेम गा मंदिर गा दरोमेन यहूदी इथूमिंकू गा तलान सुबानके, दिकुगा आजोम्बा एठा दिकुटे प्रश्न कोकाम्बारा टे घटाएन। 47एठा चोटोकु दियागा आजोम लक्के डा, दिकु सेबाईकु दियागा समझो एठा दियागा जवाब टे अचम्बो जे डा। 48मेटे दियागा आंटे-बाटे डीचके धोटे अचम्बो जे एठा दियागा आंटे नी डीचके मंडीके, “हे कोण, आमनी आलेटे चोया येनोगो व्यवहार डाके? डोगे, अमा बाटे एठा इंज चिंता लठ्ठाका आमके घगाटा लक्के डा।” 49सानी यीशु नी दिकुटे मंडीके, “आपे इंज्के चोया घगाटा डा? चोच बान मालूम डा, कि इंजेन इंजा बाटे गा भवनेण थंदळ जरुरी होय?” 50पेनो डी बातो गा अर्थ दिकुनी बान समजातिंजडुका। 51मेटे देटेन दिकुगा सेंग्गोन ओले, एठा नासरत पुरान हेन एठा दिकुगा हात टाल्ले गेन थंदळके एठा दियागा आंटे नी इनी सेबाई बातो हेजा गा मनेन डोके। 52एठा यीशु दिमाग गेन एठा कोम्बोरेन परमेश्वर एठा कोरोकु गा आनुग्रह गेन बळातिंजे।

Currently Selected:

लूका 2: GOKNT

ማድመቅ

Copy