लूका 1

लूका गा मकसद

1श्रीमान थियुफिलुस, घोनेच कुरकू नी आलेगा तलान डाएन घटनानौर गा बारेन ओलगा कोशिश डावे होय। 2दिकुनी सही डीका ओल्के जो डी कुरकू नी आलेके घल्ले डा। दिकुनी इकुगा मेट टे यीशु के दियागा सेवकाई के पेलाटेका डोके डा, एठा जो कुरकू बादोन परमेश्वर गा वचन सेवक आरुके। 3इनिघल्जी हे श्रीमान थियुफिलुस इंजभी इनी सेबाई घटनानौर के ध्यान पळातिंजके होय, एठा इंजेन इनी अच्छा लगातिंजे कि इंज अमा घल्जी इनी घटनानौर म्या बादोन म्या ओलके, 4इंज इनिघल्जी येटेन दडा लक्के मेना ताकी आमेन हार डी बातो गा सेबाई सच्चाई पता लगातिंजू जो कुरकू गा द्वारा आमके घाल्के होय।

जकर्याह एठा एलीशिबा

5जब राजा हेरोदेस यहूदिया जिल्हा लिंजेन राजो लक्के डा, मेटे जकर्याह जीमू गा म्या यहूदी याजक डा। देटेन याजककु गा डी पंचाती तलाटे डा, जो अबिय्याह यजाक गा जीमू लिंजेन आरुके मेना डा। एठा जकर्याह गा जापाए एलीशिबा डा जो हारून गा पीढी गा डा। 6परमेश्वर नी मनतिंजकेकी कि दिकिंज बर्खिंज धर्मी डा, चोयाकी दिकिंज लगातर सेबाई रोंगो टे हर डी बातो के निर्दोष तरीका टे ममानातिंज डा जो परमेश्वर नी हुकूम जीके डा। 7पेनो दिकिंज बर्खिंज गा तुनिका कोण बाऊ डा, चोयाकी एलीशिबा बंजली डा, एठा दिकिंज बार्खिंज भी सानाएन-डुकरेन डा।

स्वर्गदूत द्वारा यूहन्ना गा जनम गा भविष्यवाणी

8म्या दिन जकर्याह गा पंचती यरूशलेम गा मंदिर गेन हेजा गा सेवा दडा लक्के डा एठा जकर्याह परमेश्वर गा थंदळ गेन म्या याजक गा रुपोन सेवा दडा लक्के डा। 9मेटे याजक गा रिती गा रोंगो दियागा जीमू लिंजेन चिठ्ठी ओटके, कि प्रभु गा यरूशलेम गा मंदिर गेन ओलेडो धुपो जुले। 10एठा धुपो जुजूल गा टेमो कुरकू गा सेबाई मण्डली मंदिर गा दरोमेन प्रार्थना दडा लक्के डा। 11अचानक प्रभु गा म्या स्वर्गदूत धुपो गा वेदी गा डाखुरी कोनेन टेगेनके मेना दियेन डोएन मेना। 12एठा जकर्याह धोटे घबरातिंजे एठा दिया लिंजेन भेबाव हिगराएन मेना। 13पेनो स्वर्गदूत नी डीचके मंडीके, “हे जकर्याह, हिगरा बाकी चोयाकी परमेश्वर नी अमा प्रार्थना आजुम्जे होय, अमा जापाए एलीशिबा अमा घल्जी म्या कोण जनम जेबा, एठा आम दियागा जीमू यूहन्ना डोकी। 14एठा आमेन खुशी एठा अच्छा लगातीन्जुवा एठा घोनेच कुरकू दियागा जनम गा डाऊ वोजीटे खुशीऊवा मेना। 15चोयाकी देटेन प्रभु गा सम्मान महान मेना, एठा सेबाई रेंग्गो अंगूर रेस्सो एठा नुनू गा चीजो जो नशा होय, डीके चोलाकाभी बान आनु। एठा आपना जनम गा पेलाटेका पवित्र आत्मा गा द्वारा भेट्टिके होय। 16एठा देटेन इस्राएल देशो गा चोटोका कुरकू दिकुगा प्रभु परमेश्वर गा मेरान डाबोलटे साकुवा। 17यूहन्ना म्याखोम येनोगो कोरो डाऊवा जो परमेश्वर गा कोनेटे मंडीमिठाच एलिय्याह रोंगो आत्मा एठा शक्ती गा सेंग्गोन डाऊवा। देटेन प्रभु कोरा तैयारेवा। देटेन बाटे एठा चफनीकुके डाबोलटे म्या सेंग्गोन मिलातिंजकुबा, एठा देटेन बान आजोम हुकूम के कुरकू परमेश्वर गा ज्ञान मनेन कोम्बा एठा प्रभु गा घल्जी म्या लायको प्रजा तैयारेवा।” 18जकर्याह नी स्वर्गदूत टे कोम्बाराके, “इंज येटेन टोनोगो यकिने कि आलेगा सेंग्गोन येनोगो डाऊवा? चोयाकी इंज्नी बुडडा मेना, एठा इंजगा जापाए भी भूडडेन होय।” 19स्वर्गदूत नी डीचके जवाब जीके, इंज जिब्रएल मेना, एठा इंज परमेश्वर गा सम्मान टेगेनका थंदळवा मेना, एठा इंज आपेटे बातो दडा एठा आमके इनी अच्छा खाबोर घागल घल्जी इंज्के कुल्केमी होय। 20एठा आजुमे, आमनी इंजा बातो लिंजेन विश्वास बान दोडुका, जो हेजा टेमो गेन सच्चो सबितडूवा, अमाटे मंडीव बाने। जब टाएन कोण डाऊ बाने, मेटे टाएन अमाटे चोच्काभी मंडीव बाने। 21यरूशलेम गा मंदिर गा दरोमेन कुरकू जकर्याह गा राह दोडो लक्के, एठा अचम्बो दडा लज्जे कि दियेन मंदिर गेन येटो टेमो चोया घाई लक्के होय? 22जब देटेन बल्लान हेन, मेटे दिकुटे बान मंडीडुका, इनिघल्जी दिकुन मालूम्जेकी, मेटे डीचनी यरूशलेम गा मंदिर गेन तुनिका दर्शन घाटाएन होय, एठा देटेन दिकुटे इशारा दडा लज्जे, एठा गुंगाका थंदळके। 23जब मंदिर गेन म्या याजक गा रुपोन दियागा सेवा गा हप्ताह स्याएन मेना, मेटे देटेन यरूशलेम पूरा टे हेजा गा उरान ओले। 24अदा दिन गा बादोन दियागा जापाए एलीशिबा लाच्के मेना, एठा मोनाई महिना टाएन एलीशिबा नी हेज खुदके कुरकू गा नजर टे उखुका डोके चोयाकी डीच लाच्के डा। 25एठा डीचनी इनी बातो हेजाटेका मंडीके, “कोरोकु नी इंजा बेजती लेंक्कीन घल्जी, प्रभु नी इंजा लिंजेन कृपा डाके होय।”

स्वर्गदूत गा मरियम गा सम्मान ओटबा

26-27जब इलीशिबा तुरुई महिना गा लाच्के मेना, मेटे परमेश्वर गा कोनेटे जिब्रएल स्वर्गदूत के गलील जिल्हा गा नासरत पूरा गेन म्या कुंवारी गा मेरान कुल्केकु डा। दियागा मंगनी यूसुफ जीमू गा म्या कोरो गा सेंग्गोन डाएन डा, जो राजा दाऊद गा उरा गा टे डा एठा डी कुंवारी गा जीमू मरियम डा। 28एठा स्वर्गदूत नी दियागा मेरान तलान हेंडो मंडीके, “खुशीटे एठा जय अमागा डायु, प्रभु अमागा सेंग्गोन होय। परमेश्वर नी आमके घोनेचका आशीर्वाद जीके होय, आम सेबाई जापाएकु टे खाटटे होय!” 29जब मरियम नी दियागा बातो के आजुम्के मेटे डीच भेबाव घबरातिंजे, एठा सोचातिंज लज्जे, कि इनी अभिवादन गा मतलब चोच होय? 30स्वर्गदूत नी डीचके मंडीके, “हे मरियम, हिगरा बाकी, चोयाकी परमेश्वर गा कृपा अमा लिंजेन डायेन होय।” 31एठा आजुमे, आम लाजुवा मेना एठा आम म्या कोण के जनम जेबा, आम दियागा जीमू यीशु डोकी। 32देटेन महान होंगा एठा परमप्रधान परमेश्वर गा कोणटे मांडेवा एठा प्रभु परमेश्वर डीचके दियागा जुना सनाकु राजा दाऊद गा रोंगो डीचके राजा आरोएच्बा। 33एठा देटेन याकूब गा पीढीनौर लिंजेन हमेशा गा घल्जी स्वर्ग गा राज्य दडावा एठा दियागा राज्य गा चोलाकाभी स्यागु बाने। 34मरियम नी स्वर्गदूत टे मंडीके, “येटेन टोनोगो डौऊवा? इंज कुंवरी मेना।” 35स्वर्गदूत नी डीचके जवाब जीके, “पवित्र आत्मा अमा लिंजेन आगुरुवा, एठा परमप्रधान परमेश्वर गा शक्ती अमा लिंजेन साईली रोंगो थंदळवा, इनिघल्जी जो अमाटे जनम सावा डीच चोखरा एठा परमेश्वर गा कोण मांडेवा। 36एठा आजुमे, अमा सगाकु गेन एलीशिबा भी सानायेन टेमोन लाच्के होय, जो बांजली मेना डा, नका येटेन दियागा लाजुगा तुरुई महिना होय। 37चोयाकी परमेश्वर सेबाईका डायेबा मेना होय।” 38मरियम नी मंडीके, “आजुमे, इंज प्रभु गा दासी होय, जैसा आमनी मंडीके होय, डेनोगोका इंजा सेंग्गोन डायु।” मेटे स्वर्गदूत दियागा मेराटे ओले।

इलीशिबा गा मेरान मरियम गा सेने

39अदा दिन गा बादोन मरियम बिटजे डो यहूदिया जिल्हा गा टुक्की ईरिया गा म्या गाँवेन ओले। 40एठा डीचनी जकर्याह गा उरान गेन ओलेडो एलीशिबा के नमस्कार केनेच। 41डेनोगोका एलीशिबा नी मरियम गा नमस्कार आजुम्के, डेनोगोका सानी दियागा लाजेन उचके, एलीशिबा पवित्र आत्मा टे भेट्टेन। 42एठा डीचनी खाटटे का मंडीके, “आम सेबाई जापाएकु गेन धन्य होय, एठा देटेन डी सानी डीचके आम जनम जेबा धन्य होय।” 43इंज आमके येटेन धोटे इंज खुदके धन्य महसूस दडावा मेना, इंजा प्रभु गा आंटे इंजाटे मिलातिंजू हेन होय। 44आजुमे, डेनोगोका इंज्नी अमा नमस्कार आजुम्के, डेनोगोका सानी इंजागा लाजेन खुशीटे उचके। 45आम धन्य होय, चोयाकी आमनी विश्वास डाके, कि जो बातो प्रभु नी अमाटे मंडीके डा, दिकु डीके पुराएवा।

मरियम व्दारा परमेश्वर गा स्तुति

46मेटे मरियम नी मंडीके, “इंज परमेश्वर गा स्तुति दडावा।” 47एठा इंजा आत्मा इंजा उध्दार दडामिठाच परमेश्वर टे इंज खुशोके मेना। 48इंज परमेश्वर दासी मेना डीचनी इंजा लिंजेन दया डाके होय। इनिघल्जी डोगे, नका टे जमाना-जमाना गा कुरकू इंज्के धन्य मांडेवा। 49चोयाकी सर्व शक्तिमान नी इंजा घल्जी खापेट-खापेट कामय डाके होय, दियागा जीमू चोखरा होय। 50दियागा दया डी कुरकू लिंजेन आरुका थंदळवा। जो पीढी टे पीढी टाएन दियागा हिगरा ममानातिंज्बा होय। 51डीचनी हेजा खाट शक्तीटे खाट कामय डाके होय, एठा जो मनेन घमंड दडावा होय, दिकुके हरातिंजकेकु होय। 52डीचनी हाकमिंकू के सिंहसान टे ओटकेकु होय एठा नम्र कुरकू के आदर डाके होय। 53परमेश्वर नी रांगेचमिंकूके अच्छा चीजो टे भेटटीकेकू, एठा डामा मिन्कुके खाली टी ओटकेकु। 54डीचनी आलेगा जुना सनाकु गेल्ला डाके मिनी इकुगा वादा के यादोके एठा हेजा इस्राएल देशो गा कुरकू के मदत दडा हेन होय। 55डीचनी अब्राहम के एठा दियागा पीढीकु लिंजेन हमेशा घल्जी दया गघाल घल्जी यादोकेकु होय। 56मरियम लगभग आफाई महिना एलीशिबा सेंग्गोन थंदळ टे हेजा उरान हिराएन।

यूहन्ना बपतिस्मा जिऊमिठाच गा जनम

57मेटे एलीशिबा गा डाऊ गा टेमोन पुराएन होय एठा देटेन पोट्टा डाऊवा। 58दियागा मेराकू एठा सगाकुनी इनी आजुमटे, कि प्रभु नी दिया लिंजेन खाट दया डाके होय, दियागा सेंग्गोन खुशी मनातिंजबे। 59जनम डाउगा बदोन आठवा दिन दिकु सानी गा खात्ना दडा हेन। दिकु दियागा जीमू दिया बाटे गा जीमू लिंजेन जकर्याह दोडो चाहतावा डा। 60पेनो दियागा आंटे एलीशिबा जवाब जीके, “बाने, यानेकी दियागा जीमू यूहन्ना डोकी।” 61लेकिन दिकुनी डीचके मंडीके, “अमा सगा तला गेन जेका गा का एगो जीमू बाऊ होय।” 62मेटे दिकुनी सानी कोण गा बाटे जकर्याह टे इशाराटे कोम्बाराके? कि आम दियागा जीमू चोच दोडो चाहतावा होय? 63एठा डीचनी ओलगा पट्टी आसिटे ओल्के, “दियागा जीमू यूहन्ना होय” एठा सेबाई कुरकू आचोम्बोयेन डाके। 64मेटे देटेन डाबोलटे मंडी लज्जे एठा परमेश्वर गा स्तुति दडा लज्जे। 65दिकु सेबाईकु हिगराएन एठा डी सेबाई बातो गा चर्चा गा यहूदिया जिल्हा गा सेबाई टुक्की ईरिया गेन फैलातिंजे। 66एठा आजुममिंकूनी इकु-इकुगा का मनेन बिचार टे मंडीके, “येटेन सानी टोनोगो होंगा?” चोयाकी प्रभु गा शक्ती दियागा सेंग्गोन डा।

जकर्याह गा भविष्यवाणी

67दियागा बाटे जकर्याह पवित्र आत्मा टे भेट्टी टे, भविष्यवाणी डाटे मंडी लज्जे। 68“प्रभु, इस्राएल देशो गा परमेश्वर स्तुति डाए, चोयाकी देटेन हेजा कुरकू के मिलातिंजू हेन एठा दिकुके आराकेकु होय। 69डीचनी आले घल्जी हेजा गा भग्या राजा दाऊद गा पीढी टे म्या शक्तीशाली उध्दार दडामिठाच के कुल्लेनेच होय। 70-71घोनेच पेला, प्रभु नी हेजा चोखरा परमेश्वर गा कोनेटे मंडीमिठाच द्वारा मंडीके कि देटेन आलेके आलेगा दुश्मान कुटे एठा दिकु सेबाईकु शक्तीटे बचातिंजकोम्बा जो आलेटे नफरत दोडोवा होय। 72डीचनी मंडीके डीच आलेगा जुना सनाकु लिंजेन दया डाएवा एठा हेजा चोखरा करार के यादो डोएबा। 73-75डीचनी आलेगा जुना सनाकु अब्राहम गा सेंग्गोन कासोम जोमटे हेजा करार गा पाक्का डाके, कि देटेन आलेके आलेगा दुश्मान कुटे आराकोम्बा। ताकी आले बिना तुनिका हिगरा गा परमेश्वर गा सेवा दडा होना। 76एठा आम हे सानी परमप्रधान परमेश्वर गा कोनेटे मंडीमिठाच मांडेवा। चोयाकी आम प्रभु गा कोरा तैयार दडा घल्जी दियाटे पेला कुल्केनेच मेना होय। 77देटेन हेजा कुरकू पापो के मापो गा द्वारा उध्दार गा बारेन ज्ञान जेबा। 78-79येटेन आलेगा परमेश्वर गा डी खाट दया टे डाऊवा, डेनोगोका सूर्य आलेके उजाला जिऊ घल्जी चमकातिंजूवा होय, डेनोगोका मसीह भी आलेगा मेरान स्वर्ग टे हेन। जो अंधरा गेन एठा गुजू गा साईलीन सुबानमिंकू के उजाला जिऊ घल्जी येटेन उजाला आलेके जीवन गेन मर्गदर्शन डायेबा जो आलेके परमेश्वर गा सेंग्गोन शांती जेबा होय।”

80एठा देटेन सानी यूहन्ना, बढातिंजुवा एठा आत्मिकता गेन ताखातदार आरोएन, एठा इस्राएली कुरकू तलान इथू दिन टाएन सुनसान जगानका थंदळके।

Currently Selected:

लूका 1: GOKNT

ማድመቅ

Copy