मरकुस 15

पिलातुस सामणै यीशु

(मत्ती 27:1,2,11-14; लूका 23:1-5; यूहन्‍ना 18:28-38)

1भ्याग भुन्दै ही झट प्रधान याजकै, स्याणै, अतै शास्त्रीये ही ना पर पूरी यहूदी महासभा रै मणुऐ सलाह करीके यीशु जो बेड़ी पाई, अतै राजा पिलातुस रै हत्थै सौंपी दिता।

2पिलातुस राजै यीशु थऊँ पूछु, “कै तू यहूदी रा राजा हा?”

यीशुऐ बल्लू, “तू अप्पू ही ता बल्लू करदा।”

3प्रधान याजक तैस पुर बड़ी गल्ला रा दोष लाऊ करदै थियै। 4पिलातुसै तैस थऊँ फिरी पूछु, “कै तिजो बलै कोई जवाव निय्आ, हेर ऐह तिजो पुर कैतनी गल्ला रा दोष लाऊ करदै हिन?”

5यीशुऐ फिरी जवाव ना दिता; ऐह सब थऊँ पिलातुस जो भी बड़ी हैरानी भूई।

मृत्युदण्ड रा हूक्म

(मत्ती 27:15-26; लूका 23:13-25; यूहन्‍ना 18:39-19:16)

6हर साल जैहणै सो फसह रा त्यौहार मनान्दै थियै। ता पिलातुस तैस त्यौहारा मन्ज कसकि अक्क कैदी जो जैसिओ सो मणु चाहन्दै थियै तियां तांयें रिहा करदा थू। 7बरअब्बा नां रा अक्क मणु कसकि कत्‍ल री व्जहा थऊँ जेला मन्ज बन्द थू, तिनी रोमी सरकार रै विरोध करू अतै कसकि रा कत्‍ल करूरा थू। 8भीड़ राजै सोगी बिनती करना लगी तू जिंआं असु तांयें करदा आ तियां ही कर।

9पिलातुसै तियां जो जवाव दिता, “तुहै कै चाहन्दै कि अऊँ तूसु तांयें यहूदी रै राजै जो छड़ी दिछुं?” 10क्ओकि पिलातुस जाणदा थू कि प्रधान याजकै तैसिओ जलणी रा पकड़ाऊरा थू। 11पर प्रधान याजकै मणु जो भकाऊ कि सो यीशु रै बदलै बरअब्बा जो तियां तांयें छड़ी देय्आ।

12ऐह हुणी पिलातुसै तियां थऊँ फिरी पूछु, “ता तुहै जैसिओ यहूदी रा राजा बलदै हिन ऐस सोगी अऊँ कै करूं?”

13सो फिरी बक्की नकैऐ, “ऐसिओ क्रूस पुर चढ़ाई देय्आ!”

14पिलातुसै फिरी तियां जो बल्लू, “कजो, ईनी कै गुनाह करूरा हा?” पर सो फिरी भी बक्की नकैऐ, “ऐसिओ क्रूस पुर चढ़ाई देय्आ!”

15ता पिलातुसै भिड़ा जो खुश करनै री इच्छा थऊँ बरअब्बा जो तियां तांयें छड़ी दिता, अतै यीशु जो कोड़ै लगाई करी रोमी सैनका रै हबाळै करी दिता कि सो ऐसिओ क्रूस पुर चढ़ाई देय्आ।

सपाई यीशु रा अपमान करू

(मत्ती 27:27-31; यूहन्‍ना 19:2,3)

16सपाई तैसिओ किलै रै अन्दरा बाळै अँगणा जो लेई गै (जैतिओ प्रीटोरियुम बल्‍दै थियै), अतै पूरी सपाई री पलटण हैदी अन्दी। 17तसेरा मजाक उड़ाणै तांयें तिन्यै तैसिओ बैंगणी रंगा रा चोगा लगबाऊ अतै कण्ड़ै रा मुकुट बणाई करी तसेरै मुण्ड़ा पुर रखू, 18अतै ऐह बली करी तैसिओ नमस्कार करना लगै, “हे यहूदी रै राजा, नमस्कार!” 19सो तसेरै मुण्ड़ा पुर ड़न्ड़ै री मारदै, अतै तैस पुर थूकदै, अतै घुटनै रै भारै बैही करी तैसिओ प्रणाम करदै रैह। 20जैहणै सो तसेरा मजाक उड़ाई बैईठै, ता तसेरै सो बैंगणी रंगा रा चोगा उतारी करी तसेरै ही कपड़ै लुआऐ; अतै ता सो तैसिओ क्रूस पुर चढ़ाणै तांयें शहरा रै बाहर लेई गै।

यीशु रा क्रूस पुर चढ़ाया गाणा

(मत्ती 27:32-44; लूका 23:26-43; यूहन्‍ना 19:17-27)

21सिकन्दर अतै रूफुस रा पिता शमौन, सो मणु कुरैनी नगर थऊँ यरूशलेम शहरा मन्ज आ अतै तैहा ही बत्ता मितै ईणा लगुरा थू; सपाई तैसिओ पकडु ताकि सो यीशु रा क्रूस चुकी लेई चला। 22सो यीशु जो गुलगुता नां री पहाड़ी जो लेई आये (जठेरा मतलब हा “खोपड़ी री जगह”)। 23सो यीशु जो पित्त मळाऊरा दाखरस दिणा लगै, पर तिनी ना लैऊ। 24ता सपाई तैसिओ क्रूस पुर चढ़ाऊ अतै तसेरै कपड़ै उतारी करी तियां कपड़ै तांयें चिट्ठी पाई की कसिओ कै कै मुळदा, अतै अप्पू मन्ज बन्डी लै। #भज. 22:18.

25भ्यागा लगभग नौ बजै रा टैमं थू, जैहणै तियैं यीशु जो क्रूस पुर चढ़ाऊ थू। 26तसेरा दोषपत्र भी अक्की तख्ती पुर लिखीकरी तसेरै क्रूसा पुर टुन्गी दिता कि “यहूदी रा राजा”।

27तिन्यै तैस सोगी दोई डाकू भी अलग अलग क्रूस पुर अक्क तसेरी सज्जै कनारी अतै अक्क खब्बै कनारी चढाए। 28#15:28 हस्तलेख मन्ज 28 आयत ना लिखुरी हा ता पवित्रग्रन्था रा ऐह बचन कि सो अपराधी सोगी गिणु, पुरा भूआ। #यशा. 53:12. 29तैहा बत्ता मन्ज ईणै-गाणै बाळै मुण्ड़ा हिलाई-हिलाई करी अतै ऐह बली करी तसेरी निन्दा करदै थियै, “बाह! मन्दरा जो ढाणैबाळा, अतै त्राई दिन मन्ज बणाणै बाळै!#भज. 22:7; 109:25. 30क्रूस थऊँ थलै ओसी करी अपणै आपा जो बचा!”

31ऐस तरीकै ही प्रधान याजक अतै शास्त्री अप्पू मन्ज मजाक ऊडाऊ करदै थियै अतै बलदै थियै, “ईनी होरी जो बचाऊरा, पर अपणै आपा जो ना बचाई सकदा। 32इस्त्राएल रा राजा, मसीह, अबै क्रूसा थऊँ ओसी अई कि अहै भी हेरी करी विस्वास करन।” अतै जैड़ै तैस सोगी क्रूस पुर चढ़ाऊरै थियै सो भी तसेरा मजाक करू करदै थियै।

यीशु रा प्राण त्यागणा

(मत्ती 27:45-56; लूका 23:44-49; यूहन्‍ना 19:28-30)

33दोफारा रै पूरै देशा मन्ज घोर नैहरा भूच्ची गो, अतै ऐह नैहरा लगभग त्राई बजै तक रैऊ। 34त्राई बजै लगभग यीशुऐ जोरा सितै अपणी भाषा मन्ज बल्लू “इलोई, इलोई, लमा शबक्तनी?” जठेरा मतलब ऐह हा, “हे मेरै प्रमात्मां, हे मेरै प्रमात्मां, तैंई मिन्जो कजो छड़ी दिता?”

35जैड़ै तैड़ी खडुरै थियै, तियां मन्ज कैतनै ऐह हुणी करी बल्लू, “हेरा, ऐह भविष्‍यवक्ता एलिय्याह जो हक्का पाऊ करदा।”

36अक्क जीणा दौड़ी करी गो अतै सिरकै मन्ज स्पंज डुबाऊ अतै सरकण्ड़ैं मन्ज रखी करी तैसिओ चुसाऊ अतै बल्लू, “ठहरी गच्छा, हेरदै एलिय्याह ऐसिओ सुआलणै तांयें ईन्दा कि ना।”#भज. 69:21.

37तैहणै यीशुऐ जोरा सितै बल्लू अतै मरी गो।

38ता यरूशलेम रै मन्दरा मन्ज पवित्र जगह रा पर्दा ऊपरा थऊँ थला तक छकी करी दोई टुकड़ै भूच्ची गो। 39जैडा सुबेदार तसेरै सामणै खडूरा थू, जैहणै यीशु जो ईयां जोरा सितै बलदै अतै मरदै हेरू, ता तिनी बल्लू, “सच मन्ज ऐह मणु प्रमात्मैं रा पुत्र थू!”

40कई जनानी दूरा थऊँ हेरू करदी थी, तियां मन्ज मगदल ग्राँ री मरियम, याकूब अतै योसेस री माता मरियम भी, अतै सलोमी थी। 41जैहणै यीशु गलील मन्ज थू ता ऐह सब यीशु रै पिचो चलदी थी अतै सेरी सेवा चाकरी करदी थी; अतै होर भी मती सारी जनानी तैड़ी थी, जैड़ी तैस सोगी यरूशलेम थऊँ छुरी थी।

यीशु रा दफनाया गाणा

(मत्ती 27:57-61; लूका 23:50-56; यूहन्‍ना 19:38-42)

42जैहणै सँझ भूई ता ठेरैतांये कि तैयारी रा दिन थू, जैडा विश्रामदिन थऊँ पैहलै भुन्दा, 43अरिमतिया नगर रा रहणैबाळा यूसुफ आ, जैडा यहूदी महासभा रा सदस्य थू अतै सो भी प्रमात्मैं रै राज्य री भाळा मन्ज थू। सो हिम्मत करीके पिलातुस बलै गो अतै यीशु री लाहश जो मँगू। 44पिलातुस जो हैरानी भूई कि यीशु ऐतनी झट कियां मरी गोआ; अतै तिनी सुबेदार जो हैदी करी पूछु, “कै सच मन्ज ही यीशु मरी गो हा?” 45जैहणै तैसिओ सुबेदारा थऊँ सब पता लगी गो, ता यीशु री लाहश यूसुफ जो दी दिती। 46ता तिनी मलमल री अक्क कफन खरीदू अतै लाहश जो सुआली करी तैसा कफणा मन्ज लपेटु, अतै अक्की कब्रा मन्ज जैड़ी हप्पडा मन्ज कोरूरी थी रखी दिता, अतै कब्रा रै दारा मन्ज अक्क बड्डा बड्‍डा पत्थर रखी दिता। 47मरियम मगदलीनी अतै योसेस री माता मरियम हेरू करदी थी कि यीशु री लाहश जो कड़ी रखुआ।

Currently Selected:

मरकुस 15: GBKNT

ማድመቅ

Copy