मरकुस 16
16
यीशु रा दोबारा जी भूणा
(मत्ती 28:1-8; लूका 24:1-12; यूहन्ना 20:1-10)
1जैहणै विश्रामदिन बीती गो, ता मरियम मगदलीनी, अतै याकूब री माँ मरियम अतै सलोमी छैळ मुसकी बाळी चिजा खरीदी ताकि सो तैतिओ यीशु री लाशा पुर मळन। 2हप्तै रै पैहलै दिन भ्यागा ही जैहणै सूरज नकैऊ ही थू, सो कब्रा पुर आई, 3अतै अप्पू मन्ज कणैऊ करदी थी कि, “असु तांयें कब्रा रै द्धारा पुर रखूरा पत्थर कस घेरना भोला?”
4जैहणै तियैं हाख्री चुकी हेरू, ता पत्थर कब्रा थऊँ घिरूरा थू-सो बडा भारी बड्डा थू। 5कब्र रै अन्दर गिचीकरी तियैं अक्की जवान जो हच्छै कपड़ै लाऊरै खब्बी कनारी बैहुरै हेरू, अतै हैरान भूई।
6तिनी तियां सितै बल्लू, “हैरान मत भोआ, तुहै नासरत रै यीशु जो जैडा क्रूस पुर चढाऊरा थू, तैसिओ तोपदी हिन। सो जी भुआ, पर सो ऐठी निय्आ; हेरा, ऐह सो ही जगह हा, जैड़ी तैसिओ रखूरा थू। 7पर तुहै गच्छा, तसेरै चेलै अतै पतरस जो बला कि तूसु थऊँ पैहलै यीशु गलील परदेस जो गाणा। जिंआं तिनी तूसु सोगी पैहलै बलुरा थू, तूसु तैठिये तैसिओ हेरना।”
8अतै सो कब्र थऊँ नकैई करी नह्ही गई; क्ओकि सो कमी नकैऊरी थी अतै डरूरी भी थी। तिन्यै कसी सोगी कुछ ना बल्लू, क्ओकि सो ड़रदी थी।
मरियम मगदलीनी जो यीशु हुजै
(मत्ती 28:9,10; यूहन्ना 20:11-18)
9 # 16:9 कुछ हस्तलेख मन्ज मरकुस री कताबा री ऐह 9 थऊँ 20 आयत ना लिखुरी हिन। हप्तै रै पैहलै दिन भ्यागा ही जैहणै सो जी भुआ ता पैहलै-पैहल मरियम मगदलीनी जो जैसा थऊँ यीशुऐ सत दुष्टात्मा कडुरी थी तैहा जो हुजु। 10तैहै ऐह खबर गिचीकरी यीशु रै चेलै जो जैड़ै शौक मन्ज डुबुरै थियै अतै रूणा लगुरै थियै, हुणाई। 11तिन्यै चेलै जैहणै ऐह हुणु कि सो जिन्दा अतै तैहै सो हेरूआ, विस्वास ना करू।
दूँ होर चेलै जो यीशु हुजै
(लूका 24:13-35)
12ऐत थऊँ बाद सो अलग ही रूपा मन्ज तियां चेलै मन्ज दूँ होर चेलै जो हुजु, जैहणै सो ग्राँ री कनारी चलुरै थियै। 13तिन्यै भी गिचीकरी होरी जो ऐह खबर हुणाई, पर तिन्यै तंयारा भी विस्वास ना करू।
ग्यारह चेलै जो यीशु हुजै
(मत्ती 28:16-20; लूका 24:36-49; यूहन्ना 20:19-23; चेलै रै कम 1:6-8)
14फिरी सो तियां ग्यारह चेलै जो भी, जैहणै सो खाणा बैहुरै थियै हुजु, अतै तंयारै अविस्वास अतै मना री कठोरता पुर झिड़कू, क्ओकि जिन्यैं तसेरै जी भूणै थऊँ बाद तैसिओ हेरू थू, तिन्यै भी विस्वास ना करू।
15यीशुऐ तियां सितै बल्लू, “तुहै पूरी दुनिया मन्ज गिचीकरी सबी मणु जो सुसमाचार प्रचार करा। 16जैडा मिन्जो पुर विस्वास करा अतै बपतिस्मा लेय्आ तसेरा ही उद्धार भूणा, पर जैस विस्वास ना करना सो दण्ड रा हकदार भूणा। 17विस्वास करनैवाळै मन्ज ऐह चिन्ह भूणै कि तियां मेरै नां सितै दुष्टात्मा जो कड़णा, नोई नोई बोली बलणी। 18तियां कीड़ै जो चुकी लैणा, अतै अगर जहर भी पी गाहलै ता भी कुछ ना भूणा; तियां बमारा पुर हत्थ रखणै अतै तियां ठीक भूच्ची गाणा।”
19प्रभु यीशु चेलै सोगी गल्ला करनै थऊँ बाद प्रमात्मैं तैसिओ स्वर्गा जो चुकी लैऊ, अतै प्रमात्मैं री सज्जै कनारी बैही गो। #1 पत. 3:22. 20तसेरै चेलै यरूशलेम थऊँ निकळी गै अतै हर जगह प्रचार करदै रैह, अतै जैड़ी भी गै प्रभु तियां सोगी कम करदा रैऊ, अतै तियां चिन्ह द्धारा जैड़ै सो करदै थियै, मणु जो दसणा लगै कि प्रमात्मैं रा बचन सचा हा। आमीन
Currently Selected:
मरकुस 16: GBKNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.