मरकुस 14

यीशु रै वरोधा मन्ज षड्यन्त्र

(मत्ती 26:1-5; लूका 22:1,2; यूहन्‍ना 11:45-53)

1दूँ दिन बाद फसह रा अखमीरी#निर्ग. 12:1-20. रोटी रा त्यौहार भूणैवाळा थू। प्रधान याजक अतै शास्त्री ऐसा ताक मन्ज थियै कि यीशु जो कियां ठगी करी पकडन अतै मारी दीन। 2पर सो बलदै थियै कि, “त्यौहारा रै दिन ना, करखी ऐसा ना भोआ कि सब मणु दंगा करन।”

बैतनिय्याह मन्ज यीशु रा इत्र सोगी अभिषेक

(मत्ती 26:6-13; यूहन्‍ना 12:1-8)

3जैहणै यीशु बैतनिय्याह ग्राँ मन्ज शमौन कोढ़ी रै घरै खाण खाणा बैहुरा थू, ता अक्क जनानी संगमरमर रै अक्की भाण्ड़ै मन्ज जटामांसी रा किमती शुद्ध इत्र लेई करी आई; अतै तैहै सो इत्र यीशु रै मुण्डा पुर मळु।

4पर कई मणु जैड़ै तैड़ी बैहुरै थियै सो अपणै मना मन्ज रिस करी बलणा लगै, “ऐस इत्र जो कजो खराब करू? 5क्ओकि ऐह इत्र त्राई सौ दीनार#14:5 त्राई सौ दीनार लगभग त्राई सो दिना री मजदूरी थऊँ भी मती किमता मन्ज बेचीकरी कंगाला मन्ज बण्ड़ी सकदै थियै।” अतै सो तैहा जो झिड़कणा लगै।

6यीशुऐ बल्लू, “ऐसा जो मत झिड़का; ऐसा जो कजो सताऊ करदै हिन? सारा ऐह व्यवहार मिन्जो खरा लगु हा। 7कंगाल तूसु सोगी सदा रैहन्दै हिन, अतै तुहै जैहणै चाहन तैहणै तियां पुर भलाई करी सकदै हिन; पर मुँ तूसु सोगी सदा ना रैहणा।#व्य. 15:11. 8जैडा कुछ ऐह करी सकदी थी ऐहै करूआ; ऐहै मेरै दबाणै थऊँ पैहलै ही मेरै जिस्मां मन्ज इत्र मळूआ। 9अऊँ तूसु सोगी सच बलदा कि पूरै संसारा मन्ज जैड़ी भी मेरा सुसमाचार प्रचार करलै, तैड़ी सारै ऐस कम्मा री चर्चा भी याद करनी हा।”

यहूदा रा विस्वासघात

(मत्ती 26:14-16; लूका 23:3-6)

10ता यहूदा इस्करियोती जैडा बारह चेलै मन्ज अक्क चेला थू, प्रधान याजका बलै गो अतै बल्लू कि अऊँ यीशु जो तून्दै हत्थै पकडाई दिला। 11सो ऐह हुणी करी बड़ै खुश भुएै, अतै तैसिओ रूपियें दिणा मंजूर करै; अतै यहूदा मौका तोपणा लगा कि तैसिओ कस तरीकै पकडा।

चेलै सोगी फसह रा अन्तिम भोज

(मत्ती 26:17-25; लूका 22:7-14,21-23; यूहन्‍ना 13:21-30)

12अखमीरी रोटी रै त्यौहारा रै पैहलै दिन, जैत मन्ज सो फसह रा बलिदान करदै थियै। तसेरै चेलै तैस थऊँ पूछु, “तुहै कड़ी चाहन्दै कि अहै गिचीकरी तूसु तांयें अतै अपणै तांयें फसह खाणै री तैयारी करन?” #निर्ग. 12:6; 12:15.

13तिनी अपणै चेलै थऊँ दूँ जो ऐह बली करी भैजु, “यरूशलेम शहरा मन्ज गच्छा, अतै अक्क मणु पाणी रा घडा चुकुरा मुळना, तसेरै पिचो चली गच्छैं। 14जैस घरा मन्ज सो गाला, तैस घरा रै मालका सितै बलै, ‘इन्दा गुरू बलदा कि असु तांयें ठहरनै रा कमरा कड़िआ जैत मन्ज अऊँ अपणै चेलै सोगी फसह खाऊँ?’ 15तैस तुसिओ अक्क सजी सजाई अतै तैयार करूरी बड़ी बोढ़ दस्सी दिणिआ, तैड़ी तुहै असु तांयें तैयारी करा।”

16ता सो दोई चेलै यरूशलेम शहरा जो चली आये, अतै जिंआं तिनी तियां सोगी बलुरा थू, तियां ही सो भुआ; अतै तियैं फसह तैयार करू।

17जैहणै सँझ भूई ता सो बारह प्रेरिता सोगी आ। 18जैहणै सो खाणा बैईठै अतै खाणा लगै ता यीशुऐ बल्लू, “अऊँ तूसु सोगी सच बलदा कि तूसु मन्ज अक्क, जैडा मिन्जो सोगी खाणा लगुरा, तैस मिन्जो पकड़ाणा।” #भज. 41:9.

19सो उदास भूच्ची गै अतै अक्क अक्क करीके तैस थऊँ पुछणा लगै, “कै सो अऊँ हा?”

20तिनी तियां सितै बल्लू, “सो बारह मन्ज अक्क हा, जैडा मिन्जो सोगी बैही करी कटोरै मन्ज रोटी डुबाई करी खाऊ करदा। 21क्ओकि मणु रा पुत्र ता, जिंआं तसेरै बारै मन्ज पवित्रशास्त्र री कताबा मन्ज लिखुरा तियां ही भूणा। पर हाय तैस मणु पुर जसेरी वजह थऊँ मणु रा पुत्र पकड़ाया गान्दा। तैस मणु तांयें ता ऐह खरा भुन्दा अगर तैस मणु रा जन्म ना भच्छुरा भुन्दा।”

प्रभु-भोज

(मत्ती 26:26-30; लूका 22:14-20; 1 कुरिन्थियों 11:23-25)

22जैहणै सो खाऊ करदै थियै, ता यीशुऐ रोटी लेई अतै आशीष मगींकरी त्रोड़ी अतै तियां जो दिकरी बल्लू, “लेय्आ ऐह मेरा जिस्म हा।”

23फिरी तिनी कटोरा लेई करी धन्यवाद करू, अतै तियां जो दिता; अतै तिन्यै सबीये तैस कटोरै थऊँ ही पिऊ।

24अतै यीशुऐ तियां सितै बल्लू, “ऐह नोए वायदै रा मेरा सो खून हा, जैडा मतै री पापा री माफी तांयें बहाआ गान्दा।#निर्ग. 24:8; जक. 9:11. 25अऊँ तूसु सोगी सच बलदा मुँ अंगुरा रा रस तैस दिन तांयें फिरी कदी ना पीणा, जैहणै तक प्रमात्मैं रै राज्य मन्ज नौआ ना पिऊ।”

26फिरी सो भजन गाईकरी जैतून रै पहाड़ा पुर गै।

पतरसा रै इनकार री भविष्‍यवाणी

(मत्ती 26:31-35; लूका 22:31-34; यूहन्‍ना 13:36-38)

27ता यीशुऐ अपणै चेलै सोगी बल्लू, “तूसु सबी मेरा साथ छड़ी करी चली गाणा,” क्ओकि भविष्‍यवक्तै पवित्रग्रन्था मन्ज लिखुरा :

“मुँ रखवाळा मारना

अतै भैड़ा तितर-बितर भूच्ची गाणा।” #जक. 13:7.

28“पर मुँ अपणै दोबारा जी उूठणै थऊँ बाद तूसु थऊँ पैहलै गलील परदेस जो गाणा।”

29पतरसै तैस सोगी बल्लू, “अगर सब तिजो छड़न ता छडी दिन, पर मुँ तिजो ना छड़णा।”

30यीशुऐ तैस सोगी बल्लू, “अऊँ तिजो सोगी सच बलदा कि अज ही ऐसा राती ही कुक्कड़ा री दोई बरी बाँग दिणै थऊँ पैहलै तुद त्राई बरी मेरै बारै मन्ज मुकरी गाणा।”

31पर तिनी होर जोर दिकरी बल्लू, “अगर मिन्जो तिजो सोगी मरना भी पैला तांभी मुँ तेरा इन्कार कदी ना करना।” ऐस तरीकै सबीये भी बल्लू।

गतसमनी बगीचे मन्ज प्रार्थना

(मत्ती 26:36-46; लूका 22:39-46)

32तैत थऊँ सो गतसमनी नां रै अक्की बगीचे मन्ज आये, अतै तिनी अपणै चेलै सोगी बल्लू, “ऐठी बैही रेय्आ, जैहणै तक अऊँ प्रार्थना करदा।” 33अतै सो पतरस, याकूब अतै यूहन्‍ना जो अपणी सोगी लेई गो; अतै बडा ही उदास अतै व्याकुल भूणा लगा। 34तिनी बल्लू, “मेरा मन बड़ा उदास हा, ऐतना कि मेरै प्राण निकलणा लगुरै, तुहै ऐड़ी रूका अतै जागदै रेय्आ।” #भज. 42:5.

35फिरी सो थोड़ा जिनी अगो गो अतै धरती पुर घुटनै रै भारै बैही करी प्रार्थना करना लगा, कि अगर भूच्ची सकदा ता ऐस दुखा थऊँ अऊँ बच्ची गच्छू। 36तिनी बल्लू, “हे अब्बा#14:36 अब्बा अरामी भाषा मन्ज पिता जो अब्बा बलदै हिन, हे पिता, तूसु थऊँ सब कुछ भूच्ची सकदा ऐस दुखा जो मिन्जो थऊँ दूर करी लेआ, तांभी जिन्‍ना अऊँ चाहन्दा तियां ना पर जैडा तुहै चाहन्दै सो ही भोआ।”

37प्रार्थना करीके यीशु फिरी आ अतै तियां जो सुतुरा हेरू अतै पतरसा सोगी बल्लू, “हे शमौन, तू सोऊँ करदा? कै तू अक्क घड़ी भी ना जागी सकू? 38जागदै रेय्आ अतै प्रार्थना करदै रेय्आ कि तुहै परीक्षा मन्ज ना पैन। आत्मा ता तैयार हा, पर जिस्म कमजोर हा।”

39अतै यीशु फिरी प्रार्थना करना चली गो अतै तियां ही शब्दा मन्ज प्रार्थना करी। 40फिरी ईच्ची करी यीशुऐ तियां जो सुतुरै हेरू, क्ओकि तियां जो बड़ी निन्द्र लगुरी थी; अतै निन्द्रा मन्ज ना पता लगु कि तैसिओ कै जवाव दीन।

41यीशु फिरी त्रीं बरी प्रार्थना करना गो अतै जैहणै प्रार्थना करीके फिरी आ तियां सोगी बल्लू, “तुहै हालि तिकर सोऊ करदै अतै आराम करू करदै हिन? अबै बस करा! हेरा सो घड़ी चली आई हा; हेरा मणु रा पुत्र पापी रै हत्थै पकड़ाया गाणा। 42उठा, चला! हेरा, मिन्जो पकडाणैवाळा नेड़ै ईच्ची रैऊआ!”

यीशु जो धोखै सोगी पकड़ाणा

(मत्ती 26:47-56; लूका 22:47-53; यूहन्‍ना 18:3-12)

43यीशु बल्लू ही करदा थू कि यहूदा जैडा बारह चेलै मन्ज अक्क थू, अपणै सोगी प्रधान याजका अतै शास्त्री अतै स्याणै मणु री तरफा थऊँ अक्क भीड़ तलवारा अतै होट्‌ठी लेई करी ईच्ची पुजी। 44यहूदै पकड़णै बाळै जो बलुरा थू कि जैसिओ अऊँ पोक्कु दिला सो ही यीशु हा, तैसिओ पकड़ी लैं।

45यहूदा आ, अतै झट यीशु बलै गिच्ची करी बल्लू, “हे रब्बी!” (मतलब हे गुरू) अतै तैसिओ पोक्कु दिता। 46ता तियैं यीशु जो पकड़ी लैऊ। 47तसेरै चेलै जैड़ै तैस सोगी खडुरै थियै, अक्कीयै तलवार कड़ी करी महायाजक रै अक्की दासा पुर चलाई, अतै तसेरा कन कटी दिता।

48यीशुऐ तियां जो बल्लू, “कै तुहै मिन्जो डाकू समझी करी तलवारा अतै डण्डै़ लेई करी पकड़ना आये? 49अऊँ ता हर रोज मन्दरा मन्ज तूसु सोगी रैई करी उपदेश दिन्दा थू, अतै तैहणै तुहै मिन्जो ना पकडु पर ऐह ठेरैतांये हा कि पवित्रग्रन्था री गल्ला पूरी भून।”

50ऐह सब हेरी करी यीशु रै सब चेलै तैसिओ छड़ी करी नह्ही गै। #भज. 88:18.

51अक्क जवान अपणै नंगे जिस्मां जो चादर सितै लपेटी करी तैस पिचो चली पैऊ; अतै मणुऐ तैसिओ पकड़नै री कोशिश करी। 52पर तंयारै हत्थै थऊँ चादर फिसली गैई अतै सो चादरा छडी करी नंगा ही नह्ही गो।

महासभा सामणै यीशु

(मत्ती 26:57-68; लूका 22:54,55,63-71; यूहन्‍ना 18:13,14,19-24)

53फिरी सो मणु यीशु जो महायाजक बलै लेई गै; अतै सब प्रधान याजका, स्याणै अतै शास्त्री तैड़ी किटठी गै। 54पतरस दूरा थऊँ पिचो पिचो महायाजक रै अँगणा तक गो अतै तंयारै सपाई सोगी बैही करी अग सेकणा लगा।

55प्रधान याजक अतै पूरी यहूदी महासभा यीशु जो मारनै तांयें तसेरै वरोधा मन्ज गवाही रै चक्करा मन्ज थियै पर कोई ना मुळी। 56क्ओकि मतै सारै तसेरै वरोधा मन्ज झूठी गवाही दिच्छु करदै थियै, पर तंयारी गवाही अक्क जिनी ना थी।

57ता कुछ मणुऐ खड़ी करी तसेरै वरोधा मन्ज ऐह झूठी गवाही दिणा लगै। 58“अहै ऐसिओ ऐह बलदै हुणुरा कि ‘मुँ ऐस हत्था रै बणाऊरै मन्दरा जो ढ़ाई दिणा, अतै त्रियै दिन फिरी बणाणा, जैडा हत्था रा ना बणुरा भोआ।’” 59पर ऐह गवाही भी तंयारी अक्क जिनी ना निकळी।

60ता महायाजकै सामणै खड़ी करी यीशु सोगी बल्लू, “तू कोई जवाव ना दिन्दा? ऐह मणु तेरै वरोधा मन्ज कै गवाही दिच्छु करदै हिन?” 61पर यीशु मौन रैऊ, अतै कुछ भी जवाव ना दिता।

महायाजकै तैस थऊँ फिरी पूछु, “कै तू प्रमात्मैं रा पुत्र मसीह हा?”

62यीशुऐ बल्लू, “अऊँ हा, तूसु मणु रै पुत्रा जो सर्वशक्तिमान री सज्जै कनारी बैहुरै, अतै अम्बरा मन्ज बदळा सोगी इन्दै हेरना।” #दानि. 7:13; भज. 110:1.

63ता महायाजकै हैरान भूच्ची करी अपणा चोगा फाड़ी करी बल्लू, “असिओ अबै गवाह री कोई जरूरत निय्आ। #मत्ती 26:65. 64तुहै ऐह निन्दा हुणी। ऐह ता प्रमात्मैं री बुराई करू करदा अबै तुहै दस्सा कि तुन्दी कै राय हा?”

तियैं सबीये बल्लू ऐह जानी थऊँ मारनै लायक हा। #लैव्य. 24:16. 65ता कोई तैस पुर थुकणा लगै, कोई तसेरै मुँहा घटना लगै, कोई मुक्‍कै मारना लगै अतै कोई बलणा लगै, “भविष्‍यवाणी कर!” अतै सपाई पकड़ी करी तैसिओ थप्पड़ मारै।

पतरसा रा मुकरना

(मत्ती 26:69-75; लूका 22:56-62; यूहन्‍ना 18:15-18,25-27)

66जैहणै पतरस अँगणा मन्ज थू, ता महायाजक री अक्क नौकरैणी तैड़ी आई, 67पतरसा जो अगी सेकदै हेरी करी अक्क नजर हेरदी रैई अतै बलणा लगी, “तू भी ता तैस यीशु नासरी सोगी थू।”

68सो मुकरी गो, अतै बलणा लगा, “अऊँ ना जाणदा अतै ना समझदा कि तू कै बल्लू करदी हा।” फिरी सो बाहर आ अतै तैहणै ही कुक्कड़ै बाँग दिती।

69सो नौकरैणी तैड़ी खडुरै मणु सितै बलणा लगी, “ऐह यीशु रै मणु थऊँ अक्क हा।” 70पर सो फिरी मुकरी गो। थोड़ी देरा बाद तियैं जैड़ै पतरसा रै नेड़ै खडुरै थियै तैस सोगी बल्लू, “पक्का तू तंयारा ही मणु हा क्ओकि तेरी गल्ला थऊँ लगदा कि तू भी गलीली मणु हा।”

71ता पतरस सौगन्द खाई करी बलणा लगा कि धिक्‍कार हा मिन्जो पुर जे अऊँ झूठ बल्लू, “अऊँ ऐस मणु जो ना जाणदा।”

72ता तैहणै ही दूई बरी कुक्कड़ै बाँग दिती। पतरसा जो यीशु री सो गल्ल याद आई कि “दोई बरी कुक्कड़ा री बाँग दिणै थऊँ पैहलै तुद मेरा त्राई बरी इन्कार करना।” अतै सो यहा गल्ला जो याद करीके फूटी-फूटी करी रूणा लगा।

Currently Selected:

मरकुस 14: GBKNT

ማድመቅ

Copy