YOANE 16
16
1A pasa ki mu tea maga wanogoe, naga kuga ta pei tea mariana kuga tapilagona mau. 2Euga wo mari mu kuga toko etaku ni nasum̃a ni nasaisaiana maga: go aura ega wo umai, waina sara naatam̃oli waina eu mari punue mu euga wo midoaki nia naga eu magi Sup̃e suasua asa. 3Go euga wo mari tea maga wanogoe, nalakena eu da atae Tamagu mau, go eu da atae au mau. 4Ma a noa ki mu tea maga wanogoe, naga, ragi waina aura kakada ega umai, kuga midoaki da, naga kinau a noa ki sua mu ara. Go a da noa ki mu tea maga wanogoe pae naatulakeana pa pa mau, nalakena a sikoti mu doko. 5Ma ragi waia a naga aga vano punusi tea waina e dip̃aki lua au umai; go nimu sikai kakamu e da pusuusu paki nau mau, po naga, Ku naga p̃a vaki esava? 6Ma nalakena a po pasa ki mu tea maga wanogoe, nasusueana e pakavuro nap̃op̃omu. 7Ma kinau a noa ki mu nalomauana; E p̃ia ki mu naga kinau aga vano: nalakena a pe ta pano mau, Tea Vasapakavakale e pe wo da umai punusi mu mau; ma a pe vano, a pe wo dip̃aki lua e umai punusi mu. 8Go nae, ragi waina ega wo umai, ega wo pasap̃ai maramana nalo ni namarinaleosaana, go nalo ni namarinaleoleanaana, go nalo ni navasap̃otaeana: 9nalo ni namarinaleosaana. Nalakena eu da saralomau au mau; nalo ni namarinaleoleanaana, 10Nalakena a pano punusi Tamagu, go ku da moro punusi au mau; 11nalo ni navasap̃otaeana, nalakena tea maraki ni maramana waia e pei tea vasap̃otaeana. 12A ko peani tea laapa waina a naga aga noa ki mu ara, ma ku da mari atae dape ra ragi waia mau. 13Ma ragi waina nae, Naatana ni nalomauana, ega wo umai, ega wo maraki mu pae napua paki nalomauana mamau: nalakena ega wo da dum̃ana pasa mau; ma ega wo pasa tea maga waina ega wo dogo ra: go ega wo noakisai mu tea maga waina euga wo umai. 14Nae ega wo samasamani au: nalakena ega wo dape tea aginau, go ega wo noakisai mu asa. 15Naleo maga mamau puti waina Tamagu e peani ra eu pei tea aginau: nalakena tea wanogoe a noa, naga e do dape tea aginau, go ega wo noakisai mu asa. 16Ragi kiki, go ku da moro punusi au mau; go ragi moro kiki, go kuga wo punusi au. 17Nalakena tea wanogoe tea vasapiseikiana aneana maga seara eu dum̃ada noa ki da, eu naga, Tea wanogoe waina e noa ki gida asa e pei nasava, Ragi kiki, go ku da punusi au mau; go ragi moro kiki, go kuga wo punusi au: go, Nalakena a pano punusi Tamagu? 18Nalakena tea wanogoe eu naga, Tea wanogoe waina e noa e, Ragi kiki e pei nasava? Tu da atae tea waina e noa e mau. 19Yesu e atae naga eu masauna naga euga vusuusu paki nia, go e noa ki da, e naga, Ku pusuusu ki nalo ni tea wanogoe dum̃amu paki mu, nalakena a naga, Ragi kiki, go ku da punusi au mau; go ragi moro kiki, go kuga wo punusi au? 20Lomau, lomau, a noa ki mu, naga nimu kuga wo dagi po lalagaarova, ma maramana ega wo laelaea: nimu kuga wo susue, ma nasusueana animu ega wo pei tea mariana ega vei nalaelaeaana. 21Nagoroi sikai ragi waina e pisola e peani nasusueana, nalakena aura aneana e po umai: ma ragi waina e piragi sua pipia, e da moro midoaki navitinuana mau, nalakena nalaelaeaana nalakena naatam̃oli sikai e po pakilina maramana. 22Go nalakena tea wanogoe nimu ku peani nasusueana ragi waia: ma aga wo moro punusi mu, go nap̃op̃omu ega wo laelaea, go nalaelaeaana animu te naata sikai e da dape lua e kiamu mau. 23Go naaleatia wanogoe kuga wo da pusuusu paki nau ki te navatuna mau. Lomau, lomau, a noa ki mu, naga, Ku pe tatagovi Tamagu ki te navatuna, e pe wo dua mu asa pae nagisagu. 24Pa pa paki ragi waia ku da datago te navatuna pae nagisagu mau: kuga tatago, go kuga wo dape, naga nalaelaeaana animu ega vei tea vakavuroana.
25A pasa ki mu tea maga wanogoe pae naluluakia maga: aura ega wo umai waina aga wo da moro pasa ki mu pae naluluakia maga mau, ma aga wo noakisai mu lina nalo ni Tamagu. 26Naaleatia wanogoe kuga wo datago pae nagisagu: go a da noa ki mu mau, naga kinau aga wo pavarani Tamagu nalo kakamu; 27nalakena Tamagu e dum̃ana dodomi mu, nalakena nimu ku dodomi au, po saralomau naga kinau a m̃elu Tamagu dave umai. 28A m̃elu Tamagu umai, po umai paki maramana: aga moro doropusi maramana ega toko, po pano punusi Tamagu. 29Tea vasapiseikiana aneana maga eu naga, P̃a leo, ragi waia ku pasa lina, po da noa te naluluakia mau. 30Ragi waia au atae naga ku atae naleo maga mamau puti, po da pei sap̃o mau naga te naata sikai ega vusuusu paki‐go: nalakena tea wanogoe au saralomau naga ku m̃elu Sup̃e dave umai. 31Yesu e pasa dara ra, e naga, Ku saralomau ragi waia kite? 32Kuga leo, aura ega wo umai, go e umai sua, naga kuga vei tea taperaverakiana, sara naata sikasikai paki kiamu, po doropusi au aga sikigu doko: go a da sikigu doko mau, nalakena Tamagu e sikoti au doko. 33A pasa ki mu tea maga wanogoe, naga kuga veani natam̃ateana au. Ku peani nariesokiana maramana: ma kuga marasike, kinau a marimatua ki maramana.
Currently Selected:
YOANE 16: NTB
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific
