YOANE 15
15
1Kinau a pei vaine lomau, go Tamagu e pei tea wosiwosi natano. 2Sara ara waina eu doko au waina eu da dau ki nawada mau, e dape lua ra: go sara ara waina eu dau ki nawada, e mari pakasa ki da, naga euga dau p̃arua ki nawada. 3Ragi waia nimu ku dautau sua nalakena navasaana waina a pasa ki mu asa. 4Kuga toko au doko, go kinau aga toko mu doko. Dapala waina ara e pe ta doko vaine doko mau, e pe ta mari atae dum̃ana dau ki nawana mau; dapala nogoe nimu, ku pe ta doko au doko mau, ku pe ta mari atae dau mau. 5Kinau a pei vaine, nimu ku pei arana maga: tea waina e doko au doko, go kinau a doko asa doko, nae e dau p̃arua ki nawana: nalakena ku pe masale ki nau ku pe ta mari atae mari te navatuna sikai mau. 6Te naata sikai e pe ta doko au doko mau, e pe vei tea nadikiana paki etaku dapala ara sikai, go e kokolo; go eu pila daua ki da, po nadi ki da paki nakapu, go eu pei tea tap̃arakiana. 7Ku pe toko au doko, go navasaana aginau maga eu pe toko mu doko, kuga tatago tea waina ku pe masauna, go ega wo manimu pei tea mariana. 8Tea waia Tamagu e pei tea samasamaniana asa, naga kuga tau p̃arua ki nawamu; go kuga wo pei tea vasapiseikiana aginau maga asa. 9Dapala waina Tamagu e dodomi au, kinau ma a dodomi mu: kuga toko nadodomiana aginau doko. 10Ku pe rogo paratiki natip̃akiana aginau maga, ku pe wo doko nadodomiana aginau doko; dapala waina kinau a dogo paratiki natip̃akiana maga ki Tamagu, po doko nadodomiana aneana doko. 11A po pasa ki mu tea maga wanogoe, naga nalaelaeaana aginau ega toko mu, go naga nalaelaeaana animu ega vei tea vakavuroana. 12Natip̃akiana aginau e pei tea waia, naga kuga tum̃amu dodomi mu, ega tapala waina kinau a dodomi mu. 13Nadodomiana waina e p̃arua liu tea waia te naata sikai e da peani a mau, naga naata sikai ega magi tana ri maga doropusi namauriana aneana ega madoko. 14Nimu ku pe mari tea maga waina kinau a dip̃aki mu ara, ku pe vei tagu ri maga. 15A da moro soso mu ki tea suasua maga mau; nalakena tea suasua e da atae tea waina nawota aneana e mari a mau: ma a soso mu ki tagu ri maga, nalakena tea maga mamau puti waina a dogo ra ki Tamagu a mari mu ku atae ra. 16Nimu ku da matadoa au mau, ma kinau a matadoa mu, po dawona ki mu, naga nimu kuga vano po dau ki nawa, go naga nawamu ega tu: naga tea waina ku pe wo datagovi Tamagu asa pae nagisagu, ega tua mu asa. 17A dip̃a ki mu tea maga wanogoe, naga kuga tum̃amu dodomi mu. 18Maramana e pe vilosi mu, kuga atae naga e pilsoi au pea ki e pilosi mu. 19Ku pe vei tea ni maramana, maramana e pe dodomi tea aneana: ma nalakena ku da pei tea ni maramana mau, ma kinau a matadoa mu m̃elu dua ki maramana, nalakena tea wanogoe maramana e pilosi mu. 20Kuga midoaki navasaana waina kinau a noa ki mu asa, a naga, Tea suasua e da p̃arua liu nawota aneana mau. Eu pe kopalele au, eu pe wo moro kopalele mu: eu pe rogo paratiki navasaana aginau, eu pe wo moro dogo paratiki animu. 21Ma euga wo mari tea maga mamau puti wanogoe paki mu nalakena nagisagu, nalakena eu da atae tea waina e dip̃aki lua au umai mau. 22A pe ta umai po pasa ki da mau, eu pe ta peani namarinaleosaana mau: ma ragi waia eu da peani nakokorokiana nalo ni namarinaleosaana adeada mau. 23Tea waina e pilosi au, e pilosi gami ma Tamagu. 24A pe ta mari nawosiana maga m̃aleoputo kakada waina te naata p̃ota sikai e da mari ra mau, eu pe ta peani namarinaleosaana mau: ma ragi waia eu punusi po pilosi gami ma Tamagu. 25Ma e dapala nogoe, naga navasaana waina e pei tea midiriana nawotaeana adeada ega lolomana, waina e naga, Eu pilosi au nalakena e dika. 26Ma ragi waina Tea Vasapakavakale ega wo umai, waina kinau aga wo dipaki lua e m̃elu Tamagu umai punusi mu, Naatana ni nalomauana waina e do m̃elu Tamagu pano, nae ega wo noa sokisoki nalo kakagu: 27go nimu ma kuga wo noa sokisoki, nalakena ku sikoti au doko pae naatulakeana pa pa.
Currently Selected:
YOANE 15: NTB
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific
