YOANE 17
17
1Yesu e pasa tea maga wanogoe; go e leo sake paki nakoroatelagi, po naga, Mama, aura te umai; p̃a samasamani Natum̃a, naga Natum̃a ega samasamani ko; 2dapala waina ku dua e naveinawotaana dap̃au sara nap̃okasi, naga ega tua tea maga waina ku dua e ara, namauriana waina e du mau du. 3Go namauriana waina e du mau du e pei tea waia, naga euga atae ko Sup̃e lomau sikai maau, go tea waina ku dip̃aki lua e umai, Yesu Kristo. 4Kinau a samasamani ko maramana, a mari sua nawosiana waina ku dua au asa naga aga mari a. 5Go ragi waia, nigo, Mama O, p̃a samasamani au aga sikoti ko ki nasamasamaana waina a peani a sikoti ko pea ki maramana e doko. 6A mari nagisam̃a e doko lina ki naatam̃oli maga waina ku dua au ara m̃elu dua ki maramana: eu pei tea anigo, go ku dua au ara; go eu dogo parati ki navasaana anigo. 7Ragi waia eu atae naga naleo maga mamau puti waina ku dua au ara eu m̃elu ako umai: 8nalakena navasaana maga waina ku dua au ara a dua ra ara; go eu dape ra, po atae lomau naga a m̃elu ako dave umai, go eu saralomau naga nigo ku dip̃aki lua au umai. 9Kinau a madeada pavara: a da magi maramana pavara mau, ma a magi tea maga waina ku dua au ara pavara; nalakena eu pei tea anigo: 10go naleo maga mamau puti waina eu pei tea aginau eu pei tea anigo, go tea anigo maga eu pei tea aginau: go a pei tea samasamaniana ara. 11Go a da moro doko maramana mau, go nara waia eu doko maramana, go kinau a paloti punusi ko. Mama Tapu, p̃a leo paratiki da euga toko nagisam̃a waina ku dua au asa, naga euga vei tea sikai maau, ega tapala waina nigida toro pei tea sikai maau. 12Ragi waina a sikoti ra doko, kinau a leo paratiki da eu doko nagisam̃a waina ku dua au asa: go a pavaigoro ra, go sikai kakada e da mate puoli mau, ma natu ni namatepuoliana e sikina; naga navasaana midiriana ega lolomana. 13Ma ragi waia a paloti punusi ko; go a pasa tea maga wanogoe maramana, naga euga veani nalaelaeaana aginau ega vei tea vakavuroana ara. 14Kinau a dua ra navasaana anigo; go maramana e pilosi ra, nalakena eu da pei tea ni maramana mau, dapala waina kinau a da pei tea ni maramana mau. 15A da pavara mau naga p̃a tape lua ra m̃elu dua ki maramana, ma naga p̃a to pavaigoro ra m̃elu dua ki tea sa. 16Eu da pei tea ni maramana mau, dapala waina kinau a da pei tea ni maramana mau. 17P̃a tapugoro ra doko nalomauana: navasaana anigo e pei nalomauana. 18Dapala waina ku dip̃aki lua au paki maramana, kinau ma a dip̃aki lua ra paki maramana. 19Go kinau a madeada dum̃agu dapugoro au, naga nara ma euga vei tea tapugoroana doko nalomauana. 20Go a da magi nara waia sikida pavara mau, ma a magi tea maga waina euga wo saralomau au pae navasaana adeada; 21naga euga mamau puti pei tea sikai maau; dapala waina nigo, Mama, ku doko au go kinau a doko ako, naga nara ma euga toko gida doko: naga maramana ega saralomau naga nigo ku dip̃aki lua au umai. 22Go nasamasamaana waina ku dua au asa kinau a dua ra asa; naga euga vei tea sikai maau, dapala waina nigida toro pei tea sikai maau; 23kinau a doko ara, go nigo ku doko au, naga euga vei tea mariana euga wia lua po pei tea sikai maau; naga maramana ega atae naga nigo ku dip̃aki lua au umai, po dodomi ra dapala waina ku dodomi au. 24Mama, tea waina ku dua au asa, a masauna naga, tokora waina kinau a doko asa, nara ma euga toko asa sikoti au; naga euga leopunusi nasamasamaana aginau waina ku dua au asa: nalakena ku dodomi au pea ki nanadikilaketanoana ni maramana. 25Mama leana O, maramana e da atae ko mau, ma kinau a atae ko; go nara waia eu atae naga nigo ku dip̃aki lua au umai: 26go a mari ra eu atae nagisam̃a, go aga wo mari ra euga atae a; naga nadodomiana waina ku dodomi au asa ega toko ara doko, go kinau aga toko ara doko.
Currently Selected:
YOANE 17: NTB
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific
