Marko 5
5
Yesu tsa nyumu ko nɛ mumi yayami ngɛ e mi
(Mateo 8.28-34; Luka 8.26-39)
1Kɛkɛ nɛ a ba Galilea Wo ɔ se ngɛ Gerasebi ɔmɛ a zugba a nɔ. 2Si nɛ Yesu kple pɛ kɛkɛ nɛ nyumu ko nɛ mumi yayami ngɛ e mi je yɔkɔ ɔmɛ a mi kɛ lɛ ba kpe. 3Kikɛmɛ a nyumu nɛ ɔ, yɔkɔhi a mi e hii nɛ nɔ ko nyɛ we lɛ kɔsɔkɔsɔ nɛ e wo hu, 4ejakaa a ka lɛ pã, nɛ a wo lɛ kɔsɔkɔsɔhi si abɔ, se be tsuaa be nɛ a maa wo lɛ ɔ, e tsɔɔ kɔsɔkɔsɔ ɔmɛ nɛ e kuɔ pa amɛ nɛ nɔ ko nɔ ko nyɛ we e he jɔɔmi: 5nyɔ kɛ pia tsuo ɔ, yɔkɔ ɔmɛ kɛ yoku ɔmɛ a mi e hii, nɛ e kpaa ngmlaa, nɛ e kɛ tɛ poo e he. 6Se benɛ e na Yesu ngɛ lokoo ɔ, e tu fo kɛ ba e ngɔ, nɛ e ba kpla si ngɛ e hɛ mi, 7nɛ e kpa ngmlaa wawɛɛ ke: “Yesu, Mawu nɛ ngɛ hiɔwe lokoo ɔ bi, mɛni o ngɛ hlae ngɛ ye dɛ? I na Mawu kaa ko pii mi!” 8(E de enɛ ɔ) ejakaa Yesu ke: “Jee nɔmlɔ nɛ ɔ mi, mo mumi yayami!” 9Kɛkɛ nɛ Yesu bi lɛ ke: “O biɛ nɛɛ?” Nyumu ɔ he nɔ ke: “Ye biɛ ji Asafo, ejakaa wa he hiɛ! 10Nɛ e kpa Yesu pɛɛ hluu ke e ko fie mɛ kɛ je lejɛ ɔ ni ɔmɛ a mi. 11Kpotoohi a kuu ngua ko ngɛ lejɛ ɔ ngɛ ni yee ngɛ yoku ɔ he. 12Nɛ mumi yayami ɔmɛ kpa Yesu pɛɛ ke: “Ha waa ya kpotoo ɔmɛ a kpɛti nɛ wa ya sɛ a mi.” 13Nɛ e ngmɛ mɛ blɔ. Mumi yayami ɔmɛ je nyumu ɔ mi nɛ a ya sɛ kpotoo ɔmɛ a mi. Kuu ngua a tsuo, (maa pee akpe enyɔ) sa fo kɛ kple si kɛ ya pue wo ɔ mi nɛ a gbo. 14Kɛkɛ nɛ kpotoo hyɛli ɔmɛ tu fo nɛ a ya sɛɛ ngɛ ma a mi kɛ ngmɔ ɔmɛ a si. Nɛ ni ɔmɛ je kpo ba hyɛ nɔ́ nɛ ba a. 15A ba Yesu ngɔ nɛ a ba na nyumu nɛ jinɛ mumihi asafo ngɛ e mi ɔ nɛ e hii si nɛ e wo tade nɛ e hɛ mi tsɔ lɛ; nɛ e pee mɛ gbeye. 16Nihi nɛ na a sɛɛ nɔ́ nɛ ba nyumu nɛ mumi yayamihi hi e mi ɔ nɔ ɔ kɛ kpotoo ɔmɛ a he sane ɔ ha mɛ. 17Nɛ a kpa Yesu pɛɛ ke e je a kpo ɔmɛ a nɔ. 18Nɛ benɛ Yesu ngɛ lɛ ɔ mi sɛe ɔ, nyumu nɛ jinɛ mumi yayami hi e mi ɔ kpa lɛ pɛɛ nɛ e ha e kɛ lɛ nɛ hi si. 19Se Yesu kplɛɛ we; mohu e de lɛ ke: “Kpale o se nɛ o ya we mi kɛ o wekuli a ngɔ nɛ o ya sɛɛ ni nguahi nɛ Nyɔmtsɛ ɔ pee ha mo ɔ, kɛ mɔbɔ nɛ e na mo ɔ ha mɛ!” 20Lɔ ɔ he ɔ nyumu ɔ pue nɔ kɛ ho nɛ e ya bɔni ni nguahi nɛ Yesu pee ha lɛ ɔ fiɛmi ngɛ Deɔapoli (Ma Nyɔngma), nɛ e pee mɛ tsuo nyakpɛ.
Yairo bi yo ɔ kɛ yo nɛ ta Yesu tade he ɔ
(Mateo 9.18-26; Luka 8.40-56)
21Yesu kpale e se kɛ lɛ kɛ ya wo ɔ se, nɛ nihi babauu ba bu e he ngɛ wo ɔ nya. 22Kɛkɛ nɛ kpe he ɔ nikɔtɔma amɛ a ti nɔ kake nɛ a tsɛɛ lɛ Yairo ɔ ba, nɛ benɛ e na Yesu ɔ, e kpla si ngɛ e nane nya, 23nɛ e fa kue ha lɛ wawɛɛ ke: “Ye biyo wayoo miɔ nɛ e ma gbo, he je ɔ ba nɛ o kɛ o ninehi ba pue e nɔ konɛ e na he wami nɛ e yi nɛ na wa.” 24Nɛ Yesu kɛ lɛ ho. Nihi, fuu kɛ lɛ nyɛɛ nɛ a fifia lɛ.
25Yo ko nɛ muɔ demi hiɔ hɛɛ lɛ jeha nyɔngma kɛ enyɔ ji nɛ ɔ, 26nɛ e na nɔ́ nitsɛ ngɛ tsopatsɛmɛ fuu a dɛ mi, nɛ e puɛ e dɛ mi nihi kulaa, se nɔ́ nane mi nɛ hiɔ ɔ ko fani ha lɛ ɔ, e nɔ mohu se e ngɛ puee ɔ, 27benɛ e nu Yesu he ɔ, e ba je e se je ngɛ ni ɔmɛ a kpɛti, nɛ e ta e tade ɔ he; 28ejakaa e ke: “Ke i na e tade ɔ he ta kɛkɛ ɔ, ye he maa wa mi.” 29E ta e tade ɔ he, nɛ amlɔ ɔ muɔ demi ɔ se po, nɛ e nu he ngɛ e he womi mi kaa a tsa e hiɔ ɔ. 30Nɛ amlɔ ɔ Yesu nu he ngɛ e mi kaa he wami ko je e mi, nɛ e plɛ e he ngɛ ni ɔmɛ a kpɛti nɛ e bi ke: “Mɛnɔ ta ye tade ɔ he ɔ?” 31E kaseli ɔmɛ ha lɛ heto ke: “O ngɛ hyɛe kaa asafo ɔ ngɛ mo fifiae nɛ o pa ngɛ bie ke: Mɛnɔ ta ye he ɔ?” 32Se Yesu bɔni e he hyemi kone e na nɔ nɛ pee ja a. 33Se akɛnɛ yo ɔ le nɔ́ nɛ a pee ha lɛ he je ɔ, e kɛ gbeye yemi kɛ he domi ba nɔ si ngɛ e hɛ mi, nɛ e de lɛ anɔkuale ɔ tsuo. 34Yesu de lɛ ke: “Biyo, o hemi kɛ yemi tsa mo; yaa ngɛ he jɔmi mi, nɛ o hiɔ ɔ nɛ jɔ.
35Benɛ Yesu ngɛ nɔ ngɛ munyu ɔ tue ɔ, Yairo we mi bi ɔmɛ a ti ni komɛ ba ba de lɛ ke: “O biyo ɔ gbo; mɛni he je o pa ngɛ tsɔɔlɔ ɔ nya dooe?” 36Se benɛ Yesu nu munyu nɛ a tu ɔ, e de Yairo ke: “Koo ye gbeye; he ye kɛkɛ!” 37Nɛ e ha we nɛ nɔ ko nɔ ko nɛ nyɛɛ e se, ja Petro kɛ Yakobo kɛ Yohane, Yakobo nyɛmi ɔ kɛkɛ. 38A ba Yairo we ɔ mi nɛ Yesu ba na hoo peemi kɛ nihi nɛ ngɛ ya foe nɛ ngɛ kɔmɔ yee fuu ɔ. 39Nɛ benɛ e sɛ we ɔ mi ɔ, e de mɛ ke: “Mɛni he je nɛ nyɛ ngɛ hoo pee nɛ nyɛ ngɛ ya foe kikɛ nɛ ɔ? Jokuɛ ɔ gbo we, mahɛ kɛkɛ e ngɛ hwɔe!” 40Nɛ a muɔ lɛ. Se lɛɛ e fie ni ɔmɛ tsuo kɛ je kpo, nɛ e ngɔ jokuɛ ɔ tsɛ kɛ e nyɛ kɛ nihi nɛ piɛ e he ɔ kɛ ho he nɛ jokuɛ ɔ hwɔɔ si ngɛ ɔ ya. 41E nu e nine si nɛ e de lɛ ke: “Talita kuum!” E sisi ji; “Jokuɛyo, i ngɛ mo dee ke: Tee si!” 42Nɛ amlɔ ɔ, jokuɛ ɔ te si nɛ e bɔni si slami; (e ye jeha nyɔngma kɛ enyɔ.) Nɛ ni ɔmɛ a nya kpɛ a he nitsɛnitsɛ. 43Se Yesu wo mɛ si veveeve ke a ko ha nɔ ko nɛ le enɔ; nɛ e fã ke a ha jokuɛ ɔ nɔ ko nɛ e ye.
Currently Selected:
Marko 5: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
