Marko 6
6
A kua Yesu ngɛ Nazaret
(Mateo 13.53-58; Luka 4.16-30)
1Yesu si lejɛ ɔ kɛ ho e ma a mi ya, nɛ e kaseli ɔmɛ nyɛɛ e se. 2Nɛ benɛ e su Hejɔɔmi Ligbi ɔ, e bɔni ni tsɔɔmi ngɛ kpe he ɔ; nɛ nihi fuu nɛ nu ɔ he nya si mɛ nɛ a bi ke: “Jije nɔ nɛ ɔ ya na ni nɛ ɔmɛ kɛ je? Mɛni ni lemi a kɛ ha lɛ, nɛ mɛni blɔ nɔ e guu kɛ tsuɔ kikɛmɛ a nyakpɛ ni tsumi nɛ ɔmɛ? 3Anɛ pi kapitɛ ɔ ji nɛ ɔ, Maria bi ɔ, kɛ Yakobo kɛ Yose kɛ Yuda kɛ Simonmɛ a nyɛmi nyumu ɔ, nɛ pi e nyemimɛ yihi hu nɛ kɛ wɔ ngɛ hiɛ ɔ?” Nɛ lɔ ɔ he ɔ a kua lɛ. 4Nɛ Yesu de mɛ ke: “A buu gbalɔ ngɛ he tsuaa he, ja e ma mi kɛ e wekuli a kpɛti kɛ e we mi kɛkɛ.” 5Nɛ e nyɛ we he wami ni tsumi ko nɛ e tsu ngɛ Nazaret, pe kaa e kɛ e ninehi pue hiɔtsɛmɛ bɔɔ ko nɔ nɛ e tsa mɛ. 6E hɛ mi pee lɛ yaa ngɛ hemi nɛ a he we yi ɔ he.
Yesu tsɔ kaseli nyɔngma kɛ enyɔ ɔ
(Mateo 10.5-15; Luka 9.1-6)
7Nɛ e ya kpa kɔpehi nɛ bɔle lejɛ ɔmɛ a mi nɛ e tsɔɔ ni. E tsɛ e kaseli nyɔngma kɛ enyɔ ɔ kɛ ba e ngɔ nɛ e bɔni mɛ tsɔmi enyɔenyɔ, nɛ e ha mɛ he wami ngɛ mumi yayamihi a nɔ. 8Nɛ e wo mɛ mlaa ke a ko hɛɛ̃ nɔ́ ko ngɛ blɔ ɔ nɔ, kaa ja tso kɛkɛ; a ko hɛɛ abolo loo kotoku loo sika ngɛ a mlɛ mi fimi nihi a mi— 9se a wo tokota, nɛ a ko wo hiɔwe tade enyɔ. 10E kpale de mɛ ke: “He tsuaa he nɛ nyɛ ma ya sɛ we ko mi ngɛ ɔ, nyɛɛ hi lejɛ ɔ kɛ yaa su nyɛ maa je. 11He tsuaa he nɛ ni ɔmɛ he we nyɛ nɛ a bu we nyɛ tue ngɛ ɔ, ke nyɛ ngɛ lejɛ ɔ jee ɔ, nyɛ blɛ nyɛ nane si zu ngɔ pue si kaa okadi ngɔ ha mɛ.” 12Nɛ lɔ ɔ he ɔ a pue nɔ kɛ ho, nɛ a ya fiɛ tsɔɔ ni ɔmɛ ke a kpale kɛ je a he yayami ɔmɛ a he. 13Nɛ a hia mumi yayamihi fuu nɛ a pɔ hiɔtsɛmɛ fuu nu nɛ a tsa mɛ.
Yohane Baptisilɔ ɔ gbenɔ
(Mateo 14.1-12; Luka 9.7-9)
14Nɛ matsɛ Herode nu he, ejakaa Yesu biɛ jije. Ni komɛ ke: “Yohane Baptisilɔ ɔ lɛ te si kɛ je gbeje, lɔ ɔ he nɛ he wami nɛ ɔmɛ ngɛ ni tsue ngɛ e mi ɔ nɛ.” 15Ni komɛ hu ke: “Elia ʼi; nɛ ni kpa komɛ hu ke: “Gbalɔ ʼi, kaa gbali ɔmɛ eko.”
16Benɛ Herode nu ɔ, e ke: “Yohane nɛ i po e yi ɔ, lɛ nɛ e te si kɛ je gbeje nɛ ɔ nɛ!” 17Ejakaa lɛ Herode ɔ nɔuu lɛ e tsɔ nɛ a ya nu Yohane nɛ e fi lɛ nɛ e kɛ lɛ wo tsu mi. Herode pee enɛ ɔ ngɛ Herodia, e nyɛmi Filipo yo ɔ he; ejakaa e ngɔ lɛ ngɔ pee e yo. 18Ejakaa Yohane pɔɔ lɛ demi ke: “E dɛ blɔ kaa o ngɔɔ o nyɛmi ɔ yo ɔ ngɔ peɔ o yo.” 19Lɔ ɔ he ɔ Herodia ngɔ lɛ ninyɛ nɛ e ngɛ lɛ hlae nɛ e gbe, se e nyɛ we; 20ejakaa Herode ngɛ Yohane gbeye yee akɛnɛ e le kaa dalɔ kɛ nɔ klɔuklɔu ji lɛ ɔ, nɛ e ngɔ lɛ ngɔ to sɔkee. E suɔ kaa e bu lɛ tue, se be tsuaa be nɛ e maa bu lɛ tue ɔ, e haoɔ lɛ.
21Ligbi nɛ sa a ba su, benɛ Herode ngɛ e fɔmi ligbi kaie nɛ e ngmɛ okplɔɔ ha e ganɔ ɔmɛ kɛ asafoatsɛme ɔmɛ kɛ Galilea nikɔtɔma amɛ ɔ, 22Herodia biyo ba ba do, nɛ e muɔ Herode kɛ nihi nɛ kɛ lɛ hii si ngɛ okplɔɔ ɔ he ɔ a hɛ. Matsɛ ɔ de jokuɛ yo ɔ ke: “Bi mi nɔ́ tsuaa nɔ́ nɛ o suɔ nɛ ma ha mo!” 23Nɛ e ka lɛ kita ke: “Nɔ́ tsuaa nɔ́ nɔ́ o ma bi mi ɔ ma ha mo, ke ye matsɛ yemi ɔ fa tete po.” 24Lɔ ɔ he ɔ jokuɛ yo ɔ je kpo nɛ e ya bi e nyɛ ke: “Mɛni ma bi?” Nɛ e ke: “Yohane Baptisilɔ ɔ yi.” 25Nɛ amlɔ ɔ e ba matsɛ ɔ ngɔ oya nɛ e ba de lɛ ke: “I ngɛ hlae nɛ o ngɔ Yohane Baptisilɔ ɔ yi ngɔ ha mi amlɔ nɛ ɔ nɔuu ngɛ ka mi.” 26E dɔ matsɛ ɔ wawɛɛ nitsɛ; se e kita a kɛ nihi nɛ kɛ lɛ hii si ngɛ niyeni ɔ si ɔ he ɔ, e sume kaa e ma kua. 27Nɛ amlɔ ɔ matsɛ ɔ tsɔ klawi yelɔ nɛ e fa lɛ ke e kɛ Yohane yi nɛ ba. 28Nɛ e ho nɛ e ya po Yohane yi ngɛ tsu ɔ mi nɛ e kɛ fɔ kã mi kɛ ba ha jokuɛ yo ɔ, nɛ lɛ hu e kɛ ya ha e nyɛ. 29Nɛ benɛ Yohane kaseli ɔmɛ nu he ɔ, a ba nɛ a ba wo e gbogboe ɔ, nɛ a ya pu.
Yesu ha nimli akpe enuɔ niyeni
(Mateo 14.13-21; Luka 9.10-17; Yohane 6.1-14)
30Kaseli ɔmɛ bua a he nya kɛ ba Yesu ngɔ, nɛ a ba bɔ lɛ nihi nɛ a ya pee kɛ nihi nɛ a ya tsɔɔ ɔ tsuo kulaa. 31Nɛ e de mɛ ke: “Nyɛ sɔuu nyɛɛ ba nɛ waa ho nga a nɔ he ko banee ya nɛ nyɛ ya jɔɔ nyɛ he bɔɔ.” Ejakaa nimli nɛ ngɛ bae ngɛ yae ɔ hiɛ tsɔ, nɛ a na we deka kɛ ye ni tete. 32Nɛ a gu lɛ mi kɛ ho nga a nɔ he ko banee ya. 33Nɛ nihi fuu na mɛ nɛ a yaa, nɛ a yo mɛ; nɛ a je ma amɛ kulaa mi tu fo kɛ gu nane kɛ ho lejɛ ɔ ya, nɛ a be a nya. 34Benɛ Yesu kple ɔ, e na asafo gidiglɛmɛ, nɛ e mi mi sa lɛ ngɛ a he, ejakaa a ngɛ kaa tohi nɛ be hyɛlɔ; nɛ e bɔni mɛ nihi fuu tsɔɔmi. 35Benɛ je bɔni jɔmi ɔ, e kaseli ɔmɛ ba e ngɔ ba de lɛ ke: “Nga nɔ ji hiɛ ɔ, nɛ je hu ngɛ jɔe; 36wo ni ɔmɛ blɔ nɛ a ya ngmɔ ɔmɛ a si kɛ kɔpe ɔmɛ nɛ pueɔ si ngɛ wa he ɔmɛ a mi nɛ a ya he nɔ́ ko nɛ a ye.” 37Se e he nɔ nɛ e de mɛ ke: “Nyɛ nitsɛmɛ nyɛ ha mɛ nɔ́ ko nɛ a ye.” A bi lɛ ke: “Anɛ waa ya nɛ wa ya he abolo cedi lafa enyɔ nya ha mɛ nɛ a ye lo?” 38Nɛ e bi mɛ ke: “Abolo nyɛmɛ nyɛ ngɛ? Nyɛɛ ya nɛ nyɛ ya hyɛ.” Benɛ a ya hyɛ ɔ, a ke: “Bɔbɔɛ enuɔ kɛ lo enyɔ.”
39Nɛ Yesu fa mɛ ke a ha ni ɔmɛ tsuo nɛ a hi si kuuhi kuuhi ngɛ nga mumu ɔ nɔ. 40Nɛ a hi si kuuhi kuuhi, lafa lafa, kɛ nyingmi enuɔenuɔ. 41Nɛ Yesu kukuɔ abolo enuɔ ɔ kɛ lo enyɔ ɔ nɛ se hyɛ hiɔwe nɛ e gbaa nɔ. E kuɔ abolo ɔmɛ a mi nɛ e kɛ ha e kaseli ɔmɛ konɛ a kɛ ma ni ɔmɛ a hɛ mi. E dla lo enyɔ ɔ hulɔ ha mɛ tsuo. 42Nɛ mɛ tsuo pɛpɛɛpɛ a ye nɛ a tɔ. 43Nɛ a kukuɔ abolo bibli ɔmɛ kɛ lo bibli ɔmɛ ngɔ wo kusii nyɔngma kɛ enyɔ mi tɔtɔɔtɔ. 44Nɛ nyumuhi nɛ ye ni ɔ a nya ji akpe enuɔ.
Yesu nyɛɛ nyu hɛ mi
(Mateo 14.22-33; Yohane 6.15-21)
45Nɛ amlɔ ɔ Yesu tsɛ̃ e kaseli ɔmɛ a kuɛ se, nɛ a sɛ lɛ mi konɛ a sɛ e hlami kɛ ya wo ɔ se nɛ a ya Betsaida, kɛ maa su benɛ e maa wo asafo ɔ blɔ. 46Nɛ benɛ e wo mɛ blɔ se ɔ, e pue nɔ kɛ ho yoku ɔ nɔ ya konɛ e ya sɔle. 47Benɛ je jɔ ɔ, lɛ ɔ su wo ɔ kpɛti, nɛ Yesu nɔ kake ngɛ kpo. 48E na kaa hluimi ɔ ngɛ kaseli ɔmɛ pɔtɔ woe, ejakaa a ngɛ kɔɔhiɔ kpee; nɛ makɛ mla, maa pee ngmlɛ etɛ loo nɔ́ mi ɔ, e nyɛɛ nyu ɔ hɛ mi kɛ ma a ngɔ, nɛ e ngɛ hlae nɛ e be a he. 49Benɛ a na lɛ nɛ e nyɛɛ nyu ɔ hɛ mi ɔ, a susu kaa kpade, nɛ a kpa ngmlaa, 50ejakaa mɛ tsuo a na lɛ nɛ a tsui po. Nɛ amlɔ ɔ, e kɛ mɛ tu munyu nɛ e de mɛ ke: “Nyɛ tsui nɛ nɔ nyɛ mi ami ʼi; nyɛ ko ye gbeye!” 51Nɛ e ba a ngɔ ngɛ lɛ ɔ mi, nɛ kɔɔhiɔ ɔ jɔɔ fiami. Nɛ a nya kpɛ a he nitsɛnitsɛ, nɛ a hɛ mi pee mɛ yaa. 52A kɔ we nɔ́ nɛ abolo sane ɔ tsɔɔ ɔ se, ejakaa a juɛmi sui he.
Yesu tsa hiɔtsɛmɛ ngɛ Genezaret
(Mateo 14.34-36)
53Nɛ benɛ a po wo ɔ, a ba kple ngɛ Genezaret zugba a nɔ, nɛ a muɔ lɛ ɔ si. 54Nɛ benɛ a je lɛ ɔ mi ɔ, amlɔ ɔ ni ɔmɛ yo Yesu, 55nɛ a tu fo kɛ ya kpa lejɛ ɔ kpo ɔmɛ tsuo a nɔ, nɛ a bɔni hiɔtsɛmɛ womi ngɛ sahi a nɔ kɛ e ngɔ bami ngɛ he tsuaa he nɛ a nu kaa e ngɛ ɔ. 56Nɛ he tsuaa he nɛ Yesu ya ngɛ kpe hehi loo mahi loo ngmɔ ɔmɛ a si ɔ, a kɛ hiɔtsɛmɛ ɔmɛ ba pueɔ blohu ɔmɛ a mi, nɛ a kpaa lɛ pɛɛ konɛ e ha a na e tade ɔ nya kɛkɛ he nɛ a ta. Nɛ nihi abɔ nɛ ta he ɔ he wa mɛ.
Currently Selected:
Marko 6: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
