Marko 4
4
Nidulɔ ɔ he abɛ ɔ
(Mateo 13.1-9; Luka 8.4-8)
1Yesu bɔni ni tsɔɔmi ekohu ngɛ Galilea Woɔ nya. Nihi fuu ba bua a he nya ngɛ e ngɔ, lɔ ɔ he ɔ e sɛ lɛ ko mi, nɛ e ya hi si. Lɛ ɔ maa si ngɛ nyu ɔ hɛ, nɛ asafo ɔ tsuo pueɔ si ngɛ wo ɔ nya. 2E tsɔɔ mɛ nihi fuu ngɛ abɛhi a mi, nɛ e de mɛ ngɛ e ni tsɔɔmi ɔ mi ke: 3“Nyɛɛ bu tue! oʼɛ, ni dulɔ ko pue nɔ kɛ ho ni dumi ya. 4Nɛ e ba mi kaa benɛ e ngɛ wu ɔmɛ fiae ɔ, ekomɛ ya pue blɔ tue, nɛ lohwe pɛlitsɛmɛ ba ba kukuɔ. 5Ekomɛ ya pue tɛ sahi a nɔ he nɛ zu fuu be. A puɛ oya, ejakaa zu ɔ mi kuɔ we. 6Se benɛ pu je ɔ, e sa mɛ, nɛ akɛnɛ a sipoku ɔmɛ yɛ́ zu mi fuu tsɔ he je ɔ a ngla. 7Wu ɔmɛ ekomɛ ya pue miohi a kpɛti, nɛ mio ɔmɛ puɛ, nɛ nɛ a ngɛ wae ɔ, a gbe tso ɔmɛ nɛ a wui yibilii. 8Se wu ɔmɛ ekomɛ ya pue zugba kpakpa nɔ, nɛ a puɛ, nɛ a wa, nɛ a wo yiblii: eko nyingmi etɛ, eko nyingmi ekpa, kɛ eko lafa.” 9Nɛ Yesu de ke: “Nɔ nɛ ngɛ tue nɛ e kɛ maa nu ɔ, e nu.”
Nɔ he je nɛ Yesu bu abɛhi
(Mateo 13.10-17; Luka 8.9-10)
10Benɛ piɛ Yesu nɔ kake ɔ, ninɛmɛ nɛ ngɛ e he ɔ kɛ kaseli nyɔngma kɛ enyɔ ɔ bi lɛ abɛ ɔ sisi. 11E de mɛ ke: “Nyɛɛ lɛɛ a kɛ Mawu matsɛ yemi ɔ he laami sane ɔ ha nyɛ kaa nyɛɛ le; se ninɛmɛ nɛ ngɛ se ɔ, abɛhi a mi a kɛ mɛ maa tu munyu ɔmɛ tsuo ngɛ,
12‘Kone nami ɔ a na lɛɛ, se a ko kɔ se.
Nɛ numi ɔ a nu lɛɛ, se a ko nu sisi;
Ke pi ja a, a maa kpale kɛ ba Mawu ngɔ
Nɛ e kɛ a he yayami ɔmɛ maa pa mɛ.’ ”
Yesu tsɔɔ nidulɔ ɔ he abɛ ɔ sisi
(Mateo 13.18-23; Luka 8.11-15)
13Kɛkɛ nɛ Yesu bi mɛ ke: “Anɛ nyɛ nui abɛ nɛ ɔ sisi? Lɛɛ kɛ nyɛ maa pee kɛɛ kɛ nu abɛ ɔmɛ tsuo sisi mɔ? 14Ni dulɔ ɔ duɔ Mawu munyu ɔ. 15Be komɛ ɔ, munyu ɔ ya nɔɔ blɔ tue. Ni nɛ ɔmɛ nuɔ, se amlɔ nɔuu nɛ a nu ɔ, Satan baa ba saa munyu nɛ a du ngɛ a mi ɔ. 16Ni komɛ hu ngɛ kaa wuhi nɛ ya nɔ tɛ sa zugba nɔ ɔ. Amlɔ nɔuu nɛ a nu munyu ɔ, a pɛtɛɛ he kɛ bua jɔmi. 17Se e nui si ngɛ a mi, lɔ ɔ he ɔ a se kɛ we; lɔ ɔ he ɔ ke amanehlu loo yi wami te si ngɛ munyu ɔ he ɔ, amlɔ nɔuu nɛ a ngmɛɛ he. 18Ni kpa komɛ hu ngɛ kaa wuhi nɛ a du ngɛ miohi a kpɛti. Ni nɛ ɔmɛ ji nihi nɛ nuɔ munyu ɔ, 19se je nɛ ɔ mi he nya gbami kɛ ni nami he suɔmi kɛ ni kpahi a he akɔnɔ sɛɛ a mi nɛ a gbee munyu ɔ, nɛ a wui yiblii. 20Se ni kpa komɛ hu ngɛ kaa wuhi nɛ a du ngɛ zu kpakpa mi. A nuɔ munyu ɔ, nɛ a pɛtɛɛ he, nɛ a woɔ yiblii: eko nyingmi etɛ, eko nyingmi ekpa, kɛ eko lafa.”
Kane nɛ a kɛ ma sowe sisi
(Luka 8.16-18)
21Nɛ Yesu de mɛ ke: “Anɛ nɔ ko suɔ kane kɛ maa sowe loo sa tso sisi lo? Anɛ pi kane tso nɔ nɛ a kɛ maa lo? 22Nɔ́ ko be nɛ a kɛ laa nɛ a be lɛ kpo jee, nɛ nɔ́ ko be nɛ a ha nɔ nɛ a be nɔ blie. 23Ke nɔ ko ngɛ tue nɛ e kɛ maa nu ɔ, e nu.”
24Nɛ e kpale de mɛ ke: “Nyɛ susu nɔ́ nɛ nyɛ ngɛ nue nɛ ɔ he saminya! Kalemi nɔ́ nɛ nyɛɛ kɛ kaleɔ ɔ, kɔlɔ ɔ Mawu ma kɛ kale ha nyɛ, nɛ a maa piɛ he ha nyɛ. 25Nɔ nɛ ngɛ nɔ́ ko ɔ, a ma ha lɛ eko ngɔ piɛ he; se nɔ nɛ be nɔ́ ko tsɔ ko ɔ, bɔɔ nɛ e ngɛ ɔ tete a ma kpɔ ngɛ e dɛ.” Dumi wuhi nɛ puɛ ɔ 26Yesu ya nɔ nɛ e de ke: “Bɔ nɛ Mawu matsɛ yemi ɔ ngɛ ha ji nɛ ɔ nɛ: E ngɛ kaa nyumu ko nɛ fiaa ni ngɛ zugba nɔ. 27E ya hwɔɔ si nyɔ mi, nɛ e tee si ke je na, nɛ (lɛ be ɔ mi tsuo ɔ), dumi wu ɔmɛ ngɛ puɛe nɛ a ngɛ wae, nɛ e li bɔ nɛ peɔ. 28Zugba a nitsɛ lɛ haa ni ɔmɛ waa nɛ a woɔ yiblii: ba mumu ɔ kekle, kɛkɛ ɔ ngma tso ɔ, nɛ lɔ ɔ se ɔ ngma a nitsɛ ngɛ ngma tso ɔ yi. 29Ke ngma a wa a, nyumu ɔ haa nɛ a kɛ ngma kpami ha a yaa, ejakaa ngma kpami be ɔ su.
Sinapi wu ɔ
(Mateo 13.31-32, 34; Luka 13.18-19)
30Yesu bi mɛ ke: “Mɛni he waa kɛ Mawu matsɛ yemi ɔ maa to? Aloo mɛni abɛ wa maa bu kɛ tsɔɔ nya? 31E ngɛ kaa sinapi wu nɛ ji wu nyafii pe zugba nɔ wuhi tsuo. 32Se ke a du ɔ, e puɛɛ nɛ e klee pe pui bahi tsuo. E tsɛ̃ɛ kɔni nguahi nguahi, bɔ nɛ hiɔwe lohwe pɛlitsɛmɛ ma nyɛ maa pee a tsuhi ngɛ e hɔ ɔ mi.” 33Yesu gu abɛhi fuu nɛ ngɛ kaa enɛ ɔmɛ a nɔ nɛ e kɛ fiɛ munyu ɔ tsɔɔ ni ɔmɛ, bɔ nɛ a ma nyɛ maa nu sisi. 34E kɛ mɛ tu we munyu ja ngɛ abɛhi a mi; se ke piɛ e kɛ e kaseli ɔmɛ pɛ ɔ, e tsɔɔ mɛ abɛ ɔmɛ kulaa sisi.
Yesu nga wo nɔ kɔɔhiɔ yi nɛ e he jɔ
(Mateo 8.23-27; Luka 8.22-25)
35Jamɛ a ligbi ɔ nɔuu, benɛ su gbɔkuɛ nya si ɔ, Yesu de e kaseli ɔmɛ ke: “Nyɛ ha waa po wo ɔ kɛ ya e se je. 36Lɔ ɔ he ɔ a si asafo ɔ, nɛ kaseli ɔmɛ sɛ lɛ nɛ e ngɛ mi ɔ mi, nɛ a ngɔ lɛ bɔ nɛ e ngɛ ngɛ lɛ ɔ mi ɔ nɔuu kɛ ho, nɛ lɛ kpa komɛ hu piɛ e he; 37se wo nɔ kɔɔhiɔ ngua ko ba fia nɛ oslɔkehi ku wo lɛ ɔ mi, nɛ e ngɛ hyie. 38Nɛ Yesu ngɛ lɛ ɔ se je: e tsɔ sɔne nɛ e hwuɔ mahɛ. Nɛ kaseli ɔmɛ tsɛ̃ɛ lɛ nɛ a de lɛ ke: “Tsɔɔlɔ, nɛ wa hɛ mi ngɛ kpatae nɛ ɔ, pi o he sane ko lo?” 39Yesu te si nɛ e nga kɔɔhiɔ ɔ yi, nɛ e de wo ɔ ke: “Ma o nya nɛ o pee kɔ dii!” Kɔɔhiɔ ɔ jɔɔ fiami nɛ wo ɔ gbo miaa. 40Kɛkɛ nɛ Yesu de mɛ ke: “Mɛni he je nɛ nyɛ ngɛ gbeye yee kikɛ nɛ ɔ? Kɛ pee kɛɛ loko nyɛ be hemi kɛ yemi nɛ ɔ?” 41A ye gbeye nitsɛ, nɛ a de a he ke: “Mɛnɔ po ji nɛ ɔ, nɛ kɔɔhiɔ kɛ wo tete buɔ lɛ tue nɛ ɔ!
Currently Selected:
Marko 4: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
