Gɔ̃mèjèje be Xoma 20
20
Abràham ku Abimèlɛk
1So funua, Abràham hũ jo va yì Nègev be àgowo ji, kè le nyi èvègoa, e yì sò àxue ɖo Kadɛ̀s ku Sur be dòdòmè, e yomè a e va yì nɔ̀ Geràr. 2Abràham gblɔ̃ so èsrɔ̃a Sarà ŋuti be: “Nɔ̀vi nyè nyɔ̃nù ye”, eye Abimèlɛk, Geràr be èfìɔa na wo kplɔ̀ ɛ̀ va na ɛ̀. 3Vɔ̀a, Mawu va to ɖo Abimèlɛk ji lè drɔ̃ mè èzã mè eye e gblɔ̃ na ɛ̀ be: “Wò la ku, ɖo nyɔ̃nù kè wò na wo kplɔ̀ va na wòa ŋuti; ɖo èsrɔ̃a tɔ̀ be nyi.” 4Abimèlɛk, kè mu kpɔ dɔ̃ ku nyɔ̃nùa òa, do àpa be: “Tɔhonɔ̀ nyè! Wò la crɔ̃ dùkɔ̃ ɖe ne e gbà lè jɔ̀jɔɛ cã a? 5Mu nyi e ye gblɔ̃ na mù be: “Nɔ̀vi nyè nyɔ̃nù ye à?” Ye ŋutɔ cã gblɔ̃ be: “Nɔ̀vi nyè ŋusù ye!” Mù wɔ̀ ekèa ku èjìmè kɔ̀kɔ̀ɛ gbàku àlɔ̀ mànya ɖe.”
6Mawu ɖo e ŋuti na ɛ̀ lè drɔ̃ mè be: “Nyè cã, mù nya be wò wɔ̀ ɛ̀ ku èjìmè kɔ̀kɔ̀ɛ, eye ènyè ke le wò be mù gbà wɔ̀ vuɛ̃ ɖo ŋuti nyè ò; eŋuã ŋuti ye mù na ye wò mu tɔ ɛ̀ àsi ò. 7Fifìa, sɔ ŋusù kèa be èsrɔ̃a na ɛ̀, ɖo Mawu be gblɔ̃ɖɛtɔ kè la blìbɔ̀ ɖo èta wò ne wòa nɔ̀ àgbèa ye be nyi. Ne wò mu sɔ ɛ̀ na ɛ̀ òa, nya be èku ke wò la ku, èwò kudo tɔ̀ wòwo kpata.”
8Abimèlɛk fɔ̃ xoxo, na wo bɔ̀ yebe èdɔwɔ̀tɔwo kpata eye e gblɔ̃ ènyà kèa keŋu na wo; vɔ̃vɔ̃ gã ɖe jè àmè kèawo ji. 9E yomè a, Abimèlɛk na wo yɔ Abràham va be gblɔ̃ na ɛ̀ be: “Ènu kɛ ye wò wɔ̀ kudo mi leke ò! Nukɛ mè ye mù wɔ̀ èvuɛ̃ ɖo ŋuti wò lè ye wò ɖè mi àma, ènyè ŋutɔ ku fìɔdu nyèa, na èvuɛ̃ sɛ̃sɛ̃ kèa ò? Wò wɔ̀ ènu kè wo mu ɖo la wɔ̀ òa ku mù.” 10Abimèlɛk yì e ji gblɔ̃ be: “Susu kɛ ye lè àsi wò lè ènu kèa be wɔ̀wɔ mè ò?” 11Abràham ɖo e ŋuti be: “Mù gblɔ̃ lè ɖokoe nyè mè be: “Mawu be vɔ̃vɔ̃ ɖekpe mu lè tèpe kèa ò, wo la wu mù ɖo èsrɔ̃ nyèa ŋuti! 12Nyàwo cã ye, be e nyi nɔ̀vi nyè nyɔ̃nù, ètɔ nyè be èvi nyɔ̃nù ye vɔ̀, mu nyi ènɔ̀ nyè be èvi ò, eye e va trɔ zũ èsrɔ̃ nyè. 13Wàlɛbɛ kè Tɔhonɔ̀ ɖè mù jo lè ètɔ nyè be àxuea gbɔa, mù gblɔ̃ na Sarà be: “ɖo èjro nyuɛ̃ ne wòa gblɔ̃ lè àfi ɖekpekpe kè mi la yìa be nɔ̀vi nyè ŋusù ye.”
14Abimèlɛk sɔ àlɛ̃wo ku ènyìwo, sumɔ̃vi ŋusùwo ku sumɔ̃vi nyɔ̃nùwo; e sɔ wo na Abràham, e ɖè àsi lè èsrɔ̃a Sarà cã ŋuti na ɛ̀ 15eye e gblɔ̃ be: “Kpɔ èdù nyèa lè ŋùkɔ̀ na wò, sò àxue ɖo àfi ɖekpekpe kè nyɔ na wòa.” 16E yomè a, e gblɔ̃ na Sarà be: “Kpɔ be mù sɔ klòsalò-ga èkà èwì vɔ àtɔ̃ na nɔ̀vi wò ŋusùa, ne bèa nyi ŋùkpɛ̃ɖènu na wò lè àmèwo be ŋùkumè be wò lè jɔ̀jɔɛ.”
17Abràham blìbɔ̀ na Mawu, eye Mawu dà èdɔ̀ na Abimèlɛk, èsrɔ̃a ku yebe sumɔ̃vi nyɔ̃nùwo; eye wo jì èviwo keŋu. 18Tututu ye Tɔhonɔ̀ na be Abimèlɛk be àxuea be nyɔ̃nùwo kpata trɔ èkònɔ̀wo ɖo Abràham be èsrɔ̃ Sarà ŋuti.
Currently Selected:
Gɔ̃mèjèje be Xoma 20: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.