Gɔ̃mèjèje be Xoma 21
21
Izàk be jìji
1Tɔhonɔ̀ ɖo ŋùku àjɔ̀gbè kè e fìã na Saràa ji eye e wɔ̀ ɛ̀ na Sarà sìgbè àlekè e gblɔ̃a nène. 2E fɔfu eye e jì èvi ŋusù na Abràham lè yebe nyagãkuku mè lè àzã kè ye Mawu gblɔ̃ na ɛ̀a ji. 3Abràham yɔ ŋusùvi kè Sarà jì na ɛ̀a be nyikɔ be Izàk. 4E sò èvo na èvia Izàk lè ŋùkèkè ènyi gbè sìgbè àlekè Mawu ɖo è ɖɛ na ɛ̀a nène. 5Abràham xɔ̀ èpè èkà èvè takpo wàlɛbɛ kè wo jì èvia Izàk na ɛ̀a. 6Sarà do àpa be: “Mawu na mù ènu kòkoe be èvi! Ɖo mù la ɖì kòkoe na àmè sia àmè kè la sè ènyà kèa.” 7E yì e ji gblɔ̃ be: “Àmè kɛ teŋu gblɔ̃ na Abràham be Sarà la va na ànɔ èvi ò? Eye mù jì ŋusùvi lè yebe tɔgbekuku mè!” 8Ɖèvia le sĩ eye wo xɔ̀ ànɔ lè e si. Abràham ɖù àzã gã ɖe lè ŋùkèkè kè ji wo xɔ̀ ànɔ lè Izàk sia. 9Ekè Sarà kpɔ be Ejiptè nyɔ̃nù Hagàr be èvi ŋusù kè e jì na Abràham yè srɔ̃a, le gble ku Izàk yèbe èvia, 10e gblɔ̃ na Abràham be: “Nyà sumɔ̃vi nyɔ̃nù nyèa ku èvia ŋusùa, ɖo sumɔ̃vi nyè kèa be èvi ŋusù mu la ɖùcrɔ̃ ku èvi nyè Izàk ò.”
11Ènyà kèa ve Abràham ŋuti ŋutɔ ɖo èvia ŋusù ke e cã nyi. 12Vɔ̀a, Mawu gblɔ̃ na ɛ̀ be: “Mù gbà bijì ɖo èvi wò ku sumɔ̃vi wò nyɔ̃nùa be ènyà ŋuti ò. Ɖoto èsrɔ̃ wò Sarà be ègbè, ɖo, to Izàk ji ye jìjimèwo la xɔ̀ àpo nyikɔ. 13Vɔ̀, mù la na dùkɔ̃wo la to so sumɔ̃vi nyɔ̃nù wòa be èvi ŋusùa cã mè, ɖo àpo jìjimèvi ye be nyi.”
14Abràham fɔ̃ ŋùdekɛ̃nyɛ fùtù, sɔ kpɔ̃nɔ, kù èsì ɖo èlãgbàzegò mè, sɔ na Hagàr. E kɔ èvia Ismàɛl dà ɖo àbɔta na ɛ̀ eye be nyà ɛ̀ to. E jè ègbe, le dã lè Bɛr-Sevà be zògbè ji. 15Wàlɛbɛ kè ye èsìa vɔ̀ lè èlãgbàzegoa mèa, e sɔ ɖèvia dà ɖo àti ɖe gɔ̃mè. 16E yomè a, e yì nɔ̀ ànyi lè àzɔ̀ge boo, sìgbè èhuãvi dàda ɖèka be dìdimè nène. Eye be gblɔ̃ be: “Mù gbà jro ne ma kpɔ ɖèvi a be èku tèpe ò!” E nɔ̀ ànyi lè àzɔ̀ge eye be kɔ ègbè yì ji, fã àvi. 17Mawu sè ɖèvia be ègbè eye, so jiŋùkusia, Mawu be àtikplɔtɔa yɔ Hagàr. E gblɔ̃ na ɛ̀ be: “Nukɛ ye le wɔ̀ wò Hagàr? Mù gbà vɔ̃ ò, ɖo Mawu sè ɖèvia be ègbè, lè àfi kè be lèa. 18Sitè! Yì kɔkɔ ɖèvia, ne wòa le yebe àlɔ̀tinu, ɖo dùkɔ̃ gã ɖe la to so e mè.” 19Mawu hũ ŋùkuviwo na ɛ̀ eye e kpɔ vudo ɖe kè mè èsì lèa. E yì kù èsìa, ɖɔ èlãgbàzegoa eye e na ɖèvia be nù.
20Mawu nɔ̀ ku ɖèvia be sĩ eye e sò àxue ɖo zògbè ji. E trɔ zũ èhuãvidàtɔ; 21e sò àxue ɖo Paràn be zògbè ji eye ènɔa ɖè Ejiptè nyɔ̃nù na ɛ̀.
Zòɖùɖu lè Bɛr-Sevà
22Vɔ̀a lè gà ŋua mè kea, èfìɔ Abimèlɛk ku Pikɔ̀l, yebe àhùakɔ̃ be ga, gblɔ̃ na Abràham be: “Mawu lè ku wò lè ènu kè wò le wɔ̀a kpata mè. 23Tà Mawu na mù, lè fikè fifì, be yè mu la blè nyè ŋutɔ, èvi nyèwo ku jìjimèvi-nyèwo ò: be wò ɖo la ɖo lɔ̃lɔ̃ ɖèka ŋùku mè na mù ku ànyigbã kè ji wò lèa sìgbè àlekè mù lɔ̃ wòa nène.” 24Abràham ɖo e ŋuti be: “Mù tà ɛ̀.” 25Abràham sɔ ènyà na Abimèlɛk ɖo vudo kè yebe sumɔ̃vi ŋusùwo xɔ̀ lè èsìa ŋuti. 26Abimèlɛk do àpa be: “Nyè mu nya àmè kè wɔ̀ ènu kèa ò; wò mu na mù nya tètè ò eye nyè ŋutɔ cã nyè mu sè kpɔ kaka va na egbè ò.” 27Abràham sɔ àlɛ̃wo ku ènyìwo sɔ na Abimèlɛk eye wo àmè èvèa, wo ɖùzò. 28Abràham ɖè àlɛ̃nɔvi adrɛ̃ ɖovò lè èlãwo dòmè. 29Abimèlɛk gblɔ̃ na Abràham be: “Nukɛ ye àlɛ̃nɔvi adrɛ̃ kèwo wò ɖe ɖovòa, la wɔ̀ lè fikè ò?” 30E ɖo e ŋuti be: “Ne wòa xɔ̀ àlɛ̃ nɔvi adrɛ̃awo lè àlɔ̀ nyè mè. Wo la nyi ɖase na mù be ènyè ye ɖè vudo kèa.” 31Ènu kè ŋuti ye wo yɔna funua be Bɛr-Sevà, ɖo funua ye wo àmè èvèa wo kã àtãŋu lè.
32Wo ɖùzò lè Bɛr-Sevà. Abimèlɛk sitè e ye ku Pikɔ̀l yebe àhùakɔ̃a be ga, e trɔ yì Filistìtɔwo be ànyigbã ji. 33Abràham do àtikusɛ̃sɛ̃wo ɖo Bɛr-Sevà àfi kè be mlã Tɔhonɔ̀ Mawu kòkòɖàbìa be nyikɔ lèa. 34Abràham nɔ Filistìtɔwo be ànyigbã ji xɔ̀ àzã sùgbɔ.
Currently Selected:
Gɔ̃mèjèje be Xoma 21: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.