Gɔ̃mèjèje be Xoma 19
19
Lɔt ku Sodɔ̀m
1Mawu be àtikplɔtɔ èvèawo va ɖo Sodɔ̀m wètrɔmè, wàlɛbɛ kè Lɔt nɔ̀ ànyi lè èdùa be èmɔ̃ nua. E kpɔ wo gbãnà, e sitè yì dogò wo eye e jèklò sɔ ŋùkumè cɔ̃ ànyi. 2E gblɔ̃ be: “Mìa tɔ̀ jɔ̀, àpetɔ nyèwo, mì va to mìabe sumɔ̃via be àxomè, ne mìa klɔ àfɔ̀, mìa dɔ̃ funu ne èŋù kèa, mìa gbà so jè èmɔ̃.” Vɔ̀a wo ɖo e ŋuti na ɛ̀ be: “Ào! Mi la nɔ̀ àgboanu lè èzã bliboa mè.” 3E zĩ woa ji kaka be wo trɔ va ye gbɔ lè àxomè. E ɖànu na wo, na wo mè kpɔ̃nɔ àkpiti eye wo ɖù.
4Wo mu kpɔ mlɔ̃ ànyi gbɔ̀xue ye èdùa mè be àmèwo va xa àxuea ò. Sodɔ̀m be ŋusùwo, so vifɛ̃ yì àmèsĩsĩwo ji, dùkɔ̃a kpata vòvòtoto mà nɔ̀ emè. 5Wo yɔ Lɔt eye wo gblɔ̃ na ɛ̀ be: “Fikɛ ye ŋusù kèwo va gbɔ wò èzã kèa mèawo lè ò? Ɖè wo to ne mia dɔ̃ woa gbɔ.”
6Lɔt to eye e tu àgboa lè ŋùgbe, e yì dogò wo lè àgboa mɔnu, 7eye e gblɔ̃ be: “Mìa tɔ̀ jɔ̀, nɔ̀vi nyèwo, mì mu gbà wɔ̀ èvuɛ̃ ɖekpe ò. 8Mù ɖo tùgbɛ̀jɛvi èvè kèwo mu nya ŋusù òa, mù la teŋu ɖè wo to na mì ne mìa wɔ̀ ènu kè mì jro a ku wo. Vɔ̀a mì mu gbà wɔ̀ ènu ɖekpe ku ŋusù kèawo ò, ɖo wo va zɛ̃ gbɔ nyè.” 9Wo ɖo e ŋuti be: “Jo lè funu!” Eye wo gblɔ̃ be: “Àmè kèa nyi àmèjro va eye e le wɔ̀ ye ɖokoe kòjoɖotɔ! Mi la wɔ̀ nuvuɛ̃ ku ì sɔ wu ŋusùawo.” Wo tùtù Lɔt dãŋùgbe eye wo dɔ̃ gogo àgboa ne woa fo è. 10Vɔ̀a ŋusù èvèawo le àlɔ̀ na Lɔt, dɔ̃ ɛ̀ va àxuea mè, lè woa gbɔ. Wo tu àgboa, 11eye wo na ŋùku gbã na àmè kèwo keŋu lè àgboa ji, so vifɛ̃ kaka yì àmègãxo ji; ne wo mu gbà teŋu kpɔ àgboa ò.
12Ŋusù èvèawo gblɔ̃ na Lɔt be: “Àmè kɛ wò gbà ɖo lè fikèa ò? Ètoyɔvia? Ŋusùvi wòwoa? Nyɔ̃nùvi wòwoa? Ènu kèwo kpata lè èdùa mè na wòa, ɖè wo to lè èdù kèa mè. 13Ènu kè ŋutia, mi la crɔ̃ ɛ̀, ɖo lè Tohɔnɔ̀ be ŋùmèa, yebe àgɔ̀jèjea lòlò. E ɖo mi ɖoɖa be mia crɔ̃ ɛ̀.” 14Lɔt to yì pò nupo na yebe ètoyɔviawo, àmè kèwo la va ɖè èvia nyɔ̃nùawo, eye e gblɔ̃ na wo be: “Mì sitè! Ne mìa to jo lè èdù kèa mè ɖo Tɔhonɔ̀ la crɔ̃ èdùa.” Vɔ̀a, lè ètoyɔviawo gbɔa, e le gble ye.
15Wàlɛbɛ kè ye fɔ̃fɔ̃mè le ɖoa, Mawu be àtikplɔtɔawo gbà tɛ ègbè ɖo ènyà ji na Lɔt gblɔ̃ be: “Sitè! Kplɔ̀ èsrɔ̃ wò ku nyɔ̃nùvi èvè kèwo lè fikèa, ne mì mu gbà crɔ̃ ɖo èdù kèa be àgɔ̀jèje ŋuti ò.” 16Ekè ye e le dɔ̃ gàmèa, ŋusù èvèawo le yebe àlɔ̀tinu kplɔ̀ɛ, eye, èsrɔ̃a ku èvia nyɔ̃nùvi èvèawo, ɖo Tɔhonɔ̀ ku ŋuzĩzĩ na ɛ̀; wo kplɔ̀ wo to yì èdùa godo.
17Ekè wo le kplɔ̀ wo toa, wo gblɔ̃ na Lɔt be: “Si jo, ne wòa nɔ̀ àgbè. Mù gbà kpɔ ŋùgbedòmè ò, mù gbà tɔtè ɖo àfi ɖekpekpe lè ànyigbã ji ò! Si yì ètoa gbɔ lɔ̀ge ne wò mu gbà crɔ̃ ò.” 18Lɔt gblɔ̃ na wo be: “Mu gbà jro Mawu ò! 19Kpɔɖa sumɔ̃vi wòa fɔ̀ màje lè gbɔ wò eye wò ɖè lɔ̃lɔ̃ gã wòa fiɔ mù ekè wò le àgbè nyèa ɖotèa. Vɔ̀a ènyè ya, nyè mu la teŋu si yì èto ji ekè ye àyàdonamè kèa mu la jè e ji nyè, ne ma ku ò. 20Kpɔ èdù kèa ɖa, e sɔ̀ gbɔ nyè ne ma si yì funu, mu ɖo àsìxɔ̀xɔ ɖe ò. Mù ji be ma si yì ci funu. Mu nyɔ nènea be woa biɔ ènu viɖe so nɔ̀ àgbèa?” 21E ɖo e ŋuti be: “Kpɔ! Mù gbà le tàsi mɔnu kpɔkpɔ kèa na wò eye nyè mu la gbã èdù kè be ènyà wò le gblɔ̃ na mù a ò. 22Si yì funu kaba, ɖo nyè mu la wɔ̀ ènu ɖekpe ne wò mu yì funua ò.” Ekèa ŋuti ye wo yɔ èdù kèa be Soà.
23Dɔ̃ŋùkusu le to ɖo ànyigbã ji ye Lɔt le ɖo èta Soà be ànyigbã ji, 24wàlɛbɛ kè Tɔhonɔ̀ na wèmi ku èzò jà ɖo Sodɔ̀m ku Gòmɔrà jia. Ekèa so jiŋùkusi ku Tɔhonɔ̀ gbɔ. 25E gbã èdù kèawo, ànyigbã kpata, èdùawo mètɔwo kpata ku ànyigbã ji be àmàwo kpata. 26Lɔt be èsrɔ̃a trɔ, kpɔ ŋùgbedòmè eye e trɔ zũ èjèkɔ̃ lè ètènu.
27Abràham, fɔ̃ xoxo yì tèpe kè e nɔ̀tè lè Tɔhonɔ̀ be ŋùkɔ̀ lè va yìa; 28e ɖèkɔ̀ kpɔ Sodɔ̀m ku Gòmɔrà ku ànyigbã kè trɔ do woa kpata; eye e kpɔ àzìzɔ le tù lìlìlì so ànyigbã mè sìgbè èkpozo be àzìzɔ nène.
29Wàlɛbɛ kè Mawu le crɔ̃ ànyigbã be èdùawoa, e ɖoŋùku Abràham ji, eye e ɖè Lɔt to lè àyàdonamè kèa be dòdòmè, wàlɛbɛ kè e le gbã èdù kèwo mè Lɔt nɔ̀ sãa.
Lɔt ku èvia nyɔ̃nùawo
30Lɔt jo lè Soà va yì sò àxue ɖo èto ji, eye èvia nyɔ̃nùvi èvèawo kplɔ̀ ɛ̀ do. E le vɔ̃ Soà be èdùa nyàwo eye e sò àxue ɖo èto mè, e ye ku èvia nyɔ̃nù èvèawo. 31Àmègãxotɔa gblɔ̃ na nɔ̀via be: “Mia tɔa sĩ eye ŋusù ɖe mu lè èdùa mè la va dɔ̃ mia gbɔ sɔ zɔ̃ ɖo èdùa kpata be ɖoɖo ji ò. 32Mi yì! Mia na vɛ̃ mia tɔa ne bèa nù eye mia dɔ̃ e gbɔ ne mia na ɛ̀ jìjimèviwo.”
33Wo na vɛ̃ woa tɔa nù èzã ŋua mè, eye àmègãxotɔa yì dɔ̃ ku ètɔa kè mu gbà lè ye ɖokoe mè òa. Eye mu nya yebe dɔ̃dɔ̃ ku yebe fɔ̃fɔ̃ ò. 34Kè èŋù kèa, àmègãxotɔa gblɔ̃ na vifɛ̃a be: “Kpɔ! Mù dɔ̃ ku ètɔ nyè lè èzã mè. Mia gbà na ɛ̀ vɛ̃ bèa nù èzã yà mè ke, eye wò la yì dɔ̃ e gbɔ, nène ye mi la na àgbè jìjimè kè la to so e mèa.” 35Èzã ŋua ke mèa, wo gbà na vɛ̃ woa tɔa, e nù. Vifɛ̃tɔa yì dɔ̃ e gbɔ lè yebe mànya mè. Ɖo mu nya yebe dɔ̃dɔ̃ ku yebe fɔ̃fɔ̃ mè ò.
36Lɔt be èvi nyɔ̃nù èvèawo fɔfu na woa tɔ. 37Àmègãxotɔa jì èvi ŋusù kè e ɖo nyikɔ na be Mòab; àmè kè nyi Mòabviwo be tɔgbe egbèa. 38Vifɛ̃tɔa, cã jì èvi ŋusù kè e ɖo nyikɔ na be Bɛn-Amì, e le nyi Amɔ̀nìviwo be tɔgbe egbè.
Currently Selected:
Gɔ̃mèjèje be Xoma 19: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.