Gɔ̃mèjèje be Xoma 18
18
Mawu, Abràham ku Sodɔ̀m
1Tɔhonɔ̀ ɖè ye ɖokoe fiɔ Abràham lè Mamrè be àtigãwo gbɔ wàlɛbɛ kè e bɔ̀bɔ̀ nɔ̀ ànyi dɔ̃ŋùkusu jàse lè yebe gòxɔa be èmɔ̃ nua. 2E kɔ ŋùkuvi yì ji eye e kpɔ ŋusù ètɔ̃ lètè gogo e gbɔ. Ekè e kpɔ woa, e sidù so gòxɔa be èmɔ̃ nu yì dogò wo, bɔ̀bɔ̀ do ègbè na wo, 3eye e gblɔ̃ be: “Tɔhonɔ̀ nyè, ne mù teŋu kpɔ àsìxɔ̀xɔ ɖe lè àpo ŋùkumèa, mù gbà to àpo sumɔ̃via ŋuti boo jo yì ò. 4Wo ne kù èsì viɖe va na mì ne mìa klɔ àfɔ̀wo, eye mìa gbɔ̃jɛ̃ lè àti kèa gɔ̃mè. 5Mù la sɔ kpɔ̃nɔ va ne mìa sɔ do ŋusɛ̃ mìabe ŋutilã gbɔ̀xue mìa gbà ɖè zɔ̃ do kè e nyi be mì va to mìabe sumɔ̃via gbɔa.” Wo ɖo e ŋuti be: “Wɔ̀ ɛ̀ sìgbè àlekè wò gblɔ̃ ɛ̀a.” 6Abràham ɖèbla yì gòxɔa mè gblɔ̃ na Sarà be: “Ɖèbla! Kù èwɔ tɔ̀tɔ àgbã ètɔ̃ ne wòa blù ì eye wòa tɔ̀ klàko!” 7Eye e pu dù yì èlãkpa mè, yì le ènyìvi doàmì ɖèka. E sɔ ɛ̀ na sumɔ̃vi ŋusùvi ɖe kè jrà ɛ̀ ɖo kaba na ɖùɖua.
8E sɔ ènyìnɔsi babla ku ènyìnɔsi gbalo kudo ènyìvi doàmì kè wo mèa dà ɖo woabe ŋùkɔ̀; e lètè lè woa gbɔ lè àtia gɔ̃mè. Wo ɖù ènua 9eye wo gblɔ̃ be: “Sarà èsrɔ̃ wòa ɖe?” E ɖo e ŋuti be: “E lè funu, lè gòxɔa mè.” 10Àmèjroawo dòmètɔ ɖèka gblɔ̃ be: “Mù ɖo la trɔ va lè èpè kè la vaa be hùenu kèa eye kpɔɖa Sarà èsrɔ̃ wòa la ɖo ŋusùvi ɖèka.” Sarà lè gòxɔ kè lè Abràham be ŋùgbedòmèa be èmɔ̃ nu le sè ènyà kè wo le gblɔ̃a. 11Abràham ku Sarà nyi àmè sĩsĩ ŋutɔ, woabe èpè sùgbɔ fuu, eye Sarà kpò àsi ɖo ànyi, nyɔ̃nùwo tɔ̀a. 12Sarà tɔ ènukòko lè ye ɖokoe mè gblɔ̃ be: “Ènyè kè kpò keŋu-keŋu lekea, mù la gbà teŋu jì èvia? Eye àpetɔ nyèa sĩ ŋutɔ!” 13Àpetɔa gblɔ̃ na Abràham be: “Nukɛŋuti Sarà le kònu lekea ɖo ò? Eye nukɛ ŋuti e le biɔ ye ɖokoe sè be: “Nyàwo be mù la teŋu jì èvia, ènyè kè ku nyagãa?” 14Ènu ɖe teŋu nyi ènuglonu na Tɔhonɔ̀a? Lè àzã kè gbè mù la trɔ va gbɔ wòa, lè hùe kèa nua, Sarà la ɖo ŋusùvi ɖèka.” 15Sarà mɔnu gblɔ̃ be: “Nyè mu kònu ò”, ɖo e le vɔ̃. Àpetɔa gblɔ̃ be: “Nyàwo ye, wò kònu tututu.”
Abràham blìbɔ̀ ɖo Sodɔ̀m ta
16Ŋusùawo sitè lè funu eye wo ɖota Sodɔ̀m; Abràham zɔ̃ èmɔ̃ ku wo ne bèa ɖo wo. 17Tɔhonɔ̀ gblɔ̃ be: “Nyè mu la teŋu wla ènu kè mù la wɔ̀a do Abràham ò. 18Abràham ɖo la trɔ ŋusɛ̃ be dùkɔ̃ gã ɖe. E ye mè wo la tu sì na ànyigbã ji dùkɔ̃wo kpata lè, 19ɖo mù cã ɛ̀ ne bèa ŋlɔ̀ ɛ̀ dàɖɛ na yebe àxuedo a ku yebe jìjimèviwo be woa le ŋùku ɖo Tɔhonɔ̀ be èmɔ̃a ŋuti, lè ènu kè jèa ku ènu jɔ̀jɔɛ wɔ̀wɔ mè; nènea ye Tɔhonɔ̀ le wɔ̀ ènu kè e fìã na Abràham yeŋu.” 20Tɔhonɔ̀ gblɔ̃ be: “Èhùɛjèje so Sodɔ̀m ku Gòmɔrà ŋuti trì àkɔ, woabe vuɛ̃ a kpɛ̃ ŋutɔ 21àleke be mù ɖo la ɖì va kpɔ ne woabe àgɔ̀jèjea sɔ̀ ku èhùɛ kè va kaka gbɔ nyèa. Ne àjè àlo nyàwo ye à mù la nya!”
22Ŋusùawo jè èmɔ̃ tùtà Sodɔ̀m. Abràham gbà kpɔ̀tɔ̀ lè Tɔhonɔ̀ be ŋùkɔ̀. 23E tètè gogo e gblɔ̃ be: “Nyàwo ye wò la crɔ̃ àmè jɔ̀jɔɛa ku àgɔ̀jètɔa ɖodua? 24Ta mu nyɔ òa, àmè jɔ̀jɔɛ èkà ci èwo lè èdùa mè! Nyàwo wò la crɔ̃ èdù kèa, wò ma kpɔ ɖo mè na ɛ̀, ɖo àmè jɔ̀jɔɛ èkà ci èwo kèwo lè èdùa mèa ŋutia? 25E la nyi ènu nyɔŋu ne wò wɔ̀ nènea! Wò la wù àmè jɔ̀jɔɛ ku àgɔ̀jètɔ ɖodua? Àmè jɔ̀jɔɛ ku àgɔ̀jètɔa la xɔ̀ fɛ̃tu ɖèkaa? Ènu nyɔŋu kɛ ye nyi ekèa! Ànyigbã kpata be kòjoɖotɔa mu la sò jɔ̀jɔɛ àdodoe òa?” 26Tɔhonɔ̀ gblɔ̃ be: “Ne mù kpɔ àmè jɔ̀jɔɛ èkà ci èwo lè Sodɔ̀m be èdùa mèa, sɔ kùɖo woa ŋutia, mù la sɔkè èdùa kpata.”
27Abràham xɔ̀ ènyà gblɔ̃ be: “Mù la sɔ ɖo ɖokoe nyè ji ne ma pò nupo na Tɔhonɔ̀ nyè, ènyè kè nyi àfi ku ɖiɖɔɛa. 28Ta mu nyɔ òa, lè èkà ci èwoa mèa, e la teŋu hùe àtɔ̃! Hà ɖo àtɔ̃a ŋutia, wò la crɔ̃ èdùa kpataa?” E gblɔ̃ be: “Nyè mu la crɔ̃ èdùa ne mù kpɔ àmèjɔ̀jɔɛ èkà ci àtɔ̃ ò.”
29Abràham gbà xɔ̀ ènyàa, gblɔ̃ be: “Ta mu nyɔ òa, lè funua, àmè èkà ɖèka kpò ye lè!” E gblɔ̃ be: “Nyè mu la wɔ̀ ɛ̀ ò, ɖo àmèjɔ̀jɔɛ èkà ɖèka ŋuti.”
30E gbà yì e ji be: “Tɔhonɔ̀ nyè mu gbà bijì ne mù pò nupo ò; ta mu nyɔ òa àmè jɔ̀jɔɛ ègbã ye la nɔ̀ funu!” E gblɔ̃ be: “Nyè mu la wɔ̀ ɛ̀ ne mù kpɔ àmè jɔ̀jɔɛ ègbã lè funu ò.”
31E gbà yì e ji gblɔ̃ be: “Mù la sɔ ɖo ɖokoe nyè ji be ma pò nupo na Tɔhonɔ̀ nyè: ta mu nyɔ òa, lè funua àmè jɔ̀jɔɛ èwì kpò wo la kpɔ!” E gblɔ̃ be: “Nyè mu la crɔ̃ èdùa ò, ɖo àmè èwì ŋuawo ŋuti.”
32E gbà yì e ji be: “Tɔhonɔ̀ nyè mu gbà bijì ne mù pò nupo kpɔ̀tɛa ò; ta mu nyɔ òa, àmè èwo kpò ye la nɔ̀ funu!” E gblɔ̃ be: “Nyè mu la crɔ̃ èdùa ɖo àmè èwo ŋuawo ŋuti ò.”
33Tɔhonɔ̀ jo lè Abràham gbɔ wàlɛbɛ kè e pò nupo ku è vɔ̀a eye Abràham cã trɔ yì yebe àxomè.
Currently Selected:
Gɔ̃mèjèje be Xoma 18: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.