Gɔ̃mèjèje be Xoma 17
17
Abràm trɔ zũ Abràham
1E xɔ̀ èpè èkà èvè ci woeàsiɖèkɛ wàlɛbɛ kè Tɔhonɔ̀ ɖè yeɖokoe fiɔ Abràm, gblɔ̃ na ɛ̀ be: “Ènyè ye nyi Mawu-ŋusɛ̃kpatatɔa. Zɔ̃ lè àpe nɔ̀nɔmè mè eye nɔ̀ jɔ̀jɔɛ. 2Mù ji be ma sɔ zòɖùɖu kè lè ènyè gbàkudo wò dòmèa na wò, mù la na wò la jì ɖo eji kpe è.” 3Abràm jèklò sɔ ŋùkumè cɔ̃ ànyi, Mawu pò nupo ku ì gblɔ̃ na ɛ̀ be: 4“Na ènyèa, kpɔɖa àpe zòɖùɖu ku wòa yekè: Wò la nyi ètɔ na dùkɔ̃ sùgbɔ fuu. 5Wo mu gbà la yɔ wò be Abràm ke ò, vɔ̀a àpo nyikɔ la nyi Abràham, ɖo mù la na wò la nyi ètɔ na dùkɔ̃ sùgbɔ fuu, 6eye mù la na wò la jì ɖo ji ŋutɔ, dùkɔ̃wo ku èfìɔwo la to so èwò mè. 7Ma ɖo zòɖùɖu nyèa, ànyi lè ènyè ku wò gbàkudo jìjimèviwo dòmè. Zòɖùɖu mà-vɔ kèa la ɖèfiɔ be mù nyi àpo Mawu gbà nyi àpo jɔ̀jɔmèvi kèwo la jè yo wò mèa be Mawu. 8Ma sɔ Kanàn nyigbã bliboa kpata, kè ji wò nyi àmèjro lèa na wò ne bèa nyi èwò ku jìjimèvi wòwo tɔ̀ tɛ̀gbɛ̀. Ma nyi woabe Mawu.”
9Mawu gblɔ̃ na Abràham be: “Wò ya, le zòɖùɖu nyèa ɖo àsi, eye lè èwò yomè a, jìjimèvi kèwo la to so èwò mèa. 10Kpɔɖa, zòɖùɖu kè la nɔ ènyè ku èwò gbàkudo jɔ̀jɔmèvi wòwo dòmèa ye nyi ekè: Wò la sò èvo na ŋusù wòwo kpata. 11Wò la ɖè àyu kè lè mìabe èvo be ènugbɔa jo, ekèa ye la nyi zòɖùɖu kè lè ènyè gbàkudo mìa dòmèa be jèsìdo. 12Nène a ye èvi ŋusù ɖekpekpe kè xɔ̀ ŋùkèkè ènyi lè àpo jɔ̀jɔmèa la sò èvo. Nène ke la nyi na kluvi kè wo jì lè àpo àxomèa, àlo kè wo plè ku èci ye e nyi àmèjrovi so àfi ɖekpekpe cã yeŋu, ekèwo mu lè jɔ̀jɔ wòa mè òa. 13Wò ɖo la sò èvo na kluvi kè wo jì lè àxomè àlo wò plèa cã. Zòɖùɖu nyèa la trɔ zòɖùɖu kè lè tɛ̀gbɛ̀ lè mìabe ŋutilã mè, 14vɔ̀a èvo mà-sòtɔa, ŋusù kè be èvo be àyu wo mu sò òa, wo la ɖè nène mèa to lè tɔ̀ wòwo dòmè. Ɖo e gble zòɖùɖu nyèa.”
15Mawu gblɔ̃ na Abràham be: “Wò mu gbà la yɔ èsrɔ̃ wò Saraì be nyikɔ be Saraì ke ò, ɖo yebe nyikɔ la nyi Sarà. 16Mù la tu sì na ɛ̀, eye ŋutɔ cã mù la na wò ŋusùvi ɖèka to e ji. Mù la tu sì na ɛ̀, dùkɔ̃wo ku èdùmè-fìɔwo la to so e mè.” 17Abràham jèklò sɔ ŋùkumè cɔ̃ ànyi eye e kònu; e gblɔ̃ lè ye ɖokoe mè be: “Èvi ɖe la teŋu to so àmè kè ɖo èpè èkà èvè takpoa mèa? Àlo Sarà kè ɖo èpè èkà èvè ci èwoa la teŋu jì èvia?” 18Abràham gblɔ̃ na Mawu be: “Ismàɛl ne gbe ci àgbè na wò kpò!” 19Mawu gblɔ̃ be: “Ào ɖe! Èsrɔ̃ wò Sarà la jì ŋusùvi na wò eye wò la ɖo nyikɔ na ɛ̀ be Izàk. Mù la ɖùzò nyèa ku è eye zòɖùɖu kèa la nɔ̀ ànyi tɛ̀gbɛ̀ na yebe jìjimèviwo. 20Mù sè àpo kuefã na Ismàɛl, kpɔ, mù la tu sì na ɛ̀, mù la na e la jì ɖo ji wu gbɔ̃gblɔ̃; e la jì èfìɔvi woèvè eye dùkɔ̃ gã ɖe la to so e mè. 21Vɔ̀a, mù la ɖùzò nyèa ku Izàk, kè Sarà la jì na wò lè àzã kèa ji lè èpè kè gbãnàa mè.”
22Wàlɛbɛ kè Mawu pò nupo ku Abràham vɔ̀a, e jo lè e gbɔ boo. 23Abràham kplɔ̀ èvia Ismàɛl ŋusùa, kluvi kèwo wo jì lè yebe àxomèa, àlo kèwo wo plè ku ècia, ŋusùvi kèwo lè yebe àxomèa; e sò èvo be àyua na wo lè gbè kè gbè Mawu pò nupo ku do èa ke. 24Abràham xɔ̀ èpè èkà èvè ci woeàsiɖèkɛ wàlɛbɛ kè wo sò yebe èvo be àyua, 25eye Ismàɛl xɔ̀ èpè woètɔ̃ kè wo sò èvo na ɛ̀a. 26Ŋùkèkè ɖèka ŋua ke gbè ye wo sò èvo na Abràham ku èvia Ismàɛl ŋusùvia; 27eye wo sò è na eye ku yebe àxuedo a, kluvi kèwo wo jì lè àxomèa àlo kèwo wo plè ku ècia, kèwo nyi àmèjrowoa ɖodu.
Currently Selected:
Gɔ̃mèjèje be Xoma 17: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.