ADECHHÜ 23
23
Sarah na Shü nu Abraham na kevhüpen ayyi keshü
1Sarah na amapi 127 hang. 2Ma Kanaan yyi Hebron wi shü, nu Abraham na ma keshü ghena anongü nu qai. 3Abraham na ma wubvü keshü kamang tsü teshi theng nu Hitti nyithu wi khi, 4#Ibr 11.9; Kek 7.16. “Hi asang sa nu he nthu jawi hangben, ayyi pi hi shüya thsü nu iwubvü pi vhüya thsülo.”
5Mathu na khi, 6“Ikhang jüh kina chilo, kediwa. No ithu jawi kekhang kedi nyi kesü saben, nwubvü pi ithu shüjjen kemehai ntsawa wi vhüyalo. No nwubvü pi vhüya thsüle kesalina ashüjjenpen pi no kecü tsü ithu tsüdila anonghe benle.”
7Abraham na mathu tuwi kukedu, 8nu khi, “Keujüla nthu na hi ya iwubvü pi hewi vhü thsü mvuben lethu, nthu nchala Zohar tsawa Efron wi 9ma lli khutsu wi Makhpela Lonshiku tsüpi hi wi jeü cülo kizalo. Nthu tuwi na hi ma men maben pi ma cü nu tsüpi iji saya, nu pi ashüjjenpen saya thsülo.”
10Efron la Hitti nyithu gweghe anyunuti khweti-jenka wi keccünengli pen witsü donki ben. Mathu tsüdi za keben wi ma Abraham luneng, 11“Ijüh kina chilo, kediwa; hi alli tsü maben nu ma non wi alonshiku tsüpi no cüaden. Hi inyithu tuwi na tsüpi no cü ben na nwubvü pi ciwi vhüyalo.”
12Isala Abraham na Hitti nyithu tu kukedu 13nu tsüdi zaya thsüle kesalina Efron wi kiza, “Hi no wi khieben, ijüh kina chilo. Hi alli maben shüyaden, no hi wi alli men ha khuyalo, nu iwubvü pi ciwi vhüya thsülo.”
14Efron na khineng 15“Kediwa, alli tsüna rükatssü meza mejü men ketan —— ishinyi jüwi mangwa kaghakhi ma? Nwubvü pi ciwi vhüyalo.” 16Abraham na anlo khichi, nu Efron na anyithu za keben wi kekhi ju ma rükatssü meza mejü whu chi, tsüna tsü tsüwi apisa men kenie wina.
17Tsütinu Efron lli Mamre na nishuwa Makhpela tsüna Abraham ji saya. Alli tsü maben ciwi alonshiku nu achanton tsüdila saghu ben. 18Tsüna Abraham ji sadhale kesa pi Hitti nyithu anyunuti jenka keccünengli pen wi kewathu tsüdila chü thsüa.
19Tsaseng wi Abraham na ma wubvü Sarah pi alonshiku tsüwa wi Kanaan yyi wi vhüa. 20Tsalina Hitti nyithu lli alonshiku ciwi keben tsüna Abraham ji sa nu ma tsüpi ashüjjenpen saya.
Currently Selected:
ADECHHÜ 23: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.