ADECHHÜ 24
24
Isak Wubvü Ghena
1Abraham na khilitsü qhai wadha, nu Apvüwa na alentagha wi sawegü pi ma cü. 2Abraham na ma keben tsüdi kenonccawa magha keqhai ntsawa wi kiza, “Nkwen pi ipedhi#24.2: Nkwen pi ipedhi: Hatinu kekishen tsü khiela kemiliya nten. cakhu wi chiyalo. 3Hi no ya Apvüwa Anyiza nu ayyi sakechiwa nyan wina kishen thsü mvuben; tsüna no hewi Kanaan nyithu jawi itsawa ghena awubvü kessi pi ncü thsüle kesalina. 4Isala no hi kepvügha pen diyyiwa wi wa nu ishilithu jawi itsawa Isak ghena awubvü yapi cülo.”
5Amaghawa na khineng “Keujüla nzawa na ajjen teshi nu hi niesen hewi ngho mvuthu khati sa nu? Hi ntsawa kesun pi no kegho yyiwa wi tsü wa neng thsüala?”
6Abraham na khineng “No itsawa kesun pi ciwi nwa neng thsüla metsilo! 7Apvüwa, atssan Nyiza na iba jjen nu ishilithu yyi wi na hi ssi shhugho kishen nu khi, ‘Hi ayyi hapi nshicübvüghathu cüden.’ Ma nyilo kesun pi ntuwi chi nu no ciwi itsawa ghena awubvü muyaben. 8Keujüla nzawa na no gweghe ngho mvu lethu kekishen hawa ha nmiwi nmi. Isala no katsü sa lela itsawa ssinu ciwi nwa nengla metsilo.” 9Tsalina amaghawa na ma kwen pi ma pvüwa Abraham pedhi keni jüwi chiya nu Abraham na kekhi tsü sale khila kishen. 10Abraham keben kenonccawa amaghawa na ma pvüwa ji sunsiesa tagha ssiya nu Nahor na hang keten nyunuti Mesopotamia na aghawa tsü wa. 11Ma wa cukeya wi sunsiesathu ya anyunuti bendi atssükhang wi akhhutsüdu thsüa. Tsüna minulen wi nzathu na atssü kagha tsü wi sadha. 12Ma kekhie sa, “Apvüwa, ipvüwa Abraham Nyiza, nansü hi yala haicenya thsülo, nu no nmaghawa Abraham wi khichi ketheng tsü sa chilo. 13Hi hewi anyunutiwa wi ghalathu na atssü ghaketen tssükhang wi nganben. 14Hi mathu meshu kesü wi hati khiden, ‘No nchala nlakhü piesha chi nu hi ya atssü jjüya thsülo.’ Keujüla ma khi, ‘Jjüyalo, nu hi atssü pi sunsiesathu la jjü thsüna,’ isa lethu nza tsüwa ya nmaghawa Isak ghena kessi ketheng tsü saya thsülo. Tsüti sa lethu no nmaghawa wi khichi ketheng tsü sacendha kesa hi chüyaben.”
15Ma kekhie npi sadhila Rebeka na alakhü pi ma depfü wi donpvü nu gha. Rebeka na Abraham cünyuwa Nahor nu ma wubvü Milka manyi tsa Bethuel nga. 16Ma ghala tegü pvünyimetha pi atsimehai ntsa saben. Ma dula atssükhang wi atssü deya theng nu kheneng shhugho. 17Amaghawa na wa ma metu nu khi, “No nchala hi ya nlakhü wi atssü jjüya thsülo.”
18Nzawa na khi, “Jjüyalo, kediwa,” nu ma shishi ma depfü wi alakhü piesha pi ghansen nu ma ya jjüya thsüa. 19Ma tsü jjükeya seng wi nzawa na khi, “Hi atssü piegho sunsiesathu tsüdila jjüya thsü na.” 20Ma kaghayila atssü pi asahangthu kejjükhu wi keshuchi khi nu ma lakhü ghacang, nu kheneng bvü wa atssükhang wi atssü de, ma atssü pi sunsiesathu tsüdi jjüya thsüa. 21Apvüwa na ma yala haicenya thsütenla nye khe sala anyi tsüwa na ceen nu nza tsüwa ghangben.
22Nzawa na tsü sacen keya seng wi anyi tsüwa na suna qei menkedhu khushi pi nzawa mitsan wi chi nu suna khwesa keni pi ma kwen wi chi cüa. 23Ma khi, “No thowa nga khe hi kizalo. Nba jjen wi shita ikhang keben pen muya ben ma?”
24Nzawa na luneng “Iba na Nahor nu Milka manyi tsawa Bethuel le! 25Ikhang jjen wi amatsi nu amesü tsse kejonla ben, nu nthu ghena apen la ben.”
26Tsaseng wi anyi tsüwa na kukedu nu Apvüwa kinyi. 27Ma khi, “Apvüwa sengle, ipvüwa Abraham Nyiza na jühtsentsa sa nu ipvüwa wi khichi ketheng sacen cüdha. Apvüwa na meshonqhe hi ssi ghala ipvüwa shilithu jjen wi chi cüdha.” 28Ghalawa na bvü sen nu ma jja jjen wi wa ha cüki maben khipi kiza. 29Rebeka na ma bagha kesü ma nyan Laban na ben, nu Laban na bvü sen nu Abraham maghawa keben pen atssükhang wi wa. 30Laban na ma tssüggüwa mitsan wi suna qei nu ma kwen wi akhwesa muya nu anyi tsüna mangwale nzawa kiza lakhe ma kekhi tsü zayadha. Ma Abraham maghawa na atssükhang wi ma sunsiesa kete wi ngan keben wi wa. 31Nu khi, “Hi gweghe ijjen wi ghalo. Apvüwa na sawegü pi no kecü nyi kesü. Mangkesa na hewi ngan ben nu? Ijjen wi nghena apen kesü kiden pi theng, nu ciwi sunsiesathu ghena la apen na ben.”
32Tsalina anyi tsüwa na ajjen wi du, Laban na sunsiesathu khhi piesha nu amatsi nu atsse pi mathu dsa thsü. Tsaseng wi ma wa atssü senghola Abraham maghawa nu ma nyithu ccü bhuya thsü. 33Tsaseng wi kedsakejjü sen nu gho nan anyi tsüwa na khi, “Hi khile kebenwa npi kekhi chu hi dsajjü ntenle.”
Laban na khi, “Khi nanlo.”
34Tsalina ma khi wa, “Hi Abraham maghawa. 35Apvüwa na sawegü pi ipvüwa cü ntsa sa nu ma ya keban sa thsü. Apvüwa na khaghaneni nu anenithu, amesüsi, rükatssü, suna, maghalo nu maghalethu, sunsiesa nu gadathu pi ma cü. 36Ipvüwa wubvü Sarah na ma keqhai seng wi atsa kesü pvügha pi ma cü, nu ipvüwa na ma keben tsüdi pi atsawa cüdha. 37Ipvüwa na hi ya ma jühkhukechi tsü kinalo nu hi ya kishen thsüdha. Ma khi, ‘No Kanaan yyi wi itsawa wubvü ghena nza nkessila. 38Isala iba jjen nu ishilithu wi wa nu itsawa ghena awubvü kesü yapi cülo.’ 39Nu hi ipvüwa keüchi, ‘Keujüla nzawa tsüna hi nie ngho mvuthu khati sa nu?’ 40Ma hi luneng ‘Apvüwa, hi keshüthangla ma jühkina ketenwa na ma nyilo kesun pi no gweghe wa nu no ya haicenya thsüden. No ishilithu nu iba theghithu wi itsawa ghena awubvü kesü muyaben. 41Ciwi ajjügi kesütan ghena no kekishen ha npvülaya mehai; keujüla no ishilithu wi wa nu mathu nzawa pi no ncü mvu lethu kekishen ha nmiwi nmi.’
42“Hi nansü atssükhang wi kekhie sa, ‘Apvüwa, ipvüwa Abraham Nyiza, hi kekuli hawi haicenya thsülo. 43Hi hewi atssükhang wi nganben. Ghala kesü atssü gha lethu hi ma wi nlakhü wi atssü pi hi jjüya thsülo isa khiden. 44Keujüla ma anlo khi nu atssü piegho hi sunsiesathu la jjüya thsüthu, ghala tsüwa yala ipvüwa tsawa ghena awubvü kessi kethengwa tsü saya thsülo.’ 45Hi ileben wi kekhie sa keben tsü npi kecen wi Rebeka na alakhü pi ma depfü wi donpvü nu gha atssükhang wi atssü deyale sa. Hi ma wi khi, ‘Atssü pi hi jjüya thsülo.’ 46Ma shishi ma depfü wi alakhü pieshaya nu khi, ‘Jjüyalo, nu hi atssü pi no sunsiesathu la jjü thsü na.’ Tsalina hi jjüya, nu ma atssü pi sunsiesathu la jjüya thsüa. 47Hi ma keüchi, ‘Nba thowa nu?’ Ma luneng ‘Iba na Nahor nu Milka manyi tsawa Bethuel le.’ Tsaseng wi hi suna qei nu akhwesa pi ma mitsan nu ma kwen wi chi cüa. 48Hi kukedu nu Apvüwa kinyi. Hi Apvüwa seng, ipvüwa Abraham Nyiza, no meshonqhe hi ssigho ipvüwa shilithu jjen wi chi cü, nu hi ipvüwa tsawa ghena awubvü muyadha. 49Khili nthu na ipvüwa ssinu ajühkeyali nu atsentsa sa lethu hi kizalo; nyelethu tsü la khilo, isathu hi khati kesau khe saden.”
50Laban nu Bethuel manyi na khi, “Ha jjügi hana Apvüwa wina kegho ghena ishinyi na mangla kekhiu nyele. 51Rebeka na hewi ben na ma ssiya nu walo. Apvüwa na kekhi ti ma yala npvüwa tsawa wubvü saya thsülo.” 52Abraham maghawa na ha za keya wi ma kukedu nu Apvüwa kinyi. 53Tsaseng wi ma athsü, rükatssü, nu suna yan tsüthu pi Rebeka cü. Ma aju menkedhu pi ma baghawa nu ma jja la cü.
54Tsaseng wi ccüna Abraham maghawa nu anyi ma gweghe ketenthu na dsajjüya nu mathu tsü ghaja ciwi ben wa. Mathu na ghanenwa shagha nu ma khi, “Hi yala ipvüwa wi wha neng thsü yilo.”
55Rebeka baghawa nu ma jja manyi khi, “Ghalawa yala ghanan tagü nyelela tagha ithu gweghe benla thsü nu tsaseng wi ma ya wa thsülo.”
56Isala ma khi, “Ikhang ya nminu thsüla yilo, Apvüwa na hi yala haicenya thsüdha; hi ya ipvüwa wi wha neng thsü yilo.”
57Manyi khineng “Ghalawa na mangwale khiten khe ma ci chinan na.” 58Tsalina mathu Rebeka cichi nu keü, “No anyi ha gweghe wa mvu ben ma?” Nzawa na khi, “Hi waden.”
59Tsalina mathu Rebeka nu ma maghale yala Abraham maghawa nu ma nyithu gweghe wa thsüa. 60Mathu hatinu sawegü pi Rebeka cü;
“Ikhang tssüggüwa, no anyi khalatsi jja
sakeyawa sa!
Nshicüthu ya mathu ghinyi nyunutithu
nkakeyawa sa!”
61Tsaseng wi Rebeka nu ma maghale manyi kidenya, nu sunsiesa miwi benya nu Abraham maghawa mathu tsüdi gweghe nu wa.
62Isak na “Hangbennu hi mukebenwa tssükhang” ghansha wi tsü gho nu Kanaan yyi acülawa witsü benden. 63Ma minulen wi alli wi kegoe ten nan sunsiesathu ghoketen muya. 64Rebeka na Isak mu chinan ma sunsiesa miwi na ayyi wi dugho nu 65Abraham maghawa wi keü, “Anyi kesü ka alli wi alentsen sen nu ikhang wiwa ghoketen katsü thowa nu?”
Amaghawa na luneng “Ma ipvüwa le.” Tsalina nzawa na athsü khusha pi ma mmi shanbhonya.
66Amaghawa na ma kekuli cüki tsüdi khipi Isak kizachia. 67Tsaseng wi Isak na Rebeka ssinu ma jja Sarah na hang kegho nithsüjjen witsü du, nu Rebeka na ma wubvü sa wa. Isak na Rebeka nen ntsa sa nu ma jja na shü lela ma lebencca sa.
Currently Selected:
ADECHHÜ 24: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.