ADECHHÜ 22
22
Abraham na Isak pi Kekinyi salo Anyiza na ma Kekiza
1Matsü pahan seng wi Anyiza na Abraham ghan-nan. Anyiza na ma cichi, “Abraham” Abraham na lesha, “Hi hewi benle!” 2#2 Kc 3.1. Anyiza na khi, “Ntsawa Isak ma ketan no ma ghali ntsa ketenwa tsü ssiya nu Moria yyi wi walo. Ciwi hi no kiza na ayikha kesü miwi ma pi ahhansha sapi hi cülo.”
3Ghanenwa wi mitu na Abraham na ahhansha kesa ghena achan pahan pi gada khhi saya, ma tsawa Isak nu ma magha keni ssiya; isanu mathu gweghe Anyiza na apen khipi ma kekiza wi tsü wa. 4Kecheng ghanan wi Abraham na alen kesie wina apen tsü muya. 5Tsaseng wi ma amagha keni kiza, “Gada ssinu hewi ngan ben lalo. Ghanyiwa ishinyi wa apen kawi ka tsü kinyi theng nu kheneng nshinyi wi gho ben na.”
6Abraham na Isak yala ahhansha kesa ghena achan tsü pvüya thsü, nu ma annuza kesü nu annithegü khuya. Manyi gweghe wa keten wi, 7Isak na khi, “Iba!” Ma lesha chi, “Hi hewi benle, itsawa!”
Isak na keü, “No anni nu achan la ben, isala ahhansha kesa ghena aneni zza khiewa ben nu?”
8Abraham na khineng “Anyiza na khuchi cüben.” Isanu manyi gweghe wa.
9 #
Jos 2.21. Manyi wa Anyiza na khipi ma kekiza pen tsü cukeya wi Abraham na kekinyipen kesü saya nu achan pi tsü miwi chiya. Ma ma tsawa tsü bhenya nu pi kekinyipen wi achan miwi chi. 10Tsaseng wi ma annuza khuya nu pi ma süthia le saben. 11Isala Apvüwa nyilowa tang wina ma cichi, “Abraham, Abraham!”
Ma nusha chi, “Hi hewi benle!”
12“No ghanyiwa miwi nkwen nchila, nyelela ma miwi mangla nsa lalo. Hi no Anyiza messikü tenle kesa chüyadha, kepaghenanye no hi wina ntsa ma ketan kesawa tsü la ntepagha ladha.”
13Abraham na ghang kevüli chinan aneni süpon kesü ma ghacü pi aghangbhon wi vüki keben muya. Ma wa tsü ghanya nu khupi ma tsawa mithon sala mecang pi kekinyi sa. 14Abraham na apen tsüpi “Apvüwa khuchiden” isa cia. Nu nansü kecu anyithu na tsüpi “Apvüwa yikha wi ma khuchiden” isa khiden.
15Apvüwa nyilowa na tang wina keni tughuwa Abraham cichi, 16#Ibr 6.13,14. nu khi, “Hi ketanla inyan wina kishenben— Apvüwa na khiben —Hi sawegü pi no cü ntsa saden. Kepaghenanye no hi wina ntsa kesütanwa tsü ntepaghala. 17#Ibr 11.12. Hi nshicübvügha sapi tang wi ghotsithu nu atssükedone ghüsa wi ahachan ti sa cüden kesa khishi chiben. Nshicübvüghathu na mathu ghinyithu miwi khang yaden. 18#Kek 3.25. Mizzatenti tsüdila hi sawegü pi nshicübvüghathu kecü ti pi mathu la cülo khieben, — kepaghenanye no hi ayenkhukechi tsüdi kenie ghena.” 19Abraham na ma magha keni wi whaneng nu mathu gweghe Beersheba wi wa nu Abraham na ciwi hang wa.
Nahor Shicübvüghathu
20Matsü pahan seng wi Abraham na Milka na atsanga tazen pvügha pi ma cünyuwa Nahor cüle kesa chüya; 21Uz na atssütsewa, Buz na ma cünyuwa, Aram bawa Kemuel, 22Khesed, Hazo, Pildash, Jidlaf, nu Bethuel 23Rebeka ba. Milka na atsa tazen hathu pvügha pi Abraham cünyuwa Nahor cü. 24Nahor wubvü meshibvüwa Reuma na Teba, Gaham, Tahash, nu Maka pvügha cü.
Currently Selected:
ADECHHÜ 22: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.