BVÜKESHHU 5
5
Mosa nu Aaron Manyi na Ejipt Kadimiwa wi kewa
1Tsaseng wi Mosa nu Aaron manyi na Ejipt kadimiwa wi wa nu khi, “Apvüwa, Israel Nyiza na khiben, ‘Inyithu yala bvü thsülo, isanu mathu wa ayyikeshü wi hi kekinyi ghena akho saya thsüle kesalina.’ ”
2Isala kadimiwa na keü, “Apvüwa tsüna thowa nu? Hi mangkesa na ma jühkina nu Israel nyi yala bvü thsüa nu? Hi Apvüwa tsü nchü, nu Israel nyithu ya bvü thsü nben.”
3Mosa nu Aaron manyi na luneng, “Ibri nyi Anyiza na ma ketanla ma pi ikhang ccücale. Ikhang ya ghanan kecheng alentsen wa ayyikeshü wi ahhansha sapi Apvüwa ithu Nyiza cüya thsülo. Keujüla ikhang tsüti nsalethu ma khumakhujü nyelela aghi wina ikhang pathiaben.”
4Kadimiwa na Mosa nu Aaron manyi wi kiza, “Nshinyi mangkesa na anyithu mathu kekuli wi apiketsü nsa thsüla ben nu? Anyi nssümagha hathu ya kuli wa thsülo! 5Nthu Ejipt nyi miwi anyi shakidha. Nu nthu khili nkulidha le sabenla!”
6Tsü ghanan na kadimiwa na ahza pi Ejipt nyi nssümagha ccülikesathu nu Israel nyi kekuli ssiketenthu cü: 7“Yimecanglon kesa ghena nansü nten na amatsi pi anyithu ncü layilo. Mathu ketanla wa bhaya thsülo. 8Isala hatu wi mathu na yimecanglon khaju saten khe tsü makesü saben, kesüla zeng kayi nben. Mathu na kekuli kejon nkemi ghena hi wi mathu ya bvü thsü nu wa ahhansha sapi mathu Nyiza cü thsülo khie kiben! 9Mathu na milikemesa jüh kekina matsü nmu thsüle kesalina mathu pi kekuli khang kayi sa thsü nu dhamang ben thsülo.”
10Nssümagha ccülikesathu nu Israel nyi kekuli ssiketenthu na wa Israel nyithu wi khi, “Kadimiwa kekhi na ma amatsi pi nthu cü ntendha. 11Nthu ketanla wa khiewi muya mehai khe tsü bhaya, isala hatu wi yimecanglon khaju saten khe tsü makesü nsathu yishü.” 12Tsalina anyithu na Ejipt yyi tsüdi wila amatsi bha wa. 13Nssümagha ccülikesathu na mathu meten pi ghanan kaghapengla hatu wi amatsi pi mathu cü keten wi yimecanglon sakeya ju sa thsüle sa. 14Ejipt nyi nssümagha ccülikesathu na Israel nyi kekuli ssiketenthu pi kekuli ghang thsü ketenthu tsü kiccü. Mathu na keü, “Nthu mangkesa na hatu wi yimecanglon kesa ju nsala ben nu?”
15Kekuli ssiketenthu na kadimiwa wi wa nu khi, “Mangkesa na ikhang tuwi hati saben nu? 16Amatsi pi ikhang ncüladha, isala yimecanglon salo khi! Nu khilitsü ikhang kiccü wadha, hati ha nghena le.”
17Kadimiwa na luneng, “Nthu na nontssü nu kuli mvu nten, tsalina nthu hi wi nthu ya bvü thsü nu wa ahhansha sapi Apvüwa cü thsülo khieki benden. 18Khili wa kuli walo! Amatsi pi nthu cü ntendha, isala nthu hatu wi yimecanglon kesa ju tsü nsathu yishü.” 19Israel nyi kekuli ssiketenthu na mathu keshüthangla hatu wi yimecanglon kesa ju nsathu yishüle kesa mathu kekiza wi mathu na agükeccü wi bendha le kesa chüya.
20Mosa nu Aaron manyi na mathu hie keben lina mathu bvü keten len wi wa manyi metu. 21Mathu na Mosa nu Aaron wi kiza, “Apvüwa na nshinyi mangwa sa khe tsü mudha, nu ma nshinyi metenmesha ben, kepaghenanye nshinyi na kadimiwa nu ma kekhu wi kedithu sapi ikhang nanmeghü thsüdha. Nshinyi na ikhang pathi thsüale njünnu pi mathu kwen wi chi cüdha.”
Mosa na Apvüwa wi Leben-nkagha Kekhi
22Tsaseng wi Mosa na kheneng wa Apvüwa wi khi, “Apvüwa, no mangkesa na n-nyithu miwi nkemehai saten nu? No mangkesa na hi kesun pi hewi chitheng nu? 23Hi n-nyan wina wa kadimiwa wi kekhi seng wi ma mathu miwi nmehai pfüpfü wadha. Nu no mangla sapi mathu kiqa chi ncüle.”
Currently Selected:
BVÜKESHHU 5: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
