BVÜKESHHU 4
4
Anyiza na Amankesa Kekhang pi Mosa kecü
1Tsaseng wi Mosa na Apvüwa luneng, “Isala keujüla Israel nyithu na hi n-nondi nu hi mangwa khi khe nkina, nu no ituwi nghole khithu hi khati sa nu?”
2Tsalina Apvüwa na ma keü, “Nkwen wi tsü mangwa senten nu?”
Ma luneng, “Akhhatssü le.”
3Apvüwa na khi, “Tsüpi ayyi wi cüchilo.” Mosa na tsüpi ayyi wi cüchi nan tsüna amaghang kesü ceng wa, nu ma tsü tuwi na bvüa. 4Apvüwa na Mosa wi khi, “Nkwen chang pi ma ghanu sonki yalo.” Tsalina Mosa na ma kwen chang pi tsü sonkiya nan tsüna kheneng akhhatssü kesü cengya. 5Apvüwa na khi, “Israel nyithu na hi Apvüwa, mathu baqhaithu Nyiza, Abraham, Isak, nu Jakob Nyizawa na ntuwi ghole kesa chüshiya thsüle kesalina no hati ha salo.”
6Apvüwa na kheneng Mosa wi khi, “Nkwen pi ngwomejuwa non wi chiyalo.” Mosa na tsü kina nu tsüti sa; nu ma kwen tsü khushi neng nan tsüna khuma pi aghola ti mikidhi sabenla. 7Tsaseng wi Apvüwa na khi, “Kheneng nkwen pi ngwomejuwa non wi chiyalo.” Ma tsüti saya; nu ma kwen khushi nan khilitsü tsüna mehaitsü nu ma gwo kepa wi ti sabenla. 8Apvüwa na khi, “Keujüla mathu no n-nondi nyelela amankesa atuwa ha nkina lethu mathu asakhenwa tsü nondi ben. 9Keujüla mathu amankesa keni ha wi lela no n-nondi, nu no mangwa khi khe nkinala lethu wa Nil Ghaku wi atssü pahan ssuya nu pi ayyi wi keshu chilo. Atssü tsüna ajjü ceng shaben.”
10Isala Mosa na khi, “Nyele, Apvüwa hi nkesun chi lalo. Hi ajüh khi kemehai nyi nye, nu no ccüneng keshagha wi lela hi tsüti npi saya. Hi imili dsaden nu ajüh ashina khi keten nyile.”
11Apvüwa na ma wi khi, “Thowa na anyi pang sachi nu? Thowa na ma sapi akhuna decu, ajühkhi meya, anyon nmu, nyelela muya thsü nu? Tsüna hi Apvüwa na nye kwe? 12Khili walo! Hi no kiqa pi khiya thsü, nu no mangwa nkhithu yishü khe kizaben.” 13Isala Mosa na luneng, “Nyele, Apvüwa, anyi kepa wi kesun chilo.”
14Apvüwa na Mosa miwi aghepvüya nu khi, “Ncünyuwa Levi nyi Aaron tsüna khati nu? Ma ajühkhi mehai kesa hi chüben. Ma no metule ghoden nu ma no mukeya wi ma nonghe ben. 15No mangwa khiten khe tsü pi ma kizaya mehai. Hi nshinyi qho kiqa pi khiya thsü nu nshinyi mangwa saten khe kizaben. 16Ma nkuti sala khipi anyithu kizaben. No Anyiza ti nu mangwa khilo khe pi ma kizaben. 17Nkhhatssü ha khuyalo, kepaghenanye no tsü sen nu amankesa kuliben.”
Mosa na Ejipt wi Keghoneng
18Tsaseng wi Mosa na kheneng ma myiwa Jethro wi wha nu khi, “Hi ya Ejipt wi ishilithu wi wha neng nu mathu hang benla nye khe ghangchi thsülo.” Jethro na anlo khinu Mosa wi “Kemehaiwa sa whalo” khi.
19Mosa na Midia wi keben wi Apvüwa na ma wi kiza, “Ejipt wi wha nenglo, kepaghenanye no pathile kesathu tsüdila shüdha.” 20Tsalina Mosa na ma wubvü nu ma tsathu pi gada miwi chiya nu ssisen Ejipt wi wha, Anyiza na ma kekiza ti akhhatssü tsü la khuya.
21Kheneng Apvüwa na Mosa wi kiza, “No khili Ejipt wi wha neng tendha, hi saya kemehai kekhang pi no cü ketheng tsüti kadimiwa tuwi amankesa tsüdi kuli chilo. Isala hi kadimiwa leben sapi dhu thsüaben nu ma anyithu ya bvü thsü nben. 22No hapi ma nkizathu yishü: Hi, Apvüwa na khiben, ‘Israel ha itsa tssütsewa. 23#Bvü 12.29. Hi no kizaben, itsa ya bvü thsülo isanu ma hi kinyi thsüle kesalina, isala no tsü hhaghe. Hi khili ntsa tssütsewa pathia tendha.’”
24Ejipt wi kewalen kemnanpen kesü wi Apvüwa na Mosa metu nu ma pathiale sa. 25-26Isanan ma wubvü Zippora na alon ketsu kesü khuya nu pi ma tsa hyuhan, nu tsü pi Mosa ccü#4.25-26: ccü: Pahan kemeshen “accü” ha kekuthi jüh kesü ma gwo tsü khibenkidhen. Ahyukahan keccüna ghena ma Mosa wi khi, “No itu wi ajjü wuba kesü le.” Tsalina Apvüwa na Mosa kahangli hangsha cüa.
27Apvüwa na Aaron wi kiza, “Ayyikeshü wi tsü wa Mosa metulo.” Tsalina ma kemetha yikha wi Mosa metule wa, nu ma Mosa metu keya wi ma kimang. 28Ciwi Mosa na Apvüwa na ma Ejipt wi wa nenglo kekiza jüh tsüdi khi pi Aaron kiza; Apvüwa na amankesa kulilo ahza pi ma cü ketheng cüki la khipi Aaron kiza. 29Tsalina Mosa nu Aaron manyi Ejipt wi wa nu Israel nyi ccülikesathu tsüdi saghuya. 30Aaron na Apvüwa na pi Mosa kekiza tsüdi khipi mathu kiza, nu Mosa na anyithu tuwi amankesa tsüdi kuli chi. 31Mathu na nondiya, nu Apvüwa na mathu wi gho nu mathu gükeccü muyadha le kesa zakeya wi mathu na kukedu nu kinyi.
Currently Selected:
BVÜKESHHU 4: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
