BVÜKESHHU 3
3
Anyiza Na Mosa Cikeya
1Ghanan kesü wi Mosa na ma myiwa Jethro, Midia nyi keqhaikediwa khaghaneni nu anenithu hieden, ma anenithu ssisen ayyikeshü bvüdhi sen kemetha yikha Sinai wi tsü gho. 2#Kek 7.30-34. Ciwi Apvüwa nyilowa na aghangbhon wi nnikeqhe wina ma tuwi gho. Mosa na aghangbhon wi anniqhe ben isala tsü nmecangla keben muya. 3Mosa na ma ketanla khi, “Aghangbhon katsü mangkesa na nmecangla ben khe hi ma kete wi whanu ghang chiden.”
4Apvüwa na Mosa na tetsaki gho keten mukeya wi aghangbhon wina ma cichi nu khi, “Mosa! Mosa!”
Ma luneng, “Hi hewi benle.”
5Anyiza na khi, “Tetsaki ngho lalo, nccüguwen khushilo, kepaghenanye no kemetha pen wi nganben. 6Hi nbaqhai Abraham, Isak, nu Jakob Nyizawa tsüle.” Tsalina Mosa na ma mmi shangya, kepaghenanye ma Anyiza tsü ghang messi kesalina.
7Tsaseng wi Apvüwa na khi, “Hi inyithu na Ejipt wi khatila agüccü ben khe muyadha, nu nssümagha ccülikesathu kwen wi mathu hangsha cülo kiqai hhai zayadha. Hi mathu ketizenkesa tsüdi chüyadha. 8Tsalina hi Ejipt nyithu kwen wina mathu hangshaya nu Ejipt wina mathu ssi wa ayyi kemehai apen kemeza, ayyi kecca nu kinyan; Kanaan, Hitti, Amor, Periz, Hivi, nu Jebus nyithu na khili hang keben witsü chi cüle ghodha. 9Hi ntsakhiwa inyithu kiqai hhai zayadha, nu Ejipt nyi na khatila mathu metenmesha ben khe muben. 10Hi khili no kesun pi Ejipt kadimiwa wi chiben nu no ma diyyiwa wina inyithu ssi shhu thsüle kesalina.”
11Isala Mosa na Anyiza wi khi, “Hi mangla nkenye nyi. Hi khatinu kadimiwa tuwi wa nu Ejipt wina Israel nyithu ssi shhuya mehai nu?”
12Anyiza na luneng, “Hi no ssiden, nu no Ejipt wina anyithu ssi shhugho lethu nthu na ayikha ha wi hi kinyiben, tsüna hi no kesun chile kesa chüza saben.”
13 #
Bvü 6.2-3. Isala Mosa na khineng, “Hi wa Israel nyithu wi ‘Nthu baqhaithu Nyiza na hi kesun pi nthu wi chibenle’ khithu mathu na hi wi keüben, ‘Ma nyan thowa nu?’ Tsalina hi mathu wi mangwa le khi nu?”
14 #
Ccü 1.4,8. Anyiza na khi, “Hi anuphanla hi. No mathu wi ‘Hi#3.14: Hi anuphan hi... Hi; nyelela Hi thowa khe anuphanla hi tsü sabenden. Ibri jüh wi ‘Hi’ kesa tsüna Yahweh (nyelela Jehovah) nyan, ha wi zhükemilikechi na tsüpi ‘Apvüwa’ sa theng le khi ketenwa’ tsüna hi kesun pi nthu wi chi benle nkhithu yishü. 15Israel nyithu wi hi Apvüwa, mathu baqhaithu Nyiza, Abraham, Isak, nu Jakob Nyizawa na no kesun pi mathu wi chi benle kizalo. Hawa ha anuphanla inyan; abvüye ghaketen tsüdi wila hati hi ciden. 16Wala Israel nyi accülikesathu saghuya nu mathu wi hi Apvüwa, mathu baqhaithu Nyiza, Abraham, Isak, nu Jakob Nyizawa na ntuwi ghole mathu kizalo. Hi mathu wi ghonu Ejipt nyi na mathu miwi mangwa saben khe hi muyadhale kesa kizalo. 17Hi Ejipt wi mathu agüccü keben wina ssi shhula ayyi kecca nu kinyan — Kanaan, Hitti, Amor, Periz, Hivi, nu Jebus nyithu yyi wi tsü chi cüle cenyadha.
18“Inyithu na no mangwa khi khe kinaben. Tsaseng wi no Israel nyi accülikesathu gweghe Ejipt kadimiwa wi wa nu ma wi ha nkhithu yishü, ‘Apvüwa, Ibri nyi Nyizawa na ma ketanla ma pi ikhang ccücale. Ikhang ya ghanan kecheng alentsen wa ayyikeshü wi ahhansha sapi Apvüwa ithu Nyiza cüya thsülo.’ 19Ma meten pi nsa thsü lethu Ejipt kadimiwa na khiela nthu ya tsüti sa thsü nben kesa hi chüben. 20Isala hi kekhang sen nu Ejipt nyi metenmesha nu ciwi amankesa tsüdi sa chiben. Tsaseng wi ccüna ma nthu ya wa thsüben.
21 #
Bvü 12.35,36 “Hi Ejipt nyithu sapi nthu nyuwakü thsüben, isanu inyithu na kebvü wi mathu kemissü bvü thsü nben. 22Israel nyi nza tsüdila wa ma jenphon Ejipt nyithu nu Ejipt nyi nza ma jjen wi hang ketenthu wi athsümeni, suna nu rükatssü khieben. Israel nyithu na tsüthu pi mathu tsangathu pvü thsü nu Ejipt nyithu keben-keyeng pvü bvüaben.”
Currently Selected:
BVÜKESHHU 3: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.